1. Ngano luzolo lwa Yehova lumbu ti ni lwe?

 NZAMBI zololo ti nsangu za mbote za Timfumu basamuna zo ha mutoto wa mukaka. (Mak. 13:10; 1 Tim. 2:3, 4) Tisalu tia Yehova tiena, mpe mu bungu ti nguria mfunu tiena, wasola Mwana’andi wu katomono zolo ngatu katwarisa tio. Tulendi bâ na lukwikulu ti mu lenda die na Yezu dia twarisa, tisalu tia samuna mbo tilungana buna bu zololo wo Yehova ntete nsuka yatula.​—Mat. 24:14.

2. Nti tuzonzela mu timoko ti?

² Mu timoko ti, mbo tumona ka bwe Yezu kasarilaka ‘ngamba’andi ya kwikama na ya ndwenga,’ mu hana bidia bia timpeve na mu kubika bisari biandi mu bungu dia tisalu tia tinene tia samuna tialembo toko salama mu nza. (Mat. 24:45) Mbo tumona mpe ka nti muna muntu mu beto kalendi sa mu yika Yezu moko na ngamba’andi ya kwikama.

3. Ntia lutumu Yezu bamuhana?

³ Yezu mbo katwarisaka tisalu tia samuna. Ngano bwe tulendi bêla na lukwikulu mu musamu wo? Ntangu fioti ntete kanaka ku mazulu, Yezu wabwabana na milongoki miandi miakaka mia kwikama ku mongo wa Galile. Wabatêla ti: ‘Timfumu tiatiansoni tiahanu kwe meno, ku zulu na ha nsi.’ Mpe ha manima, wavutu ba têla ebu: ‘Yendeno mu mutoto wa mukaka, kubikeno milongoki.’ (Mat. 28:18, 19) Buna, mu timfumu tia baka Yezu, mwe na lutumu lwa twarisa tisalu tia samuna.

4. Mu bungu dia nti tulendi bêla na lukwikulu ti Yezu mbo kata tatamana mu twarisa tisalu tia samuna?

 ⁴ Yezu watâ ti tisalu tia samuna na tia kubika milongoki mbo baketi tia sala ‘mu mutoto wa mukaka,’ mpe mbo kaketi bâ na milongoki miandi ‘bilumbu biabiansoni tii ku nsuka ya nza.’ (Mat. 28:20) Misamu mio mbo mitomo songelaka ti tisalu tia samuna mbo tiaketi tatamana mu lutumu lwa Yezu tii mu bilumbu bia beto.

5. Ntia dema die neto mu ndungananu ya Mikunga 110:3?

⁵ Yezu keri’â na lwaka ko ti bisari mbo biaketi bâ bike mu ntangu ya mansukina. Wazaba ti mbikululu ya titsoniki tia mikunga mbo yaketi lungana. Mbo yitâka ti: “Kanda diaku mbo ditihana mu luzolo lwa mutima mu tilumbu tia mukangu wa binwani biaku.” (Mik. 110:3, NWT) Tala ti nsangu za mbote samunaka, mbo yikaka Yezu na ngamba ya kwikama moko, mpe mbo hanaka lubakusu mu bungu dia ndungananu ya mbikululu yo. Tisalu ku matu tita kwenda, kâ misamu mia mpasi mie kô mi tulendi telamana.

6. Wumosi wa misamu mia mpasi mi bwabanaka na bisamuni bia Timfumu lumbu ti ni we?

⁶ Wumosi wa misamu mia mpasi mi bwabanaka na bisamuni bia Timfumu, ni nkwamusu. Ba-aposta, mfumu za mabundu, na bantu basaka politike bayizi sa ti bantu babîngi bamwinaka tisalu tieto mu mpila ya mbi. Tala ti bantu ba kanda dieto, ndiku zeto na bantu ba tusalaka na bo, babawisiri mu mpila yo, balendi tu sa tiya ngatu tabika mu sarila Yehova peleko tabika mu samuna. Mu nsi zakaka, mbo batukwamisaka bu batutâka bunkuta, bu batukanikinaka misamu mia mbi, bu batukangaka, kâ mpe bu batutûlaka ku boloko. Ka tuyitukuku’â ko mu misamu mio. Yezu wabikula ti: ‘Makanda mamansoni mbo malubela mu bungu dia nkumbu’ani.’ (Mat. 24:9) Buna bu batubongelaka na diki dia mpila yo, mbo wusongelaka ti Yehova beto katambulaka. (Mat. 5:11, 12) Satana tumaka nkwamusu zo. Kâ kena buma ko ha matu ma Yezu! Na lubakusu lwa Yezu, bantu ba makanda mamansoni mbo bawâka nsangu za mbote. Tataluzuleno bidimbu.

