1-2. Tala ti ka wena wa kubama ko mu batusu, mu bungu dia nti fweti lembo bêla wa nôka? (Tala tifwani ha tinima tia ntete.)

 TALA ti zololo wabatusu, kani dia toma die naku. Ngano wa kubama wena mu bonga nzengolo yo bwawu bu? Tala ti mweni ti wa kubama wena, mpe bakuluntu batamburi ngatu wabatusu, kulembeketandi mu sila bo. Luzingu lwa nsayi luta ku kêla mu tilumbu tia Yehova.

² Ku lweka lwakaka, ngano beka ku têla ti nsobolo zakaka fweti sa ntete wabatusu? Ngano nge beni mbo bakulaka ti nsobolo fweti sa? Tala ti ni bo, kunôkandi. Lendi sa nsobolo zifwanane mu tula ha titini tio tia mfunu, ni bu sa ti ntwenia wena peleko wa nuna.

3. Ngano muntu weri salaka ku nzo ya mutinu wa ku Etiopi nti kayula kwe Filipe, mpe musamu wo ntia tiyuvu wuta nata? (Bis. 8:36, 38)

³ Tanga Bisalu 8:36, 38. Muntu weri salaka ku nzo ya mutinu wa ku Etiopi wayula Filipe: ‘Nti bita kanga nzila mu kumbatisa?’ Musi-Etiopi wo weri nandi kabatusu, kâ ngano wa kubama weri ngatu kabatusu?

4. Bwe Musi-Etiopi kasongela ti nzengolo kabonga ya tatamana mu longoka?

⁴ Musi-Etiopi wo wayenda ku Yerusaleme mu kembela Nzambi. (Bis. 8:27) Buna, muntu wa nsi yakaka weri watambula tikulu tia Bayuda; wayizi tambula nsambululu ya Bayuda. Ntembe kâni wayizi longoka mu Matsonoko ma santu ma Hebre ti Yehova kô kena. Kâ nsatu yayingi yeri nandi mu longoka misamu miakaka. Mu ntangu yi kabwabana na Filipe mu nzila, ngano  Musi-Etiopi wo nti keri saka? Rulo ya Matsonoko ma mbikuri Izaya keri tangaka. (Bis. 8:28) Bidia bia dema bia timpeve bieri. Musi-Etiopi wo ka sukisina ko kwa mu longoka misamu mia fioti-fioti; weri nandi katatamana mu longoka.

5. Ngano Musi-Etiopi nti kasa mu misamu mi kalongoka?

⁵ Bakala dio tisari tia tinene tieri tia Kandase, mutinu wa mukento wa ku Etiopi; bimvwama biandi keri kipaka. (Bis. 8:27) Buna, kampe keri’â na ntangu yayingi ko mu bungu ti madema mamingi meri nandi. Kâ ntono misamu mio, ntangu yeri nandi ya sarila Yehova. Keri’â sukisinaka kwa mu longoka matieleka ko; mbo keri sarilaka mio mi keri longokaka. Buna wasa nzietolo tûka ku Etiopi mu kwe sambila Yehova ku Tempelo ya ku Yerusaleme. Mu sa nzietolo yo, diangana ntangu na mbongo zazingi zafwanakana, kâ bakala dio ka sa munkanga ko mu musamu wutariri nsambululu ya Yehova.

6-7. Ngano luzolo lweri na Musi-Etiopi mu Nzambi bwe lwatatamana mu kula?

⁶ Musi-Etiopi walongoka matieleka ma môna ma mfunu kwe Filipe. Wayizi longoka mpe misamu mitariri Masiya. (Bis. 8:34, 35) Kampe Musi-Etiopi wo wayizi bâ na nsayi mu zaba misamu miamiansoni mia yirika Yezu mu bungu dia yandi. Ngano nti kasa bu kamana zaba misamu mio? Lenda dieri nandi dia bâ kwa buna bu keri, mbo beri mu bongelaka ntiana nzenza yi beri zitisaka yatambula tikulu tia Bayuda. Kâ, luzolo lwandi mu Yehova na mu Mwana’andi lwayizi kula. Wayizi bâ na timina dia bonga nzengolo ya mfunu ya batusu ngatu kabâ mulongoki wa Yezu Kristo. Filipe wamona ti muntu wo wa kubama weri, buna wamubatisa.

