1. Ntia nzengolo ya mfunu bantu babansoni bafweti bonga?

 LUMBU ti bantu bafweti bonga nzengolo ya mfunu. Ngano Yehova bayika moko we Ntwarisi yiyôkele mu nza, peleko Satana we mbeni’andi? Ka kwena muntu ko wulendi bâ ha kati-kati. Nzengolo yi babonga mbo yisa ti bazinga mankululu peleko kâni. (Mat. 25:31-33, 46) Mu ntangu ya mpasi ziyôkele, mbo babaka tidimbu tia mvukulu peleko tia mfukulu.​—Nza. 7:14; 14:9-11; Ezk. 9:4, 6.

2. a) Ngano Bahebre 10:35-39 nti yitutindisaka mu sa? b) Bwe mukanda wa Nzabukusu wulendi tu bakisila?

² Tanga Bahebre 10:35-39. Tala ti solele mu yika lutumu lwa Yehova moko, nzengolo ya ndwenga bongele. Bwawu bu timina die naku dia bakisa bantu bakaka mu sa nsololo ya mbote. Mu bungu dia musamu wo, lendi sarila misamu mie mu mukanda wa Nzabukusu mu ba bakisa. Mukanda wo mbo wuzonzelaka mio miturila bantu batelamanaka Yehova, kâ mpe tusakumunu tu baka bô bayikaka lutumu lwandi moko na kwikama kwakwansoni. Musamu wa mbote wena mu longokaka matieleka mo ma mfunu. Ndongokolo yo mbo yiyika nzengolo’eto ngolo ya tatamana mu sarila Yehova. Misamu mi tulongoka, tulendi mia sarila mu bakisa bantu bakaka mu bonga nzengolo ya sarila Yehova na ya tatamana mu mu sarila.

3. Nti tutaluzula mu timoko ti?

³ Mu timoko ti, biyuvu ebi tutaluzula: Nti biturila bantu bayikaka lutumu lwa Nzambi moko? Nti biturila bantu basola mu yika tibulu tia sangi moko tie na langi wa mbwaki ya ngolo, ti bazonzelaka mu mukanda wa Nzabukusu?

4. Ntia tikunku tia bantu tieri na Yezu ntumwa Za kamona?

⁴ Mu timona-meso timosi, ntumwa Za wamona bikunku biole bia bantu beri yikaka lutumu lwa Yehova moko, mpe babaka tusakumunu twa luzingu lwa mankululu. Mu tikunku tia ntete, mwe na bantu 144 000. (Nza. 7:4) Mbo babasolaka ha mutoto mu kwenda ku mazulu mu kwe bâ mu guvernema, peleko mu Timfumu, tintwari na Yezu. Na yandi, mbo bayâla mutoto. (Nza. 5:9, 10; 14:3, 4) Mu timona-meso tio, Za wabamona tintwari na Yezu ba telama ha mongo wa Siyone ku mazulu.​—Nza. 14:1.

5. Ngano nti biturila Bakristo ba tumbu batiri ha mutoto?

⁵ Tûka ntangu ya bantumwa, bantu babingi beka sola mu bâ mu lutangu lwa the 144 000. (Like 12:32; Rom. 8:17) Kâ, Za watâ ti bantu bê mu lutangu lo ba nkonta kwa basâla ha mutoto mu ntangu ya bilumbu bia mansukina. Ntete mpasi ziyôkele zabatika, Bakristo ba tumbu batiri ha mutoto mbo babaka tiniemo tiawu tia mansukina tisongela ti Yehova bawu katamburi. (Nza. 7:2, 3; 12:17) Mu ntangu ya mpasi ziyôkele, Bakristo batiri ha mutoto mbo bakwenda ku mazulu mu kwe bâ tintwari na Bakristo bê mu lutangu lwa 144 000, bafwa ba kwikama. Kûna, mbo bayâla na Yezu mu Timfumu tia Nzambi.​—Mat. 24:31; Nza. 5:9, 10.

6-7. a) Za ntia tikunku kamona ha manima, mpe ntia misamu tulongokaka mu bawu? b) Mu bungu dia nti Bakristo ba tumbu batiri ha mutoto na yungi dia bantu bafweti taluzulaka misamu mie mu Nzabukusu 7?