7. Ntia misamu mitariri Nzabukusu 14:6, 7 mita lungana?

⁷ Bu twena bisamuni, musamu wakaka wa mpasi wu tubwabanaka na wo, ni wutariri luswaswanu lwa mazu. Mu Nzabukusu yi kahana kwe ntumwa Za, Yezu watâ ti mu ntangu yi ya beto nsangu za mbote mbo zaketi nunga musamu wo. (Tanga Nzabukusu 14:6, 7.) Ngano mu bwe? Mbo tuhanaka bweso kwe bantu babingi mu hana mvutu mu nsangu za Timfumu zi tubasamuninaka. Lumbu ti, bantu ba mu nza ya mukaka balendi tanga mikanda misikamanaka mu Bibila mu site’eto ya jw.org mu bungu ti mu mazu yôka 1 000 yena! Timvuka titwarisaka tiayizi hana nzila ya bangula buku dia Bâ mu nsayi ntangu zazansoni! mu mazu yôka 700; die buku dia nguri di tusarilaka mu longesa bantu! Bayizi dukisa mpe bidia bia timpeve mu video na mu braille mu bungu dia bantu balembo wâka na balembo monaka. Mbo tumonaka mbikululu za Bibila zita lungana. Bantu ba “mazu mamansoni ma makanda,” mbo balongokaka mu zonza “zu dia verela” dia matieleka ma Bibila. (Zka. 8:23; Sof. 3:9) Misamu mio miamiansoni mbo milunganaka mu lutwalusu lwa lunga lwa Yezu Kristo.

8. Ngano tisalu tieto tia samuna ntia ndandu tieka nata tii lumbu ti?

⁸ Lumbu ti, bantu yôka 8 000 000 bê mu nsi na teritware 240 bayizi vukana na organizasio ya Yehova, mpe mivu miamiansoni mafunda ma bantu makwizi batusuku! Kâ biyôkele lutangu mu mfunu, ni bifu bia timpeve,  “timuntu tia môna,” biayizi bâ na milongoki mio mia môna. (Kol. 3:8-10) Babingi bayizi bika bunsuza, miangu, mabanza ma mbi, mpe masîka ma hata diawu. Mbikululu ye mu Izaya 2:4 ya yita lungana; mbo yitâka ti: ‘Ka bavutu’â longoka muzingu ko.’ Bu tusarilaka ngolo mu lwata timuntu tia môna, mbo tubendaka bantu mu organizasio ya Nzambi, mpe mbo tusongelaka ti ntwarisi’eto Yezu Kristo tukwe landi. (Za 13:35; 1 Pi. 2:12) Mu bungu dia nti misamu mio miyilamanaka? Mu bungu ti Yezu mbo katuhanaka lubakusu lwe neto nsatu.

9. Tintwari na Matie 24:45-47, ntia musamu babikula mu bungu dia ntangu ya mansukina?

⁹ Tanga Matie 24:45-47. Yezu wabikula ti mu ntangu ya mansukina, mbo kaketi noma “ngamba ya kwikama na ya ndwenga” mu hana bidia bia timpeve. Buna mbo tukêlaka ti ngamba yo yasala bwabwingi mu bilumbu bi. Mpe misamu ni bo miyôkelaka. Ntwarisi’eto wasarila tikunku tia fioti tia babakala ba tumbu mu hana bidia bia timpeve kwe kanda dia Nzambi na kwe bô batambulaka Zu diandi “mu ntangu yifwanakane.” Babakala bo ka batibongelaka ntiana mfumu za timinu tia bampwana’awu ko. (2 Kor. 1:24) Kâ, mbo babakulaka ti ni Yezu Kristo we Mfumu mpe ntwarisi ya kanda diandi.​—Iza. 55:4.

