1. Nti tufweti sa mu vuka mu tilumbu tia Yehova?

 BIBILA bu dizonzelaka ‘tilumbu tia Yehova,’ mbo dizolo zonzelaka ntangu Yehova yi kafukisa mbeni zandi mpe yi kasenda kanda diandi. Mu ntama, ntangu zakaka Yehova mbo keri sembaka makanda makaka. (Iza. 13:1, 6; Ezk. 13:5; Sof. 1:8) Mu ntangu yi ya beto, ‘tilumbu tia Yehova’ mbo tibatika mu ntangu mfumu za politike zifukisa Babilone ya Yinene, mpe mbo timanisina mu muzingu wa Armagedo. Mu vuka mu ‘tilumbu’ tio, tufweti kubama bwawu bu. Yezu watulongesa ti tufweti bâ ba kubama mu bungu dia “mpasi ziyôkele,” wuzololo tâ tufweti tatamana mu sila bo.—Mat. 24:21; Like 12:40.

2. Ntia ndandu tulendi baka mu 1 Bisi-Tesalonike?

² Mu mukanda’andi wa ntete kwe Bisi-Tesalonike, ntumwa Paulo wasarila bifwani mu bakisa Bakristo mu kubama mu bungu dia tilumbu tia tinene tia mfundusu tia Yehova. Paulo wazaba ti tilumbu tia Yehova ka tiaketi’â tula ko ho nkatika bendo. (2 Tes. 2:1-3) Kâ, watindisa mpangi zandi mu bâ ba kubama mu bungu dia tilumbu tio ntiana tia titula mbazi, beto mpe tulendi sarila malongi mo. Tataluzuleno mbangululu ya misamu emi: 1) bwe tilumbu tia Yehova tikwizila, 2) nani lembo vuka mu tilumbu tio, mpe 3) bwe tulendi kubamana mu vuka.

3. Bwe tilumbu tia Yehova tikwizila ntiana mwivi? (Tala mpe tifwani.)

³ ‘Ntiana bu kwizaka mwivi mu mpimpa.’ (1 Tes. 5:2) Tiawu ti ni tifwani tia ntete mu bifwani bia bitatu bi basarila mu zonzela  nkwizulu ya tilumbu tia Yehova. Mivi mbo mivulu labaka mu mpimpa mu ntangu bantu yi balembo kêlaka. Tilumbu tia Yehova mpe mbo tikwiza mu ta-pulukusu, mu ntangu bantu babîngi yi balembo tia kêla. Bakristo ba matieleka mpe balendi yituku mu mpila misamu yi miyôkela mu ntinu. Kâ ka twena ntiana bankwa-mbi ko, beto ka tufuka ko.

4. Mu bwe tilumbu tia Yehova tifwanakanaka na misongo mia zimi?

⁴ ‘Ntiana bu bakilaka misongo mia mukento we na zimi.’ (1 Tes. 5:3) Mukento we na zimi ka wulendi’â watomo zaba ko buna bufwanane ka ntia tilumbu kabuta. Kâ, ka bâka na ntembe ko ti mbo kabuta. Ntangu yo mbo yitulaka mu ta-pulukusu, mpasi mbo zibâka ngolo, mpe ka lendi’â kakabakasa yo ko. Mpila mosi mpe, ka tuzebi’â tilumbu na ntangu yi batika tilumbu tia Yehova ko. Kâ, lukwikulu lwe neto ti mbo tikwiza, mpe mfundusu ya Nzambi mu bungu dia bankwa-mbi mbo yikwiza mu ta-pulukusu mpe ka badioka yo ko.

5. Mu bwe mpasi ziyôkele zifwanakanaka na ntielolo bwisi?

⁵ Ntiana ntielolo bwisi. Tifwani tia ntatu tia Paulo mbo tivutu zonzelaka mivi mi labaka mu mpimpa. Kâ bwawu bu, Paulo kampe fwanakase tilumbu tia Yehova na ntielolo bwisi. (1 Tes. 5:4) Mivi mikwizi labaka mu mpimpa milendi lembo bakula ti ntangu yôka yita yôka. Ntielolo bwisi yilendi ba bandakasa mpe balendi ba baka. Mpasi ziyôkele mpe mbo zibandakasa bantu bo, ntiana mivi bata tatamana ku buyongongo mu nsalulu zawu zilembo tâka Nzambi nsayi. Kâ beto ka twena ntiana bawu ko, tulendi bâ ba kubama bu tulosa ndiatulu yilembo tâka Yehova nsayi mpe bu tusarila mbote, buderede na butieleka. (Efz. 5:8-12) Ha manima Paulo wavutu sarila  bifwani biole bieri mpila mosi mu zonzela bô baketi lembo vuka.