⁶ Bu kamana mona tikunku tio tie ku mazulu, Za wamona “yungi dia bantu.” Tikunku tio ka tiena ntiana tikunku tia bantu 144 000 ko, mu bungu ti lutangu lwa bantu bê mu yungi dio ka lwena lwa zabakana ko. (Nza. 7:9, 10) Ntia misamu tulongokaka mu bawu? Za watâ ti: ‘Ni bawu batûkiri ku mpasi ziyôkele. Binkuti biawu bia basukuri; bia batsemese mpe mu menga ma Mwana Timeme.’ (Nza. 7:14) Bu bavuka ku mpasi ziyôkele, yungi dio dia bantu mbo dibaka tusakumunu tuyôkele ha mutoto.​—Mik. 37:9-11, 27-29; Bin. 2:21, 22; Nza. 7:16, 17.

⁷ Ni bu wubâ ti batusola mu kwenda ku mazulu peleko ha mutoto tubâ, ngano mbo tutimonaka mu misamu mie mu Nzabukusu 7? Tufweti timona mô. Diangana mbo yibâ ntangu ya mbote kwe bikunku bio bia biole bia bisari bia Nzambi! Mbo tuyangalala mu nsololo yi tasa ya yika lutumu lwa Yehova moko. Mukanda wa Nzabukusu ntia misamu miakaka wututêlaka mu bungu dia mpasi ziyôkele?​—Mat. 24:21.

8. Ngano mpasi ziyôkele bwe zibatikila, mpe bwe bantu babîngi basa?

⁸ Ntiana bu talongokele wo mu timoko tiayôkele, ntamana bimfumu bia politike mbo bibalukila Babilone ya Yinene, wuzololo tâ mabundu mamansoni ma bungungu. (Nza. 17:16, 17) Musamu wo mbo wusongela mbatukulu ya mpasi ziyôkele. Ngano musamu wo mbo wusa ti bantu babîngi basarila Yehova? Kâni. Mu ntangu yo ya mpasi, Nzabukusu 6 mbo yitusongelaka ti bô balembo sarilaka Yehova mbo badinga mu tikengerela mu binsamu bia politike na bia nkari bia nza yi, bi bafwanakasaka na miongo. Mu bungu ti ka bayika Timfumu tia Nzambi moko ko, Yehova mbo kababongela ntiana mbeni zandi.​—Like 11:23; Nza. 6:15-17.

9. Mu ntangu ya mpasi ziyôkele, bwe kanda dia Yehova disongela ti dia swaswana diena, mpe ntia ndandu zimoneka?

⁹ Wa matieleka, mu ntangu ya mpasi ziyôkele  bisari bia kwikama bia Yehova mbo bisongela ti bia swaswana biena. Bawu kaka kwa batatamana mu sarila Yehova, mpe bakala mu yika tibulu tia sangi moko. (Nza. 13:14-17) Mu bungu ti bisari bia Yehova mbo bitamamana mu bâ ba kwikama, bô batelamanaka Yehova mbo bakwizi bâ mu nkesi zazingi. Musamu wo mbo wusa ti timvuka tia nsi tianwanisa kanda dia Nzambi die ha mutoto. Nwanisa ko, mu Bibila mbo batâka ko nkotolo ya Goge ya ku nsi ya Magoge.—Ezk. 38:14-16.

10. Tintwari na Nzabukusu 19:19-21, nti Yehova kasa bu banwanisa kanda diandi?

¹⁰ Ngano Yehova nti kasa bu banwanisa kanda diandi? Bibila mbo ditâka ti Yehova mbo kabaka nkesi za ngolo. (Ezk. 38:18, 21-23) Nzabukusu 19 mbo yizonzelaka misamu miyôka ha manima. Yehova mbo katambika Mwana’andi mu nwanina kanda diandi na mu nunga mbeni zandi. Mukangu wa binwani we ku mazulu​—wuzololo tâ mbazi za kwikama na ba 144 000, tintwari na Yezu mbo banwana na Goge ya ku nsi ya Magoge. (Nza. 17:14; 19:11-15) Ngano muzingu wo bwe wumanisina? Bantu na bimvuka biabiansoni bitelamanaka Yehova mbo bifuka!​—Tanga Nzabukusu 19:19-21.

