1. Ntia mbanzulu zilendi bâ na bisari biakaka bia kwikama bia Yehova?

 NGURIA nsayi wutâka, bu tuzebi ti Yehova mbo katambulaka kanda diandi diadiansoni! Bibila ditêle ti: ‘Yehova mu kanda diandi kamwinaka nienze.’ (Mik. 149:4) Kâ ntangu zakaka, bakaka mbo bakwizi tomo nôkaka buna balendi tiyula: ‘Ngano Yehova meno katambulaka?’ Bisari bia kwikama bia Yehova bia mu ntangu ya Bibila biabingi bieri na mbanzulu za mpila yo.—1 Sam. 1:​6-10; Yobe 29:​2, 4; Mik. 51:11.

2. Ngano nani Yehova katambulaka?

² Bibila mbo ditomo songelaka ti Yehova lendi tambula bantu ba masumu. Mu bwe? Tufweti sarila timinu mu Yezu Kristo, mpe tufweti batusu. (Za 3:16) Buna mbo tukwizi songelaka kwe bantu babansoni ti tayizi soba mabanza mu masumu meto, mpe takanisina Nzambi ti mbo tusarila luzolo lwandi. (Bis. 2:38; 3:19) Yehova mbo katomo bâka mu nsayi bu tukwizi silaka bo mu sa tindiku na Yandi. Tala ti tutatamane mu sa miamiansoni mi tulenda mu zitisa kani di tamusila bu tatihana kwe Yandi, Yehova mbo katatamana mu tu tambula, mpe mbo tubâ ndiku zandi zi kena nguria penepene.—Mik. 25:14.

3. Nti tuzonzela bwawu bu?

³ Kâ, mu bungu dia nti bantu bakaka babanzaka ti Nzambi ka ba tambulaka ko ntangu zakaka? Bwe Yehova kasongelaka ti beto katambulaka? Mpe bwe Mukristo wulendi yikila lukwikulu lwandi ngolo ti Nzambi Yandi katambulaka?

 MU BUNGU DIA NTI BANTU BAKAKA BABANZAKA TI YEHOVA KA BA TAMBULAKA KO

4-5. Ni bu sa ti mbo tubanzaka ti ka twena salu ko, mu ntia musamu tulendi bêla na lukwikulu?

⁴ Bantu babingi mu beto babanzaka tûka buleke bwawu ti ka bena salu ko. (Mik. 88:15) Mpangi ya bakala ye na nkumbu Adrián têle ti: “Tûka muna tûka nimonaka ti ka ndiena salu ko. Misamu mia ntete mi nibambukilaka ni mu sambila ngatu kanda diani diakota ku Paradi, ni bu sa ti lukwikulu lweri nani ka ndieri’â wa fwanana ko mu bâ kô.” Tony, wakurila mu kanda dilembolo Mbangi za Yehova têle ti: “Kani kabwe bibuti biani ka bieri’â kuntêlaka ko ti me beri zoloko peleko nsayi ndieri ba tâka. Wayizi sa nabanza ti ka ndieri’â yirikaka musamu wa mbote ko waketi ba tâ nsayi.”

⁵ Tala ti ntangu zakaka mbo tumonaka ti ka twena salu ko, tulendi bambuka ti ni Yehova Yandi beni watubenda kwe Yandi. (Za 6:44) Mbo kamonaka misamu mia mbote mie mu beto mi tulembolo zaba beto beni, mpe mitima mieto mia kazebi. (1 Sam. 16:7; 2 Nta. 6:30) Buna, tulendi mu kwikila bu katâka ti ntalu twena.—1 Za 3:​19, 20.

6. Bwe ntumwa Paulo keri monaka mu bungu dia masumu mandi ma ntama?

⁶ Ntete tazaba matieleka, bakaka mu beto bayirika misamu milendi tu semba tii lumbu ti. (1 Pi. 4:3) Bakrsito ba kwikama mbo banwanaka mpe na nsatu za mbi. Ngano mutima’aku mbo wukusembaka? Tala ti ni bo, baka lutindusu bu banza ti bisari bia kwikama bia Yehova bianwana na mbanzulu za mpila yo. Mu tifwani, ntumwa Paulo wabâ mu bunsana bu kabanza masumu mandi. (Rom. 7:24) Paulo wasoba mabanza mandi, mpe wabatusu. Kâ, watitâ ntumwa yiyôkele bufioti, mpe ‘wa ntete mu bisumuki.’—1 Kor. 15:9; 1 Tim. 1:15.

