1. Nti bibakisaka bisari bia Yehova mu tatamana mu mu kunda ntono mpasi zi babwabanaka na zo?

 BIBILA ditêle ti mu ntangu za nkatika mpasi twena. (2 Tim. 3:1) Mpasi zi turilaka bantu babansoni mu nza yi ya Satana, za ziturilaka mpe bisari bia Nzambi. Kâ beto mpe bakwamisaka mu bungu ti Yehova tusarilaka. Nti bitubakisaka mu tatamana mu kunda Yehova ntono mpasi zo? Musamu wa mfunu ni wena’eti lubakusu lwa Yehova tabaka mpe tuzebi ti ‘Nzambi ya moyo yena.’—Yer. 10:10; 2 Tim. 1:12.

2. Nti tuzebi mu Yehova bilendi tu yika ngolo?

² Mpasi zi tubwabanaka na zo Yehova za kamonaka mpe ntangu zazansoni zololo mu tu bakisa. (2 Nta. 16:9; Mik. 23:4) Bu tubambukaka ti Nzambi beto kakipaka, mpe ntangu zazansoni wa kubama wena mu tu bakisa, tulendi baka ngolo mu korela mpasi ni mpasi. Tataleno bwe musamu wo walungana kwe mutinu Davide.

3. Ngano Davide bwe keri zolo tâka bu katâ ti “Yehova wa moyo wena”?

³ Davide wazaba Yehova mpe Yandi keri sikirilaka. Mutinu Sawule na bantu bakaka bu badinga mu honda Davide, yandi wasambila Yehova mu baka lubakusu. (Mik. 18:6) Nzambi bu kamana hana mvutu mu lusambulu lwandi mpe bu kamuvukisa, Davide watâ: “Yehova wa moyo wena!” (Mik. 18:​46, NWT) Mu misamu mi katâ, Davide ka dinga ko kwa mu tambula ti Nzambi kô kena. Davide wasongela ti Yehova Nzambi ya matieleka yena yibakisaka bisari biandi ntangu zazansoni. Davide wazaba ti misamu mieri mu turilaka Nzambi’andi mia kazaba mpe wakubama weri mu mu bakisa. Musamu wo wamutuma mu tatamana mu sarila Yehova na mu mu kembela.—Mik. 18:​28, 29, 49.

4. Ntia ndandu tubakaka bu tubongelaka Yehova ntiana Nzambi ya moyo?

 ⁴ Lukwikulu lubâka neto ti Yehova Nzambi ya moyo yena, lulendi tu bakisa mu mu sarila na luhemo lwalwansoni. Mbo tubâ na ngolo za korela ntontolo zazansoni, mpe mbo wututuma mu tatamana mu sarila ngolo mu tisalu tiandi. Mbo tubonga mpe nzengolo ya tatamana mu bâ penepene na Yehova.

NZAMBI YA MOYO MBO KAKUYIKA NGOLO

5. Nti bilendi tu hana lukwikulu bu tutelamanaka ntontolo? (Bisi-Filipe 4:13)

⁵ Mbo tubâ na lenda dia korela ntontolo ni ntontolo, za zinene peleko za fioti, tala ti tubambukiri ti Yehova wa moyo wena mpe hô kena mu tu bakisa. Butomo tala ka kwena mpasi ko zilendi tu turila ziyôkele Nzambi’eto. Yandi ni Nkwa-Ngolo-Zazansoni mpe lendi tu hana ngolo za korela. (Tanga Bisi-Filipe 4:13.) Buna, misamu miamingi mie neto mita tu tuma mu telamana ntontolo na lukwikulu lwalwansoni. Bu tumonaka lubakusu lwa Yehova mu ntontolo za fioti, lukwikulu lubâka neto ti mbo katubakisa mu ntontolo za zinene.

6. Ntia misamu mia bwabana na Davide mu buntwenia bwandi miakurisa lukwikulu lwandi mu Yehova?

⁶ Tataluzuleno misamu miole mia bwabana na Davide miakurisa lukwikulu lwandi mu Yehova. Davide bu kabâ muvungi wa ntwenia, urse na ngo-mbulu yimosi banata muna mosi mu bawu timeme tia tata’andi. Mu ntangu zo za zole, Davide walanda bibulu bio na butindi bwabwansoni, mpe wavukisa bimeme bio. Kâ Davide ka tâ ko ti mu ngolo za yandi beni kanungina. Yandi wazaba ti Yehova wamubakisa. (1 Sam. 17:​34-37) Kani kabwe, Davide ka zimbakana misamu mi kabwabana na mio ko. Bu kadimbitila mu misamu mio, wayizi bâ na lukwikulu ti Nzambi ya moyo mbo kamuyikila ngolo mu bilumbu bita kwiza.

