1. Nti Yehova kalombaka kwe bisari biandi? (Tala mpe tifwani.)

 KWE nani tufweti tarisa bu tubâka na nsatu lutindusu mpe na lutwalusu? Mvutu ya tiyuvu tio ya luzebi. Tulendi pusana kwe Yehova Nzambi’eto mu lusambulu. Yehova mbo katulombaka mu mu sambila. Zololo ti tavulu mu sambilaka. (1 Tes. 5:17) Ka wena musamu wa mpasi ko mu pusana kwe Yandi mu lusambulu, na mu dinga lutwalusu lwandi mu misamu mieto miamiansoni mia luzingu. (Bin. 3:5, 6) Bu kena Nzambi yikabaka, Yehova ka tûlaka ndilu ko mu ntangu zi tulendi mu sambila.

2. Nti tuzonzela mu timoko ti?

² Kabu dia lusambulu dia tutomo zoloko. Kâ, mu bungu dia bisalu biabingi bibâka neto, wulendi bâ musamu wa mpasi mu sârisa ntangu ya sambila. Tulendi bâ mpe na nsatu ya tomesa tusambulu tweto. Musamu wa nsayi, tulendi baka lutindusu na malongi mu Bibila. Mu timoko ti, mbo tuzonzela ka bwe tulendi sârisila ntangu ya sambila bu tutaluzula tifwani tia Yezu. Mbo tuzonzela mpe mpila yi tulendi tomesena tusambulu tweto, bu tuzonzela misamu mitanu mia mfunu mi tulendi zonzela mu lusambulu.

3. Yezu nti kabakula mu musamu wutariri lusambulu?

³ Yezu wabakula ti tusambulu tweto nguria mfunu twena kwe Yehova. Ntete kiza ha mutoto, Yezu wamona Tata’andi weri hanaka mvutu mu tusambulu twa bakento na babakala ba kwikama. Mu tifwani, Yezu ho keri mu ntangu Tata’andi yi  kahana mvutu mu tusambulu twa nsungu twa Ana, twa Davide, twa Eliya na twa bisari biandi biakaka. (1 Sam. 1:10, 11, 20; 1 Mit. 19:4-6; Mik. 32:5) Ntiangu Yezu kalongesa kwe milongoki miandi mu vulu sambilaka na lukwikulu lwalwansoni!—Mat. 7:7-11.

4. Nti tulongokaka mu tusambulu twa Yezu?

⁴ Mu tusambulu twa yandi beni kwe Yehova, Yezu wasongela tifwani ti fweti landa milongoki miandi. Mu tisalu tiandi ha mutoto, Yezu mbo keri vulu sambilaka. Wafwanakana kasârisa ntangu ya sambila, mu bungu ti bisalu biabingi keri salaka mpe bantu babingi beri mu zungirilaka. (Mak. 6:31, 45, 46) Nkatika pari keri vumbukaka mu bâ na ntangu ya sambila ha yandi kaka. (Mak. 1:35) Lumbu timosi, wasambila mpimpa ya mukaka ntete kabonga nzengolo ya mfunu. (Like 6:12, 13) Mpe Yezu mbala zazingi kasambila mu mpimpa ntete lufwa lwandi bu katûla mabanza mandi mamansoni mu dema diandi dia mansukina ha mutoto dieri nguria mpasi mu lungisa.—Mat. 26:39, 42, 44.

5. Bwe tulendi landila tifwani tia Yezu bu tusambilaka?

⁵ Tifwani tia Yezu mbo titulongesaka ti ni bu sa ti bisalu biabingi bie neto, tufweti sârisa ntangu ya sambila. Ntiana Yezu, tulendi sârisa ntangu ya sambila—bu tuvumbuka mu nkatika pari peleko mu mpimpa. Bu tusila bo, mbo tusongela kwe Yehova ti mbo tutondaka mu kabu dio dia nzitukulu. Mpangi ya yikento ye na nkumbu Lynne mbo kabambukaka ka bwe katondela bu bamuzonzela kabu dia lusambulu mu mbala ya ntete. Têle ti: “Bu nalongoka ti ndendi zonza kwe Yehova ntangu zazansoni, wakumbakisa mu mona ti ndiku yena ye nguria penepene mpe nadinga mu tomesa tusambulu twani.” Ntembe kâni babingi mu beto bamonaka bo. Buna tataluzuleno misamu mitanu mia mfunu mi tulendi zonzela mu tusambulu.