⁷ Wamana landa tifwani tia Musi-Etiopi wo, lendi kwizi kubama mu bungu dia bateme. Buna na lukwikulu lwalwansoni lendi tâ mpe: ‘Nti bita kanga nzila mu kumbatisa?’ Tataleno ka bwe lendi yirikila misamu ntiana Musi-Etiopi: Watatamana mu longoka, wasarila misamu mi keri longokaka mpe watatamana mu kurisa luzolo lwandi mu Nzambi.

8. Ngano Za 17:3 ntia musamu yitâka wu fweti sa?

⁸ Tanga Za 17:3. Ngano misamu mio mia tâ Yezu miakubakisa mu bonga nzengolo ya longoka Bibila? Beto babingi tabaka lutindusu mô. Kâ verse yo mbo yitâka mpe ti tufweti tatamana mu longoka. Kani kabwe ka tubika ko mu ‘bakula [. . .] Nzambi ya matieleka.’ (Ekl. 3:11) Mbo tutatamanaka mu longoka ntangu zazansoni. Bu tutomo longoka misamu miamingi mitariri Yehova, mbo tutomo pusana kwe Yandi.—Mik. 73:28.

9. Nti tufweti sa bu tumana baka luzabu lwa matieleka ma nguri?

 ⁹ Diangana, luzabu lwa Yehova mu misamu mia nguri lubatikilaka. Mu mukanda’andi kwe Bahebre, ntumwa Paulo watâ ndongosolo za nguri ‘misamu mia mbatukulu.’ Keri’â nioniaka ndongosolo ya mbatukulu ko; mbo keri ya fwanakasaka na mabeni ma yemaka mwana. (Ebr. 5:12; 6:1) Watindisa Bakristo babansoni mu lembo longoka kwa ndongosolo za nguri, kâ mu tatamana mu longoka matieleka ma ndilu ma Zu dia Nzambi. Ngano nsatu yayingi ye naku ya longoka misamu mia ndilu mia Bibila? Ngano zololo watatamana mu kula na mu tatamana mu longoka misamu mitariri Yehova na makani mandi?

10. Mu bungu dia nti bantu bakaka bamonaka ti musamu wa mpasi wena mu longoka?

¹⁰ Kwe bantu babîngi musamu wa mpasi wena mu longoka. Mbo kwe nge? Ngano ku lukolo, bakulongesa mu tanga na mu longoka? Ngano longoka nsayi kukutâka, mpe mbo monaka ti miamingi kwizi bakulaka? Peleko mbo banzaka ti mutu’aku ka wena na lenda ko dia longoka mabuku? Tala ti ni bo, ka wena nge kaka ko. Kâ, Yehova lendi ku bakisa. Wa lunga wena, mpe Yandi ni Mulongi wuyôkele.

