1. Bwe tuzabiri ti tisalu tia kubika milongoki vukisa tivukisaka?

TISALU tia kubika milongoki tisalu tiena tivukisaka! Bwe tuzabiri wo? Mu ntangu Yezu yi kahana ntumunu ye mu Matie 28:19, 20, watâ ti: ‘Yendeno [. . .], kubikeno milongoki [. . .], babatiseno.’ Ntia misamu tuzebi misongelaka ti bateme mfunu yena? Tufweti batusu tala ti tuzololo tavuka. Muntu wubatusu wufweti kwikila ti ni mukayulu wa hana Yezu wusa ti kabaka mvukulu. Ntiangu ntumwa Piere katâ kwe Bakristo ti: “Bateme [. . .] yita lu vukisa mpe mu ntangu yi [. . .] mu nzila ya mvumbukulu ya Yezu Kristo.” (1 Pi. 3:21 NWT) Buna mu ntangu mulongoki wa môna wubatusuku, lendi bâ na tivuvu tia luzingu lwa mankululu.

2. Tintwari na 2 Timote 4:1, 2 ntia mpila milongi tufweti bâ?

² Mu kubika milongoki, tufweti bâ milongi mia mbote (Tanga 2 Timote 4:1, 2.) Mu bungu dia nti? Mu bungu ti Yezu watâ: ‘Yendeno [. . .], kubikeno milongoki.’ Ntumwa Paulo watâ ti ‘tatatamana’ mu tisalu tio, ‘ngatu bu tusa bo, tativukisa beto beni na bô batuwirikila.’ Mu bungu dia misamu mio mia mbote, Paulo watâ ti: “Sa mayela [. . .] mu ndongosolo’aku.’ (1 Tim. 4:16) Mu bungu ti tufweti bâ na lenda dia longesa bantu ngatu babâ milongoki, tuzololo ti ndongosolo’eto yabâ ya nguria ya mbote.

3. Mu timoko ti, ntia misamu mitariri mpila ya twarisa ndongokolo ya Bibila tutaluzula?

³ Ntangu zazansoni, mbo tulongesaka matieleka matariri Bibila kwe milio za bantu mu nza ya mukaka. Kâ, ntiana bu tamweni mu timoko tiayôkele, tuzololo tazaba bwe tulendi bakisila bantu babîngi mu kwizi bâ milongoki mia batusu mia Yezu. Mu timoko ti, mbo tutaluzula misamu tanu (5) miakaka mi fweti  sa milongi miamiansoni mu bakisa milongoki miawu ngatu miabatusu.

4. Mu bungu dia nti mulongi wufweti sarilaka tifu tia tiyimina bu wutwarisaka ndongokolo ya Bibila? (Tala mpe note ye ha banda.)

⁴ Misamu mi tulongesaka mie mu Zu dia Nzambi mia tuzoloko. Ntiangu, tulendi wolomokaka bu tuzonzelaka misamu mi tuzololo. Kâ, ni bu sa ti Nzo ya Zangama ya Munkengi, ndongokolo ya Bibila ya timvuka peleko ndongokolo ya Bibila ya muntu kata twarisa, ntwarisi ka fweti’â kazonzaka kwakwingi ko. Ngatu kabika Bibila dialongesa, mulongi wufweti sarila tifu tia tiyimina, mpe ka fweti’â ka yêla ko mu bangula misamu miamiansoni mi kazebi mu verse zakaka peleko mu musamu wu bata zonzela. * (Za 16:12) Fwanakasa luzabu lwa Bibila lwe naku bwawu bu, na luzabu lweri naku mu ntangu yi wabatusu. Bu wabatusu, kampe misamu mia nguri kwa mi longesaka Bibila wazaba. (Ebr. 6:1) Mvula zazingi zakufwanakana mu longoka mio mi zebi lumbu ti.

5. (a) Tintwari na 1 Bisi-Tesalonike 2:13, nti tuzololo milongoki mieto miabakula mu ndongokolo’awu? (b) Bwe tulendi tindisila mulongoki mu zonzela misamu mi kata longoka?