7. Ngano mu ntia misamu Davide katûla mabanza mandi mamansoni, mpe bwe wamubakisila mu nwana na Goliate?

⁷ Ha manima, kampe bu kabâ kwa mpe ntwenia, Davide waye tala camp ya binwani bia Israele. Wayizi mona ti binwani bunkuta bweri nawu mu bungu ti Musi-Filisiti wa zangama wu beri tâka nkumbu Goliate waduka mu “tsotsa mukangu wa binwani bia Israele.” (1 Sam. 17:​10, 11, NWT) Binwani bunkuta bweri nawu mu bungu ti mabanza mawu mamansoni mu bunene bwa Goliate batûla mo na mu misamu mi keri ba têsaka. (1 Sam. 17:​24, 25) Kâ Davide mu mpila yakaka keri mwinaka misamu. Davide wazaba ti Goliate bu keri seheselaka mukangu wa binwani bia Israele, butomo tala ni Nzambi ya moyo keri fingaka. (1 Sam. 17:26) Davide Yehova keri toko banzaka. Davide lukwikulu lwabâ nandi ti Nzambi ya mu bakisa bu keri muvungi, mbo kavutu mu bakisa mu musamu wo. Dieka bo, na lukwikulu lwandi mu lubakusu lwa Nzambi, Davide wanwanisa Goliate mpe wanunga!—1 Sam. 17:​45-51.

8. Bwe tulendi tatamana mu tûla Yehova mu mabanza meto bu tubwabanaka na mpasi? (Tala mpe tifwani.)

⁸ Beto mpe tulendi lenda mu telamana ntontolo tala ti tubambukiri ti Nzambi ya moyo wa kubama wena mu tu bakisa. (Mik. 118:6) Tulendi yika ngolo lukwikulu lweto mu musamu wo, bu tubanza misamu mi tayirika mu ntama. Tanga binsamu bie mu Bibila bikubambula bwe Yehova kavukisila bisari biandi. (Iza. 37:​17, 33-37) Peleko taluzula mpe rapore ze mu site’eto ya jw.org zita songela bwe Yehova kabakisiri mpangi zeto mu ntangu yi. Musamu wakaka, bambuka ntangu zo Yehova zi kakubakisa. Kampe lendi banza ti Yehova ka yirika misamu mia nzitukulu ko mu bungu dia nge, mu tifwani ka kukûla mu ngo-mbulu ko peleko mu urse.  Kâ musamu wa matieleka ni wena’eti, Yehova wayirika misamu miamingi mu nge! Yehova wakubenda kwe Yandi ngatu lwabâ na tindiku tia ngolo. (Za 6:44) Tala ti Yehova watiri sarila bwawu bu, ni mu bungu dia lubakusu lwandi. Buna, lomba kwe Yehova kakubakisa mu bambuka ntangu zi kahanina mvutu mu tusambulu twaku, yi kakuhanina bio bia bâ naku nsatu mu ntangu ya fwanana, peleko yi kakukipila mu ntangu za mpasi. Bu dimbitila mu misamu mio, mbo yika lukwikulu lwaku ngolo ti Yehova mbo katatamana mu sala mu bungu dia nge.

9. Nti tufweti bambukila bu tubâka mu mpasi? (Bingana 27:11)

⁹ Bongela Yehova ntiana Muntu wa moyo mbo wutubakisa mu mwina mpasi zeto mu mpila yakaka. Ngano bwe? Bu tubwabanaka na mpasi, tufweti tûla mabanza mu musamu wuyôkele mfunu. Satana singase ti bu tubwabana na mpasi mbo tuyambirika Yehova. Buna, mpila yi tusarila bu tubâ mu mpasi mbo yinata nsobolo mu mpila Yehova yi kamwinaka misamu ku mutima. (Yobe 1:​10, 11; tanga Bingana 27:11.) Kâ, bu tutatamana mu bâ ba kwikama kwe Yehova, luzolo lweto tumusongela mpe mbo tusongela ti Satana ngungu yena. Ngano nkwamusu za guvernema ta telamana, misamu mia mbaya, bantu bata lembo kipa nsangu za mbote zita samuna, peleko misamu miakaka? Tala ti ni buna wena, kuzimbakanandi ti misamu mita bwabana na mio nge mita hana bweso bwa yangirika mutima wa Yehova. Kuzimbakanandi mpe ti kani kabwe Yehova ka bika ko watonto mu bima bilembo lenda mu korela. (1 Kor. 10:13) Mbo kakuhana ngolo za korela.