11. Bwe Yehova kasongelaka ti Yandi “Mulongi wa Wunene” wena?

¹¹ Yehova mbo katitâka Yandi beni “Mulongi wa Wunene.” (Iza. 30:20, 21) Luvivululu na nsayi ye nandi, mpe Mulongi wubakulaka wena. Misamu mia mbote mi yirikaka milongoki miandi katalaka. (Mik. 130:3) Mpe kani kabwe, ka kêlaka ko ti tayirika misamu mi tulendi lembo lenda. Bambukaka ti ni Yandi wayirika ntongwa zaku, ze kabu dia toma. (Mik. 139:14) Bu twena bantu, nsatu yibâka neto ya longoka. Mvangi’eto zololo ti tatatamana mu longoka mankululu—mpe tabaka ndandu mu mio mi tulongokaka. Buna, musamu wa ndwenga wena mu kurisa nsatu ya longoka matieleka bwawu bu. (1 Pi. 2:2) Bâ na makani ma lendi lungisa, mpe bâ na programe ya ntangulu na ya ndongokolo ya Bibila yi lendi zitisa. (Yos. 1:8) Na lusakumunu lwa Yehova, mbo kwizi lenda mu tanga na mu longoka misamu mimutariri, mpe mbo kwizi zolo mu sila bo.

12. Mu bungu dia nti tufweti tûlaka mabanza meto mu Yezu bu tulongokaka Bibila?

¹² Vulu bongaka ntangu ya dimbitila mu luzingu lwa Yezu na mu tisalu tiandi. Nguria mfunu wena mu tomo landaka tifwani tia Yezu tala ti tuzololo tasarila Yehova, nsungula mu ntangu za mpasi. (1 Pi. 2:21) Yezu watomo zonzela misamu mia mpasi mia keti bwabana na milongoki miandi. (Like 14:27, 28) Kâ, lukwikulu lweri nandi ti milongoki miandi mia matieleka mbo miaketi lenda mu telamana misamu mia mpila yo ntiana yandi. (Za 16:33) Longoka misamu mitariri luzingu lwa Yezu ha mutoto, mpe bâ na makani ma landa tifwani tiandi mu luzingu lwaku lwa bilumbu biabiansoni.

13. Nti fweti tatamana mu lomba kwe Yehova, mpe mu bungu dia nti?

¹³ Luzabu lwawu kaka ka lulungaka ko. Musamu wusaka ti tabâ na luzabu ni mu bâ na lenda dia longoka misamu miamingi mitariri Yehova na mu kurisa bifu ntiana luzolo na timinu mu Yandi. (1 Kor. 8:1-3) Bu kwe tatamane mu longoka, tatamana mu lomba kwe Yehova kakubakisa mu baka timinu tiatingi. (Like 17:5) Mbo kahanaka mvutu na nsayi yayansoni mu tusambulu twa mpila yo. Timinu tia matieleka tisikamanaka mu luzabu lwa matieleka mu Nzambi’eto mbo tikubakisa mu sa nsobolo zazingi.—Zaki 2:26.

14. Ngano ntumwa Piere bwe kazonzela mfunu ya sarila misamu mi tulongokaka? (Tala mpe tifwani.)

¹⁴ Ntumwa Piere watomo zonzela ka bwe we  mfunu kwe milongoki mia Kristo mu tatamana mu sarila misamu mi balongokaka. Wazonzela tinsamu tia Bibila tia Noa. Yehova watâ ti mbo kaketi fukisa bankwa-mbi ba ntangu’andi mu nzila ya delize. Luzabu lwa mpamba mu musamu wo, ka lwaketi’â vukisa Noa na kanda diandi ko. Piere wazonzela ntangu ntete delize, ntiana ntangu ya ntungulu ya nzaza. (1 Pi. 3:20) Diangana Noa na kanda diandi basarila luzabu lweri nawu lwatûka kwe Nzambi mu tunga nzaza yeri bato ya yinene. (Ebr. 11:7) Ha manima Piere wayizi fwanakasa misamu mia yirika Noa na bateme, bu katsoneka: ‘Tio ni tifwani tia bateme tiluvukisaka.’ (1 Pi. 3:21) Buna, tulendi fwanakasa tisalu ti ta sala bwawu bu mu kubama mu bungu dia bateme na tisalu tia ntungulu ya nzaza tia sala Noa na kanda diandi tûka mivu miamingi. Ngano nti fweti sa mu kubama mu bungu dia bateme?

