1. Tintwari na 3 Za 3, 4, nti bituhanaka nsayi?

NGANO lendi banza nsayi yeri na ntumwa Za mu ntangu yi kawâ ti bantu ba kabikasa mu zaba matieleka batatamana mu sarila Yehova na kwikama kwakwansoni? Bantu bo bayizi bwabana na misamu miamingi, mpe Za wayizi sarila ngolo zazingi mu yika timinu tia Bakristo bo ba kwikama ngolo ba keri bongelaka ntiana bala bandi ba timpeve. Mpila mosi, beto mpe mbo tubâka mu nsayi mu ntangu bala beto peleko bantu ba tubakisaka mu zaba matieleka bakwizi tihanaka kwe Yehova, mpe batatamanaka mu mu sarila.​—Tanga 3 Za 3, 4.

2. Mu bungu dia nti Za katsonekena mikanda? Ntia kani Za katsonekena mikanda?

² Mu 98 M.B., kampe Za mbo keri bêlaka ku Efeze peleko penepene na hata dio. Kampe ni kuna kaye bâ bu bamudukisa mu boloko ku île ya Patemose. Mu ntangu yo kwa, mpeve santu ya Yehova yatuma Za mu tsoneka mikanda mitatu. Mikanda mio batsoneka mio ngatu miayika Bakristo ba kwikama ngolo, basimbirila timinu tiawu mu Yezu mpe batatamana mu diatila mu matieleka.

3. Ntia biyuvu tuhanina mvutu?

³ Za weri ntumwa ya mansukina yeri moyo, yandi weri na mutima lwaka mu bungu dia nsobolo za mbi zeri nataka ndongosolo za bungungu mu timvuka. * (1 Za 2:18, 19, 26) Bantu batelamanaka ndongosolo ya Kristo mbo beri tâka ti Nzambi Yandi bazebi, kâ ka beri’â tumamanaka ntumunu za Yehova ko. Mu timoko ti mbo tuzonzela malongi ma hana Za, mpe mbo tubaka mvutu mu biyuvu bitatu: Ngano diatila mu matieleka bwe wuta zolo tâ? Ntia misamu tufweti telamanaka? Mpe  bwe tulendi hanasana lubakusu mu tatamana mu diatila mu matieleka?

4. Mu nzonzolo ya 1 Za 2:3-6 na 2 Za 4, 6, nti bifwanakane mu diatila mu matieleka?

⁴ Mu diatila mu matieleka, tufweti zaba matieleka me mu kati dia Zu dia Nzambi, Bibila. Mpe, tufweti ‘kêla misiku [mia Yehova],’ wuzololo tâ tatumama mu misiku miango. (Tanga 1 Za 2:3-6; 2 Za 4, 6.) Yezu wasongela tifwani tia lunga tia tumama kwe Nzambi. Buna, mpila mosi ya mfunu ya tumama kwe Nzambi ni ya landa ntambi za Yezu mu mpila zazansoni zi tulenda.​—Za 8:29; 1 Pi. 2:21.

5. Ntia lukwikulu lufweti bâ neto?

⁵ Mu tatamana mu diatila mu matieleka, tufweti bâ na lukwikulu ti Yehova ni Nzambi ya matieleka, mpe misamu miamiansoni mi katutêlaka mu Bibila, Zu diandi, mia matieleka miena. Tufweti bâ mpe na lukwikulu ti Yezu ni Masiya. Lumbu ti, bantu babingi basaka ntembe bu bawâka ti Yezu bamutumba Mutinu wa Timfumu tia Nzambi. Za walwengesa ti mbo ku bâ ‘bihuni biabingi,’ bihuna bantu bô balembolo ba kubama mu nwanina matieleka matariri Yehova na Yezu. (2 Za 7-11) Za watsoneka ti: ‘Nani we ngungu, tala ka ni yandi’â wo ko kalaka ti Yezu, ni Kristo?’ (1 Za 2:22) Mpila ya yimosi yilembo tu wubakasa ni ya longoka Zu dia Nzambi. Tamana sila bo mbo tukwizi zaba Yehova na Yezu. (Za 17:3) Mpe mbo tukwizi bâ na lukwikulu ti mu matieleka twena.

