1-2. Nti bivulu tulaka bu batusuku bantu, mpe nti fweti taluzula?

 NGANO weka mona tikunku tia bantu bata batusu? Ntembe kâni, wawâ mvutu zi bahana na lukwikulu lwalwansoni mu biyuvu biole bi babayula ntete babatusu. Wamona bantu ba kanda na ndiku zeri mu nsayi. Bantu babatusu bu baduka mu mamba, wawâ nsaki mpe wamona ti mu nsayi beri. Tumingu twatwansoni, kampe mafunda ma bantu babatusuku, buna mbo bakwizi bâka Mbangi za Yehova.

² Mbo nge? Tala ti zololo wabatusu, diangana mu bantu ba nguria nzitukulu wena mu nza yi ya mbi mu bungu ti Yehova dingaka. (Mik. 14:1, 2) Timoko ti nge tita tarila ni bu bâ ntwenia peleko wa nuna. Kâ, bô beka batusu mpe, bafweti yika ngolo nzengolo’awu ya sarila Yehova mankululu. Buna, tataluzuleno misamu mitatu mu misamu miamîngi misaka ti tasarila Yehova.

3. Mu bungu dia nti bisari bia Yehova bizololoko matieleka na buderede? (Mikunga 119:128, 163)

³ Yehova walomba kwe kanda diandi mu zolo matieleka. (Zka. 8:19) Yezu watindisa milongoki miandi mu landa buderede. (Mat. 5:6) Wuzololo tâ ti tufweti bâ na nsatu yayingi ya bâ ba sungama, ba mbote mpe ba verela ha meso ma Nzambi. Ngano matieleka na buderede bia zololo? Lukwikulu lwe neto ti bia zololo. Mbo yinaka bungungu na misamu miamiansoni mia mbi na mia miangu. (Tanga Mikunga 119:128, 163.) Bungungu mbo bumonekesaka timuntu tia Satana, yandi yâlaka nza yi. (Za 8:44; 12:31) Kani dimosi dia Satana ni  mu tâ bungungu mu nkumbu ya santu ya Yehova. Satana mbo kamwangasaka bungungu mu Nzambi’eto tûka bu kamukolamana ku Edene. Mbo katâka ti Yehova Ntwarisi ye na bwimi mpe yilembolo na bunsungu yena, yilembo hanaka bima bia mbote kwe bantu. (Mba. 3:1, 4, 5) Bungungu bwa tâ Satana mu Yehova bwatatamana mu bebesa mabanza na mitima mia bantu. Bantu bu basolaka mu lembo zolo matieleka, Satana lenda dibâka nandi mu ba nata mu sarila mpila zazansoni za kondo kwa buderede na mbi.—Rom. 1:25-31.

4. Bwe Yehova kasongela ti Nzambi ya matieleka yena? (Tala mpe tifwani.)

⁴ Yehova Nzambi ya matieleka yena, mpe na nsayi yayansoni mbo kalongesaka matieleka kwe bô bamuzololo. (Mik. 31:5) Bu kasilaka bo, mbo kababakisaka mu lembo vutu hunakana mu bungungu bwa Satana. Yehova mbo kalongesaka mpe bisari biandi mu bâ na bunsungu mpe na buderede. Buna, mbo bakwizi bâka ba zitama, mpe na tidzunu tia kati. (Bin. 13:5, 6) Ngano bwa keka sa kwe nge bu longokaka Bibila? Wayizi longoka ti nzila za Yehova ni ziyôkele bubote mu bungu dia bantu babansoni na mu bungu dia nge mpe. (Mik. 77:13) Buna, mbo dingaka mu yirika misamu mi tâka Nzambi ti mia buderede miena. (Mat. 6:33) Zololo wanwanina matieleka, mpe wabakisa mu songela ti misamu mia tâ Satana mu Yehova mia bungungu miena. Bwe lendi sila bo?

5. Bwe lendi nwanina matieleka na buderede?

⁵ Lendi sola mu bâ na luzingu lusongelaka ti ebu têle: “Ndosele bungungu bwa Satana, mpe matieleka ninwaninaka. Kwe meno Yehova ni Mfumu Yatomo Zangama, mpe nzololo nasarila buderede bwandi.” Bwe lendi bwa sila? Tihana kwe Yehova mu nzila ya lusambulu, mpe ha manima songela kwe bantu ti watiheni kwe Yandi bu batusu. Luzolo mu matieleka na mu buderede nguria ngolo lwena, mpe lulendi ku tuma mu batusu.

