1. Mu bungu dia nti Yehova katifwanakasa na nguri yita yemeka?

“NGANO mukento wulendi zimbakana mwana’andi wuyemaka?” Tio ni tiyuvu timosi tia yula Yehova mu ntangu ya mbikuri Izaya. Nzambi watâ kwe kanda diandi ti: “Ni bu sa ti bakento bô balendi zimbakana, kani kabwe meno ka nikuzimbakana ko.” (Iza. 49:15) Nzambi ka vulu’â tifwanakasaka na nguri ko. Kâ, mbo kasaka bo ntangu zakaka. Yehova mbo kasarilaka luzolo lwa ngolo lwe ha kati dia nguri na mwana’andi mu songela ka ntia mpila ke wa kangama kwe bisari biandi. Nguri zazîngi zilendi bakula misamu mia tâ mpangi yimosi ya yikento ye na nkumbu Jasmin: “Mu ntangu yita yemeka mwana’aku, luzolo lwa ngolo ta tunga luzingila luzingu lwalwansoni.”

2. Bwe Yehova kamonaka ku mutima mu ntangu wumosi wa bisari biandi wumubikaka?

² Mu ntangu wumosi wa bisari biandi wubikaka mu samuna na mu kwendaka ku tukutakanu, Yehova mbo kazabaka. Banza’eti mpasi zi kamonaka ku mutima mu ntangu mafunda ma bisari biandi bikwizi kotaka tiozi. *.

3. Ngano Yehova bwe kazololo?

³ Mpangi zo za ntalu za kota tiozi, zazingi zikâlaka mu timvuka, mpe nsayi yayingi yibâka neto mu ntangu yi bakâlaka! Yehova zololo ti bakâla, beto mpe. (1 Pi. 2:25) Ngano bwe tulendi ba bakisila? Ntete tahanina tiyuvu tio mvutu, bubote bwena mu zaba, mu bungu dia nti bantu bakaka babikilaka mu vutu kwizaka ku tukutakanu mpe balembo vutu samunaka.

4. Bwe tisalu tiasobesela bantu bakaka?

⁴ Babingi bayizi tûla tisalu tiawu ha mbuka ya ntete mu luzingu lwawu. Mpangi yimosi yibâka ku Asie, yi batâka nkumbu Hung, * têle ti: “Mbo ndieri yôkesaka ntangu yayingi mpe mbo ndieri sarilaka ngolo zazingi ku tisalu.” Vutulu tâ ti: “Nayizi banza mu mpila ya mbi. Mbo ndieri banzaka ti namana bâ na mbongo zazingi mbo nitomo sarila Yehova. Ntiangu nabatika mu yôkesa ntangu yayingi ku tisalu. Nabatika mu lembo vulu kwendaka ku tukutakanu mbala zazingi, ha manima nayizi bika mu kwendaka ku tukutakanu. Satana mbo kasarilaka nza mu wubakasa bantu malembe malembe ngatu babika mu sarila Yehova.”

5. Ntia misamu mia turila mpangi yimosi ya yikento?

⁵ Mpangi zakaka za zikento na za zibakala mbo zibwabanaka na misamu miamingi mibanôkesaka. Anne wa ku Grande-Bretagne, we nguri ya bala batanu (5) têle ti: “Mwana’ani wa nzole wabutuka na tifuma tia ngolo.” Vutulu tâ ti “Ha manima, mwana’ani wa ntatu bayizi mu katula mu timvuka, mpe mwana’ani wa yà wayizi bela malari ma mutu. Nayizi tomo kota mu bunokena mpe nayizi bika mu kwendaka ku tukutakanu na ku salu tia samuna. Wa matieleka, nayizi kota tiozi.” Tiari tie neto ku mutima mu bungu dia Anne na kanda diandi mpe na bantu babansoni babwabanaka na misamu mia mpila yo!