NZAMBI YA MOYO MBO KAKUSENDA

10. Ngano Nzambi ya moyo nti kasa mu bungu dia bô bamukundaka?

¹⁰ Yehova ni Yandi sendaka bô bamukundaka. (Ebr. 11:6) Bwawu bu, tidzunu kata tu hana na lenda dia yangalala mu bima bie neto, mpe mu bilumbu bita kwiza mbo katuhana luzingu lwa mankululu. Nkatika lukwikulu lwe neto ti Yehova zololo mu tu senda mpe lenda  die nandi dia sila bo. Mu bungu dia musamu wo, mio miyôkele bubote tutatamana mu hana kwe Yehova mu nsambululu’eto ntiana kwa bwasa bisari biandi mu ntama. Musamu ni wo wayirika Timote.—Ebr. 6:​10-12.

11. Ngano nti bia tuma Timote mu sala tisalu tia ngolo mu timvuka? (1 Timote 4:10)

¹¹ Tanga 1 Timote 4:10. Timote watûla tivuvu tiandi mu Nzambi ya moyo. Ntiangu kasala ngolo mu bungu dia Yehova na mu bungu dia bantu bakaka. Ngano bwe? Ntumwa Paulo wamutindisa mu kwizi bâ mulongi wa mbote mu tisalu tia samuna na mu timvuka. Timote wafweti hana mpe tifwani tia mbote kwe mpangi zandi za ntwenia na za kula. Bamuhana mpe madema ma mpasi; ntiana hana malongi ma ngolo kwe bô beri na mo nsatu. (1 Tim. 4:​11-16; 2 Tim. 4:​1-5) Ntangu zakaka, ni bu sa ti bantu ka beri’â monaka tisalu tieri salaka Timote ko peleko ka beri’â mu tondaka ko, kâ yandi wabâ na lukwikulu ti Yehova mbo kaketi mu senda.—Rom. 2:​6, 7.

12. Nti bitumaka bakuluntu mu tatamana mu bâ na tisalu tiatingi? (Tala mpe tifwani.)

¹² Lumbu ti mpe bakuluntu balendi bâ na lukwikulu ti tisalu tiawu tia mbote Yehova tia kata mona mpe tia kata zolo. Ha zulu tisalu tiawu tia muvungi, tia longesa na tia samuna, bakuluntu babingi bayikaka moko mu tisalu tia ntungulu mpe bahanaka lubakusu bu bwaka katastrofe. Bakuluntu bakaka mu tikunku bena tia bampangi bakwe talaka mpangi zakaka ze na bimbevo, peleko mu komite ya tintwari na badoktere bena. Bakuluntu bahanaka lubakusu mu bisalu bio bazebi ti timvuka Yehova vwiri tio, kâ ka bantu’â ko. Dieka bo, tisalu tia ngolo basalaka mu bimvuka na lukwikulu ti mbo kabasenda.—Kol. 3:​23, 24.

13. Bwe Yehova kamonaka ku mutima bu tusarilaka ngolo mu tisalu tiandi?

¹³ Ka bantu babansoni’â ko balendi bâ bakuluntu. Kâ beto bansoni tima tie kô ti tulendi hana kwe Yehova. Nzambi’eto nsayi yi bâka  nandi bu tusarilaka ngolo zeto zazansoni mu tisalu tiandi. Makabu ma tuhanaka mu bungu dia tisalu tisalamaka mu nza yayansoni ma kamonaka ni bu sa ti ma fioti kwa mena. Nkatika nsayi yi bâka nandi bu tunangunaka koko ku tukutakanu mu hana mvutu ni bu sa ti ba yembama twena, na bu tulemvokelaka bantu bakaka. Ni bu sa ti benzi ti kuta sala tisalu tiatingi ko mu bungu dia Yehova, bâ na lukwikulu ti tisalu tiaku ntalu tiena kwe Yandi. Nge kazololo mu bungu dia musamu wo, mpe mbo kakusenda.—Like 21:​1-4.