6. Ntia musamu wumosi Bakristo bê ba ntwenia bafweti telamanaka?

⁶ Bakirsto babansoni bafweti sa keba mu lembo hunakana mu ndongosolo za bantu zi batâka nkumbu filozofi. (1 Za 2:26) Nsungula Bakristo ba ntwenia bafweti sa keba mu lembo bawuka mu mutambu wo. Alexia, * mpangi ya yikento ya ku France ye na mvula 25 yitêle ti: “Bu ndieri kotaka, nalongoka misamu mitâka ti nza yawu beni kwa yayilama na ndongosolo za bantu, mpe misamu mio miakuntuma nabâ na ntembe mu bungu dia matieleka. Ntangu zakaka, ndongosolo zo mbo zeri kunkârilaka. Kâ nayizi mona ti musamu wa mbi wena mu zimbakana mio mi longesaka Bibila, mpe mu kwikila mio mieri tâka baprofesere bani.” Alexia walongoka buku dia La vie:  comment est-elle apparue? Évolution ou création? Mu mwa tumingu twa ndongokolo, ntembe zandi zayizi zimbakana. Alexia têle ti: “Nayizi songela kwe me beni ti, mu Bibila matieleka me mo. Mpe nayizi mona ti mbo naketi kwizi bâ mu nsayi na mu tidzunu tala ti ndendi mitieno mie mo.”

7. Ntia musamu tufweti telamana mpe mu bungu dia nti?

⁷ Bakristo babansoni, bantwenia na bambuta, bafweti sa keba mu songelaka kwe bantu ti Yehova basarilaka, kâ mu mansweki mbi’awu bakwe sariri. Za watâ ti ka tulendi’â tadiatila mu matieleka ko tala ti ndiatulu ya bunsuza ye neto. (1 Za 1:6) Tala ti tuzololo tatâ Yehova nsayi, ntangu zazansoni tufweti bambukaka ti Yehova misamu miamiansoni mi tuyirikaka mia kamonaka. Mu nzonzolo yakaka, ni bu sa ti bantu bakaka ka bamonaka misamu mi tuyirikaka mu mansweki ko, Yehova mbo kamonaka misamu miamiansoni mi tuyirikaka.​—Ebr. 4:13.

8. Nti tufweti losa?

⁸ Tufweti losa mbanzulu za bantu mu musamu wutariri masumu. Ntumwa Za watsoneka ti: ‘Tamana tâ ti: “Ka twena na disumu ko”, tutihunini.’ (1 Za 1:8) Mu bilumbu bia Za, ba-aposta mbo beri tâka ti muntu wulendi bâ ndiku ya Nzambi ni bu sa ti misamu mi lembo zoloko Nzambi kayirikaka. Lumbu ti mpe, bantu ba tubâka na bo, mbanzulu ni zo ze nawu. Babingi batâka ti Nzambi bakwikilaka, kâ ka batambulaka mbanzulu zandi ko mu musamu wutariri masumu, nsungula musamu wa vukasa nitu. Ndiatulu ye kô Yehova yi katâka ti ya bunsuza yena mpe ya mbi yena, kâ bantu bo mbo batâka ti ndiatulu yo ya mbote yena kwe muntu wo wuzololo peleko wusolele yo.

9. Mu bungu dia nti wubâka musamu wa mbote mu ntangu bantwenia balandaka ndongosolo ya mbote ya Bibila?

⁹ Wulendi bâ musamu wa mpasi mu bungu dia Bakristo ba ntwenia mu tatamana mu bâ  na mabanza ma delakana mu musamu wutariri vukasa kwa nitu mu bungu ti bantu bavulu bâka nawu ku tisalu peleko ku lukolo ka batambulaka ndongosolo ya Bibila ko mu musamu wo. Musamu ni wo waturila Aleksandar. Têle ti: “Ku lukolo, bala ba bakento mbo beri yêlaka mu kuntuma mu vukasa nitu nawu. Mbo beri tâka ti meno pede yena mu bungu ti ka ndieri’â na makangu ko.” Musamu wa mpila yo wulendi ku turila. Kâ, wamana sarila misamu mi tâka Bibila ti mia mbote miena, mbo bâ na ngindu ya mbote, mbo kengerela tikolela tiaku, kukwizi’â bâ mu tiari ko, mpe mbo tatamana mu bâ na tindiku tia mbote na Yehova. Mpe ntangu zazansoni wamana telamana ntontolo ka wubâ musamu wa mpasi ko kwe nge mu yirika misamu mia mbote. Bambukaka ti mabanza ma mbi ma nza yi mu musamu wutariri vukasa kwa nitu kwe Satana matûkaka. Buna bu kâlaka mu bâ na mbanzulu za nza, ‘nkwa-mbi nungaka’​—1 Za 2:14.