6. Mu ntia mpila bantu babîngi babwilaka tolo? (1 Bisi-tesalonike 5:6, 7)

⁶ ‘Bô ba bwaka tolo.’ (Tanga 1 Bisi-Tesalonike 5:6, 7.) Paulo wafwanakasa bô balembo vuka mu tilumbu tia Yehova na bantu babwaka tolo. Ka bazebi’â mio mita yôka ko peleko ntangu yita yôka. Buna, ka bazabaka ko mu ntangu yi salamaka tima tia mfunu, mpe ka balendi’â basa tima ko. Bantu babîngi lumbu ti ku tolo bena mu timpeve. (Rom. 11:8) Ka bakwikilaka ko ti mu “ntangu za mansukina” tuta zinga, mpe ntamana mpasi ziyôkele mbo zibatika. Misamu mia minene miyôkaka mu nza milendi vumbula bantu bakaka ku tolo twa timpeve, mpe milendi ba tuma mu kipa nsangu zeto za Timfumu. Kâ, babingi bavutu seka kani babâ na meso ma tia. Bakaka mpe bakwikilaka mu tilumbu tia mfundusu mbo babanzaka ti mala kwa tiena. (2 Pi. 3:3, 4) Kâ, bilumbu bu bita kwe yôke nguria mfunu wena kwe beto mu bâ na meso ma tia.

7. Mu bwe bantu Nzambi ba kafukisa bena ntiana bantu banwaka malavu mamingi?

⁷ ‘Bô banwaka malavu mamingi.’ Ntumwa Paulo wafwanakasa bantu Nzambi ba kafukisa na bantu banwaka malavu mamingi. Bantu banwaka malavu mamingi ka babâka na manzangu ko ma sarila mu mio miyôka ha mbuka yi bena, mpe nzengolo za mbi babongaka. Mpila mosi mpe, bankwa-mbi ka basobaka ko mu ndwengosolo za Nzambi. Mbo basolaka nzila yi banata ku mfukulu. Kâ mbo balombaka kwe Bakristo mu bâ na bunsungu, na mu zabaka ndilu. (1 Tes. 5:6) Muntu mosi we na mayela ma Bibila watâ ebu ti: “Muntu wuzabaka ndilu zandi, ka wubâka na mabanza yeko-yeko ko, mu tidzunu wubâka mpe lenda die nandi dia banzila mu mpila yi saka ti kabonga nzengolo za mbote.” Mu bungu dia nti tufweti tatamana mu bâ mu tidzunu na mu lembo bâ na mabanza yeko-yeko? Ngatu talembo kota mu misamu mia politike na mia luzingu lumbu ti. Nsatu ya kota misamu mio mbo yikula mu ntangu tilumbu tia Yehova tita kwe pusane. Kâ, ka twena na nsatu ko ya bâ na lwaka mu mpila yi tudiatila. Mpeve ya Nzambi yilendi tu bakisa mu bâ mu tidzunu na mu lembo bâ na mabanza yeko-yeko, mpe mu bonga nzengolo za mbote.—Like 12:11, 12.

8. Bwe 1 Bisi-Tesalonike 5:8 yisongelaka bifu bitubakisa mu tatamana mu bâ na meso ma tia na bunsungu? (Tala mpe tifwani.)

⁸ “Talwateno tinkuti tikengeralaka ntulu [. . .] na mpu.” Paulo tufwanakase na binwani bikubamane mpe bilweti binwanunu mu bungu dia muzingu. (Tanga 1 Bisi-Tesalonike 5:8.) Mbo tukekoloko ti tinwani tie mu tisalu tiabâ tia kubama ntangu zazansoni mu bungu dia muzingu. Mpila mosi kwa mpe na beto. Mbo tutatamanaka mu bâ bakubama mu bungu dia tilumbu tia Yehova bu tulwataka tinkuti tikengerelaka ntulu tia timinu na luzolo mpe na mpu ya tivuvu tia mvukulu. Bifu bio mbo bitomo tu bakisaka.