6. Mu bungu dia nti muntu wulendi dioka timvuka tala ti ka sariri’â Bisi-Kolose 3:13 ko?

⁶ Tanga Bisi-Kolose 3:13. Bisari biakaka bia Yehova bia baka nkesi mu bungu dia musamu wa yirika mpangi yakaka. Ntumwa Paulo wa tâ ti ntangu zakaka tulendi bâ na nguria musamu mu niongena mpangi’eto. Balendi tu bongela na kondo kwa buderede. Tala ka tusiri’â keba ko, tulendi fwema. Muntu bu wubâka mu nkesi, lendi dioka kanda dia Yehova. Tabongeno tifwani tia Pablo, mpangi ya ku Amerike ya ku side. Bamuwunisina ti musamu wa mbi kayirika, mpe mu bungu dia musamu wo wahombesa madema mu timvuka. Bwe kasa? Pablo têle ti “Natomo baka nkesi, mpe malembe malembe nayizi dioka timvuka.”

7. Nti bilendi turila muntu we na ngindu yimusembaka?

⁷ Tala ti muntu disumu dia dinene kasa mu ntama, ngindu’andi yilendi mu semba ntangu zazingi. Lendi banza ti Nzambi ka ta vutu mu zolo ko. Ni bu sa ti wasoba mabanza mu bungu dia ndiatulu’andi ya mbi mpe walomba mulemvo, lendi banza ti ka ta vutu fwanakana ko mu bâ mu kanda dia Nzambi. Mpangi yimosi ya yibakala ye na nkumbu Francisco ni buna mpe keri banzaka. Têle ti:“Bayizi kunsemba mu bungu ti bunsuza nasa”. “Ni bu sa ti ha ntete ntete nayizi tatamana mu kwendaka ku tukutakanu, bunokena bwayizi kunkota mpe nayizi banza ti ka ndieri’â vutu fwanakana ko mu bâ mu kanda dia Nzambi. Ngindu’ani semba kwa yeri kunsembaka, mpe lukwikulu lwabâ nani ti Yehova ka kundemvokela ko. Ha manima nayizi bika mu samuna na mu kwendaka ku tukutakanu.” Ntia mabanza me naku mu bungu dia mpangi zitelamanaka mpasi ntiana zo zi tuzonzele? Ngano tiari tie naku mu bawu? Kâ, musamu wuyôkele mfunu ni ewu: Ngano Yehova bwe kababongelaka?

8. Ngano Yehova bantu beri mu sarilaka ba kazimbakanaka? Bangula.

⁸ Yehova ka zimbakanaka bantu beri mu sarilaka ko mpe bayizi bika mu mu sarila ntangu fioti. Ka zimbakanaka mpe mio mi  basa mu tisalu tiandi ko. (Ebr. 6:10) Mbikuri Izaya tifwani tia mbote kayizi hana mu bangula mio mi kamonaka Yehova ku mutima mu bungu dia kanda diandi. Izaya watsoneka ti: “Ntiana mvungi mbo kakipa bimeme biandi. Mbo kakutakasa bala ba bimeme mu koko kwandi mpe mbo kabatûla ha titulu tiandi.” (Iza. 40:11) Bwe mvungi ya yinene kamonaka tala ti timosi tia bimeme biandi tizimbakane? Yezu wasongela ka bwe Yehova kamonaka ku mutima bu kayula milongoki miandi: ‘Bwe luta wa banzila? Tala ti muntu bimeme nkama (100) bie nandi, timosi tiamana wumuka, ngano ka sa sisa bia luvwa na vwa (99) ko ku mongo mu kwe tombe tina tiwumukini? Kamana tia mona, wa matieleka nita lu têla, nsayi yi timuhana mbo yiyôka nsayi ya bio bia luvwa na vwa bilembolo wumuka.’​—Mat. 18:12, 13.

9. Bwe mivungi mia mbote mia ntama mieri kipilaka bimeme biawu? (Tala tifwani tia tinima tia ntete.)

⁹ Mu bungu dia nti tulendi fwanakasa Yehova na mvungi? Mu bungu ti mvungi wa mbote mu ntangu ya ntama, bimeme biandi keri tomo fwilaka tiari. Mu tifwani, Davide wanwana na ngo-mbulu mpe na ours mu kengerela twila diandi. (1 Sam. 17:34, 35) Mvungi wa mbote kampe mbo kazabaka tala ti timosi tia bimeme biandi tizimbakane. (Za 10:3, 14) Mvungi wa mpila yo mbo kasa sisa bimeme 99 ku mpaka peleko kwe mivungi miakaka mia kengerela bio mpe mbo kakwe dinga tio tizimbakane. Yezu wasarila tifwani tio mu longesa matieleka ma mfunu: ‘Tata’eno mpe we ku mazulu ni bo kazololo ti kani wumosi mu bala ba ka wuwumukandi.’​—Mat. 18:14.