10. Bwe 1 Za 1:9 yitubakisilaka mu sarila Yehova na ngindu ya mbote?

¹⁰ Mbo tutambulaka ti Yehova nswa we nandi wa tâ ka ntia musamu balendi bongela ntiana masumu. Mpe mbo tusarilaka ngolo mu lembo sa masumu. Kâ bu tusaka masumu, mbo tufungulaka musamu wa mbi wu tuyirikiri mu lusambulu kwe Yehova. (Tanga 1 Za 1:9.) Mpe tala ti tuyirikiri masumu ma manene, mbo tudingaka lubakusu lwa bakuluntu ba tûla Yehova ngatu batukipa. (Zaki 5:14-16) Kâ, ka tufweti’â tatisembaka ko mu bungu dia misamu mia mbi mi tayirika mu ntama. Mu bungu dia nti? Mu bungu ti Tata’eto dia luzolo diahana nkûlulu ya mukayulu wa Mwana’andi wu tubakilaka mulemvo. Yehova bu katâka ti mbo katulemvokela tala ti tutomono nionga mu bungu dia masumu ma tuyirikiri, zebi ka bwe kata zolo tâ. Buna ka kwena musamu ko wulendi tu kabakasa mu sarila Yehova na ngindu ya mbote.​—1 Za 2:1, 2, 12; 3:19, 20.

11. Bwe tulendi tikengerela mu bungu dia ndongosolo zilendi wolesa timinu tieto?

 ¹¹ Tufweti losa ndongosolo za Ba-aposta. Tuka mbatukulu ya timvuka tia Bakristo, Diabulu mbo katatamanaka mu yêla mu wolesa timinu tia Bakristo. Buna tufweti zaba mu swasikisa musamu wa matieleka na wa bungungu. * Mbeni zeto zilendi sarila Internet peleko réseaux sociaux mu yêla mu wolesa timinu tieto mu Yehova na luzolo lweto mu bungu dia mpangi zeto. Kukwikilandi bungungu bo, kwe Satana butûkaka!​—1 Za 4:1, 6; Nza. 12:9.

12. Mu bungu dia nti tufweti yikila timinu tieto ngolo mu matieleka ma tayizi longoka?

¹² Mu telamana Satana, yandi yêlaka mu wolesa timinu tieto, tufweti tomo kurisa lukwikulu lweto mu Yezu na mu mpila yi mu sarilaka Yehova mu lungisa luzolo lwandi. Tufweti mpe bâ na lukwikulu mu nzila yi sarilaka Yehova mu twarisa organizasio’andi. (Mat. 24:45-47) Mbo tukurisaka lukwikulu lweto bu tuvulu longokaka Zu dia Nzambi. Buna, timinu tieto mbo tikwizi bâ ntiana muti we na miandi miayenda na tii ku nsi’a mutoto. Paulo watâ musamu wa mpila yo bu katsonekena timvuka tia Kolose ti: ‘Dieka, bu lwatamburi Kristo Yezu, Mfumu, diatileno mu yandi. Siameno, meneno mu yandi. [sikamaneno] mu luwilukulu [timinu].’ (Kol. 2:6, 7) Tamana sarila ngolo zeto zazansoni mu yika timinu tieto ngolo, Satana peleko bantu bandi, kani kabwe ka balenda ko mu tu kabakasa mu diatila mu matieleka.​—2 Za 8, 9.

13. Nti tufweti zabaka, mpe mu bungu dia nti?

¹³ Tufweti zabaka ti nza mbo yituyinaka. (1 Za 3:13) Za tu bamburi ti: “Mutoto wawansoni mu lutumu lwa nkwa-mbi wena.” (1 Za 5:19, NWT) Mu bungu ti nsukunu ya nza yi yeka nguria penepene, Satana mu nkesi ziyôkele kena. (Nza. 12:12) Mbo kasarilaka mpila zimonekaka ntiana ka zena za mbi ko mu tu nwanisa, ntiana bunsuza, bungungu bwa Ba-aposta na nkwamusu. Satana zebi ti ntangu ya fioti kwa yisiri nandi mu kabakasa tisalu tieto tia samuna na mu honda timinu tieto. Ka wena musamu wa nzenza ko bu bayiminaka tisalu tieto ku nsi zakaka. Mpangi zeto zibâka ku nsi zo mbo zitatamanaka mu korela. Mpangi zeto mbo zisongelaka ti, tulendi nunga mu musamu ni musamu wu tu yirika nkwa-mbi!