⁵ Tuzololo ti milongoki mieto miabakulaka mio mi balongokaka mu Bibila. (Tanga 1 Bisi-Tesalonike 2:13.) Bwe tulendi bwa sila? Tindisa mulongoki kazonzelaka misamu mi kalongokaka. Ntangu zazansoni, kani wamubangurilaka verse za Bibila, mu lombaka kakubangurilaka yandi. Bakisaka mulongoki mu mona bwe Zu dia Nzambi dita mu tarila. Mu yulaka biyuvu bimubakisa mu dukisa mabanza mandi mu musamu wutariri verse zi kata tanga. (Like 10:25-28) Mu tifwani, mu yulaka: “Ngano verse yi bwe yita ku bakisila mu mona bifu bia Yehova?” “Bwe misamu mi wizi longoka mita ku bakisila?” “Bwe ta mona mu misamu mi wizi longoka?” (Bin. 20:5) Musamu wuyôkele mfunu, ka ni mio mio’â ko mi zebi mulongoki, kâ ni luzolo lwe nandi mu mio mi kata longoka na mpila yi kata mia sarila.

6. Mu bungu dia nti wulendi bâ musamu wa mbote mu nata tisamuni tilongesaka tuka ntama mu twarisa ndongokolo ya Bibila?

⁶ Bu twarisaka ndongokolo ya Bibila, ngano lendi ya saka na bisamuni bilongesaka tuka ntama? Wamana sila bo, lendi ba yula bwe bamwinini mpila’aku ya twarisa, mpe bwe bikiri Bibila dialongesa. Fweti bâ wa kuluka tala ti zololo wabâ mulongi wa mbote. (Fwanakasa na Bisalu 18:24-26.) Ha manima, yula kwe tisamuni tio tilongesaka tuka ntama tala ti mbo kata banza ti mulongoki wo misamu mi kata longoka mia kata bakula. Tala ti lumingu lumosi  peleko tumingu twatwingi lembo kwa bâ, lendi lomba kwe tisamuni tio katwarisa ndongokolo. Mpila yo, mbo yibakisa ngatu ndongokolo yatatamana, mpe mbo yisa ti mulongoki kamona ti ndongokolo’andi mfunu yena. Kani kabwe kubanzakandi ti mulongoki wo nge kwa mu vwiri, mpe nge kwa fweti twarisaka ndongokolo’andi. Misamu mia mbote zololo mu bungu dia mulongoki’aku, ni mu mpila yo kalendi tatamana mu longoka matieleka.

7. Nti bibakisa mulongoki mu kwizi bâ na luhemo mu misamu mi kata longoka?

⁷ Mulongoki wufweti monaka tiya twaku, mpe wufweti monaka ti lukwikulu lwe naku mu matieleka ma Bibila. (1 Tes. 1:5) Buna, mbo kakwizi bâ na luhemo lwalwingi mu misamu mi kalongokaka. Tala ti wufwanakane, mu têla bwe Bibila diakubakisila mu luzingu lwaku. Ha manima, mbo kakwizi mona ti mitieno mia Bibila milendi mu bakisa yandi mpe.

8. Nti biakaka lendi sa bibakisa mulongoki’aku, mpe mu bungu dia nti sila bo?

⁸ Bu luta kwe longoke, zonzela kwe mulongoki’aku bifwani bia mpangi zakaka zatelamana mpasi zi kata bwabana na zo. Lendi nata mpangi ya timvuka yatelamana misamu mi ta bwabana mulongoki’aku. Peleko lendi baka binsamu bia luzingu bitindisaka mu jw.org wamana kota mu “Bibila luzingu disobesaka.” * Bimoko bio na video zo zilendi bakisa mulongoki’aku mu mona ti bubote bwena mu sarila mitieno mia Bibila mu luzingu lwandi.

9. Bwe lendi tindisila mulongoki ngatu kazonzela misamu mi kata longoka kwe kanda diandi na kwe ndiku zandi?

⁹ Tala ti mulongoki’aku wa kwela wena, ngano mulumi’andi peleko mukazi’andi Bibila kalongokaka yandi mpe? Tala ti kâni, mu lomba kalongokaka tintwari na beno. Tindisa mulongoki’aku mu zonzelaka misamu mi kata longoka kwe kanda diandi na kwe ndiku zandi. (Za 1:40-45) Ngano bwe? Lendi mu yula kwa: “Bwe bangurila matieleka kwe kanda diaku?” peleko “Ntia verse sarila mu songela kwe ndiku zaku ti matieleka ta longoka?” Mu mpila yo, mbo kwizi kubika mulongoki’aku mu kwizi bâ mulongi. Bu kakwizi bâ wa kubama, lendi kwizi bâ tisamuni tilembolo tia batusu. Lendi yula mulongoki tala ti muntu wakaka kazebi wuta zolo mu longoka Bibila. Tala ti muntu kazebi, kulu zonza na muntu wo, mpe mu lomba kalongokaka  na mulongoki’aku. Mu songela video Comment se passe un cours biblique? *

