1. Ngano Yehova bwe kamonaka mu ntangu wumosi wa bisari biandi wukârilaka mu mu sarila?

MU TIMOKO tiayôkele tayizi mona ti, Yehova mbo katifwanakasaka na mvungi wa mbote wutomo kipaka bimeme biandi biabiansoni. Mbo kakwe dingaka bimeme biandi biawumuka. Yehova watâ kwe bala ba Israele bô babika mu mu sarila ti: “Kâleno kwe meno, buna meno mpe mbo nikâla kwe beno.” Tuzebi ti ni bo kamonaka mpe lumbu ti, mu bungu ti watâ ti: “Ka nisobaka ko.” (Mal. 3:6, 7) Yezu watâ ti Yehova na bambazi nsayi yayingi yibâka nawu mu ntangu wumosi wa bisari biandi wukâlaka kwe Yehova.​—Like 15:10, 32.

2. Nti tuzonzela mu timoko ti?

² Tataluzula bifwani bitatu bia zonzela Yezu bitulongesaka malongi ma mfunu mu mpila yi tubakisila bô bayizi bika mu sarila Yehova. Mbo tuzonzela bifu bifwanakane bie neto nsatu mu bakisa bimeme biawumuka mu kâla kwe Yehova. Mpe mbo tumona mu bungu dia nti wufwanakane tasarila ngolo mu bakisa bô balembolo na ngolo.

3-4. Mu bungu dia nti mukento wu bazonzele mu Like 15:8-10, weri dingilaka drakme yazimbakana na bunkete bwabwansoni?

³ Tufweti sarila ngolo mu dzukula bô bazololo mu kâla kwe Yehova. Mu tinsamu ti bazonzelaka mu Evanzile ya Like, Yezu wazonzela tinsamu tia mukento wazimbakasa mbongo za bisengo zi batâka nkumbu drakme. Titini tia mfunu tia tinsamu tio, mbo tisongelaka ngolo za sarila mukento wo mu dinga mbongo zo.​—Tanga Like 15:8-10.

⁴ Yezu wazonzela bwe mukento wo wamona ku mutima mu ntangu yi kayizi dzukula drakme yazimbakana. Mu ntangu ya Yezu, mukento wa ku Israele bu weri kwelaka, ntangu zakaka nguri’andi mbo keri mu hanaka tikunku tia drakme kumi. Kampe  drakme yo tieri tima tia ntalu kwe mukento wo, mu bungu ti zeri mbongo zabâ mu tikunku tia drakme kumi za mu hana nguri’andi. Mukento wo wabanza ti mbongo zo ha mutoto zabwa. Buna, wanamisa mwinda mu dinga, kâ ka mona yo ko. Kampe mwinda’andi wunaminaka mu mafuta ka weri’â mu hanaka mutsamina wawingi ko mu mona mwa drakme yo. Dieka bo, na bunkete bwabwansoni, watomo komba nzo yayansoni. Mu mutoto wu kazonzeka, wayizi mona drakme’andi ya ntalu yeri kengaka mu mutsamina wa mwinda. Mutima’andi wayizi lembama! Mpe watâ ndiku zandi mbila na bantu ba babandakana mu ba hana nsangu zo za mbote.

5. Mu bungu dia nti wulendi bâ musamu wa mpasi mu dzukula bô ba kota tiozi?

⁵ Ntiana bu tumweni wo mu tifwani tia Yezu, tufweti sarila ngolo zazingi mu dzukula tima tizimbakane. Mpila mosi mpe, tufweti sarila ngolo zazingi mu dzukula bô ba kota tiozi. Kampe mvula zazingi zayôka tuka ti basala lembo kutakane na beto. Balendi bâ mpe kuma kô ku balembolo ba zaba kwe bampangi babêlaka kuna. Kâ mu ntangu yi, tulendi bâ na lukwikulu ti mpangi zo za kota tiozi nsatu yayingi ye nawu ya kâla kwe Yehova. We nawu basarila Yehova na kanda diandi dia bisamuni bia matieleka, kâ wufwanakane tababakisa.

