Nicolas na Céline bayizi bwabana na musamu wa mpasi. Bayizi tambula dema dia ba hana filiale ya France mu kwizi soba timvuka. Bawu batêle: “Ku mbatukulu nkatika nsayi yabâ neto, kâ tayizi batika mu banza ndiku zeto zasâla. Ka tweri’â nkatika penepene ko na mpangi zeto za timvuka tia môna.” a Mu bungu ti wulendi bâ musamu wa mpasi, bwe lendi bêla mu nsayi mpe lendi lendela mu timvuka tiaku tia môna? Bwe mpangi zakaka zilendi ku bakisila? Mpe ntia tusakumunu twa timpeve lendi baka mpe lendi hana mu timvuka tiaku tia môna?

MITIENO MIYÀ MILENDI KU BAKISA MU TELAMANA MPASI ZO

1. Sikirila Yehova. (Mik. 37:5) Kazumi, bâka ku Japon wayizi bika timvuka ti kabâ tûka mvula 20 bu bayizi soba tisalu tia bakala diandi. Bwe kayizi “bikila ti Yehova kayirika nzila’[andi]”? Yandi têle: “Nayizi ziburila Yehova mutima’ani mu bungu dia mbunkuta bwa bâ nani, bukaka na lwaka lu ndieri monaka. Ntangu zazansoni yi ndieri silaka bo, Yandi wakungana ngolo za bâ nani nsatu.”

Bwe lendi kurisila lukwikulu lwaku mu Yehova? Ntiana kwa muti we na nsatu mamba, na fumier ya mutoto mu kula, tufweti dikila mpe timinu tieto ngatu tia kula. Nicolas, wu tutokolo zonzelaka wayizi bakula ti, dimbitila mu bifwani ntiana bia Abrahame, Yezu na Paulo—babakala bayizi hombesa bima biabingi mu sarila luzolo lwa Yehova—kwayizi mu bakisa mu yika ngolo lukwikulu lwandi mu lubakusu lwa Yehova. Tala ti longokele Bibila ntangu zazansoni, wulendi ku bakisa mu telamana nsombolo ni nsombolo za luzingu lwaku, mpe lendi kwizi longoka misamu miamingi milendi sarila mu tindisa mpangi zaku za timvuka tia môna.

 2. Bika mu fwanakasa timvuka tiaku tia ntama na timvuka tiaku tia môna. (Ekl. 7:10) Jules wayizi bwabana na musamu wa mpasi wutariri tikulu bu kakatuka ku Bénin mu kwenda ku États-Unis. Yandi têle ti: “Nayizi mona ti wafwanana ti nazonzela luzingu lwani kwe muna muntu wu ndieri bwabanaka na wo.” Mu bungu ti misamu mia swaswana mieri na mio mi kayukunu, wayizi batika mu diokaka mpangi za timvuka. Kâ bu kayizi tomo zaba mpangi zandi, wayizi soba mabanza. Yandi têle: “Mbenzi ti kuma ni kuma ku tubâ ha mutoto, bantu mpila mosi bena. Mu mpila za swaswana kwa bazonzelaka mpe bayirikilaka misamu. Nkatika mfunu wena mu tambula bantu buna bu bena.” Buna tufweti sa keba mu lembo fwanakasa misamu mia timvuka tieto tia ntama. Ntiana bwatâ Anne-Lise, mpangi yimosi ya yikento ye mupasuri-nzila: “Ka nayizi’â soba mbuka ko mu kwizi vutu bwabana na misamu mi nasisa. Nayizi soba mbuka mu kwizi longoka misamu mia môna.”

Bakuluntu mpe ka bafweti’â bafwanakasa timvuka tiawu tia môna ko na timvuka tiawu tia ntama. Ka wena ko ti mu bungu ti mpangi zeto za timvuka tia môna mu mpila ya swaswana bayirikilaka misamu, wuzololo tâ ti ntangu zazansoni mu mpila ya mbi kwa bayirikilaka misamu. Mbo tusarila ndwenga tala ti tudingiri mu toko zaba misamu mita zungirila mbuka yi twena ntete tahana mabanza meto. (Ekl. 3:​1, 7b) Bubote bwena mu longesa mpangi zeto mu tifwani tieto tia mbote kani tabatuma mu ngolo mu tambula mabanza meto.—2 Kor. 1:24.

3. Bâ na tisalu tiatingi mu timvuka tiaku tia môna. (Flp. 1:27) Ntangu na ngolo zidinganaka mu soba mbuka, kâ mfunu wena mu kulu kwenda kutukutakanu twa timvuka tiaku tia môna ku Nzo ya Nsambululu. Mpangi za timvuka tiaku tia môna nsatu ye nawu ya vulu ku monaka ngatu lwabâ penepene mpe babâ na lenda dia ku bakisa. Lucinda, wasoba mbuka na bala bandi ba bole babakento mu kwenda ku hata dia dinene dia Afrique du Sud, têle: “Ndiku zani zakundwengesa mu tomo bâ penepene na bantu ba timvuka tiani, mu sala na bampangi mu tisalu tia samuna, na mu hanaka mvutu ku tukutakanu. Tayizi tâ mpe kwe bampangi ti balendi sarila nzo’eto mu bungu dia tukutakanu twa tisalu tia samuna.”

“Sala tintwari” mu bisalu bia timvuka na bampangi ba timvuka tiaku tia môna mbo wukubakisa mu titindisa na mu tindisa bantu bakaka. Anne-Lise, wu tutokolo zonzelaka, wayizi baka lutindisu lwa bakuluntu beri mu lombaka mu yêla mu samuna na bantu babansoni. Ntia ndandu zamoneka? Yandi têle: “Nayizi kulu bakula ti mpila ya mbote yeri ngatu natomo bâ mu timvuka.” Musamu wakaka, tala ti tomono tihana mu bisalu bia timvuka, ntiana sa bunkete mu Nzo ya Nsambululu mbo wusongela ti bwawu bu weka timona mu timvuka tiaku. Bu kwizi tomo tihana, bampangi mbo bakulu yukunu na nge mpe mbo kwizi mona ti mu kanda diaku wena.

