Ku hata dia St. Paul nabutukila, ku tizunga tia Minnesota, ku États-unis, mu muvu wa 1954. Bibuti biani ka bieri’â bamvwama ko, ka bieri’â mpe bamputu ko; mu dibundu dia Katolike (Catholique) beri. Meno ni mwana wa nzole mu bala bawu ba batanu (5). Bu ndieri mwana fioti, ku lukolo lwa bakatolike ndieri kotelaka, mpe mipelo ndieri bakisaka ku tukutakanu. Kâ, ka natomo’â zaba Bibila ko. Ni bu sa ti mbo ndieri kwikilaka ti Nzambi ye kô yasala bima biabiansoni, ka ndieri’â kwikilaka ko ti dibundu dia Katolike dilendi kumbakisa mu mu sambila.

Mvula ya ntete yi nayôkesa ku lukolo lu balongokaka misiku mia hata lu batâka nkumbu William Mitchell, Mbangi za Yehova zole zayizi kuntala ku nzo. Ka nabâ na ntangu ko mu bungu ti binkuti ndieri sukulaka; Mbangi zo za kwelana zatambula na nsayi yayansoni mu vutu kwiza mu ntangu yakaka. Mu ntangu yi bavutu kwizi kuntala, biyuvu biole biabâ nani mu bungu dia bawu: “Mu bungu dia nti bantu ba mbi balendelaka luzingu lwawu yôka bantu ba mbote?” mpe “Ngano bwe bantu balendi tomo bêla mu nsayi?” Nayizi tambula buku dia La vérité qui conduit à la vie  éternelle na Bibila dia Les Saintes Écritures. Traduction du monde nouveau dieri na langi wa lukaya lwa ntoba (couleur verte). Natambula mpe mu longoka Bibila. Ndongokolo yo yatomo kunzibula meso. Nsayi yayingi yabâ nani mu longoka ti Timfumu tia Nzambi ni guvernema yikwizi twarisa mutoto. Nayizi bakula ti lutumu lwa bantu lwayizi lembana misamu mpe nza ya fuluka yeri mu mpasi na mukondo kwa buderede.

Nayizi tihana kwe Yehova mu muvu wa 1982 mpe nayizi batusu ku lukutakanu lwa lunene lweri na mutu-diambu “Matieleka ma Timfumu” mu nzo yimosi ya yinene ya ku St. Paul. Mu lumungi lwalanda, nakâla mu kwe sa ekzame mu bâ muntu wu nwaninaka bantu bakaka mu misamu mia mfundusu (avocat). Mu mbatukulu ya ngonda ya 10, nayizi lenda ekzame yeri kunganaka nswa wa sala tisalu tia avocat.

Ku lukutakanu lo lwa “Matieleka ma Timfumu,” nayizi bwabana na Mike Richardson, weri salaka ku Betele ya Brooklyn, yandi wakuntêla ti, biro ditalaka misamu mia Mfundusu mia hata bazibula ku Siège mondial. Nayizi bambukila nzonzolo ya Musi-Etiopi ye mu Bisalu 8:36 mpe natiyula: ‘Ngano nti bita kunkabakasa mu sala ku biro ditala misamu mia mfundusu?’ Buna, nayizi bonga nzengolo ya sa ndombolo mu sala ku Betele.

Bibuti biani ka bieri’â na nsayi ko bu nayizi bâ Mbangi ya Yehova. Tata’ani wakundiyula ntia ndandu tisalu tiani ku Betele tiaketi ku natina mu tisalu tiani tia avocat. Nayizi mu têla ti, tisalu tia luzolo lwa mutima ndieri zoloko mu sala. Nayizi vutu mu têla ti 75 Dollars (kampe 45 000 FCFA) baketi kunganaka mu ngonda, zo ni mbongo zi beri hanaka kwe bantu beri salaka ku Betele mu bungu dia nsatu zawu.

