1-2. Bu sobaka misamu mu luzingu lweto, mu bungu dia nti mitieno miakaka mia Bibila milendi kwizi bêla nguria mfunu kwe beto?

 MU TILUMBU tia makwela, bakala na mukento’andi batomono lwata bubote, mbo bawirikilaka na bunsungu bwabwansoni tinzonzi tia makwela tisikamanaka mu Bibila. Mitieno mi bazonzelaka mu tinzonzi tio ka mibâka mia môna ko kwe bawu. Kâ tûka tilumbu tio, mbo mibâ na nsasa yakaka kwe bawu. Mu bungu dia nti? Mu bungu ti bu bakwelane, mbo basarila mitieno mio mu longo lwawu.

² Mpila mosi kwa mpe na Mikristo mikwelanaka mpe mikwizi bâka na bala. Tûka mivu, kampe bayizi wirikila binzonzi biabingi bieri zonzelaka mpila yi basansilaka bala. Kâ bwawu bu, malongi mo mbo matomo bâ mfunu kwe bawu. Bawu beni mbo babâ na bala ba basansa. Diangana dema dia dinene diena! Wa matieleka, mu ntangu yi sobaka misamu mu luzingu lweto, mitieno miakaka mia Bibila mbo mikwizi bâka nguria mfunu kwe beto. Ntiangu bisari bia Yehova bitangaka Bibila mpe bidimbitilaka dio ‘bilumbu biabiansoni’ ntiana bu batâ wo kwe mitinu mia ku Israele.​—Lub. 17:19.

3. Ngano nti tuzonzela mu timoko ti?

³ Bibuti, bweso bwa bunene bwe neno bulendi bâ na Bakristo; bweso bwa longesa bala beno misamu mitariri Yehova. Kâ lufweti sa tima tiakaka kani lwasukisina kwa mu ba têla misamu mitariri Nzambi. Lufweti bakisa bala beno mu zolo Nzambi. Ngano nti lulendi sa ngatu lwabakisa bala beno mu zolo  Yehova? Mu timoko ti mbo tuzonzela mitieno miyà milendi bakisa bibuti. (2 Tim. 3:16) Mbo tumona mpe ka bwe bibuti biakaka bie Bakristo biabakila ndandu bu basarila malongi ma Bibila.

4. Ntia mutieno wulendi bakisa bibuti mu bakisa bala bawu mu zolo Yehova? (Zaki 1:5)

⁴ Mutieno 1: Dingeno lutwalusu lwa Yehova. Lombeno kwe Yehova kaluhana ndwenga ze neno nsatu mu bakisa bala beno mu bâ na luzolo mu Yandi. (Tanga Zaki 1:5.) Yehova ni muntu wuyôkele mu hana malongi. Misamu miamingi misingasaka wo. Tazonzeleno miole. Wa ntete, bu kena tibuti, Yehova misamu miamingi kazebi. (Mik. 36:9) Wa nzole, malongi ma ndwenga ma kahanaka ndandu kwa manataka ntangu zazansoni.​—Iza. 48:17.

5. a) Organizasio ya Yehova ntia bima yihanaka mu bakisa bibuti? b) Mu video ya bampangi Amorim, nti longokele mu mpila yi bakurisila bala bawu?

⁵ Mu nzila ya Zu diandi na ya organizasio’andi, Yehova mbo katuhanaka bidia biabingi bisikamanaka mu Bibila bilendi bakisa bibuti mu bakisa bala bawu mu mu zolo. (Mat. 24:45) Mu tifwani, lulendi baka malongi mu bimoko bie na mutu-diambu “Lubakusu mu bungu dia kanda,” bieri dukaka mu ntama mu Réveillez-vous! Mpe biayika dukaka lumbu ti mu site’eto. Mpe video zazingi ze mu jw.org, zizonzelaka interview na drame zilendi bakisa bibuti mu sarila malongi ma Yehova bu bakwe sansi bala bawu. *​—Bin. 2:4-6.

