1. Ngano nti bia ntete bisobesaka timuntu tieto?

 NI BU sa ti ka ntama ko tabatusu peleko tûka mivu miamingi twe ba batusu, beto bansoni tuzololo tabâ bantu Yehova ba kazololo. Mu bâ mpila ya bantu bo, tufweti zabirila mbanzulu zeto. Mu bungu dia nti? Mu bungu ti mbanzulu zeto mbo zitomo sobesaka timuntu tieto. Tala ti mbo tuvulu banzaka mu lungisa nsatu zeto za tinsuni, mbo tutâ mpe mbo tuyirika misamu mia mbi. (Efz. 4:17-19) Ku lweka lwakaka, tala ti misamu mia mbote tuvulu banzaka, mbo tubâ na lenda diadingi dia tâ mpe dia yirika misamu miyangirikaka Tata’eto Yehova.​—Nga. 5:16.

2. Ntia biyuvu tutaluzula mu timoko ti?

² Ntiana bu tazonzele wo mu timoko tiayôkele, ka tulendi’â takabakasa mbanzulu zazansoni za mbi ko zituturilaka. Kâ tulendi sola mu lembo sarila mbanzulu zo. Ntete tabatusu, tufweti bika nzonzolo na ndiatulu yi yinaka Yehova. Yo ni mpila ya ntete mpe yiyôkele mfunu mu katula timuntu tia ntama. Kâ mu tomo yangirika Yehova, tufweti mpe tumamana ntumunu eyi yitâka: “Lwateno timuntu tia môna.” (Kol. 3:10, NWT) Mu timoko ti, mbo tuhanina mvutu mu biyuvu ebi: Ngano “timuntu tia môna” ni nti? Bwe tulendi lwatila timuntu tia môna, mpe bwe tulendi tatamana mu bâ na tio?

3. Tintwari na Bisi-Ngalate 5:22, 23, ngano “timuntu tia môna” ni nti, mpe bwe muntu kalwatilaka tio?

³ Muntu we na “timuntu tia môna” mbo wulandaka tifwani tia Yehova. Muntu wulweti timuntu tia môna mbo kasarilaka mbutu ya mpeve ya Nzambi, mbo kabikaka mpeve santu yasobesa  mbanzulu zandi na ndiatulu’andi. (Tanga Bisi-Ngalate 5:22, 23.) Mu tifwani, mbo kazoloko Yehova na kanda diandi. (Mat. 22:36-39) Muntu wa mpila yo mbo katatamanaka mu bâ na nsayi ni bu sa ti misamu mia mpasi kata korela. (Zaki 1:2-4) Tidzunu kazololo. (Mat. 5:9) Mbo kabongelaka bampwana’andi na luvivululu mpe na nsayi. (Kol. 3:13) Misamu mia mbote mia kazololo mpe mbo kayirikaka mio. (Like 6:35) Mbo kasongelaka mu nsalulu zandi ti timinu tia ngolo tie nandi mu Tata’andi dia ku mazulu. (Zaki 2:18) Mbo kabâka wa lembama bu bamutsotsaka, mpe mbo kasarilaka tifu tia tiyimina bu kabâka mu ntontolo.​—1 Kor. 9:25, 27; Tite 3:2.

4. Mu lwata timuntu tia môna, mu bungu dia nti tufweti bâ na bifu biabiansoni bie mu Bisi-Ngalate 5:22, 23 na mu verse zakaka za Bibila?

⁴ Mu lwata timuntu tia môna, tufweti bâ na bifu biabiansoni bia mbote bie mu Bisi-Ngalate 5:22, 23 na bie mu verse zakaka. * Bifu bio ka biena ntiana binkuti bia hambana ko bi tulwataka. Kâ, bilendi moneka mu kati dia bifu biakaka. Mu tifwani, Tala ti mpwana’aku ya tomono zolo, mbo mu bongela na luvivululu mpe na nsayi. Mpe mu tomo sarila mbote, fweti bâ na bulembami mpe na tifu tia tiyimina.

5. Ngano bâ na ‘mbanzulu za Kristo’ bwe wuta zolo tâ, mpe mu bungu dia nti tufweti longokela luzingu lwa Yezu? (1 Bisi-Korente 2:16)

⁵ Tanga 1 Bisi-Korente 2:16. Mu lwata timuntu tia môna, tufweti bâ na ‘mbanzulu za Kristo.’ Mu nzonzolo yakaka, tufweti longoka ka bwe Yezu keri banzilaka mpe tufweti landa tifwani tiandi. Yezu mbo keri tomo sarilaka bifu bie mu mbutu ya mpeve mu mpila ya lunga. Ntiana kwa titâri, mbo keri tomo monekesaka bifu bia Yehova mu mpila ya lunga. (Ebr. 1:3) Bu tutomo kwe banzi ntiana Yezu, mbo tukwizi tomo sarila ntiana yandi, mpe mbo tukwizi tomo bâ ntiana yandi.​—Flp. 2:5.