Mu bungu ti bayizi kuntambula mu sala ku nzo ya mfundusu, ka naketi’â sala ku Betele ko hô nkatika bendo; kâ nayizi batika tisalu tiani ku Betele ya Brooklyn mu 1984. Ku biro ditalaka misamu mia mfundusu ndieri salaka. Tisalu ti ndieri salaka ku nzo ya mfundusu tiakunkubika mu bungu dia misamu miaketi kwiza.

Mu ngonda ya 11 ya 1983 bayizi sumba nzo ya Théâtre Stanley ku Jersey City, ku tizunga tia New Jersey. Mpangi zeto zayizi lomba nswa wa tomesa courant na tuyaux za nzo yango. Mpangi zeto bu zayizi bwabana na mfumu za hata, bayizi tâ ti nsatu yeri nawu ya sa ti nzo ya Théâtre Stanley yabâ nzo ya tukutakanu twa tunene ya Mbangi za Yehova. Musamu wa mpasi weri. Misiku mia ku Jersey City mbo mieri yiminaka mu tûla Nzo za  Nsambululu mu bizunga bibâka bantu. Théâtre Stanley mu tizunga tia nkari yeri, kâ mfumu za hata zayimina mu hana nswa wa tomesa yo. Mpangi zeto basila nzengolo yango ntembe ku nzo ya mfundusu, kâ ka babahana nswa wango ko.

Lumingu lwa ntete lu nasala ku Betele, organizasio yayizi funda mfumu za hata ku nzo ya mfundusu ya tizunga tio, mu bungu dia nswa wa tomesa Théâtre Stanley wu babayimina. Mu bungu ti mvula zole nasala ku nzo ya mfundusu ya ku St. Paul, ku tizunga tia Minnesota, misamu mi beri zolo tâka mia natomo zaba. Yimosi ya avocats zeri tu nwanika yatâ ti Théâtre Stanley ya beri sarila mu bungu dia tukutakanu twa mpila na mpila, na mu bungu dia concerts za mizike. Mu bungu dia nti balendi lembo ya sarila mu bungu dia tukutakanu twa nsambululu? Nzo ya Mfundusu ya yinene yataluzula musamu wango mpe yatâ ti mfumu za ku Jersey City ka zayizi’â zitisa nswa wa timpwanza tia nsambululu ko. Nzo ya mfundusu yalomba kwe mfumu za hata zahana nswa kwe organizasio; mpe nabatika mu bakula bwe Yehova keri sakumuninaka organizasio’andi bu yeri sarila misiku mia hata ngatu tisalu tiandi tiakula. Nsayi yayingi yeri nani mu sala mu bungu dia musamu wo.

Mpangi zeto ni zabatika ntomosono ya yinene, mpe milongoki mia classe ya 79 ya lukolo lwa Galade, ku nzo ya tukutakanu twa tunene ya Jersey City babahanina diplome zawu, mu tilumbu tia 8 tia ngonda ya 9 ya 1985, mvula yimosi kampe ha manima ma mbatukulu ya ntomosono ya Théâtre Stanley. Nsayi yayingi yeri nani mu sala tintwari na Yehova. Nsayi yi nayizi baka yayôka nsayi ya tisalu ti ndieri salaka ntete ndizi ku Betele. Ka ndieri’â wa banzaka ko ti Yehova lendi kunsarila mu bungu dia misamu mia mfundusu.

Mu mivu mia 1980, badoktere na tupitalu, ka beri’â vulu zitisaka nswa wa bantu beri kalaka nsalulu ya menga mu buka bimbevo ko. Bamfudisi mbo beri banzaka ti mukento we na zimi ka weri’â na nswa ko mu kala bamuyika menga. Bamfundisi batâ ti, tala ti ka bamuyikiri’â menga ko, nguri yilendi fwa mpe mwana wulendi kula wawu kaka.