6. Ngano tata dimosi na mukento’andi bwe bamwinaka malongi matûkaka ku organizasio ya Yehova?

⁶ Bibuti biabingi bitondaka mu bungu dia lubakusu lu ba hanaka Yehova mu nzila ya organizasio’andi. Tata dimosi die na nkumbu Joe têle ti: “Sansa bala batatu mu matieleka, ka wena musamu wa fioti ko. Mukento’ani na meno mbo tutatamanaka mu lomba lubakusu kwe Yehova mu lusambulu. Mpe tayizi mona ti timoko peleko video yeri dukaka mu ntangu yi tweri na nsatu lubakusu mu telamana musamu. Mbo tutatamanaka mu sikirila malongi ma Yehova.” Joe na mukento’andi bayizi bakula ti bima bio mbo bibakisaka bala bawu mu pusana kwe Yehova.

7. Mu bungu dia nti bibuti bafweti sa miamiansoni mu hana tifwani tia mbote? (Bisi-Rome 2:21)

 ⁷ Mutieno 2: Bêno bifwani bia mbote. Bala mbo batomo landaka misamu mi yirikaka bibuti biawu, mpe vula-vula mbo babakopaka. Wa matieleka, bibuti biabiansoni bantu ba masumu bena. (Rom. 3:23) Ntono musamu wo, bibuti bie na ndwenga mbo bisaka miamiansoni mi balenda mu hana tifwani tia mbote kwe bala bawu. (Tanga Bisi-Rome 2:21.) Bu keri zonzelaka bala, tata dimosi diatâ ti: “Bala bena ntiana éponge yinwaka mamba.” Wavutu tâ ti: “Mbo batutêlaka mu ntangu tifwani tieto tilembo delakanaka na misamu mi tubalongesaka.” Buna, tala ti tuzololo ti bala beto bazolo Yehova, beto beni tufweti ba songela ti Yehova Yandi tuzololo.

8-9. Ngano nti ta longoka mu misamu mi têle Andrew na Emma?

⁸ Mpila zazingi ze kô zilendi sarila bibuti mu longesa bala bawu mu zolo Yehova. Mpangi yimosi ye na nkumbu Andrew mpe ye na mvula 17 têle ti: “Bibuti biani mbo bieri vulu kunzonzelaka mfunu ya lusambulu. Nkokela zazansoni tata’ani mbo keri sambilaka na meno ni bu sa ti natisambirila. Ntangu zazansoni bibuti bieto mbo bieri tu bambulaka ti: ‘Lulendi zonza kwe Yehova ntangu zazansoni zi luzololo.’ Mu bungu dia musamu wo, lusambulu lwayizi bâ tima tie nkatika mfunu kwe meno. Bwawu bu, ka wena musamu wa mpasi ko kwe meno mu sambila, mpe mbo nimonaka ti Tata diena dia luzolo.” Bibuti bambukakeno ti luzolo lweno mu Yehova lulendi bakisa bala beno mu mu zolo.

⁹ Tabongeno tifwani tia Emma. Tata’andi bu kasa yambirika kanda, wasa sisa nguri’andi na mfuka zazingi. Emma Têle ti: “Nguri’ani mbala zazingi keri bwabanaka na misamu mia mpasi mia mbongo, kâ ntangu zazansoni mbo keri zonzelaka mpila Yehova yi kabelokelaka bisari biandi lwaka mpe yi kabakipilaka. Mpila yi keri diatilaka mbo yeri songelaka ti nguria lukwikulu lweri nandi mu musamu wo. Nguri’ani mbo keri sarilaka misamu mi keri longesaka.” Ntia malongi tuta baka? Bibuti bilendi longesa bala bawu mu nzila ya bifwani biawu ni bu wubâ mu misamu mia mpasi.​—Nga. 6:9.

10. Bibuti bia ku Israele ntia bweso bweri nawu mu zonza na bala bawu? (Lubambu 6:6, 7)

¹⁰ Mutieno 3: Vulueno zonzaka na bala beno. Yehova walomba kwe bala ba Israele mu vulu longesaka bala bawu misamu mimutariri. (Tanga Lubambu 6:6, 7.) Bibuti bio, bweso bwabwingi bweri nawu mu tilumbu mu zonza na bala bawu na mu ba bakisa mu kurisa luzolo lwa Yehova mu mutima’awu. Mu tifwani, mwana wa bakala ntangu yayingi weri yôkesaka na tata’andi mu kwe kuni bima peleko mu kwe tie bima biyelele. Mwana wa mukento mbo weri yôkesaka ntangu yayingi na nguri’andi mu tunga bima na mu bisalu biakaka bia mu nzo. Mu bungu ti bibuti na bala ntangu yayingi beri yôkesaka tintwari, bweso bweri nawu mu zonzela misamu miamingi mia mfunu. Mu tifwani, lenda dieri nawu dia zonzela mbote ya Yehova na ya dimbitila mu mpila yi keri bakisilaka kanda.