10. Tintwari na Ezekiele 34:11-16, Yehova nti kakanisi mu sa mu bungu dia bimeme biandi biawumuka?

¹⁰ Yehova beto bansoni kazololo, na “ndambu” bimeme biawumuka mpe. Mu nzila ya mbikuri Ezekiele, Nzambi wakanisina ti mbo kaketi kwe dinga bimeme biandi biawumuka mpe mbo kaketi bia bakisa ngatu biavutu karisa tindiku tiawu tia mbote na Yandi. Mpe wazonzela mpila yi kaketi bia bakisila, ntiana kwa bweri saka mivungi mia ku Israele mu bakisa  timeme tizimbakane. (Tanga Ezekiele 34:11-16.) Ntete, mvungi mbo keri kwe dingaka timeme, ntangu zakaka, ntangu yayingi na ngolo zazingi zeri dinganaka. Ha manima, bu keri dzukulaka timeme tizimbakane, mvungi mbo keri tia karisaka mu mpaka. Musamu wakaka, tala ti timeme tia lwala tieri peleko nsatu yeri nandi, na luzolo lwalwansoni, mvungi wafweti mu bakisa, wafweti buka mputa zandi, wafweti mu nanguna, mpe wafweti mu dika. Bakuluntu, mvungi za “twila dia Nzambi,” bafweti sarilaka mu mpila yo ngatu babakisa bô babika timvuka. (1 Pi. 5:2, 3) Bakuluntu dinga bakwe ba dingi, mbo bababakisaka mu kâla mu timvuka, mpe mbo babasongelaka luzolo bu babahanaka lubakusu mu vutu bâ ndiku za Nzambi. *

11. Ngano mvungi wa mbote nti keri bakulaka?

¹¹ Mvungi wa mbote mbo weri bakulaka ti timeme tilendi wumuka. Mpe tala ti timeme tiayizi wumuka, mvungi keri’â tia sembaka ko. Tazonzela tifwani tia tu hana Yehova mu bakisa bô beri bisari biandi mpe bayizi wumuka.

12. Bwe Yehova kabongela Yona?

¹² Mbikuri Yona wakolama kwe Yehova mpe ka yenda ku Ninive ko. Ni bu sa ti misamu ni bo mieri, Yehova ka mu losa mu ntinu ntinu ko. Ntiana mvungi wa mbote, Yehova wamubakisa mu vutu bâ na ngolo zeri nandi nsatu mu sala tisalu ti kamuhana. (Yona 2:7; 3:1, 2) Ha manima, Nzambi wasarila muti wubutaka nkalu mu bakisa Yona ngatu kabakula ntalu ya luzingu lwa muntu. (Yona 4:10, 11) Ntia malongi tuta baka? Bakuluntu ka bafweti’â bakulu losaka bô ba kota tiozi ko. Kani basarila bo, bakuluntu mbo bayêlaka mu bakula nti biasa ti timeme tiawumuka. Mpe bu kâlaka timeme kwe Yehova, bakuluntu mbo batatamanaka mu mu songela luzolo.

13. Nti tulendi longoka mu mpila ya bongela Yehova titsoniki tia Mikunga 73?

¹³ Titsoniki tia Mikunga 73 wayizi nôka bu keri monaka mpila yeri lendelaka bankwa-mbi. Wayizi tiyula tala ti ndandu yeri kô mu  sarilaka luzolo lwa Nzambi. (Mik. 73:12, 13, 16) Ngano Yehova bwe kasa? Ka mu semba ko. Kâ, Nzambi watsonekesa misamu miandi mu Bibila. Titsoniki tio tia Mikunga tiayizi bakula ti tindiku tia mbote na Yehova tiyôkele tima ni tima mu ntalu. (Mik. 73:23, 24, 26, 28) Ntia malongi tuta baka? Bakuluntu ka bafweti’â bakulu fundisaka bantu bô babatikaka mu yula tala ti ndandu ye kô mu sarila Yehova. Kani babasemba, bakuluntu bafweti yêla mu bakula mu bungu dia nti bata zonzela peleko bata diatila bo. Ha manima, bakuluntu balendi sarila Zu dia Nzambi mu ba tindisa.