6. Ntia misamu tufweti bambukilaka mu ntangu yi tusarilaka ngolo mu lwata timuntu tia môna?

⁶ Ngano wa matieleka tulendi landa tifwani tia Yezu? Tulendi banza ti: ‘Yezu wa lunga wena. Kani ka bwe ka ndendi’â nabâ ntiana yandi ko!’ Tala ti ni bo ta banza, bambukila misamu emi. Musamu wa ntete, bakusala mu bâ ntiana Yehova na Yezu. Buna, lendi sola mu landa tifwani tiawu, mpe lendi lenda, ni  bu sa ti ka mu mpila ya lunga ko. (Mba. 1:26) Musamu wa nzole, Mpeve santu ni ngolo ziyôkele mu nza. Na lubakusu lwandi, lendi lungisa misamu mi lendi lembo lungisa mu ngolo za nge beni. Musamu wa ntatu, Yehova ka kêlaka ko ti wasongela bifu bia mbutu ya mpeve mu mpila ya lunga. Kâ, Tata’eto die na luzolo wasârisa mvula 1 000 mu bungu dia bantu bê na tivuvu tia bâ ha mutoto mu kwizi bâ ba lunga. (Nza. 20:1-3) Tima ti tu lombaka Yehova lumbu ti ni mu sarila ngolo zeto na mu sikirila lubakusu lwandi.

7. Ngano nti tutaluzula bwawu bu?

⁷ Bwe tulendi landila tifwani tia Yezu? Mbo tuzonzela bifu biyà bia mbutu ya mpeve mu bukufi. Mbo tumona mpila Yezu yi keri sarilaka muna tifu, mpe mbo tubaka malongi mu mpila zo. Mbo tukwe taluzuri mwa biyuvu bitubakisa mu zaba ka bwe tulendi tomesena timuntu tieto tia môna.

8. Bwe Yezu kasongela luzolo?

⁸ Mu bungu ti Yezu luzolo lwalwingi lweri nandi mu Yehova wazolo mu tihana mu bungu dia Tata’andi na mu bungu dia beto. (Za 14:31; 15:13) Yezu wasongela ti bantu ba keri tomo zoloko mu mpila yi keri natinaka luzingu lwandi ha mutoto. Bilumbu biabiansoni, mbo keri songelaka luzolo na tiari tia mutima, ni bu sa ti bantu bakaka mbo beri mu telamanaka. Mpila ya mfunu yi kasongela luzolo mu bantu ni mu ntangu yi keri ba longesaka misamu mitariri Timfumu tia Nzambi. (Like 4:43, 44) Yezu wasongela mpe luzolo lwandi mu Nzambi na mu bantu bu katambula mu mona mpasi na mu fwa ha moko ma bantu ba masumu. Bu kasila bo, wahana bweso kwe beto bansoni bwa baka luzingu lwa mankululu.

9. Ngano bwe tulendi landila tifwani tia Yezu mu mpila ya songela luzolo?

⁹ Tatihana kwe Yehova mpe tabatusu mu bungu ti Tata’eto dia ku mazulu tu zololo. Buna, ntiana Yezu, tufweti songelaka ti Yehova Yandi tu zololo mu mpila yi tubongelaka bampwana’eto. Ntumwa Za watâ ti: ‘Wô lembo zolo mpwana’andi wu kamonaka, ka lendi’â kazolo Nzambi ko wu kalembo monaka.’ (1 Za 4:20) Tulendi tiyula: ‘Ngano luzolo lwa ngolo lwe nani mu bungu dia bampwana’ani? Ngano tiari tia mutima tibâka nani mu bantu bakaka, ni bu sa ti ka bata kunzitisa ko? Ngano luzolo mbo lukuntumaka mu sarila ntangu’ani na bimvwama biani mu bakisa bantu mu zaba Yehova? Ngano mbo nizoloko mu sila bo ni bu sa ti bantu babingi balembo tambulaka ntono ngolo zi nisarilaka peleko mu ntangu yi bakuntelamanaka? Ngano ndendi dinga mpila zi niyôkesela ntangu yayingi mu tisalu tia kubika milongoki?’​—Efz. 5:15, 16.