11. Ngano ntia ntangu bibuti bie Bakristo bilendi sarila mu zonza na bala bawu?

¹¹ Ntangu ya lumbu ti ya soba yena. Mu nsi zazîngi, bibuti na bala ka balendi’â bayôkesa ntangu yayingi ko mu tilumbu. Bibuti bilendi bâ ku salu mpe bala balendi bâ ku lukolo, kâ bibuti bafweti dingaka ntangu yi balendi zonza na bala bawu. (Efz. 5:15, 16; Flp. 1:10) Nsambululu ya kanda mbo yihanaka bweso bwa zonza nawu. Mpangi mosi ya ntwenia ye na nkumbu Alexander têle ti: “Ntangu zazansoni,  tata’ani mbo kakubikaka misamu ngatu tasa nsambululu ya kanda, mpe ka bikaka na kani tima ko tiakabakasa yo. Ha manima ma nsambululu yo, mbo tumokaka.”

12. Mu ntangu ya nsambululu ya kanda, mfumu-kanda ntia mabanza mafweti bâka nandi?

¹² Tala ti nge mfumu-kanda yena, ngano nti lendi sa ngatu nsambululu ya kanda yabâ ya mbote kwe bala baku? Lendi sarila buku dia Bâ mu nsayi ntangu zazansoni! mu longoka na bala baku. Ndongokolo yo mbo yikuhana bweso bwa tomo zonza na bala baku. Tala ti zololo bala baku bakuziburila mitima miawu mu ku têla misamu mie nawu, kusarilandi ntangu ya nsambululu ya kanda mu ba semba peleko mu ba bamina. Sarila ngolo mu lembo baka nkesi tala ti bala baku baheni mabanza mata lembo kwelana na mitieno mia Bibila. Tondakeno mu ntangu bala beno yi balutêlaka misamu mie nawu ku mutima na bunsungu bwabwansoni, mpe batindisakeno mu lembo bâ na bunkuta bwa zonza. Mu bakisa bala beno, lufweti zaba misamu mi bamonaka ku mutima.

13. Ntia ntangu yakaka bibuti bilendi sarila mu bakisa bala bawu mu pusana kwe Yehova?

¹³ Bibuti, dingeno mpila zi lulendi sarila mu tilumbu mu bakisa bala beno mu pusana kwe Yehova. Ka lukêlakandi kwa ntangu yi lusaka ndongokolo ya Bibila mu ba longesa misamu mitariri Nzambi’eto ya luzolo. Mama yimosi ye na nkumbu Lisa têle ti: “Tayizi sarila bima bieri tu zungirilaka mu longesa misamu mitariri Yehova kwe bala beto. Mu tifwani, mu ntangu mbwa’eto yeri yirikaka musamu weri sehesaka bala beto mbo tweri ba têlaka ti Nzambi’eto, Nzambi ya nsayi yena yizololo luzingu ntiana beto.”

14. Mu bungu dia nti we mfunu kwe bibuti mu bakisa bala bawu mu sola ndiku zawu na ndwenga zazansoni? (Bingana 13:20)

¹⁴ Mutieno 4: Bakisa bala baku mu sola ndiku za mbote. Zu dia Nzambi mbo ditomo tu têlaka ti bindiku mbo bitunatinaka nsobolo​—za mbote peleko za mbi. (Tanga Bingana 13:20.) Bibuti, ngano ndiku za bala beno za luzebi? Ngano bawu lweka mona mpe lweka yôkesa ntangu nawu? Nti lulendi sa mu bakisa bala beno mu sola ndiku zizololo Yehova?  (1 Kor. 15:33) Lulendi ba bakisa mu sa nsololo za ndwenga bu lutikisa bantu bê na tindiku tia mbote na Yehova mu yôkesa ntangu na kanda diadiansoni.​—Mik. 119:63.