6. Ntia misamu mie mu Mikunga 45:4 misaka ti wazolo Yezu?

⁶ Mu bungu dia nti zololoko Yezu Kristo? Tala misamu mia mbote mie mu Mikunga 45:4. (Tanga.) Yezu mbo kasingasaka matieleka, tifu tia kuluka na buderede. Tala ti matieleka na buderede zoloko, buna wa delakana mpe wena mu zolo Yezu Kristo. Banza ka bwe Yezu kanwanina matieleka na buderede  na butindi bwabwansoni. (Za 18:37) Kâ, bwe Yezu kasingasalaka tifu tia kuluka?

7. Nti bikutâka nsayi mu tifu tia kuluka tia Yezu?

⁷ Yezu mbo kasingasaka tifu tia kuluka mu nzila ya tifwani tiandi. Mu tifwani, mbo kahanaka mukembo wawansoni kwe Tata’andi, ka kwe yandi beni’â ko. (Mak. 10:17, 18; Za 5:19) Ngano bwe monaka ku mutima bu monaka kuluka kwa mpila yo? Ngano ka kukutumaka ko mu zolo Mwana wa Nzambi na mu landa tifwani tiandi? Mu bungu dia nti Yezu ke wa kuluka? Mu bungu ti Tata’andi kazololo, mpe mbo kalandaka tifwani tiandi. (Mik. 18:35; Ebr. 1:3) Ngano Yezu ka ku tâka nsayi ko, yandi landaka bifu bia Yehova mu mpila ya lunga?

8. Mu bungu dia nti tuzoloko ti Yezu kabâ Mutinu’eto?

⁸ Mbo tuzoloko ti Yezu kabâ Mutinu’eto mu bungu ti ntwarisi ya mbote yena. Yehova Yandi beni walongesa Mwana’andi, mpe wamunoma ngatu kayâla. (Iza. 50:4, 5) Banza’eti mpe mu luzolo lwa songela Yezu bu katihana mu mukayulu. (Za 13:1) Bu kena Mutinu’aku, wufwanakane ti wazolo Yezu. Wabangula ti bô batomono mu zolo—bô ba katâka ndiku zandi—mbo basongelaka luzolo lwawu bu batumamanaka ntumunu zandi. (Za 14:15; 15:14, 15) Diangana, bweso bwena bwa bâ ndiku ya Mwana wa Yehova!

9. Mu bwe bateme ya Bakristo yidelakanaka na ya Yezu?

⁹ Ntumunu yimosi ya Yezu yitâka ti milongoki miandi mifweti batusu. (Mat. 28:19, 20) Yandi beni wahana tifwani tia mbote. Bu tutomo tala, bateme’andi ya swaswana yena na ya milongoki miandi. (Tala kaku tie na mutu-diambu “ Bateme ya Yezu na bateme ya milongoki miandi—Bwe ziswaswane.”) Kâ mu mpila zakaka, mbo zidelakanaka. Bu kabatusu, Yezu wayizi tihana mu sarila luzolo lwa Tata’andi. (Ebr. 10:7) Mpila mosi mpe, milongoki mia Yezu bu mibatusuku ha meso ma bantu babansoni, mbo misongelaka ti bayizi tihana kwe Yehova Nzambi’eto. Buna, mbo bakwizi yôkesaka luzingu lwawu lwalwansoni mu sarila luzolo lwa Nzambi, ka lwa bawu beni’â ko. Mbo balandaka tifwani tia Mfumu’awu.

10. Mu bungu dia nti luzolo mu Yezu lufweti ku tuma mu batusu?

¹⁰ Mbo tambulaka ti Yezu ni Mwana wa wumosi wa Yehova, mpe mbo tambulaka mpe ti yandi ni Mutinu wa tumba Nzambi ngatu katuyâla. Mbo monaka Yezu ntiana tifwani tia lunga mpe tia kuluka tia Tata’andi. Walongoka ti wadikila bantu beri na nsatu, watindisa bantu beri ba nôka, mpe wawasisa bambevo. (Mat. 14:14-21) Wayizi longoka mpe ka bwe katwarisilaka timvuka tiandi lumbu ti. (Mat. 23:10) Mpe zebi ti mbo kayirika misamu miamingi bu kena Mutinu wa Timfumu tia Nzambi. Bwe lendi songela ti yandi zololo? Ni mu landa tifwani tiandi. (Za 14:21) Lendi batika mu sila bo bu tihana kwe Yehova na bu batusu.