10. Ntiana bu bazonzele wo mu 1 Bisi-Tesalonike 2:7, 8, bwe mulongi wulendi landila tifwani tia Paulo?

¹⁰ Milongi mifweti tomo kipaka milongoki miawu. Bafweti ba mwinaka ntiana bawu bakwizi bâ mpangi zawu za timpeve. (Tanga 1 Bisi-Tesalonike 2:7, 8.) Musamu wa mpasi wena kwe bawu mu bika ndiku zawu za mu nza na mu sa nsobolo zifwanakane mu sarila Yehova. Tufweti ba bakisa mu bâ na bindiku bia matieleka mu timvuka. Bâ ndiku ya mulongoki’aku bu yôkesa ntangu nandi mu ntangu zazansoni, ka mu ntangu yi lulongokaka ko kwa. Lendi mu tâ mbila, peleko lendi mu tsonekena mu telefone, kâ mpe lendi kwe mu tala mu ntangu yi lulembo longokaka, mu mu songela ti yandi tomo kipaka.

11. Nti tuzololo milongoki mieto miamona mu timvuka tieto, mpe mu bungu dia nti?

¹¹ Tingana timosi titâka: “Mulembo wumosi ka wusukulaka tidiri ko.” Tulendi tâ ti: “Timvuka tifwanakane mu kubika milongoki.” Ntiangu, milongi mia Bibila mia mbote mizabikisaka milongoki miawu kwe mpangi zakaka za timvuka zilendi ba bakisa mu pusana kwe Yehova. Buna milongoki milendi kwizi baka bweso bwa kutakanaka na kanda dia Yehova, dilendi ba bakisa mu bâ na tindiku tia mbote na Yehova mpe dilendi ba tindisa bu babâka na misamu. Tuzololo ti muna mulongoki wamonaka ti muntu wa timvuka wena mpe mu kati dia timvuka tieto tia timpeve kena. Tuzololo ti, tiya tweto na luzolo lweto lwa kanda dia Bakristo lwabenda muna mulongoki. Buna ka wubâ musamu wa mpasi ko kwe yandi mu bika mu bâ ndiku za bantu balembo mu bakisa mu zolo Yehova. (Bin. 13:20) Tala ti ndiku zandi za ntama zimuyambirikiri, mbo kazaba ti lendi baka ndiku za matieleka mu organizasio ya Yehova.​—Mak. 10:29, 30; 1 Pi. 4:4.

12. Mu bungu dia nti tufweti zonzelaka musamu wutariri mpana na bateme kwe milongoki mieto?

¹² Fweti vulu mu têlaka ti, musamu wa mfunu wena kwe muntu watihana kwe Yehova mpe wabatusu. Kani dieto bu tulongesaka muntu Bibila ni dia mu bakisa mu sarila Yehova na dia batusu. Bu lukwizi yôkesa ngonda mu ndongokolo ya Bibila, nsungula tala ti batikiri mu kwizaka ku lukutakanu, mulongoki wufweti bakula ti tala ti Bibila lulongokaka ni mu mu bakisa mu sarila Yehova ntiana Mbangi’andi.

13. Mulongoki nti wufweti sa ngatu kabatusu?

 ¹³ Malembe-malembe, mulongoki we na bunsungu wulendi kwizi dinga mu batusu! Musamu wa ntete, mbo wukwizi zaba, mbo wukwizi zolo mpe mbo wukwizi tûla timinu tiandi mu Yehova. (Za 3:16; 17:3) Buna mulongoki mbo wukwizi bâ ndiku ya Yehova na ya mpangi za timvuka. (Ebr 10:24, 25; Zaki 4:8) Ha manima, mulongoki mbo wukwizi losa nsalulu zandi za mbi mpe mbo wukwizi soba mabanza mu bungu dia masumu mandi. (Bis. 3:19) Mbo kazonzela bantu nkwikulu zandi za môna. (2 Kor. 4:13) Mbo kakwizi tihana kwe Yehova mpe mbo kakwizi batusu. (1 Pi. 3:21; 4:2) Diangana tilumbu tia nsayi tibâ mu bungu dia bantu babansoni! Mu ntangu mulongoki yi kakwizi yirika misamu mifwanakane mu batusu, mu sîkaka mpe mu tindisaka ngatu katatamana mu nzila yo.