15. Bwe bibuti bilendi bakisila bala bawu mu bâ na ndiku za mbote?

¹⁵ Tabongeno tifwani tia tata dimosi die na nkumbu Tony. Banguri ka nti basa yandi na mukento’andi mu bakisa bala bawu mu bâ na ndiku za mbote. Têle ti: “Tûka mivu, meno na mukento’ani tatikisa mpangi za zikento na za bakala ze na mvula za swaswana mpe zatûka ku mbuka za swaswana ku nzo’eto. Mbo tweri diaka tintwari mpe mbo tweri saka nsambululu ya kanda. Yo ni mpila ya mbote mu zaba bô bazololo Yehova mpe bamusarilaka na nsayi yayansoni. Tabaka mpe lusakumunu lwa bwanaka minkengi mia bizunga, bamisionere na mpangi zakaka ku nzo’eto. Misamu mi bazebi, luhemo lwawu na tifu tiawu tia tihana bianata nsobolo za zinene kwe bala beto mpe miababakisa mu pusana kwe Yehova.” Bibuti, bongeno nzengolo ya bakisa bala beno mu bâ na ndiku za mbote.

16. Ngano nti lulendi sa tala ti mwana’eno wutêle ti kata vutu zolo ko mu sarila Yehova?

¹⁶ Tala ti lusiri miamiansoni ngano nti lusa tala ti mosi wa bala beno wulutêlele ti ka zololo’â ko mu sarila Yehova? Ka lubanzandi ti dema dieno dia bibuti ka lutomono’â dia nata ko. Yehova watuhana beto bansoni​—na bala beno mpe—​timpwanza tia sola, wuzololo tâ lenda dia sola tala ti Yandi tusarila peleko kâni. Tala ti mwana’eno wubongele nzengolo ya lembo vutu sarila Yehova, tatamaneno mu bâ na tivuvu ti lumbu tie kô mbo kakâla. Bambukileno tifwani tia mwana wawumuka. (Like 15:11-19, 22-24) Ntwenia yo wayirika misamu miamingi mia mbi, kâ ha manima wakârila mu yirika misamu mia mbote. Bantu bakaka mbo batâ ti: “Tifwani kwa tiena.” “Ngano wa matieleka musamu wo wulendi yilama?” Yee wulendi yilama! Musamu ni wo waturila ntwenia yimosi ye na nkumbu Elie.

17. Ngano ntia lutindusu ta baka mu tifwani tia Elie?

¹⁷ Mu bungu dia bibuti biandi, Elie têle ti: “Basa miamiansoni mi balenda mu kumbakisa  mu zolo Yehova na Zu diandi, Bibila. Kâ bu nayizi bâ na mvula kampe 15, nayizi bâ na ndiatulu ya mbi.” Elie wabatika mu kwe yiriki misamu mia mbi mu mansweki mpe keri’â vutu kipaka ngolo zeri sarilaka bibuti biandi ko mu mu bakisa mu timpeve. Bu kamana duka ku nzo ya bibuti biandi, waye bâ na ndiatulu ya mbi. Ni bu sa ti ni bo, ntangu zakaka mbo keri zonzelaka Bibila kwe ndiku’andi yimosi. Elie vutulu tâ: “Bu ndieri vulu kwe zonzele Yehova kwe ndiku’ani, mbo weri kumbakisaka mu tomo bâ na mabanza mu Yehova. Malembe-malembe mbutu za matieleka ma Bibila zeri sekaka mu mutima’ani, mbutu za kuna bibuti biani, zabatika mu kula.” Ha manima, Elie wakâla mu matieleka. * Banzeno’eti ka ntia mpila nsayi yeri na bibuti biandi biasarila ngolo mu mu longesa mu zolo Yehova tûka bu keri wa fioti!​—2 Tim. 3:14, 15.

18. Bwe mwinaka bibuti bisarilaka ngolo mu bakisa bala bawu mu zolo Yehova?

¹⁸ Bibuti, bweso bwa nzitukulu bwe neno bwa sansa bala beno mu kwizi bâ bisari bia Yehova. (Mik. 78:4-6) Ka diena dema dia fioti ko, mpe mbo tutomo lu sîkaka mu bungu dia ngolo zi lusarilaka mu bakisa bala beno! Tala ti lutatamane mu sa miamiansoni mi lulenda mu bakisa bala beno mu zolo Yehova na mu ba longesa mu mu tumamana, lulendi bâ na lukwikulu ti Tata’eto dia luzolo dia ku mazulu mbo kayangalala.​—Efz. 6:4.