11. Mu mabanza maku, ntia musamu wuyôkele mfumu wufweti tuma muntu mu batusu mpe mu bungu dia nti?

¹¹ Ntia musamu wuyôkele mfunu wufweti ku tuma mu batusu? Yezu wazabikisa ntumunu yiyôkele bunene bu katâ ebu: “Fweti zolo Yehova Nzambi’aku mu mutima’aku wawansoni, mu tilundi tiaku tiatiansoni, mu mabanza maku mamansoni na mu ngolo zaku zazansoni.” (Mak. 12:30, NWT) Ngano ntelo zo za delakana zena mu zonzela luzolo lwe naku mu Nzambi?

12. Mu bungu dia nti zololoko Yehova? (Tala mpe tifwani.)

¹² Diangana, misamu miamingi misaka ti tazolo  Yehova. Mu tifwani, wayizi bakula ti ni Yandi we “Titeko tia luzingu” mpe ni Yandi hanaka makabu ma mbote na ma lunga. (Mik. 36:9; Zaki 1:17) Bima biabiansoni bi monaka bia mbote, kwe Nzambi’eto yikabaka mpe ya luzolo bitûkaka.

13. Nti bisaka ti nkûlulu yabâ kabu dia nguria dia toma?

¹³ Nkûlulu kabu dia toma diena dia tu hana Yehova. Mu bungu dia nti tulendi têla bo? Tataluzuleno tindiku tia ngolo tie ha kati dia Yehova na Mwana’andi. Yezu watâ ti: ‘Tata me kazololo’ mpe meno ‘Tata Yandi nzololo.’ (Za 10:17; 14:31) Tindiku tiawu tiayizi tomo kula ha kati dia miliare za mivu mi beri tintwari. (Bin. 8:22, 23, 30) Buna, banza ka ntia mpasi Yehova kamona bu kabika ti Mwana’andi wafwa. Yehova bantu ba katomono zolo—mu kati na nge mpe—ntiangu keri wa kubama mu hana Mwana’andi wu kazololo mu bungu dia nge na bantu bakaka, ngatu tabaka luzingu lwa mankululu. (Za 3:16; Nga. 2:20) Diangana wo ni musamu wa ntete wusaka ti tazolo Nzambi.

14. Ntia kani diyôkele mfunu difweti bâ naku mu luzingu?

¹⁴ Luzolo lwaku mu Yehova lwayizi kula mu bungu ti wayizi longoka misamu miamingi mu Yandi. Buna, zololo wapusana kwe Yandi bwawu bu mpe mankululu. Diangana, bulendi bâ. Na nsayi yayansoni mbo katutindisaka mu yangirika mutima’andi. (Bin. 23:15,  16) Lendi bwa sa mu nzonzolo na mu nsalulu. Mpila yi natina luzingu lwaku, mbo yisongela tala ti Yehova Yandi zololo peleko kâni. (1 Za 5:3) Dio ni kani diyôkele mfunu difweti bâ naku.

15. Bwe lendi songela luzolo mu Yehova?

¹⁵ Bwe lendi songela luzolo mu Yehova? Ntete, sa lusambulu lwa nzitukulu mu têla Nzambi ya yimosi ya matieleka ti kwe Yandi tiheni. (Mik. 40:8) Ha manima, zabikisa kani dio dia mansweki di wasiri kwe bantu babansoni, bu batusu. Ntiana bu tuzonzele wo mu timoko ti, bateme ntangu ya nsayi mpe ya mfunu yena mu luzingu. Mbo kwizi bâ na luzingu lwa môna, ka lwa nge beni’â ko, kâ mbo zinga mu bungu dia Yehova. (Rom. 14:8; 1 Pi. 4:1, 2) Lendi mona ti nzengolo ya yinene yena, yee diangana ya yinene yena. Kâ, mbo yikuziburila nzila ya bâ na luzingu luyôkele bubote. Ngano bwe?

