MPANGI zazingi zayenda ku nsi zakaka mu kwe dinga mbongo, zakâla ku nsi zawu za mbutukulu. Luzolo lwawu mu Yehova na mu bampwana’awu lwabatuma mu kwenda mu bizunga bie na nsatu bisamuni biabingi bia Timfumu. (Mat. 22:37-39) Ntia ngolo basarila, mpe ntia tusakumunu babaka? Mu zaba, tataluzuleno misamu mia ku Cameroun.

Mu 1998 mpangi ye nkumbu Onésime yakatuka ku Cameroun, ye nsi’andi ya mbutukulu. Wayôkesa mvula 14 ku nsi yi kayenda. Lumbu timosi ku tukutakanu twa Bakristo, wawâ tifwani tieri zonzelaka tisalu tia samuna. Nzonzi watâ ti: “Tala ti na ndiku’eto tuta loba ha mbuka za swaswana mpe tumweni ti ndiku’eto mbizi zazingi kata loba, ngano ka tukwenda hâna he ndiku’eto ko?”

Tifwani tio tiatuma Onésime mu bâ na mbanzulu za kâla ku Cameroun kweri bantu babingi beri na nsatu yayingi ya longoka Bibila. Kâ lwaka lweri nandi. Ha manima ma mvula zazingi zi kayôkesa ku nsi yo, ngano mbo kaketi bâ na lenda dia vutu yukunu na mbelo ya ku Cameroun? Mu zaba tala ti mbo kaketi lenda, Onésime wakâla ku Cameroun mu yôkesa ngonda sambanu. Mpe mu 2012, wakâla mu kwe bâ mankululu ku Cameroun.

Onésime têle: “Wafwanakana nayukunu na yaninga mpe na mbelo ya kûna. Ku Nzo ya Nsambululu, wafwanakana nayukunu mu vutu zakalaka ha bancs za kuba.” Na nsayi yayansoni vutulu tâ ti: “Bu ndieri tûlaka mabanza mani mu programe ya nsambululu, mbo ndieri zimbakanaka bancs za mbote zeri mu Nzo za Nsambululu zakaka.”

Mu 2013, Onésime wakwela Géraldine wakâla ku Cameroun ha manima ma mvula 9 zi kayôkesa ku France. Ngano Yehova ntia tusakumunu kabahana bu batûla luzolo lwandi ha tibuka tia ntete mu luzingu lwawu? Onésime têle ti: “Meno na mukento’ani tayizi sa Lukolo lwa bisamuni bia Timfumu mpe ha manima tayizi sala ku Betele. Mu muvu wayôkele, milongoki mia Bibila 20 miabatusu mu timvuka tieto. Mbo nita mona ti bwawu bu ha mbuka yifwanakane ndiena mu kubika milongoki.” (Mak. 1:17, 18) Géraldine yikiri ti: “Nayizi baka tusakumunu twa ndieri lembo banzaka.”

Judith waye bâ ku États-Unis, kâ nsatu yayingi yeri nandi ya sala bwabwingi mu bungu dia Yehova. Têle ti, “Bu ndieri kwe talaka kanda diani ku Cameroun, mu ntangu ya kâla, mbo ndieri dilaka mu bungu ti wafwanakana na bika bantu babingi ba tabatika ndongokolo ya Bibila.” Kâ, Judith watîna mu kâla ku Cameroun. Wabâ na tisalu ti beri mu futaka bubote, mpe tiamubakisa mu bukisa tata’andi diasâla ku Cameroun. Judith wasikirila Yehova mpe wakâla ku Cameroun. Yandi watâ ti, bima bia mbote bieri nandi ku États-Unis nguria kondo bieri mu kondoko. Wasambila Yehova ngatu  kamubakisa mu yukunu, mpe wayizi baka lutindusu lwa munkengi wa tizunga na mukento’andi.