10. Mu mabuku mamansoni ma basongele mu tifwani, ntia buku diakubakisa mu kwikila ti fweti sarila Yehova?

¹⁰ Tûka 1919, ngamba ya kwikama yakubika mikanda miamingi miahana bweso kwe bantu beri zoloko mu wâ Zu dia Nzambi mu longoka matieleka ma Bibila mu mbala’awu ya ntete. Mu 1921, ngamba ya kwikama yakubika buku dia La Harpe de Dieu mu bakisa bantu beri zoloko mu longoka matieleka ma nguri ma Bibila. Ntangu bu yeri kwe yôke, mikanda miakaka miayizi duka. Ngano ntia  mukanda wakubakisa mu zaba na mu zolo Tata’eto dia ku mazulu? Ngano ni buku dia “Que Dieu soit reconnu pour vrai !,” La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Qu’enseigne réellement la Bible ?, Ngano Bibila nti ditulongesaka?, peleko buku dia Bâ mu nsayi ntangu zazansoni! diadukiri ka ntama ko. Mabuku mo mamansoni badukisa mo mu tu bakisa mu kubika milongoki, mpe maduka mu ntangu ya fwanakana.

11. Mu bungu dia nti we mfunu ti beto bansoni tabaka bidia bia timpeve?

¹¹ Bantu babatikiri mu longoka Bibila ka ntama ko, ka bawu’â ko kwa bê na nsatu ya yika ndilu luzabu lwawu mu Yehova na mu Bibila. Beto bansoni tufweti sila bo. Ntumwa Paulo watsoneka ti: ‘Bantu ba yela madia ma dema ma bawu.’ Wavutu tâ ti tamana sarilaka misamu mi tulongoka mu Bibila mbo wutubakisa mu ‘swasikisa mbote na mbi.’ (Ebr. 5:14) Mu ntangu zi za mpasi bantu bu bayikiri na ndiatulu ya nkatika ya mbi, wulendi bâ musamu wa nguria wa mpasi mu sarila mitieno mia Yehova. Kâ Yezu mbo kasaka miamiansoni ngatu tabaka ngolo ze neto nsatu mu nzila ya madia ma timpeve. Madia mo ma timpeve mbo matûkaka mu Zu dia Nzambi, Bibila. Ngamba ya kwikama mbo yikubikaka mpe mbo yikabaka bidia bio mu lutumu lwa Yezu.

12. Ntiana Yezu, bwe tahanina nkembo mu nkumbu ya Nzambi?

¹² Ntiana Yezu, tayizi hana nkumbu ya Nzambi mukembo wufwanakane. (Za 17:6, 26) Mu tifwani, mu 1931 tayizi lwata nkumbu ya Mbangi za Yehova yitûkaka mu Bibila, mpe mbo tweri zoloko ti batuzabila mu nkumbu ya Tata’eto dia ku mazulu. (Iza. 43:10-12) Tûka ngonda ya octobre ya muvu wo, nkumbu ya nzambi mbo yidukaka ha tinima tia  ntete tia Nzo ya Zangama ya Munkengi. Mpe, La Bible. Traduction du monde nouveau yakarisa nkumbu ya Nzambi ha bibuka yi yeri mu Bibila. Diangana musamu wo wa swaswana wena na mabundu ma bantu, batâka ti Bakristo bena bakatula nkumbu ya Yehova mu mbangululu zawu zazingi za Bibila!