4. Bâ na ndiku za môna. (2 Kor. 6:​11-13) Bu tusongelaka ti bantu bakaka tukipaka, mpila ya  mbote yena yabâ na ndiku, buna ntete lukutakanu na ha manima ma lukutakanu sârisa ntangu ya moka na bampangi na ya longoka mu ba zaba. Sarila ngolo mu zaba nkumbu zawu. Bambukila nkumbu za bantu, bâ na ndiambu mpe bika ti bantu biza kwe nge, mbo wusa ti bantu babâ penepene na nge mpe ntembe kâni mbo wukubakisa mu bâ na bindiku bia môna bia mbote.

Kani wadinga mu moneka ntiana muntu wakaka ngatu bakutambula, bika ti ndiku zaku za môna za tomo zaba timuntu tiaku. Sa ntiana buta tâ Lucinda: “Bwawu bu bindiku bia mbote bie neto mu bungu ti tayizi bonga nzengolo ya tikisa bantu bakaka kwe beto.”

“BWANASANAKENO BENO NA BENO”

Kota mu Nzo ya Nsambululu ye na bantu babingi ba nzenza kulendi tulumuna lwaka kwe bantu bakaka. Buna bwe tulendi bakisila bantu bata kwiza ba môna mu timvuka tieto? Ntumwa Paulo watutindisa: “Bwanasanakeno beno na beno ntiana Kristo bu kalubwana.” (Rom. 15:​7, NWT) Bu bakwe landi tifwani tia Kristo, bakuluntu balendi bakisa bô bata kwiza ba môna mu mona ti bawu bata bwana mu timvuka. (Tala kaku tia “ Nti bilendi bakisa bantu bata soba mbuka.”) Kâ, bantu babansoni ba timvuka, na bala mpe, balendi kwizi bakisa bantu ba môna mu kwizi bâ na ndiku za môna.

Bwana bantu kuzololo tâ songela ndiambu, kâ wulendi zolo tâ mpe hana lubakusu lu fwanane. Mu tifwani, mpangi yimosi ya yikento ya sarila ntangu’andi mu bakisa mpangi yakaka ya yikento yayiza ka ntama ko mu tizunga tiandi mu sa vizite ya hata na mu zaba bwe kalendi sarila transport. Musamu wa yirika mpangi ya yikento watomo simba mutima wa mpangi yo ya môna mpe wayizi mu bakisa mu yukunu na hata.

BWESO BWA KULA MU TIMPEVE

Konko bu dikwe yele, mukanda’andi mbala zazingi wuyubukaka ntete kabâ na lenda dia pulumuka. Mpila mosi mpe, bu tusobaka timvuka tufweti katula bunkuta bwabwansoni bulendi tu kabakasa mu  tomo tihana mu tisalu tia Yehova. Nicolas na Céline batêle ti: “Soba mbuka ya bêla formasio ya mbote yena. Kwizi yukunu na bantu ba môna, kâ mpe na bizunga bia swaswana kwayizi tu bakisa mu kurisa bifu bia mbote bia môna.” Jean-Charles, wu tuzonzeleke ku mbatukulu, zonzele ndandu zi kabaka yandi na kanda diandi: “Mu timvuka tieto tia môna, bala beto bayizi kula mu timpeve mpe bayizi bâ penepene na Yehova. Ha manima ma mwa ngonda kwa, mwana’eto wa wukento wayizi batika mu saka devware ku lukutakanu lwe ha kati dia lumingu, mpe mwana’eto wa bakala wayizi bâ tisamuni tilembolo tia batusu.”

Nti lendi sa tala ti ka wena na lenda ko dia kwenda ku mbuka ye na nsatu lubakusu lwalwingi? Buna lendi sa ti timvuka tiaku tia ntama tia moneka tia môna bu sarila malongi ma bata zonzela mu mutu-diambu wu. Bukwe sikiriri Yehova, lendi tomo tihana mu bisalu bia timvuka bu kubika misamu mu sala tintwari na bampangi mu tisalu tia samuna, bu bâ na bindiku bia môna, peleko bu yika ngolo bindiku bitekele. Kampe lendi dinga mu hana lubakusu lu fwanane kwe bantu ba môna, peleko kwe bô bê na nsatu lubakusu. Mu bungu ti luzolo tidimbu tiena tia Bakristo ba matieleka, ntembe kâni lulendi ku bakisa mu kula mu timpeve. (Za 13:35) Lendi bâ na lukwikulu ti ‘mikayulu ni mia mpila yo minataka nsayi kwe Nzambi.’—Ebr. 13:16.

Ntono misamu mia mpasi, Bakristo babingi balenda mu yukunu na timvuka tia môna—nge mpe lendi lenda! Anne-Lise têle: “Soba timvuka kwakumbakisa mu tomo zibula mutima’ani.” Bwawu bu Kazumi lukwikulu lwe nandi ti bu soba mbuka “Yehova lendi ku bakisa mu mpila yi walembo toko banza.” Bwe tulendi tâ mu Jules? Yandi têle: “Bindiku bi nayizi bâ na bio biakumbakisa mu mona ti ku nzo’ani ndiena. Bwawu bu mweni ti nkatika penepene ndiena na timvuka tiani mpe wulendi kwizi bâ mpasi kwe meno mu sa tia bika.”