Mu ntangu Judith yi kabambukaka mpila ya yôkela misamu bu bakâla ku Cameroun, têle ti: “Mu mvula tatu, nayizi bâ na nsayi ya bakisa bantu bayà mu batusu.” Judith wayizi bâ mupasuri-nzila wa wunene. Lumbu ti mbo kasalaka na bakala diandi Sam-Castel, we mukengi wa tizunga. Kâ, nti biaturila tata dia Judith? Judith na kanda diandi babaka lupitalu ku nsi yakaka lwatambula mu futa opération ya tata’andi. Opération yango yayôkela mu mpila ya yibote.

Mpangi ye nkumbu Victor waye bâ ku Canada. Bu kamana tanga timoko tia Nzo ya Zangama ya Munkengi yeri zonzelaka université, wayizi dimbitila mu lukolo lu kaketi sa. Wayizi bika mu kwenda ku université mpe wayizi sa lukolo lwa teknike lwa nkufi. Victor têle ti: “Lukolo lo lwakumbakisa mu kulu baka tisalu, na mu lungisa kani diani, di ndieri banzaka tuka ntama, dia sala tisalu tia mupasuri-nzila.” Ha manima, Victor wayizi kwela Caroline, mpe bayenda ku Cameroun. Mu ntangu yi beri kwe tari Betele, mpangi zayizi ba tindisa mu banza tala ti balendi kwizi sala ku Cameroun. Victor têle ti: “Ka tabâ na musamu wuta keti karila ko, mpe mu bungu ti luzingu lweto ka lwabâ nkaka ko tayizi tambula.” Ni bu sa ti Caroline wayizi bâ na bimbevo, tayizi bonga nzengolo ya kwenda ku Cameroun.

Victor na Caroline bayizi bâ mipasuri-nzila mia ntangu zazansoni mu bakisa bantu babansoni beri na nsatu ya zaba Bibila. Mbongo zazingi bayizi lunda ngatu balembo sala ha mbatukulu. Ha manima baye sala ku Canada ngonda fioti, mpe mbongo zo zababakisa mu kâla ku Cameroun na mu tatamana mu bâ mipasuri-nzila. Ntia tusakumunu babaka? Bayizi sa Lukolo lwa bisamuni bia Timfumu, bayizi bâ mipasuri-nzila mia minene, mpe bwawu bu mu tisalu tia ntungulu bena. Victor têle ti: “Mu bungu ti tayizi bika luzingu lweto lwa nienze mpe tayizi sikirila Yehova, Yandi watukipa.”

Mu 2002, Alain weri longokaka ku université ya Allemagne, watanga trakte yeri na mutu-diambu: Jeunes gens, qu’allez-vous faire de votre vie ? Misamu mi katanga miamutuma mu bâ na makani ma môna. Mu 2006, wayizi sa lukolo lu beri tâka nkumbu: L’École de formation ministérielle. Ha manima bamutambika ku Cameroun, yeri nsi yi kabutukila.

Ku Cameroun, Alain wabaka tisalu tia ntangu fioti. Ha manima, wabaka tisalu tifutaka bubote, kâ wabâ na lwaka mu bungu ti kaketi’â vutu bâ na ntangu yayingi ko ya samuna na ya longesa ntiana mu ntama. Kâ bu bamulomba mu bâ mupasuri-nzila wa wunene, ka lembeketa ko mu tambula. Mfumu’andi ya tisalu wamukanisina mu mu nakisina mbongo, kâ Alain wakala mpe wayizi bâ mupasuri-nzila wa wunene. Ha manima, Alain wayizi kwela Stéphanie wayôkesa mvula 4 ku France. Ngano ntia nkwamusu Stéphanie Kabwabana na zo ku Cameroun?