Mu tilumbu tia 29 tia ngonda ya 12 ya 1988, mpangi’eto ya yikento yi batêle nkumbu Denise Nicoleau wahombesa menga mamingi bu kamana buta mwana’andi wa bakala. Mu bungu ti waketi fwa, doktere wamutêla katambula bamuyika menga. Mpangi’eto Nicoleau wakala. Tilumbu tialanda, badoktere balomba kwe bamfundisi nswa wa mu yika menga. Bamfundisi ka bahana nswa ko kwe mpangi’eto Nicoleau na bakala diandi bazonzela mpe mabanza mawu, mpe ka babatêla ko ti mfundisi wahana nswa kwe badoktere bamuyika menga.

Mu tilumbu tia 30 tia ngonda ya 12, venderedi, Badoktere ba ku lupitalu bayika menga kwe mpangi’eto  Nicoleau, ni bu sa ti bakala diandi na kanda diandi bayizi kala kwawu. Tilumbu tina, bantu ba kanda diandi babingi na bakuluntu bole peleko wumosi bakanga, babakwikisila ti badoktere beri kabakasaka mu kwe yika mpangi’eto menga. Mu tilumbu tialanda, zurnale, tele na radio za tizunga tia New York, bayizi zonzela musamu wo.

Mu tilumbu tia lundi mu pari, nazonza na mfumu ya bamfundisi, Milton Mollen. Nayizi mu têIa misamu mu mpila yi miayôkela mpe namutêla ti mfundisi yo yazenga musamu wo, ka yizi’â toko wâ musamu wango ko. Mfundisi yi batêle nkumbu Mollen walomba tamonana ku biro’andi ha manima ma midi mu zonzela musamu wango, mpe mu zaba ntia misiku tulendi sarila mu musamu wo. Munkengi wa tisalu tieto ku Betele, Philip Brumley, waye kunturisa ku biro ya mfundisi yi batêle nkumbu Mollen. Mollen watâ mpe mbila avocat ya lupitalu kabâ tintwari na beto. Timoko tieto tieri tia ngolo. Buna, Mpangi Brumley wakuntsonekena mwa note yi keri kuntêlaka ti mfweti bâ “wa dzuna.” Malongi ma mbote kakungana mu bungu ti yêla ndieri yêlaka mu songela ti avocat ya lupitalu ya mbi yeri.

Ha manima ma ngunga (heure) yimosi, mfundisi Mollen watâ ti musamu wo weri musamu wa ntete wu baketi zonzela tilumbu tiaketi landa. Bu tweri dukaka mu biro ya mfundisi Mollen, yandi watâ ti avocat ya lupitalu “tisalu tia mpasi tieri nandi tilumbu tieri landa.” Mbo keri zolo tâka ti, mbo wubâ musamu wa mpasi kwe yandi mu songela ti badoktere nswa weri nawu mu sa tiya kwe mpangi Nicoleau mu tambula bamuyika menga. Nayizi mona ti Yehova weri tu tindisaka, bweso bweri neto bwa nunga mo musamu mo. Nayizi yituku mu mona ti Yehova beto keri sarilaka mu lungisa luzolo lwandi.

Tayizi sala mpimpa yayansoni mu kubika misamu mi taketi tâ mu tilumbu tialanda. Nzo ya mfundusu penepene yena na Betele ya Brooklyn, dieka bo mpangi zazingi zi tweri salaka na zo bayiza ku lukutakanu lwa mfundusu. Bu bamana wâ mabanza meto, mfundisi za ziyà zayizi bonga nzengolo ye ti, ka bafweti’â batumaka muntu mu ngolo ko ngatu bamuyika menga. Nzo ya Mfundusu ya Yinene yahana mpangi Nicoleau mpemba mpe mfundisi zatâ ti, nsalulu ya bonga nzengolo ntete bawâ musamu we na muntu, kondo kwa buzitu kwena mu bungu dia misiku mia nguri.