6. Tintwari na Nzabukusu 4:10, 11, nti Yehova kafweti baka?

⁶ Kembela Yehova. Mu timona-meso timosi tia nzitukulu, ntumwa Za wamona bakuluntu ba 24 ku mazulu beri sambilaka Yehova. Mpe bakembela Nzambi bu batâ ti ni Yandi fwanakane mu tambula ‘nkembo, nsangu na lulendo.’ (Tanga Nzabukusu 4:10, 11.) Misamu miamingi misaka mpe ti mbazi za  kwikama zakembela Yehova. Ku zulu bena na Yandi mpe balongoka mu tomo mu zaba. Mbo bamonaka bifu biandi mu nzila ya bima bi kasala. Bu bamonaka ka bwe Yehova kasarilaka, mbo wubatumaka mu mu kembela.—Yobe 38:4-7.

7. Mu bungu dia nti tufweti kembela Yehova?

⁷ Beto mpe tufweti kembelaka Yehova mu tusambulu tweto, bu tumuzonzela misamu mi tuzololo mu Yandi na mi tumutondelaka. Bu ta kwe tangi Bibila, na bu ta kwe dia longoke yêla mu baka bifu bi songelaka Yehova bi tomo zoloko. (Yobe 37:23; Rom. 11:33) Ha manima tâ kwe Yehova ka bwe monaka mu bungu dia bifu bio. Tulendi kembela mpe Yehova mu bungu ti beto kabakisaka na mpangi zeto zazansoni. Ntangu zazansoni mbo katukipaka mpe mbo katukengerelaka.—1 Sam. 1:27; 2:1, 2.

8. Ntia misamu miakaka tutondelaka Yehova? (1 Bisi-Tesalonike 5:18)

⁸ Tondaka Yehova. Misamu miamingi misaka ti tatonda Yehova mu tusambulu tweto. (Tanga 1 Bisi-Tesalonike 5:18.) Tulendi mu tonda mu bungu dia bima biabiansoni bia mbote bie neto; diangana, makabu mamansoni ma mbote kwe Yandi matûkaka. (Zaki 1:17) Mu tifwani, tulendi songela ti mbo tutondaka mu bungu dia mutoto’eto wa toma na mu bungu dia bima bia nzitukulu bi kayirika. Tulendi tonda mpe mu bungu dia luzingu lweto, kanda dieto, ndiku zeto na tivuvu tieto. Mpe mbo tuzoloko mu tonda Yehova mu bungu dia bweso bwa toma bu katuhana bwa bâ ndiku zandi.

9. Mu bungu dia nti tufweti kurisila tifu tia tondaka Yehova?

⁹ Kampe muna muntu mu beto fweti bongaka ntangu ya banza misamu mi kalendi tondela Yehova. Lumbu ti bantu babingi balembo tondaka. Bantu mbo batûlaka mabanza mawu mu mio mi bazoloko kani batoko tonda mu bungu dia bima bie nawu. Tamana batika mu bâ na mabanza mo, tusambulu tweto tulendi fuluka mu ndombolo. Mu sila musamu wo keba, tufweti tatamana mu kurisa na mu songela tifu tieto tia tonda mu bungu dia misamu miamiansoni mi yirikaka Yehova mu bungu dia beto.—Like 6:45.

10. Bwe tifu tia tondaka tiabakisila mpangi yimosi ya yikento mu korela? (Tala mpe tifwani.)

¹⁰ Tifu tia tondaka tilendi tu bakisa mu korela mpasi. Tazonzeleno tifwani tia Kyung-sook, tie mu Nzo ya Zangama ya Munkengi ya 15 janvier 2015. Bamubaka na kansere ya poumons yatomo yela. Têle ti: “Musamu wo wa timbevo watomo ku nôkesa. Nayizi mona ti nahombesa bima biabiansoni, mpe nayizi tomo bâ na bunkuta.” Ngano nti biamubakisa mu korela musamu wo? Têle ti nkokela zazansoni ntete kenda ku mfulu, mbo keri kwendaka ku zulu muluri wa nzo mu kwe sambila mu zu dia tumbu mu bungu dia misamu mitanu mi keri vuturilaka matondo mu tilumbu tio. Tifu tio tiasa ti ka bândi na lwaka lwalwingi,  mpe kasongela luzolo lwandi mu Yehova. Wayizi longoka mpila Yehova yi kasarilaka mu bakisa bisari biandi bu babwabanaka na misamu mia mpasi, wayizi bakula mpe ti mu luzingu lweto tusakumunu twingi tubakaka yôka misamu mieto mia mpasi. Ntiana Kyung-sook, misamu miamingi misaka ti tatonda Yehova, ni bu sa ti mu mpasi twena. Tifu tia mu tondaka tilendi tu bakisa mu korela na mu tatamana mu bâ mu tidzunu.