6. Bwe beto bansoni mu timvuka tulendi bakisila mu tisalu tia dinga mpangi zo za kota tiozi?

⁶ Ngano nani lendi bakisa mu tisalu tia dinga bô ba kota tiozi? Beto bansoni​—bakuluntu, mipasuri-nzila, bisi-kanda, na bisamuni—​balendi bakisa mu ba dzukula. Ngano ndiku ye naku peleko muntu wu zebi wa kota tiozi? Ngano na mpangi ya kota tiozi lwabwabane mu tisalu tia samuna? Tala ti mpangi yo yikuheni nimero’andi ya telefone peleko yikutêlele kô ku kabâka, lendi zabikisa nsangu zo kwe bakuluntu ba timvuka tiaku.

7. Nti lendi longoka mu misamu mia tâ kuluntu wumosi wu batêle nkumbu Thomas?

⁷ Bwe bakuluntu balendi sa mu dzukula mpangi zo za kota tiozi zizololo zakâla kwe Yehova? Talanda mabanza ma kuluntu wu batêle nkumbu Thomas. * Ku Espagne kabâka mpe mpangi yôka 40 keka bakisa bakâla mu timvuka. Thomas têle: “tima tia ntete, mbo niyulaka mpangi zazingi za zikento na za zibakala tala ti mbuka zi bêlaka mpangi zo bwawu bu za bazebi. Peleko mbo niyulaka bisamuni tala ti balendi bambukila mpangi yasala lembo kwizi ku tukutakanu. Mpangi zazingi mu timvuka zitomo zoloko mu bakisa mu bungu ti mbo bamonaka ti salu bena mu tisalu tio. Ha manima, bu nikwe talaka mpangi zo za kota tiozi, mbo niyulaka nsangu za bala bawu na za ndiku zawu. Bakaka bala bawu beri nataka ku tukutakanu, kampe ntangu yeri kô bala bo bayizi bâ bisamuni. Bala bo mpe balendi babakisa ngatu bakâla kwe Yehova.”

8. Mu tifwani tia mwana wazimbakana tie mu Like 15:17-24, bwe tata kabongela mwana’andi wasoba mabanza?

⁸ Ntia bifu bie neto nsatu mu bakisa bô bata zolo kâla kwe Yehova? Taleno malongi ma tulendi longoka mu tinsamu tia Yezu titariri mwana wo wa bakala wasisa nzo. (Tanga Like 15:17-24.) Yezu banguri ti mwana wo wa bakala wayizi bakula ti buzoba kasarila mpe wabonga nzengolo ya kâla ku nzo. Tata wadioka ntinu mu kwe bwana mwana’andi mpe watomo mu bumba, ngatu mwana kazaba ti tata’andi yandi kwa katiri zolo. Mwana wo, ngindu’andi semba kwa yeri mu sembaka mpe wamona ti ka fwanana ko kamubongela ntiana mwana’andi. Tata wafwila mwana’andi tiari, mpe mwana wamutêla bwe keri monaka ku mutima. Ha manima, tata wayirika misamu mu songela kwe  mwana’andi ti ka bamubwana ko ntiana tisari, kâ ntiana muntu wa ntalu wa kanda. Mu songela ti mwana’andi wa kazolo mpe yandi katambula, tata wayizi sa salaka mpe wahana tinkuti tia toma kwe mwana’andi wasoba mabanza.

9. Ntia bifu bie neto nsatu mu bakisa bô bata zolo kâla kwe Yehova? (Tala kaku “ Bwe tubakisila bô bata zolo mu kâla.”)

⁹ Yehova we ntiana tata dia tifwani tio. Mpangi zeto za kota tiozi Yehova za kazololo mpe zololo ti zakâla kwe Yandi. Bu tulanda tifwani tia Yehova, tulendi ba bakisa mu kâla. Ntiangu wufwanakane tasongela luvivululu, tiari tia bakaka na luzolo. Mu bungu dia nti tufweti songela bifu bio biafwanakana, mpe bwe tulendi wasila?