Ha manima, Nzo ya Mfundusu ya Yinene ya ku New York yayizi tâ ti mpangi Nicoleau nswa weri  nandi wa kala bamuyika menga bu beri mu bukaka. Yo ni nzengolo ya ntete ya nzengolo ziyà zitariri nsalulu ya menga mu buka bimbevo, za yizi bonga nzo za mfundusu za zinene ku États-Unis; nayizi baka bweso mu zonzela zo. (Tala kaku “ Nunga ku Nzo ya Mfundusu ya Yinene.”) Nayizi sala mpe tintwari na avocats zakaka za ku Betele mu misamu mitariri nswa wa lunda bala, honda kwa makwela, na misiku mitariri nsalulu ya tupangu na ya nzo.

Mbala ya ntete yi nabwabana na mukento’ani, Dawn, mukento weri wahonda makwela mpe bala batatu keri sansaka yandi kaka. Mupasuri-nzila weri mpe tisalu tieri nandi. Luzingu lwa mpasi lwabâ nandi mpe nayituku mu bungu dia butindi bwandi bwa sarila Yehova. Mu 1992, bu tayenda ku lukutakanu lwa lunene lweri na mutu-diambu “Binati bia mutsamina” ku hata dia New York, namulomba mu makwela. Takwelana ha manima ma mvula yimosi. Bâ na mukento we na timpeve mpe wuzololo nsaka kabu dieri dia Yehova. Dawn watomo kunkipa bubote bilumbu biabiansoni bi tabâ tintwari.​—Bin. 31:12.

Bu takwelana, bala beri na mvula 11, 13 na 16. Weri nani nabâ tata dia mbote mu bungu dia bawu, ni ndieri vulu tangaka mikanda mieto mpe mbo ndieri sarilaka miamiansoni mi ndieri longokaka mitariri mpila ya sansila bala balembolo ba meno. Tayizi bwabana na nkwamusu mu mivu mialanda, kâ nsayi yayingi ye nani mu bungu ti bala bayizi kuntambula ntiana tata’awu di bazololo. Ndiku za bala beto mbo tweri tomo za bwanaka ku nzo’eto mpe nsayi yayingi yeri neto mu bâka tintwari na bantwenia ha kati dieto.

Mu 2013, Dawn na meno taye bâ ku tizunga tia Wisconsin mu kipa bibuti biandi bieri bia nuna. Nayizi yituku bu namona ti tisalu tiani tia ku Betele ka tiamanisa ko. Bayizi kuntâ mbila mu tatamana mu sala tintwari na organizasio mu misamumiamingi mitariri misiku.

Mu ngonda ya 9 ya 2018, nayizi mona ti kôla kwakwingi ndieri kôlaka ntete nazonza. Doktere dieto diakuntaluzula, kâ ka yizi’â zaba ko ntia timbevo tieri nani. Ha manima, doktere diakaka diatutêla ti ndie namonekena doktere dikipaka bimbevo bia mutu. Mu ngonda ya ntete ya 2019, doktere yo wayizi tâ ti timbevo tieri nani tibebesaka nitu yayansoni.

Bilumbu bitatu ha manima, bu ndieri saka sport’ani yi ntomono zolo, nayizi tiamuka koko. Sport yo luzingu lwani lwalwansoni ndieri ya saka mpe bubote ndieri ya saka. Nayizi bakula ti ka ndieri’â vutu lendaka ko mu zabirila binama biani. Natomo yituku mu ntinu zeri kurilaka timbevo tiani. Musamu wa mpasi weri kwe meno mu zonza, mu kwe yende na mu mina tima.

Nsayi yayingi ye nani ya bakisa organizasio ya Yehova mu tisalu tiani tia avocat. Bweso mpe bwa yizi bâ nani bwa tsoneka mikanda miamingi mi sarilaka badoktere, bamfundisi na ba-avocats. Nayizi tâ mpe binzonzi biabingi mu nza ya mukaka mu nwanina nswa wa kanda dia Yehova wa lembo sarila menga mu buka bimbevo. Dieka bo, mbo nitâka ntiana Like, titsoniki timosi tia Bibila, mu Like 17:10: ‘Ngamba ya mpamba kwa ndiena. Mio mi nsiri ni mio nafweti sa.’