11. Ngano ntangu ya nguria mfunu yi zonzelaka mukanda wa Nzabukusu ni ye?

¹¹ Banza’eti ka bwe bantu ba kwikama bamona mu ntangu yi fuka mbeni za Nzambi! Diangana mbo wubâ musamu wa nsayi! Ni bu sa ti nsayi yayingi yibâ ku mazulu bu fuka Babilone ya Yinene, musamu wakaka we kô wunata nsayi yiyôkele. (Nza. 19:1-3) Yo ni ntangu ya nguria mfunu yi zonzelaka mukanda wa Nzabukusu—‘makwela ma Mwana Timeme.’​—Nza. 19:6-9.

12. Tintwari na Nzabukusu 21:1, 2, mu ntia ntangu makwela ma Mwana Timeme mayôka?

¹² Ngano makwela mo mu ntia ntangu mayôka? Ntete muzingu wa Armagedo wabatika, Bakristo 144 000 babansoni mbo batibêla ku mazulu. Kâ, ka yibâ ntangu yi batika makwela ma Mwana Timeme ko. (Tanga Nzabukusu 21:1, 2.) Makwela ma Mwana Timeme mbo mayôka ha manima ma muzingu wa Armagedo bu bafukisa mbeni za Nzambi.​—Mik. 45:3, 4, 13-17.

13. Ngano makwela ma Mwana Timeme bwe mata zolo tâ?

¹³ Ngano makwela ma Mwana Timeme bwe mata zolo tâ? Ntiana kwa makwela mavukasaka mukento na bakala, makwela ma Mwana Timeme mbo mavukasa mutinu Yezu Kristo na Bakristo 144 000 bê mukento’andi. Musamu wo wa mfunu mbo wuhana nzila kwe guvernema ya môna mu yôkesa mvula 1 000 mu yâla mutoto.​—Nza. 20:6.

14-15. Tikapu tia 21 tia Nzabukusu na nti tifwanakasaka Bakristo 144 000? (Tala tifwani ha tinima tia ntete.)

¹⁴ Mu Nzabukusu 21 mbo bafwanakasaka Bakristo 144 000 na mumvuka wa nkatika wa toma wu batâka nkumbu ‘Yerusaleme ya Môna.’ (Nza. 21:2, 9) Mumvuka wo mbo wusikamanaka mu matari 12 ma bandu, mpe mu matari mo, nkumbu za 12 za bantumwa ba 12 ba Mwana Timeme batsoneka. Mu bungu dia nti musamu wo wayitukusu Za? Mu bungu ti nkumbu’andi kamona batsoneka ha tari dimosi mu matari mo. Ntia mpila bweso bweri!​—Nza. 21:10-14; Efz. 2:20.

¹⁵ Mumvuka wo, ka wufwanakane’â na mumvuka wakaka ko. Nzila ye kûna ya ore yi balembo sangasa na tima, mielo mia 12 mia perle, bibaka na mabandu ma batomesa mu  matari ma ntalu na lutangu lwa delakana. (Nza. 21:15-21) Kâ, kampe tima tiakaka tie kô tita manga! Tataleno musamu wakaka wa tâ Za: ‘Ka namweni’â nzo ya Nzambi kô ko; mu bungu ti [Yehova] Nzambi ye Nkwa-Ngolo-Zazansoni na Mwana Timeme ni nzo Nzambi’andi. Mboko, mumvuka ka wena na nsatu ntangu na ngonda ko mu baka mutsamina; mu bungu ti mukembo wa Nzambi ni mutsamina’andi; Mwana Timeme ni mwinda’andi.’ (Nza. 21:22, 23) Bô bê mu Yerusaleme ya Môna mbo babâ na Yehova. (Ebr. 7:27; Nza. 22:3, 4) Buna, Yehova na Yezu ni Tempelo ya mumvuka wo.

16. Nti biturila bantu mu ntangu ya luyalu lwa mvula 1 000 lwa Timfumu tia Nzambi?

¹⁶ Bakristo ba tumbu nsayi yibâka nawu bu babanzaka mumvuka wo. Kâ misamu mie kô misaka ti bô bê na tivuvu tia bâ ha mutoto bakipa wo. Mu ntangu ya luyalu lwa mvula 1 000 lwa Timfumu tia Nzambi, Yerusaleme ya Môna tusakumunu twatwingi yinata. Za wamona tusakumunu to ntiana nzari ya ‘mamba ma luzingu.’ Mpe ku simu edi na diakaka dia nzari kwe na ‘miti mia luzingu’ mibutaka ‘makaya mawasisaka makanda.’ (Nza. 22:1, 2) Bantu babansoni babâ ba moyo, mbo babwa bweso bwa baka tusakumunu to. Malembe-malembe, bantu babansoni batumamanaka Yehova mbo bakwizi bâ ba lunga. Ka kuvutu’â bâ bimbevo ko, mpasi ko na bidilu ko.​—Nza. 21:3-5.