9. Bwe timinu tieto titukengerelaka?

⁹ Tinkuti tikengerelaka ntulu mbo tieri kengerelaka tinwani. Timinu na luzolo mbo bikengerelaka mutima’eto. Mbo bitubakisa mu tatamana mu sarila Nzambi na mu landa Yezu. Timinu mbo tituhanaka lukwikulu ti Yehova mbo katusenda tala ti tumudingiri mu mutima’eto wa mukaka. (Ebr. 11:6) Musamu wo mbo wututuma mu tatamana mu bâ ba kwikama kwe Mfumu’eto, Yezu, ni bu sa ti tufweti  korela mpasi. Tulendi yika timinu tieto ngolo ngatu talenda mu telamana misamu mia mpasi bu tulongoka bifwani bia mpangi zeto zayizi tatamana mu bâ ba kwikama ntono nkwamusu peleko mbaya. Mpe tulendi sa keba mu mutambu wa zolo mbongo zazingi na bimvwama tala ti tulendi bifwani bia bô bayizi nata luzingu lulembolo na nkaka mu tûla Timfumu tia Nzambi ha tibuka tia ntete. b

10. Mu bwe luzolo mu Nzambi na mu bampwana’eto lutubakisilaka mu vivirila?

¹⁰ Luzolo mpe mfunu lwena mu tatamana mu bâ na meso ma tia na mu lunda mpila’eto ya mbote ya mwina misamu. (Mat. 22:37-39) Luzolo mu Nzambi mbo lutubakisaka mu vivirila mu tisalu tia samuna ntono misamu mi tilendi tu natina. (2 Tim. 1:7, 8) Mu bungu ti mbo tusongelaka luzolo lweto kwe bô balembo sarilaka Yehova, mbo tutatamanaka mu samuna na mu sala teritware’eto, ni bu sa ti mu nzila ya telefone na ya mikanda. Mbo tubâka na tivuvu ti bantu ba tubâka mbuka mosi mbo bawkizi soba mpe mbo babatika mu yirika misamu mia sungama.—Ezk. 18:27, 28.

11. Bwe luzolo mu mpangi zeto lutubakisilaka? (1 Bisi-Tesalonike 5:11)

¹¹ Mbo tuzoloko mpe mpangi zeto. Mbo tusongelaka luzolo lo bu tukwe titindisi na bu tukwe yikasane ngolo beto na beto. (Tanga 1 Bisi-Tesalonike 5:11.) Ntiana binwani binwanaka mu tintwari, mbo tutitindisaka beto na beto. Wa matieleka, tinwani na kondo kwa waya tilendi lwekesa mpwana’andi ku muzingu. Mpila mosi mpe, ka tulendi’â tawaya ko mu yirika mbi kwe mpangi zeto peleko tabakarisila mbi yi batuyirikiri. (1 Tes. 5:13, 15) Mbo tusongelaka mpe luzolo bu tuzitisaka mpangi zitwarisaka timvuka. (1 Tes. 5:12) Paulo bu katsoneka mukanda kwe Bisi-Tesalonike, timvuka tia ku Tesalonike ka tiatilungisila mvula mosi ko. Kampe babakala beri na madema ka bazaba misamu miamingi ko mpe makuba mamingi batâ. Kâ, wafwanakana babazitisa. Mpasi ziyôkele bu zita kwe pusane, kampe mbo wufwanakana mu sikirila bakuluntu bê ku mbuka yi tubêlaka mu  baka lutwalusu yôka bwawu bu. Tulendi lembo baka lutwalusu lwa Filiale na lwa siège mondial; buna, mfunu wena mu zolo na mu zitisa bakuluntu beto tûka bwawu bu. Musamu ni musamu wutula, talundeno bunsungu bweto, ka tutûlakandi mabanza meto mu makuba mawu, kâ mu Yehova mu nzila ya Kristo, yandi twarisaka babakala bo ba kwikama.

12. Bwe tivuvu tikengerelaka mbanzulu zeto?

¹² Ntiana kwa mpu yeri kengerelaka mutu wa tinwani, tivuvu tieto tia mvukulu mbo tikengerelaka mbanzulu zeto. Na tivuvu tia ngolo, tuzebi ti bima bi hanaka nza yi ka biena salu ko. (Flp. 3:8) Tivuvu tieto mbo titubakisaka mu tatamana mu bâ mu tidzunu na mu lembo bâ na mabanza yeko-yeko. Musamu ni wo wabakisa Wallace na Laurinda, basarilaka ku Afrike. Mu tumingu tutatu, muna muntu wafwilulu tibuti tiandi. Mu bungu dia pandémie ya COVID-19, ka balenda ko mu kâla ku nsi’awu mu bâ tintwari na kanda diawu. Wallace têle ti: “Tivuvu tia mvumbukulu mbo tikumbakisaka mu ba banza, ka mu mpila ko yi beri mu ntangu za mansukina za luzingu lwawu mu nza yi, kâ mu mpila yi ba bêla mu bilumbu biawu bia ntete mu nza ya môna. Tivuvu tio tidzunu tikunganaka bu nibâka mu tiari na bu ninwanaka na mabanza ma muntu wu tafwilulu.”