10. Mu bungu dia nti tufweti bâ na luvivululu mu bakisa muntu mu bâ penepene na Yehova?

¹⁰ Tufweti bâ na luvivululu mu bungu ti ntangu yayingi yifwanane ngatu muntu wakâla kwe Yehova. Bantu babingi bayizi kota tiozi batâka ti bakuluntu na bantu bakaka ba timvuka mbala zazingi bayizi ba tala ntete bavutu kârila mu sarila Yehova. Mpangi yimosi ya yikento ya ku Asie yi batêle nkumbu Nancy, watsoneka: “Ndiku yimosi ya timvuka yi tabâ penepene yakumbakisa bwabwingi. Wakunzolo ntiana kwa yaya’andi. Wakumbambula ntangu za mbote zita yôkesa nandi mu ntama. Na luvivululu lwalwansoni keri kungwirikilaka bu ndieri mu têlaka mbanzulu zani, mpe keri’â tîna ko mu kungana malongi. Wayizi moneka nguria ndiku yihanaka malongi ntangu ni ntangu.”

11. Mu bungu dia nti twena na nsatu ya tiari tia bakaka mu bakisa muntu we wa fwema?

¹¹ Mu ntangu muntu bu wufwemaka lendi mona mpasi ku mutima. Tiari tia bakaka tiena ntiana tilongo tia ngolo tilendi bakisa muntu  wo mu mona bubote. Bantu bakaka ba kota tiozi, mu bungu ti muntu mu timvuka tuka ntama wabafwemesa mpe balunda nkesi. Mu bungu dia mabanza mo ka basala zolo ko mu kâla kwe Yehova. Bakaka balendi banza ti kondo kwa buderede babasila. Balendi bâ na nsatu muntu wubawirikila mpe wubakula mabanza mawu. (Zaki 1:19) María mpangi ya yikento ya kota tiozi mu ntama têle ti: “Mbo nibâka na nsatu ya muntu wukungwirikila, wukuntindisa mpe wukungana malongi ma mabote na lubakusu.”

12. Mu bwe luzolo lwa Yehova lwena ntiana musinga?

¹² Bibila mbo difwanakasaka luzolo lwa Yehova mu bungu dia kanda diandi na musinga. Mu bwe luzolo lwa Yehova lwena ntiana musinga? Tabongeno tifwani: Bwiri mu mubu (mer). Matuma (vagues) ngolo mena mpe mamba tiozi mena. Ni nge ta yambuka. Mpe muntu we mu bato yilembolo mala na nge ku tubiriri tima ti lendi simba ngatu walembo yambuka. Tomono tonda. Kâ, mu bâ wa moyo, fweti duka mu mamba. Bantu bê mu bato bafweti ku tubila musinga mpe bafweti ku bakisa mu kota mu bato. Yehova watâ ebu mu bungu dia bala ba Israele ba kota tiozi: “Natatamane mu ba benda [. . .] mu misinga mia luzolo.” (Ozea 11:4) Lumbu ti, Nzambi mabanza ni mo me nandi mu bungu dia bantu ba kota tiozi mpe bata yambuka mu misamu na mu bunkuta. Zololo bazaba ti bawu kazololo mpe we nandi bakâla kwe Yandi. Yehova lendi ku sarila mu ba songela luzolo lo.

13. Bwe tinsamu tia Pablo tita songela ti luzolo lulendi bakisa bantu bakaka mu kâla kwe Yehova?

¹³ Musamu wa mfunu wena mu têla bantu ba kota tiozi ti Yehova na beto mpe bawu tuzololo. Pablo, wu bazonzele mu timoko tiayôkele, mpe weri mu tiozi mvula yôka 30 têle ti: “Lumbu timosi mu pari, bu ndieri katukaka ku  nzo’ani tabwabana na mpangi yimosi ya yikento ya mbuta yeri na nsayi, wakunzonzela na luzolo lwalwansoni. Nayizi dila ntiana mwana fioti. Namutêla ti, ntiana Yehova wamutambika mu kunzonzela. Ni mu ntangu yo nabonga nzengolo ya kâla kwe Yehova.”