Stéphanie têle: “Nayizi bâ na bimbevo bia fioti-fioti, mpe nitu’ani bima biakaka yeri lembo tamburilaka, kâ nayizi baka bilongo mpe nayizi mona mwa bubote.” Alain na Stéphanie bayizi baka tusakumunu mu bungu dia korela kwawu. Alain têle: “Bu taye samuna ku hata dimosi die mala di batâka nkumbu Katé, tayizi baka bantu babingi beri zoloko mu longoka Bibila. Ha manima, tayizi batika mu longoka nawu mu nzila ya telefone. Milongoki miole mia Bibila miayizi batusu, mpe tikunku tia bisamuni tiayizi butuka.”  Stéphanie yikiri: “Ka kwena nsayi ko yiyôkele tisalu tia bakisa bantu mu tihana kwe Yehova. Bu tusarilaka Yehova kwawu ku, nsayi yayingi yibâka neto.” Lumbu ti, Alain munkengi wena wa tizunga tintwari na Stéphanie.

Gisèle wabatusu mu ntangu yi keri saka lukolo lwa badoktere ku Italie. Wayizi yituku mu luzingu lwa lembo nkaka lweri nataka mpangi zo za kwelana za mipasuri-nzila zeri mu longesaka Bibila, mpe wayizi zolo mu sala bwabwingi mu tisalu tia samuna. Gisèle wayizi bâ mupasuri-nzila wa ntangu zazansoni bu keri kwe manisi lukolo lwandi.

Gisèle wazolo mu sala bwabwingi mu bungu dia Yehova ku Cameroun, kâ wabâ na lwaka. Têle ti: “Wafwanakana nabika nswa’ani wa bâ ku Italie mpe wafwanakana nahambana na ndiku zani mpe na kanda diani dieri bâka ku Italie.” Ntono misamu mio, Gisèle wakâla ku Cameroun mu mai 2016. Ha manima ma ntangu fioti wakwelana na Léonce, mpe filiale ya Cameroun yabatambika ku Ayos, hata dieri na nsatu ya bisamuni biabingi bia Timfumu.

Ngano luzingu bwe lwabâ ku Ayos? Gisèle têle ti: “Ntangu zakaka ka kweri’â courant ko tumingu twatwingi, mpe ka tweri’â lendaka ko mu sa charger telefone zeto. Musamu wakaka, ntangu zakaka ka ndieri’â sala ko. Nayizi longoka mu lambilaka ha nkuni, mpe mbo tweri kwendaka na brouette mpe na torche mu kwe baka mamba mu mpimpa ku mukelo mu ntangu yi kweri lembo bâka bantu babingi.” Nti biabakisa Gisèle na bakala diandi mu korela? Gisèle têle ti: “Mpeve santu ya Yehova yatubakisa. Bakala diani na meno mbo tweri titindisaka. Kanda dieto na ndiku zeto mbo zeri tu tindisaka mpe ntangu zakaka mbongo beri tu hanaka.”

Ngano Gisèle nsayi ye nandi mu bungu ti wakâla ku nsi’andi ya mbutukulu? Gisèle têle ti “Yee! Nsayi yayingi! Ku mbatukulu mpasi zeri kô na misamu minôkesaka, kâ buna kwa bu tatelamana mio, bakala diani na meno tayizi mona ti mbo tweri saka mîna miafwanakana mu sa. Tayizi tûla lukwikulu lweto mu Yehova mpe tayizi pusana kwe Yandi.” Léonce na Gisèle bayizi sa Lukolo lwa bisamuni bia Timfumu, mpe lumbu ti mipasuri-nzila mia minene miena mia ntangu fioti.

Ntiana tilobi tia mbizi tisongelaka butindi ntono mpasi mu baka mbizi zazingi, bô bakâlaka ku nsi zawu za mbutukulu mbo basaka ngolo zazingi mu bakisa bô bazololo mu wâ nsangu za Timfumu na bunsungu bwabwansoni. Ntembe kâni, Yehova mbo kabambukila bisamuni bio bia ngolo mu luzolo lu basongela mu bungu dia nkumbu’andi. (Neh. 5:19; Ebr. 6:10) Tala ti ku nsi ya nzenza bêlaka mpe ku nsi’aku ya mbutukulu nsatu bisamuni ye kûna, ngano mbo bâ na lenda dia kâla? Wamana sila bo, Yehova mbo kakusakumuna.—Bin. 10:22.