11. Yezu bu kamana kâla ku zulu, mu bungu dia nti milongoki miandi mieri na nsatu butindi?

¹¹ Lomba kwe Yehova kakuhana butindi mu samuna. Ntete kakâla ku zulu, Yezu wabambula kwe milongoki miandi tisalu tiawu tia tâ timbangi tiandi ‘ku Yerusaleme, ku Yude yayansoni, ku Samaria, na tii kwa sukina mutoto nsi.’ (Bis. 1:8; Like 24:46-48) Ha manima ma mwa ntangu, Bayuda bakanga ntumwa Piere na Za mpe babanata ha matu ma Sanedre, bahana ntumunu ti babakala bo ba kwikama babika mu samuna, mpe babasila miangu. (Bis. 4:18, 21) Ngano Piere na Za bwe basa?

12. Tintwari na Bisalu 4:29, 31, ngano milongoki nti miasa?

¹² Mu hana mvutu mu miangu mia mfumu za mabundu, Piere na Za batâ ti: ‘Ngano ha meso ma Nzambi, nti biyôkele bubote, mu lu tumamana keti mu tumamana Nzambi? Banza’eno’eti! Beto konga, ka tulendi’â tabika ko mu zonzela mio mi tawiri na mi tamweni.’ (Bis. 4:19, 20) Bu bayambula Piere na Za, milongoki miasambila Yehova mu zu dia tumbu mpe miazonzela luzolo lwandi. Basambila ebu: ‘Hana mpe kwe bisari biaku nguria butindi bwa samuna Zu diaku.’ Yehova wahanina mvutu mu lusambulu lo lwa nsungu.—Tanga Bisalu 4:29, 31.

13. Nti tulendi longoka mu tifwani tia Jin-hyuk?

¹³ Tulendi landa tifwani tia milongoki bu tutatamana mu samuna ni bu sa ti bamfumu batuyimini. Tabongeno tifwani tia mpangi ya yibakala ye na nkumbu Jin-hyuk, yi bakanga mu bungu ti ka kotaka misamu mia politike ko. Ku boloko, bamuhana dema dia kipaka bantu bakaka beri mu boloko dia bawu kaka, kâ bamuyimina mu zonzela misamu mieri lembo tarilaka dema diandi, mu kati na Bibila. Wasambila mu baka butindi na mu bâ na buzitu bwa zonzela matieleka ntangu zazonsoni zi kaketi baka bweso. (Bis. 5:29) Têle ti: “Yehova wahanina mvutu mu tusambulu twani bu kakungana butindi na ndwenga mu batika ndongokolo za Bibila zeri zingilaka minite 5, mpe zi ndieri batikilaka ha mielo mia boloko. Mpe mu mpimpa mikanda ndieri tsonekaka mi ndieri hanaka kwe bantu beri ku boloko tilumbu tieri landaka.” Beto mpe tulendi bâ na lukwikulu ti Yehova mbo katubakisa mu lungisa tisalu tieto tia samuna. Ntiana Jin-hyuk tulendi sambila mu baka butindi na ndwenga

14. Nti bilendi tu bakisa bu tutelamanaka misamu? (Mikunga 37:3, 5)

¹⁴ Lomba lubakusu kwe Yehova mu telamana misamu miaku. Babingi ha kati dieto babwabanaka na misamu mia mpasi mu tinsuni peleko mu mabanza ntiana hombesa muntu wu bazololo, musamu wa mpasi mu kanda, nkwamusu, peleko musamu wakaka. Mpe misamu miakaka ntiana pandémie na mizingu miayizi sa ti misamu miavutu tomo bâ mpasi mu korela. Ziburila Yehova mutima’aku. Mu zonzela musamu’aku ntiana bu lendi wa zonzela kwe ndiku yi lwena penepene. Bâ na lukwikulu ti Yehova mbo kasala mu bungu dia nge.—Tanga Mikunga 37:3, 5.