14. Tintwari na tifwani tie mu Like 15:4, 5, mvungi nti weri saka bu weri monaka timeme tiawumuka?

¹⁴ Tufweti tatamana mu bakisa na mu tindisa bantu ba kota tiozi bu tubamonaka. Ntiana mwana wawumuka we mu tifwani tia Yezu, balendi bâ na mputa za mutima zizingila mu wasa. Mpe mu bungu ti mu nza ya Satana batûkiri, kampe tindiku tiawu na Yehova ka tiasala ngolo ko ntiana mu ntama. Tufweti ba bakisa mu yika tindiku tiawu na Yehova ngolo. Mu tifwani tia bimeme biawumuka, Yezu wasongela ka bwe mvungi weri bongelaka timeme ha mahembo mpe ka bwe keri tia natinaka mu mpaka. Mvungi mbo keri yôkesaka ntangu mpe mbo keri sarilaka ngolo mu dzukula timeme tiwumukini. Kâ mbo keri zabaka ti timeme tio tieri na nsatu lubakusu lwalwingi. Mu bungu ti musamu wa mpasi weri kwe timeme tio mu kwe yende, mvungi mbo keri sa tia nangunaka.​—Tanga Like 15:4, 5.

15. Bwe tulendi bakisila bo bata zolo mu kâla kwe Yehova? (Tala kaku tie na mutu-diambu “ Tisalulu tia ntalu.”)

¹⁵ Kampe tufweti sarila ntangu na ngolo zazingi mu bakisa mpangi za kota tiozi mu telamana musamu wa mpasi wuta ba kabakasa mu vutu sarila Yehova. Kâ na lubakusu lwa mpeve santu ya Yehova, lwa Zu diandi na lwa mikanda mi tubakaka mu timvuka, tulendi ba bakisa mu bâ na timpeve tia ngolo. (Rom. 15:1) Bwe tulendi sa? Mpangi mosi ye kuluntu tuka ntama têle: “Bantu babîngi ba kota tiozi, nsatu ndongokolo  ya Bibila yibâka nawu bu babongaka nzengolo ya vutu sarila Yehova.” * Buna, tala ti bakulombele mu longoka na muntu wa kota tiozi, tambula bweso bo na nsayi yayansoni. Mpangi yo ye kuluntu yivutulu tâ ti: “Mpangi yilongesa muntu wa kota tiozi fweti bâ ndiku ya mbote, fweti bâ muntu wu kalendi kwikila mpe wu kalendi têla misamu miandi miamiansoni.”

16. Bwe tuzabiri ti tulendi sikirila lubakusu lwa bambazi?

¹⁶ Misamu miamingi mita songela ti bambazi bakisa bata tu bakisa mu dzukula mpangi zo za kota tiozi zita zolo mu kâla kwe Yehova. (Nza. 14:6) Mu tifwani, Silvio bâka ku Équateur, wasambila na bunsungu bwabwansoni ngatu Yehova katambika muntu wumubakisa mu kâla mu timvuka. Mu ntangu yo kwa yi keri sambilaka, bakuluntu bole beri ha mwelo’andi. Bu baye mu tala, nsayi yayingi yeri nawu ya batika mu mu hana lubakusu lweri nandi nsatu.

17. Bwe tumona ku mutima tala ti tubakisi mpangi za kota tiozi?

¹⁷ Mbo tubaka nsayi yayingi tala ti tubakisi bô balembolo na ngolo mu timpeve bakâla kwe Yehova. Talanda mia tâ Salvador, mupasuri-nzila wutomo kipaka mpangi za kota tiozi, têle ti: “Ntangu zakaka bu nibanzaka mpangi ya kota tiozi yikêri kwe Yehova, nsayi mbo yikundirisaka. Nsayi yayingi yibâka nani bu nibanzaka ti Yehova wavukisi wumosi wa bimeme biandi bia ntalu mu nza ya Satana mpe mu bungu ti bweso nabakiri bwa sala tintwari na Yandi mu tisalu tio.”​—Bisalu 20:35.

18. Tala ti wa kota tiozi, ntia lukwikulu lu lendi bâ naku?

¹⁸ Tala ti wa kota tiozi, mulemvo’aku, bâ na lukwikulu ti Yehova nge katiri zolo. Zololo wakâla kwe Yandi. Lendi sarila ngolo mu kâla kwe Yandi. Kâ, ntiana tata dia tifwani tia Yezu, Yehova nge kata kêla wakâla, mpe mbo kabâ na nsayi yayingi ya ku bwana ku nzo.