Misamu mie kô misongelaka ti Yezu mu muvu wa 29 M.B. kayizi bâ Mfumu-Nganga-Nzambi, bu kayizi batusu. Ngano bwe tuzabiri wo? Mu ntangu yi kabatusu, Yezu wasongela ti wayizi tambula mu hana luzingu lwandi mu mukayulu ha tifwani tia ziku dia “luzolo” lwa Nzambi. (Nga. 1:4; Ebr. 10:5-10) Mu bungu ti tifwani tio tia ziku tuka bateme ya Yezu tisalaka, tempelo ya yinene ya timpeve ni mu ntangu yo mpe yabatika mu sala. Tempelo yango ni misamu miamiansoni mia kubika Yehova ngatu bantu bamusambilaka mu mpila ya verela mu nzila ya nkûlulu. Mu bungu ti ziku mfunu diena mu kati dia tempelo, kampe tempelo ya yinene ya timpeve yabatika mu sala mu ntangu Yezu yi kayizi batusu. Tempelo ya yinene ya timpeve ya Yehova ni bima peleko misamu miamiansoni misaka ti tasambila Yehova bubote bubote mu nzila ya mukayulu wa Yezu.​—Mat. 3:16, 17; Ebr. 5:4-6.

Ngatu tempelo ya yinene ya timpeve yasala, yafweti bâ na Mfumu-Nganga-Nzambi. Dieka bo, Yehova watumba Yezu ngatu kabâ Mfumu-Nganga-Nzambi “na mpeve santu na ngolo.” (Bis. 10:37, 38; Mak. 1:9-11) Kâ, ngano bwe tulendi bêla na lukwikulu ti Yezu wayizi bâ Mfumu-Nganga-Nzambi ntete lufwa lwandi na mvumbukulu’andi? Mu hanina tiyuvu tio mvutu, tataluzula tifwani tia Arone na Mfumu-Nganga-Nzambi zalanda ha manima mandi.

Musiku wa hana Yehova kwe Mose mbo weri tâka ti Mfumu-Nganga-Nzambi kwa weri na nswa wa kota mu mbuka yiyôkele ya santu mu tabernakle, mpe mu bilumbu biaketi kwiza yandi kwa mpe waketi bâ na nswa wa kota mu mbuka yiyôkele ya santu mu tempelo. Rido yeri kabaka mbuka yiyôkele ya santu na mbuka ya santu. Mu tilumbu kwa tia zibika masumu Mfumu-Nganga-Nzambi keri sabukaka rido yango. (Ebr. 9:1-3, 6, 7) Ntiana Arone na Mfumu-Nganga-Nzambi zamulanda bafweti toko ba tumba Mfumu-Nganga-Nzambi ntete “baasabuka [nguria] rido” ya mu tabernakle, Yezu bafweti toko mu tumba Mfumu-Nganga-Nzambi ya tempelo ya yinene ya Yehova ntete lufwa lwandi. Buna, mbo kaketi bâ na nswa wa “sabuka rido, mpila mosi nitu’andi ya tinsuni” mu kwe bâ ku mazulu. (Ebr. 10:20) Mu bungu dia musamu wo, ntumwa Paulo wazonzela Yezu wayiza mu “tifwani tia Mfumu-Nganga-Nzambi” mpe “wakota mu tivula tia tinene” tiyôkele tia lunga, ti balembo sarila mu moko, mpila “mosi ku mazulu.”​—Ebr. 9:11, 24, NWT.

Ka kwena luswaswanu ko ha kati dia ntangu yi batambula luwawanu lwa môna na ntangu yi lwabatika mu sala. Ngano mu bungu dia nti? Yezu bu kanaka ku mazulu mpe bu kasongela ntalu ya luzingu lwandi lwa tinsuni lwa lunga mu bungu dia beto, wayizi lungisa titini tia ntete tia bitini bitatu ngatu Yehova katambula luwawanu lwa môna. Bitini bio, ni bio biasa ti luwawanu lo lwabatika mu sala. Ngano bitini biango ni bie?

Ntete, Yezu watoko moneka kwe Yehova; ha manima Yezu wasongela ntalu ya mukayulu’andi; mboko, Yehova watambula ntalu ya menga ma katsamuma. Ntete bitini bio bialungana, luwawanu lwa môna ka lwatibatikila ko mu sala.

Bibila ka ditomo’â tu zonzelaka bubote bubote ko ntangu Yehova yi katambula mukayulu wa Yezu. Dieka bo, ka tulendi’â tatomo zaba ntangu yi batambula luwawanu lwa môna ko na ntangu yi lwabatika mu sala. Kâ, tuzebi ti bilumbu 10 ntete Pentekote Yezu wanaka ku mazulu. (Bis. 1:3) Mo mwa ntangu yo, Yezu wasongela ntalu ya mukayulu’andi kwe Yehova, mpe Yehova watambula mukayulu wango. (Ebr. 9:12) Misamu miango miatomo moneka mu tilumbu tia Pentekote. (Bis. 2:1-4, 32, 33) Buna, luwawanu lwa môna lwayizi salama mpe lwabatika mu sala.

Mu bukufi, luwawanu lwa môna bayizi lwa tambula mpe lwayizi batika mu sala mu ntangu Yehova yi kamana tambula ntalu ya menga ma tsamuna Yezu. Dieka bo, luwawanu lwabatika mu sala mu lutumu lwa Yezu, Mfumu-Nganga-Nzambi, weri Nzonzi ya luwawanu lwango.​—Ebr. 7:25; 8:1-3, 6; 9:13-15.