13. Nti bituhanaka lukwikulu ti Yezu mbo kasarilaka “ngamba ya kwikama na ya ndwenga” lumbu ti? (Za 6:68)

¹³ Mu nzila ya “ngamba ya kwikama na ya ndwenga,” Yezu wakubika organizasio ya nzitukulu ha mototo mu simbirila nsambululu ya verela. Ngano bwe bongelaka organizasio yo? Kampe, mbo ta banza misamu mia tâ ntumwa Piere, watâ kwe Yezu ti: ‘Kwe nani tukwenda? Ni nge we na misamu mia luzingu lwa mankululu.’ (Za 6:68) Ngano kwe taketi bâ tala ti ka tayizi’â kota mu organizasio ya Yehova ko? Mu nzila ya organizasio yo, Kristo mbo kasaka miamiansoni ngatu tabaka bima bie neto nsatu mu tatamana mu bâ ba kwikama kwe Nzambi. Mbo katukubikaka mpe ngatu tasala tisalu tia samuna na ngolo zazansoni. Musamu wakaka, mbo katubakisaka mpe mu lwata ‘timuntu tia môna,’ ngatu tatâ Yehova nsayi.​—Efz. 4:24.

14. Ntia ndandu wayizi baka mu ntangu ya coronavirus mu bungu ti mu organizasio ya Yehova wena?

¹⁴ Yezu mbo kahanaka lutwalusu lwa ndwenga mu ntangu za mpasi. Ndandu za lutwalusu lo zayizi moneka mu ntangu coronavirus yabatikiri. Bantu babingi mu nza babele lembo zabaka ka bwe baketi sa, kâ Yezu wasiri ti tabaka malongi ma delakana ngatu tatatamana mu tikengerela. Batutindisi mu lwataka cache-nez tala ti ha lunguiri bantu twena, mpe mu lembo kwe bundakane na bantu. Babamburi  kwe bakuluntu mu baka nsangu za mpangi zazansoni za mu timvuka na mu zaba nsatu zawu za tinsuni na za timpeve (Iza. 32:1, 2) Tayizi baka mpe lutwalusu na lutindusu lwakaka mu nzila ya nsangu za Timvuka titwarisaka.

15. Ntia lutwalusu tabakiri mu mpila ya sila tukutakanu na ya samunina mu ntangu ya coronavirus, mpe ntia ndandu zamonekene?

¹⁵ Mu ntangu ya coronavirus, tayizi baka mpe lutwalusu lwa delakana mu mpila ya silaka tukutakanu twa timvuka na ya samunina. Ho nkatika bendo, tayizi batika mu saka tukutakanu twa timvuka na tukutakanu twa tunene twa Bakristo mu nzila ya vidéoconférence. Tayizi batika mpe mu yôkesaka ntangu yayingi mu samuna mu nzila ya mikanda na ya telefone. Yehova wasakumuni ngolo zeto. Filiale zazingi zayizi hana rapore mu bungu dia lutangu lwa bisamuni lwakuriri. Diangana, bantu babingi bayizi mona misamu mitindisaka mu ntangu ya coronavirus.​—Tala kaku “ Yehova mbo kasakumunaka tisalu tieto tia samuna.”

16. Mu ntia musamu tulendi bêla na lukwikulu?

¹⁶ Kampe bantu bakaka mbo babele banzaka ti organizasio ya Yehova yatomono yôkesa ndilu mu mpila yi basiriri keba mu ntangu ya coronavirus. Kâ ha manima, wayizi moneka ti lutwalusu lu tabakiri lwa ndwenga lwabêle. (Mat. 11:19) Mpe bu tudimbitilaka mu mpila Yezu yi katwarisilaka kanda diandi, mbo tubâka na lukwikulu ti musamu ni musamu wututurila ku matu, Yehova na Mwana’andi wa luzolo mbo babâ neto.​—Tanga Bahebre 13:5, 6.

17. Bwe monaka bu salaka mu lutwalusu lwa Yezu?

¹⁷ Diangana lusakumunu lwena mu sala mu lutwalusu lwa Yezu! Mu organizasio yilembolo ya hambana mu bikulu, mu mahata, na mu mazu twena. Mbo tutomo diaka bubote mu timpeve, mpe bisalulu bia fwanana bie neto mu sala tisalu tia samuna. Muna muntu mu beto, mbo kabakaka ndongosolo yimubakisaka mu lwata timuntu tia môna, mpe mbo batulongesaka mu zolosono beto na beto. Diangana misamu miamingi mie neto mita sa ti tatilona mu bungu ti ni Yezu we ntwarisi’eto!