15. Bwe lusambulu lulendi tu bakisila mu korela misamu mia mpasi? Hana tifwani.

 ¹⁵ Tifu tia tatamana mu lusambulu mbo titubakisa mu korela misamu mia mpasi. (Rom. 12:12) Yehova zebi ka ntia misamu bisari biandi babwabanaka na mio—“mbila zawu za lubakusu kawâka.” (Mik. 145:18, 19, NWT) Kristie mpangi ya yikento ye mupasuri-nzila mpe ye na mvula 29 wayizi bakula ti musamu wo wa matieleka wena. Mu ta-pulukusu tikolela tiandi tiabatika mu beba. Buna wayizi tomo nôka. Ha manima, wayizi wâ ti nguri’andi bayizi mu baka na timbevo tiaketi mu nata ku lufwa. Kristie têle ti: “Bilumbu biabiansoni mbo ndieri lombaka kwe Yehova kakungana ngolo zeri nani nsatu. Nayêla mu bâ na programe ya mbote ya misamu mia timpeve bu ndieri kwendaka ku tukutakanu, na bu ndieri saka ndongokolo ya Bibila ya me beni.” Vutulu yika: “Lusambulu lwakumbakisa mu korela ntangu zo za mpasi. Nazaba ti Yehova ntangu zazansoni hô kwa keri, mabanza mo makumbakisa mu bâ mu tidzunu. Ni bu sa ti tikolela tiani ka tiayizi’â toma ko ho nkatika bendo, Yehova wahana mvutu mu tusambulu twani bu kakungana tidzunu tia mutima.” Kani kabwe ka tuzimbakanandi ti ‘Yehova zebi vukisa ha mpasi bantu bê na lwaka lwa Nzambi.’—2 Pi. 2:9.

16. Mu bungu dia nti twe na nsatu lubakusu lwa Yehova mu telamana ntontolo?

¹⁶ Lomba kwe Yehova kakubakisa mu telamana ntontolo. Bu twena bantu ba masumu, ntangu zazansoni mbo wufwanakanaka tatelamana ntontolo za yirika musamu wa mbi. Satana mbo kasaka miamiansoni mi kalenda ngatu wabâ musamu wa mpasi kwe beto mu telamana ntontolo. Mpila yimosi yi kasarilaka mu yêla mu bebesa mbanzulu zeto ni nsaka za mbi. Nsaka za mpila yo zilendi sa ti tabâ na mbanzulu za mbi—mbanzulu za mpila yo  zilendi bebesa timuntu tieto tia kati mpe zilendi tu nata mu yirika masumu ma manene.—Mak. 7:21-23; Zaki 1:14, 15.

17. Bu tumana lomba lubakusu mu lusambulu, nti tulendi sa mu lembo kota mu ntontolo? (Tala mpe tifwani.)

¹⁷ Nsatu lubakusu lwa Yehova ye neto tala ti tuzololo tatelamana ntontolo za yirika musamu wa mbi. Yezu wakotesa ndombolo yo mu lusambulu lu kalongesa, watâ ti: ‘Kutukotesandi mu ntontolo, kâ tu kakula mu mbi.’ (Mat. 6:13) Yehova zololo katubakisa, kâ tufweti mu lomba lubakusu lwandi, tufweti mpe sala tintwari na tusambulu tweto. Tulendi sa miamiansoni mi tulenda mu lembo tanga na mu lembo wirikila mabanza ma mbi ma vulu sarilaka bantu bê mu nza ya Satana. (Mik. 97:10) Tulendi fulusa mbanzulu zeto mu misamu mia mbote bu tutanga na bu tulongoka Bibila. Tifu tia kwendaka ku tukutakanu na tia salaka tisalu tia samuna mbo bikengerelaka mpe mabanza meto. Yehova tu kanisini ti, ka tubwabana na ntontolo ko za tulendi lembo korela.—1 Kor. 10:12, 13.

18. Beto bansoni nti tufweti sa mu musamu wutariri lusambulu?

¹⁸ Muna muntu mu beto fweti kurisa tifu tiandi tia sambila mu tatamana mu bâ wa kwikama kwe Yehova mu bilumbu bi bia mansukina bia mpasi. Bilumbu biabiansoni sârisaka ntangu ya sambila na bunsungu bwabwansoni. Yehova zololo ti tamuziburila mitima mieto mu lusambulu. (Mik. 62:8) Kembelaka Yehova mpe mu tondaka mu miamiansoni mi kayirikaka. Mu lomba kakubakisa mu bâ na butindi mu tisalu tia samuna. Mu lemberela kakubakisa mu korela musamu ni musamu wa mpasi na mu telamana ntontolo zilendi bwabana na zo. Kubikandi ti muntu peleko tima tiakukabakasa mu vulu sambilaka Yehova. Bwe Yehova kahaninaka mvutu mu tusambulu tweto? Tiyuvu tio tia mfunu ni tio tutaluzula mu timoko tilanda.