14. Mu bungu dia nti Eliya keri na nsatu lubakusu, mpe bwe Yehova kamuhanina lo?

¹⁴ Mbikuri Eliya wadioka Yezabele weri mukento wa mutinu. (1 Mi. 19:1-3) Mbo keri banzaka ti ka kwa sâla na kani mbikuri yimosi ya Yehova ko, mpe wayizi banza ti tisalu tiandi tia mpamba kwa tieri. Eliya mutu’andi wayizi tomo zungana mpe wayizi dinga kafwa kwandi. (1 Mi. 19:4, 10) Kani kasemba Eliya, Yehova wamutindisa bu kamutêla ti ka sâla yandi kaka ko, kabâ na lukwikulu mu ngolo za Nzambi, mpe tisalu tiatingi tieri kô ti kafweti sala. Yehova wawirikila Eliya na nsayi yayansoni mpe wamuhana bisalu biakaka. (1 Mi. 19:11-16, 18) Ntia malongi tuta baka? Beto bansoni, nsungula bakuluntu, tufweti bongelaka bimeme bia Nzambi na nsayi yayansoni. Ni bu sa ti muntu mbo wuta tâ ti mu nkesi kena peleko mbo wuta tâ ti mbo kamonaka ti Yehova ka sa mu lemvokela ko, bakuluntu bafweti mu wirikila bu kata zonzela mabanza mandi. Ha manima, bafweti yêla mu songela kwe timeme  tiwumukini ti nkatika ntalu tiena kwe Yehova.

15. Mu nzonzolo ya Za 6:39, Yezu bwe keri bongelaka bimeme bia Tata’andi?

¹⁵ Yehova bwe kazoloko tabongelaka bimeme biandi biawumuka? Tulendi baka ndongosolo mu tifwani tia Yezu. Wazaba ti bimeme biabiansoni bia Yehova ntalu biena ha meso ma Nzambi, ntiangu Yezu kasa miamiansoni mi kalenda mu bakisa ‘bimeme bia ku nsi ya Isarele biawumuka’ mu kâla kwe Yehova. (Mat. 15:24; Like 19:9, 10) Ntiana mvungi wa mbote, Yezu mpe wasa miamiansoni mi kalenda mu lembo wombesa bimeme bia Yehova, na kani timosi.​—Tanga Za 6:39.

16-17. Ngano bakuluntu bwe balendi bongelaka musamu wutariri lubakusu kwe bô babika mu sarila Yehova? (Tala kaku tie na mutu-diambu “ Bimeme biawumuka bwe bilendi mona.”)

¹⁶ Ntumwa Paulo watindisa bakuluntu ba timvuka tia Efeze mu landa tifwani tia Yezu. ‘Mu miamionsoni, nalusongele ti ni mu tisalu, lufweti bakisila bamputu, bu luvutu bambukila moyo misamu mia têle Mfumu Yezu yandi beni ti: “Kaba, kuyôkele kiese na tambula.”’ (Bisalu 20:17, 35) Wa matieleka, verse yo yisongele ti bakuluntu dema dia dinene die nawu dia kipa kanda dia Nzambi. Salvador kuluntu wa ku Espagne têle ti: “Bu nibanzaka mpila Yehova yikakipilaka bimeme biandi bia wumuka, mbo nibâka na tiya twa sa miamiansoni mi nilenda mu babakisa. Ntiana mvungi wa timpeve, lukwikulu lwe nani ti Yehova zololo ti nakipa bimeme biandi.”

¹⁷ Bantu babansoni ba bazonzele mu timoko ti babika mu sarila Yehova, bakârila mu sarila Yehova bu bababakisa. Bwawu bu mpe, babingi badioka timvuka bê na nsatu ya kâla mu timvuka. Timoko tita landa mbo tizonzela mu bula nti tulendi sa mu bakisa bantu bô ngatu bakâla kwe Yehova.