16. Tintwari na Mikunga 41:12, nti Yehova kasa mu bungu dia bô basarilaka luzingu lwawu mu bungu dia Yandi?

¹⁶ Yehova ni Muntu wuyôkele mu tifu tia kaba. Tima ni tima ti mu hana, ntangu zazansoni mbo kakuvuturila tio na ntenso ya yôka. (Mak. 10:29, 30) Mbo kakuhana luzingu lwa nguria lwa toma, lwa nsayi, mpe lwa nienze tûka lumbu ti mu nza yi yifwa ntamana. Yo mbatukulu kwa yena. Luzingu lubatika tûka mu tilumbu tia bateme’aku ka lusuka ko. Mbo bâ na lenda dia sarila Tata’aku dia luzolo ntangu zazansoni. Luzolo lwaku mu Tata’aku mbo lutatamana mu kula, mpe mbo baka luzingu lwa mankululu, mu bungu ti Yandi mankululu kazingaka.—Tanga Mikunga 41:12.

17. Ntia tima lendi hana kwe Yehova ti kalembolo na tio?

¹⁷ Bu tihana kwe Nzambi mpe bu batusu, mbo bâ na bweso bwa hana tima tia nguria ntalu kwe Tata’aku. Wakuhana bima biabiansoni bia mbote na ntangu za nsayi zi weka yôkesa. Buna, lendi hana kwe Nzambi yivwiri zulu na mutoto tima ti keka lembo baka—tisalu tia luzolo na tia kwikama. (Yobe 1:8; 41:11; Bin. 27:11) Bwe lendi sarila luzingu lwaku mu mpila yiyôkele bubote? Ntembe  kâni, luzolo lwaku mu Yehova ni tima tie nguria mfunu tilendi sa ti wabatusu.

18. Ntia biyuvu lendi tiyula?

¹⁸ Ngano ntia mvutu hana mu tiyuvu eti: “Ngano mbo batusu?” Mvutu nge kwa zebi yo. Kâ tiyuvu eti tilendi ku bakisa: ‘Nti nita kêla?’ (Bis. 8:36) Bambukila misamu mia mitatu mi tuzonzele. Musamu wa ntete, matieleka na buderede zoloko. Tiyula: ‘Ngano nzololo namona tilumbu ti tâ bantu babansoni matieleka, mpe ti bayirika misamu mia buderede?’ Musamu wa nzole, Yezu Kristo zoloko. Tiyula: ‘Ngano nzololo ti Mwana wa Nzambi wabâ Mutinu’ani, mpe nzololo mu landa tifwani tiandi?’ Musamu wa ntatu, wuyôkele mfunu, Yehova zoloko. Tiyula: ‘Ngano nzololo ti mutima wa Yehova wabâ mu nsayi bu nimusarila?’ Tala ti têle ‘yee’ mu biyuvu bio biabiansoni, mu bungu dia nti ta lembo batusu? Nti ta kêla?—Bis. 16:33.

19. Mu bungu dia nti fweti lembo tînina mu batusu? Hana tifwani. (Za 4:34)

¹⁹ Tala ti mbo ta tîna mu batusu, tala tifwani tia zonzela Yezu. (Tanga Za 4:34.) Yezu wafwanakasa luzolo lwa Tata’andi na bidia. Mu bungu dia nti? Bidia bia mbote biena kwe beto. Yezu wazaba ti misamu miamiansoni mi tu tumaka Yehova mu sa mia mbote miena mu bungu dia beto. Yehova ka zololo’â ko ti tasa tima titunatina mpasi. Ngano mu misamu mi zoloko Yehova mwe mpe na bateme? Yee. (Bis. 2:38) Ha manima, lendi bâ na lukwikulu ti bu tumamana ntumunu yitariri bateme, mbo baka ndandu. Tala ti kutînaka ko mu dia bidia bia toma, mu bungu dia nti tînina mu batusu?

20. Nti tuzonzela mu timoko tita landa?

²⁰ Nti ta kêla? Babingi balendi tâ ti: “Ka ndieka’eti kubama ko.” Kâ fweti bambuka ti nzengolo yiyôkele mfunu yi lendi bonga, ni ya tihana kwe Yehova na ya batusu. Buna, fweti toko bonga ntangu ya banza ntete wabonga nzengolo yo, mpe ngolo zifwanakane ngatu wakubama. Kâ tala ti na bunsungu bwabwansoni nsatu yayingi ye naku ya batusu, nti lendi sa bwawu bu mu kubama? Mbo tubaka mvutu ya tiyuvu tio mu timoko tita landa.