10. Mu bwe Yezu keri muntu wusaka tidzunu?

¹⁰ Yezu mbo keri zoloko mu sa tidzunu. Mu ntangu bantu yi beri mu bongelaka mu mpila ya mbi, keri’â karisaka mbi mu mbi ko. Kâ keri’â sukisinaka kwa ho ko. Mbo keri bongaka nzengolo ya sa tidzunu, mpe mbo keri tindisaka bampwana’andi mu yirika misamu miawu. Mu tifwani, wabalongesa ti bafweti sa tidzunu na mpangi zawu tala ti bazololo ti Yehova katambula nsambululu’awu. (Mat. 5:9, 23, 24) Mpe mbo keri vulu bakisaka bantumwa mu bika mu dinga mu zaba ka nani wayôka mu babansoni.​—Like 9:46-48; 22:24-27.

11. Ngano bwe tulendi bêla bantu basaka tidzunu?

¹¹ Mu bâ muntu wusaka tidzunu, ka tufweti’â kwa tabika mu bâka na misamu na bampwana’eto ko. Tufweti bonga nzengolo ya saka tidzunu na bampwana’eto, mpe ya tindisa mpangi zeto mu yirikaka misamu miawu. (Flp. 4:2, 3; Zaki 3:17, 18) Tulendi tiyula biyuvu ebi: ‘Ngano nti ndendi hombesa mu sa tidzunu na bantu bakaka? Mu ntangu mpangi  yikumfwemesaka, ngano mbo nimukangilaka diki? Ngano mbo nikêlaka mpangi yo kizi tasa tidzunu, peleko mbo nibâka wa ntete mu sa tidzunu ni bu sa ti ni yandi tulumuni musamu? Tala ti wufwanakane, ngano mbo nitindisaka bantu bê na musamu mu sa tidzunu?’

12. Ngano bwe Yezu kasongela nsayi ya sarila mbote?

¹² Yezu nsayi ya sarila mbote yeri nandi. (Mat. 11:28-30) Wasongela nsayi ya sarila mbote bu keri wa lembama mpe bu keri bâka na mabanza ma delakana ni bu sa ti mu misamu mia mpasi. Mu tifwani, mu ntangu mukento wumosi wa ku Fenisi kamulemberela mu wasisa mwana’andi, ha mbatukulu, Yezu ka tambula ndombolo’andi ko, kâ bu kasongela timinu tia ngolo, Yezu wawasisa mwana’andi. (Mat. 15:22-28) Ni bu sa ti nsayi ya sarila mbote yeri nandi, Yezu keri’â bikaka ko mu hana malongi. Ntangu zakaka, wasongela nsayi ya sarila mbote bu keri sembaka bô ba keri zoloko. Mu tifwani, mu ntangu Piere yi kayêla mu mu nôkesa mu sarila luzolo lwa Yehova, Yezu wamusungika ha meso ma milongoki miakaka. (Mak. 8:32, 33) Ka sila bo ko mu fwisa Piere nsoni, kâ mu mu kubika na mu lwengesa milongoki miakaka mu lembo yirika misamu mi balembolo na nswa. Ntembe kâni Piere wamona mwa nsoni, kâ wabaka ndandu mu nsembolo yo.

13. Bwe tulendi songela nsayi ya sarila mbote ya matieleka?

¹³ Mu songela nsayi ya sarila mbote kwe bô ba zololo, ntangu zakaka fweti ba hanaka malongi. Bu sila bo, landa tifwani tia Yezu weri hanaka malongi masikamanaka mu mitieno mia Zu dia Nzambi. Bâ na bulembami. Bâ na lukwikulu ti we nawu bayirika misamu mia mbote, bu kwe kwikiri ti bô bazololo Yehova mpe bakuzololo mbo batambula malongi maku mpe mbo basarila mo. Tiyula biyuvu ebi: ‘Ngano butindi bwe nani bwa zonza bu nimonaka muntu wunzololo wuta yirika musamu wa mbi? Tala ti mfweti hana malongi, ngano mbo nizonzaka na nsayi ya mutima, peleko mbo nizonzaka na nkesi? Ngano nti bikuntumaka mu hana malongi? Ngano mbo nihanaka mo mu bungu ti nkesi ze nani mu muntu wu nita longa, peleko nzololo namubakisa?’