15. Ngano nsobolo ya mabanza ya matieleka ni nti?

¹⁵ Tima tia ntete ti tufweti sa ni mu soba mabanza mu masumu meto na bunsungu bwabwansoni. (Bis. 2:37, 38) Nsobolo ya mabanza ya matieleka mbo yinataka ku nsobolo ya ndiatulu ya matieleka. Ngano walosele nsalulu zilembo tâka Yehova nsayi ntiana bunsuza, nwa kwa fumu peleko nzonzolo ya bola, ya miangu na yitâka nkesi? (1 Kor. 6:9, 10; 2 Kor. 7:1; Efz. 4:29) Tala ti ka weka’eti lenda ko, tatamana mu sa nsobolo. Zonza na muntu wukulongesaka Bibila peleko lomba lubakusu na lutwalusu kwe bakuluntu ba mu timvuka. Tala ti nge ntwenia yena mpe na bibuti biaku bâka, tatamana mu lomba lubakusu kwe bibuti biaku mu losa bifu bia mbi bilendi ku kabakasa mu batusu.

16. Ngano bâ na programe ya misamu mia timpeve bwe wuta zolo tâ?

¹⁶ Musamu wa mfunu mpe wena mu bâ na programe ya mbote ya misamu mia timpeve. Buna, tufweti kwendaka ku tukutakanu, mpe tufweti hanaka mvutu. (Ebr. 10:24, 25) Bu kwizi lungisa misamu mifwanakane mu samuna na timvuka, sa ti tisalu tia samuna tiakota mu programe’aku. Bu tatamana mu sala tisalu tio tivukisaka luzingu, mbo kwizi tomo tia zolo. (2 Tim. 4:5) Tala ti ntwenia wena, mpe na bibuti biaku bâka, tiyula: ‘Ngano bibuti biani bifweti kumbambulaka mu kwenda ku lukutakanu na mu tisalu tia samuna? Peleko me beni nibongaka nzengolo ya sila bo?’ Tala ti  nge beni bakaka ngolo za sila bo, mbo songelaka timinu na luzolo lwaku mu Yehova, mpe mbo songelaka ti Yandi tondaka. Misamu mio mbo misongelaka ti lwaka lwa Nzambi lwe neto, mpe makabu mena ma tuhanaka kwe Yehova. (2 Pi. 3:11; Ebr. 13:15) Makabu mamansoni ma tuhanaka mu luzolo lwa mutima, mbo mayangirikaka Nzambi. (Fwanakasa na 2 Bisi-Korente 9:7.) Mbo tudiatilaka mu mpila yo mu bungu ti nsayi yibâka neto mu hana bima bieto bia ntalu kwe Yehova.

17-18. Ntia tifu tia mfunu tikubakisa, mpe mu bungu dia nti? (Bingana 3:3-6)

¹⁷ Bu kwe tatamane mu kubama mu bungu dia bateme, mbo kwizi bwabana na misamu mia mpasi. Bantu bakaka balendi ku sehesela mu bungu dia nkwikulu zaku za môna, balendi mpe ku telamana peleko balendi ku kwamisa. (2 Tim. 3:12) Bu sarilaka ngolo mu telamana tifu tia tibi, ntangu zakaka lendi vutu kwizi sarila tifu tio. Lendi kwizi bâ na timina peleko na tiari mu bungu ti ntangu yayingi yifwanakane mu lungisa kani diaku. Nti bikubakisa mu korela? Tifu timosi tia mfunu—luzolo mu Yehova.

¹⁸ Luzolo lwaku mu Yehova, tifu tia mbote tiena; tifu tiyôkele bubote mu bifu biabiansoni bie naku. (Tanga Bingana 3:3-6.) Luzolo lwa ngolo mu Nzambi lulendi ku bakisa mu lenda mu telamana misamu mia mpasi. Bibila mbo divulu zonzelaka luzolo lwa kwikama lwe na Yehova mu bisari biandi. Luzolo lwa kwikama mbo lusongelaka ti Yehova ka zimbakana bisari biandi ko, mpe ka bika ko mu ba zolo. (Mik. 100:5) Mu tifwani tia Nzambi bakusarila. (Mba. 1:26) Bwe lendi songela luzolo lwa mpila yo?