14. Ngano mulongi bwe wulendi zabila tala ti timpeve tia mulongoki’andi kula tita kula?

¹⁴ Tufweti bâ na luvivululu mu ntangu yi tubakisaka mulongoki mu tihana kwe Yehova na mu batusu. Kâ mpe, tufweti zaba tala ti mulongoki’eto nsatu ye nandi ya sarila Nzambi’eto Yehova. Ngano misamu ta mona mita songela ti mulongoki’aku yêla wuta yêla mu tumamana ntumunu za Yezu? Peleko we nandi kwa kazaba misamu mia Bibila?

15. Ntia bidimbu bisongelaka kwe mulongi ti mulongoki’andi wa kubama wena mu batusu?

¹⁵ Ntangu zazansoni taluzula tala ti timpeve tia mulongoki’aku kula tita kula. Mu tifwani, ngano mbo kazonzelaka mabanza mandi mu bungu dia Yehova? Ngano Yehova kasambilaka? (Mik. 116:1, 2) Ngano mbo kayangalalaka mu tanga Bibila? (Mik. 119:97) Ngano ku tukutakanu kakwizaka tumingu twatwansoni? (Mik. 22:22) Ngano nsobolo kata sa mu luzingu lwandi zita songela ti misamu mi kata longoka mia kata sarila? (Mik. 119:112) Ngano wabatikiri mu zonzela misamu mi kata longokaka kwe kanda diandi na kwe ndiku zandi? (Mik. 9:1) Musamu wuyôkele mfunu, ngano zololo mu kwizi bâ Mbangi ya Yehova? (Mik. 40:8) Tala ti mulongoki ka wuta kula ko mu timpeve mu misamu mi tuzonzele, dinga mu zaba mu bungu dia nti, mpe na buzitu bwabwansoni zonzeleno misamu mita lembo simba buna bufwanakane na nsayi yayansoni kâ mpe na bunsungu bwabwansoni. *

16. Ntia ntangu fweti bika mu longoka na muntu?

 ¹⁶ Ntangu zakaka tiyulaka tala ti fweti tatamana mu longoka na muntu. Tiyula: ‘Ngano mulongoki ka wuta kubika ndongokolo’andi ko? Ngano ka wuta zolo ko mu kwiza ku tukutakanu? Ngano bifu bia mbi bia tiri nandi? Ngano mu dibundu dia bungungu kwa katiri?’ Tala ti ni buna wena, wamana tatamana mu longoka na muntu wo, mbo wubâ ntiana nge ta zolo longesa muntu mu tsaba kâ, ka tazolo ko mu bola! Tala ti mulongoki ka wuta zolo misamu mi kata longoka ko, mpe ka wuta zolo ko mu sa nsobolo, mu bungu dia nti tatamana mu longoka nandi?

17. Tintwari na 1 Timote 4:16, milongi miamiansoni mia Bibila nti mifweti sa?

¹⁷ Nkatika mfunu wena mu lungisa dema dieto dia kubika milongoki mpe tuzololo tabakisa milongoki mieto mu batusu. Ntiangu tubika Bibila dialongesa, tulongesa na tiya mpe na lukwikulu lwalwansoni. Mbo tutindisa mulongoki mu tunga bindiku mu timvuka. Mpe mbo tumuzonzela mfunu ya mpana na ya bateme, ntangu zakaka mbo tukwe dingi mu zaba tala ti timpeve tia mulongoki tia tita kula. (Tala kaku tie na mutu-diambu “ Milongi nti mifweti sa mu nata milongoki ku bateme.”) Nsayi ye neto mu bungu ti tulendi sala tisalu tio tivukisaka! Buna tabongeno nzengolo ya sarila ngolo zeto zazansoni mu twarisaka ndongokolo za Bibila zinata ku bateme.