13. Nti tulendi sa mu baka mpeve santu?

¹³ ‘Ka ludimandi mpeve.’ (1 Tes. 5:19) Paulo wafwanakasa mpeve santu na tiya twe mu beto. Bu tubâka na mpeve ya Nzambi, mbo tubâka na luhemo lwa yirika misamu mia sungama na mu sala mu bungu dia Yehova. (Rom. 12:11) Nti tulendi sa mu baka mpeve santu? Tulendi sambila, tulendi longoka Zu dia Nzambi, mpe tulendi bâ tintwari na organizasio ye mu lutumu lwa mpeve yo. Misamu mio mbo mitubakisa mu bâ na bifu bia mbutu ya mpeve.—Nga. 5:22, 23.

14. Nti tufweti sila keba mu tatamana mu baka mpeve ya Nzambi? (Tala mpe tifwani.)

¹⁴ Nzambi bu kamana tu hana mpeve santu’andi, tufweti sa keba mu lembo honda tiya twa mpeve. Nzambi mpeve’andi kwe bantu  kwa babâka na mbanzulu mpe na ndiatulu ya verela kahanaka yo. Ka tatamana ko mu tu hana yo tala ti mbanzulu za mvindu tusarilaka. (1 Tes. 4:7, 8) Mu tatamana mu baka mpeve ya Nzambi, tufweti mpe bongelaka mbikululu na buzitu bwabwansoni. (1 Tes. 5:20) “Mbikululu” ni nsangu zi hanaka mpeve ya Nzambi, mu kati mwe na tilumbu tia Yehova na ntangu yi yeka ya nkufi. Mu mbanzulu zeto ka tukarisakandi tilumbu tio manima, bu tubanza ti Armagedo ka yitula ko bu twena ba moyo. Kani tasila bo, mbo tusongelaka ti tia tuta kêla, peleko mu mabanza meto tiena, bu tubâ na nsalulu za santu mpe bu tubâ na ndiatulu ya verela.—2 Pi. 3:11, 12.

15. Bwe tulendi sila keba mu bungungu na nsangu za bademo? (1 Bisi-Tesalonike 5:21)

¹⁵ Ntamana, mbeni za Nzambi mbo zitâ: ‘Ntia mpila tidzunu!’ (1 Tes. 5:3) Mabanza ma matûka kwe bademo mbo mafulusa mutoto, mpe mbo mawubakasa bantu babingi. (Nza. 16:13, 14) Mboko beto? Ka tuwubakana ko tala ti tutomono ‘sungamana miamiakulu.’ (Tanga 1 Bisi-Tesalonike 5:21) Ntelo ya Greke yi basarila mu ‘sungamana’ basarila yo mu tisalu tia sungamana bima ntiana ore. Buna, tufweti sungamanaka mio mi tuwâka peleko mio mi tutangaka mu zaba tala ti mia matieleka miena. Musamu wo mfunu weri kwe Bisi-Tesalonike, mpe mfunu wena kwe beto twe penepene na mpasi ziyôkele. Kani takwikilaka kwa mio mi tâka bantu bakaka, tufweti sarilaka lenda dieto dia banza bu tufwanakasa mio mi tutangaka peleko mio mi tuwâka na mio mi tâka Bibila na organizasio ya Yehova. Bu tusila bo, ka tuhunakana ko mu bungungu bwa bademo.—Bin. 14:15; 1 Tim. 4:1.

16. Ntia tivuvu tie neto, mpe nti tufweti sa?

¹⁶ Tuzebi ti kanda dia Yehova mbo divuka mu ntangu ya mpasi ziyôkele. Kâ, muna muntu mu beto, ka zebi’â ko ka nti bilendi mu turila mbazi. (Zaki 4:14) Ni bu tuvuka mu ntangu ya mpasi ziyôkele peleko ni bu tutifwila ntete ntangu yo, mbo tubaka musendo wa luzingu lwa mankululu tala ti tutatamane mu bâ ba kwikama. Bantu ba tumbu mbo bâ na Kristo ku mazulu. Bimeme biakaka mbo bibâ ku paradi ha mutoto. Bika beto bansoni tatûla mabanza meto mu tivuvu tieto tia toma na mu bâ ba kubama mu tilumbu tia Yehova!