19. Bwe lendi songela ti mbo tondaka Yehova mu miamiansoni mi kayirikaka mu nge? (Bisi-Ngalate 2:20)

¹⁹ Mu batika songela ti tonda tondaka. (1 Tes. 5:18) Bilumbu biabiansoni tiyulaka: ‘Bwe Yehova kakunsongelaka luzolo?’ Ha manima, tonda Yehova mu tusambulu twaku, bu zonzela misamu mi kayirikiri mu bungu dia nge. Bakula ti Yehova misamu mia mbote kayirikiri mu bungu dia nge mu bungu ti nge kazololo, ntiana kwa bwa mona ntumwa Paulo mu bungu dia Yehova. (Tanga Bisi-Ngalate 2:20.) Tiyula: ‘Ngano me mpe nzololo namusongela luzolo?’ Luzolo mu Yehova mbo lukubakisa mu tatamana mu telamana ntontolo na mu korela misamu mia mpasi. Mbo lukutuma  mu tatamana mu landa programe’aku ya timpeve, mpe mbo songela ti luzolo lwaku mu Tata’aku mbo luta tatamana mu kula bilumbu biabiansoni.

20. Nti fweti sa mu tihana kwe Yehova, mpe mu bungu dia nti ye nzengolo ya mfunu?

²⁰ Ntangu bu yikwe yôke, luzolo lwaku mu Yehova mbo lukwizi ku tuma mu sa lusambulu lwa nzitukulu. Mbo kwizi tihana kwe Nzambi. Bambuka ti bu kwizi tihana kwe Yehova, mbo bâ na tivuvu tia toma: Yehova mbo kakuvwa ntangu zazansoni. Bu tihana kwe Yehova, mbo mu sila kani dia mu sarila mu ntangu za nsayi na za mpasi. Kuvutu’â bâ na nsatu ko ya sa kani dio. Diangana, bu tutihanaka kwe Yehova, nzengolo ya mfunu tubongaka. Nzengolo zazingi bonga mu luzingu lwaku, zakaka za nguria za mbote zibâ, kâ ka kwena nzengolo ko yiyôka ya tihana kwe Yehova mu bubote. (Mik. 50:14) Satana mbo kayêla mu wolesa luzolo lwaku mu Tata’aku mu bungu ti lukwikulu lwe nandi ti kubâ wa kwikama ko kwe Yandi. Kâ, kani kabwe kubikandi Satana kabaka! (Yobe 27:5) Luzolo lwaku mu Yehova mbo lukubakisa mu lungisa kani diaku dia sarila Yehova ntangu zazansoni na mu kurisa tindiku tia ngolo na Tata’aku dia ku mazulu.

21. Mu bungu dia nti tulendi têla ti bateme mbatukulu kwa yena, ka yena nsuka ko?

²¹ Bu mana tihana kwe Yehova, zonza kwe bakuluntu ba timvuka tiaku ngatu walungisa kani dita landa. Kâ, ntangu zazansoni bambukaka ti bateme mbatukulu yena, ka yena nsuka ko. Mbo yikubakisa mu bâ na luzingu lulembolo na nsuka mu tisalu tia Yehova. Buna, kurisa luzolo mu Tata’aku bwawu bu. Bâ na makani masa ti luzolo lwaku lwayikamaka ngolo bilumbu biabiansoni. Mpila yo mbo yikunata ku bateme. Tilumbu tia nsayi tibâ. Kâ mbatukulu kwa yibâ. Bika ti luzolo lwaku mu Yehova na mu Mwana’andi lwatatamana mu kula ntangu zazansoni!