14. Bwe Yezu kasongela mbote ya ku mutima?

¹⁴ Yezu wazaba misamu mieri mia mbote, mpe mbo keri mia yirikaka. Yezu Tata’andi dia kazololo, buna ntangu zazansoni mbo kayirikaka mbote na mabanza ma mbote. Muntu wusarilaka mbote ya ku mutima, ntangu zazansoni mbo kadingaka mpila za bakisa bampwana’andi mpe mbo kabayirikaka misamu mia mbote. Tufweti zaba misamu mia mbote, kâ mpe tufweti mia yirika na mabanza ma mbote. Tulendi tiyula: ‘Ngano tulendi yirika musamu wa mbote na mabanza ma mbi?’ Yee. Mu tifwani, Yezu wazonzela bantu beri hanaka makabu kwe bamputu mpe beri dingaka ti bantu bakaka bazaba makabu mawu ngatu babakembela. Misamu mia mbote mieri monekaka, kâ ka mieri’â nguria salu ko kwe Yehova.​—Mat. 6:1-4.

15. Bwe tulendi sarila mbote ya ku mutima ya matieleka?

¹⁵ Tulendi sarila mbote ya ku mutima ya matieleka na mabanza ma mbote. Buna lendi tiyula biyuvu ebi: ‘Ngano misamu mia mbote mi mfweti yirika mia nzebi, mpe mia niyirikaka? Ngano nti bikuntumaka mu yirika misamu mia mbote?’

16. Nti tufweti saka bilumbu biabiansoni, mpe mu bungu dia nti?

¹⁶ Ka tufweti’â tabanzaka ko ti bu tumana batusu tutomono lwata timuntu tia môna, mpe ka tusiri’â na nsatu ya sa nsobolo ko. Tufweti sa ti “tinkuti tieto tia môna” mpe tia toma tiatatamana mu bâ tia mbote. Tulendi sila bo, mu ntangu yi tudinga mu sarilaka bifu bia mbutu ya mpeve bilumbu biabiansoni. Mu bungu dia nti? Mu bungu ti Yehova Nzambi yena yisalaka, mpe mpeve’andi ngolo zena zisalaka. (Mba. 1:2) Buna muna tifu tia mbutu ya mpeve tilendi, mpe tifweti tu tuma mu sala. Mu tifwani, mulongoki Zaki watsoneka ti: “Timinu tilembolo na nsalulu tia fwa tiena.” (Zaki 2:26) Musamu wo wulendi tarila mpe bifu biabiansoni bia mbutu ya mpeve. Ntangu zazansoni zi tusarilaka bifu bio, mbo tusongelaka ti mpeve ya Nzambi ya yisalaka mu beto.

17. Bwe tufweti saka mu ntangu yi tulembanaka mu sarila mbutu ya mpeve?

¹⁷ Bakristo babatusu tûka mivu miamingi mpe, mbo bakondoko mu sarila mbutu ya mpeve. Kâ, musamu wa mfunu ni mu lembo bika. Tabongeno tifwani. Tala ti tinkuti tiaku ti zololo titendokele, ngano mbo losa tio mbala mosi? Kâni. Ntembe kâni, mbo dinga walonda tio tala ti bulendi bâ. Mpe mbo tomo sa keba mu bilumbu bilanda. Mpila mosi mpe, tala ti lembane mu songela nsayi, luvivululu, peleko luzolo kwe muntu, kunôkandi. Lomba mulemvo na bunsungu bwabwansoni ngatu watatamana mu bâ na tindiku tia mbote na muntu wo. Bonga nzengolo ya sarila bifu bia mbote mu bilumbu bilanda.

18. Ngano ntia lukwikulu lulendi bâ neto?

¹⁸ Diangana mbo tutondaka mu tifwani tia sisa Yezu! Bu tutomo kwe landi mbanzulu na nsalulu zandi, ka wubâ musamu wa mpasi ko kwe beto mu diatila ntiana yandi. Bu tutomo kwe diatiri ntiana Yezu, mbo tutomo kwizi lwata timuntu tia môna. Mu timoko ti, bifu biyà kwa tuzonzele bia mbutu ya mpeve ya Nzambi. Ngano lendi bonga ntangu ya longoka bifu biakaka bia mbutu ya mpeve na mu dimbitila mu mpila yi sarila bio? Mbo baka bimoko bizonzelaka bio mu Guide de recherche des Témoins de Jéhovah bu kota mu “Mode de vie chrétien” mpe bu kota mu “Fruit de l’esprit.” Lendi bâ na lukwikulu ti bu sarila ngolo zaku zazansoni, Yehova mbo kakubakisa mu lwata timuntu tia môna na mu tatamana mu bâ na tio.