14. Bwe tulendi bakisila mpangi zeto za zikento na za zibakala mu tatamana mu bâ mu matieleka?

¹⁴ Mu bakisa mpangi zeto mu tatamana mu bâ mu matieleka tufweti songelaka tiari tia mutima. (1 Za 3:10, 11, 16-18) Tufweti zolosono ntangu zazansoni na mu ntangu yi bwaka misamu. Mu tifwani, Ngano mpangi zebi yafwilulu muntu wu kazololo we na nsatu lutindusu peleko we na nsatu lubakusu? Peleko ebu wawiri ti mpangi ze kô zahombese bima mu mvula za ngolo ze na nsatu lubakusu mu tunga Nzo za Nsambululu peleko nzo zawu? Mbo tusongelaka bunene bwa luzolo lweto na tiari tieto tia mutima kwe mpangi zeto za zikento na za zibakala mu nsalulu zeto, kâ ka mu nzonzolo’â ko kwa.

15. Mu mabanza me mu 1 Za 4:7, 8, nti tufweti saka?

¹⁵ Mbo tulandaka tifwani tia Tata’eto dia luzolo die ku mazulu bu tusongelaka luzolo kwe bantu bakaka. (Tanga 1 Za 4:7, 8.) Mpila ya mfunu yi tusongelaka luzolo ni mu tilemvokelaka beto na beto. Mu tifwani, muntu wulendi tu fwemesa, kâ ha manima tulombele mulemvo. Mbo tusongela luzolo bu tumulemvokela mpe bu tuzimbakana musamu wu katuyirikiri.  (Kol. 3:13) Mpangi ya yibakala ye na nkumbu Aldo yayizi fwema mu ntangu mpangi mosi yi keri zitisaka yayizi tâ musamu wa mbi mu bungu dia bantu ba tikulu tiandi. Aldo têle ti: “Nayizi tatamana mu sambila Yehova kakumbakisa mu lembo bâ na mbanzulu za mbi mu mpangi yo.” Kâ Aldo wayizi yirika musamu wakaka. Wayizi bonga nzengolo mu lomba kwe mpangi yo basala tintwari mu tisalu tia samuna. Bu beri kwe sari tintwari mu tisalu tia samuna, Aldo wayizi mu têla ti, musamu wu katâ wamufwemesa. Aldo têle ti: “Mpangi yo bu yawâ ti misamu mi katâ miakumfwemesa, wayizi lomba mulemvo. Mu nzonzolo’andi nayizi bakula ti wanionga mu bungu dia musamu wu katâ. Ha manima tayizi vutu bâ ndiku za zibote.”

16-17. Ntia nzengolo tufweti bonga?

¹⁶ Ntumwa Za watomo zolo mpangi zandi, mpe mbo keri zoloko babâ na timinu tia ngolo. Luzolo lwandi na tiari tiandi tiatomo moneka mu malongi ma kabahana mu mikanda mia mitatu mi kabatsonekena. Musamu wa nguria wa mbote wena mu zaba ti bakento na babakala bayâla tintwari na Yezu ku mazulu, luzolo lwe nawu, mpe tiari tie nawu ntiana Za!​—1 Za 2:27.

¹⁷ Bika ti misamu mi tuzonzele mu timoko ti miabâ mu mitima mieto. Beto bansoni tabongeno nzengolo ya diatila mu matieleka, wuzololo tâ tatumama kwe Yehova mu misamu miamiansoni mi tuyirikaka mu luzingu lweto. Longoka Zu diandi mpe tûla lukwikulu lwaku mu buku dio. Tunga timinu tia ngolo mu Yezu. Losa mabanza ma bantu peleko filozofi mpe losa ndongosolo za Ba-aposta. Telamana ndiatulu ya yirika mbi mu mansweki na ya tihana mu sa masumu. Diatila mu mitieno miyôkele mia Yehova. Mpe beto bansoni tabakisa mpangi zeto mu tatamana mu bâ ngolo, mu kwe lemvokele bô batulwekesaka na mu kwe bakisi bô bê na nsatu lubakusu. Buna, ni bu sa ti tubwabane na nkwamusu, mbo tutatamana mu diatila mu matieleka.