TATAMANA MU BÂ PENEPENE NA NZAMBI YA MOYO

14. Bwe bâ penepene na Yehova kutubakisilaka mu tatamana mu bâ ba kwikama? (Tala mpe tifwani.)

¹⁴ Tala ti tindiku tia ngolo tie neto na Yehova, ka wubâ musamu wa mpasi ko mu tatamana mu bâ ba kwikama kwe Yandi. Musamu ni wo waturila Yozefe. Yozefe wakala mu sa bunsuza mu bungu ti kwe yandi Nzambi wa moyo wabâ, mpe ka zolo’â ko mu mu fwemesa. (Mba. 39:9) Tala ti tuzololo ti Yehova kabâ wa moyo ha meso meto, tufweti bonga ntangu ya mu sambilaka na ya longokaka Zu diandi. Buna, tindiku tieto na Yandi mbo tikula. Ntiana Yozefe, bu tubâ na tindiku tia ngolo na Yehova ka tuzolo’â ko tamufwemesa.—Zaki 4:8.

15. Ntia malongi tulendi baka mu mio mia turila bala ba Israele bu babâ ku sese? (Bahebre 3:12)

¹⁵ Bô babikaka mu sikirila Yehova, ka wubâka musamu wa mpasi ko kwe bawu mu hengama na Yandi. Tataluzuleno misamu mia turila bala ba Israele bu babâ ku sese. Bala ba Israele bazaba ti Yehova kô keri, kâ babatika mu bâ na ntembe mu lenda diandi dia kipa nsatu zawu. Bawu bayizi yula: ‘Yehova ha kati dieto kena peleko kâni?’ (Ndu. 17:​2, 7) Ha manima bayizi kolamana Nzambi. Diangana, musamu wo ndwengosolo yena kwe beto mu lembo landa bukolo bwawu.—Tanga Bahebre 3:12.

16. Ngano nti bilendi kotesa timinu tieto mu ntontolo?

¹⁶ Nza beto yita kabakasa mu tatamana mu bâ penepene na Yehova. Babingi balembo tambulaka ti Nzambi kô kena. Vula-vula, bô balembo  kipaka ti Nzambi kô kena kumvuna bakumvunaka. Bu tumonaka misamu mio, timinu tieto tilendi kota mu ntontolo. Ni bu sa ti ka tukala ko ti Nzambi kô kena, tulendi kwizi batika mu tiyula tala ti mbo kasa tima mu bungu dia beto. Titsoniki tia Mikunga 73 tiatiyula tiyuvu tio. Yandi wamona bantu beri mu zungirilaka, beri lembo kipaka misiku mia Nzambi mpe beri tatamanaka mu bâ na luzingu lwa mbote. Buna wabatika mu tiyula tala ti wa fwanana ti kasarila Nzambi.—Mik. 73:​11-13.

17. Nti bitubakisa mu tatamana mu bâ penepene na Yehova?

¹⁷ Nti biabakisa titsoniki tia Mikunga mu soba mabanza mandi? Yandi wadimbitila mu misamu miaketi turila bantu bô baketi zimbakana Yehova. (Mik. 73:​18, 19, 27) Titsoniki mpe tiadimbitila mu ndandu zi babakaka bu basarilaka Yehova. (Mik. 73:24) Beto mpe tulendi dimbitila mu tusakumunu twa tu hana Yehova. Tafwanakasa tusakumunu to na mpila yaketi bâ luzingu lweto tala ti ka tusarilaka Yehova ko. Musamu wo mbo wutubakisa mu tatamana mu bâ ba kwikama kwe Yehova na mu tâ ntiana titsoniki tia Mikunga: “Kwe meno bubote bwena mu pusana kwe Nzambi.”—Mik. 73:​28, NWT.

18. Mu bungu dia nti tulendi telamana bilumbu bia ku matu na lukwikulu?

¹⁸ Tulendi telamana ntontolo zazansoni zilendi tu turila mu ntangu yi ya mansukina, mu bungu ti “Nzambi ya moyo na ya matieleka tusarilaka ntiana bangamba.” (1 Tes. 1:​9, NWT) Nzambi’eto beto kakipaka mpe ntangu zazansoni zololo mu tu bakisa. Wu monekene ti, Yehova na bisari biandi bia ntama kabâ, lumbu ti mpe na beto kena. Ntamana mbo tubwabana na mpasi ziyôkele zi talembo toko bwabana na zo ha mutoto. Kâ ka tubâ beto kaka ko; Yehova mbo kabâ na beto (Iza. 41:10) Bika beto bansoni “tabâ na butindi mpe tatâ ti: ‘Yehova ni tibakisi tiani; ka nibâ na bunkuta ko.’”—Ebr. 13:​5, 6, NWT.