17. Ntiana bu ta wa songela Nzabukusu 20:11-13, banani babaka tusakumunu tunata luyalu lwa mvula 1 000?

¹⁷ Ngano banani babaka tusakumunu to twa mbote? Ntete-ntete ni yungi dia bantu divuka ku muzingu wa Armagedo, na bala balendi kwizi butuka mu nza ya môna. Kâ Nzabukusu 20 mbo yikanisinaka ti bantu ba fwa mbo bavumbuka. (Tanga Nzabukusu 20:11-13.) Bantu ba kwikama ba sungama bafwa mu ntama na balembolo ba sungama balembo bwa bweso bwa longoka misamu mitariri Yehova, mbo bavumbuka ha mutoto. (Bis. 24:15; Za 5:28, 29) Ngano wuzololo tâ ti bantu babansoni ba fwa mbo bavumbuka mu ntangu ya luyalu lwa mvula 1 000? Kâni. Bô bakala mu sarila Yehova na miangu miamiansoni ntete lufwa lwawu, ka bavumbuka ko mu baka luzingu. Bweso bweri nawu bwa sarila Yehova, kâ basongela ti ka bafwanakana ko mu baka luzingu  ku Paradi ha mutoto.​—Mat. 25:46; 2 Tes. 1:9; Nza. 17:8; 20:15.

18. Ngano mutoto bwe wubâ ku nsuka ya luyalu lwa mvula 1 000?

¹⁸ Ku nsuka ya luyalu lwa mvula 1 000, bantu babansoni babâ ha mutoto mbo bakwizi bâ na luzingu lwa lunga. Ka kwena muntu ko wuvutu mona mpasi mu bungu dia masumu ma Adame. (Rom. 5:12) Ndoko yanata masumu ma Adame mbo bakatuka yo yayansoni. Mu mpila yo bô babâ ha mutoto mbo bakwizi baka luzingu, mu bungu ti mbo babâ ba lunga ku nsuka ya luyalu lwa mvula 1 000.​—Nza. 20:5.

19. Mu bungu dia nti kufweti bêla ntontolo za mansukina?

¹⁹ Tuzebi ti Yezu watatamana mu bâ wa kwikama kwe Nzambi ni bu sa ti Satana watatamana mu kotesa kwikama kwandi mu ntontolo. Kâ ngano bantu babansoni ba lunga mbo babâ ba kubama mu tatamana mu bâ ba kwikama mu ntangu Satana yi kabatonta? Muna muntu mbo kabâ na lenda mu hana mvutu mu tiyuvu tio, mu ntangu Satana yi bamudukisa mu abime ku nsuka ya luyalu lwa mvula 1 000. (Nza. 20:7) Bô batatamana mu bâ ba kwikama mu ntangu ya ntontolo zo za mansukina mbo babaka luzingu lwa mankululu mpe mbo babâ na timpwanza tia matieleka. (Rom. 8:21) Bô bakolamaka, mbo bafuka mankululu tintwari na Satana mpe na bademo bandi.​—Nza. 20:8-10.

20. Ngano ntia mabanza me naku mu bungu dia mbikululu za nzitukulu ze mu Nzabukusu?

²⁰ Ngano bwe ta mona ku mutima bu tumeni taluzula misamu mi mia nguri mie mu Nzabukusu? Ngano ka wuta ku yika tiya ko bu ta bakula ti mbikululu zo za nzitukulu nge zita tarila? Ngano ka wuta ku tuma ko mu tikisa bantu bakaka mu bâ tintwari na beto mu sa nsambululu ya verela ya Nzambi’eto? (Nza. 22:17) Bu tumeni zonzela misamu miyilama mu bilumbu bita kwiza, timina die neto, mpe tuzololo tatâ misamu emi mia tâ ntumwa Za: ‘Amene, yiza Mfumu Yezu!’​—Nza. 22:20.