7. Nti tufweti bambukilaka mu musamu wutariri masumu meto ma ntama?

⁷ Tata’eto dia ku mazulu watukanisina ti mbo katulemvokela tala ti tusobele mabanza. (Mik. 86:5) Buna tala ti tatomo nionga mu masumu ma tayirika, tulendi kwikila misamu mia tâ Yehova—watulemvokela.—Kol. 2:13.

8-9. Bwe tulendi telamana mbanzulu zisaka tamona ti ka tulendi’â tayirika misamu mia fwanana ko mu tâ Yehova nsayi?

⁸ Beto bansoni tuzololo tasa miamiansoni mi tulenda mu sarila Yehova. Kâ, bantu bakaka balendi kwizi banza ti kani kabwe ka balendi’â bayirika misamu mia fwanana ko ngatu Yehova kabatambula. Mpangi ya yikento ye na nkumbu Amanda têle ti: “Mbo nivulu banzaka ti bu batâka ti mfweti hana Yehova bio bie nani bia ntalu, wuzololo tâ ti ntangu zazansoni mfweti yikaka ngolo. Buna, vula-vula mbo niyêlaka mu sa bima bi ndendi lembo lenda. Bu nilembanaka, mbo nibanzaka ti Yehova mbo kaniongaka mu meno ntiana bu nitiniongenaka.”

⁹ Bwe tulendi telamana mbanzulu zisaka ti tamona ti ka tulendi’â tayirika misamu mia fwanana ko mu tâ Yehova nsayi? Bambuka ti Yehova kena ni kekete ko, mabanza ma delakana me nandi. Kani kabwe, ka tulombaka ko mu yirika misamu mi tulembo lenda. Mbo kayangalalaka mu miamiansoni mi tuyirikaka mu bungu dia Yandi tala ti mu ngolo zeto zazanzoni tusilaka bo. Dimbitila mpe mu bifwani bia Bibila bia bantu basarila Yehova mu tilundi tiawu tiatiansoni. Lendi bonga tifwani tia Paulo. Wasala na luhemo lwalwansoni tûka mvula zazingi, wasa nzietolo mu bitini bia bila, mpe wakubika bimvuka biabingi. Kâ, misamu bu miayizi mu kabakasa mu tomo sala tisalu tia samuna, ngano Nzambi keri’â vutu mu tambulaka ko? Kâni. Watamamana mu sa mio mi keri na mio lenda, mpe Yehova  wamusakumuna. (Bis. 28:​30, 31) Mpila mosi mpe, ntangu zakaka bima bi twe na bio lenda mu hana kwe Yehova bilendi soba. Kâ Yandi ti katalaka ni mu bungu dia nti tusilaka bo. Bwawu bu ti tataleno mpila Yehova zi kasongelaka ti beto katambulaka.

BWE YEHOVA KASONGELAKA TI BETO KATAMBULAKA?

10. Bwe tulendi “wîla” Yehova ta tu têla ti beto katambulaka? (Za 16:27)

¹⁰ Mu nzila ya Bibila. Yehova mbo kadingaka mpila zi kalendi songela kwe kanda diandi ti bawu kazololo mpe mbo kayangalalaka mu bawu. Bibila mbo dizonzelaka mbala zole zi katâ kwe Yezu ti yandi katomo zolo, mpe Mwana’andi wena wu katambula. (Mat. 3:17; 17:5) Zololo wawâ Yehova bu kakutêlaka ti nge katambulaka? Yehova ka tuzonzelaka ko tûka ku mazulu, kâ mbo katuzonzelaka mu nzila ya mikanda mia Zu diandi. Tulendi wirikila Zu dia Yehova bu katutêlaka ti beto kazololo, bu tutangaka misamu mia tâ Yezu mu Evanzile. (Tanga Za 16:27.) Yezu mbo katomo landaka timuntu tia Tata’andi mu mpila ya lunga. Buna bu tutangaka binsamu bia Yezu mu ntangu yi katêla milongoki miandi mia kwikama kâ mieri na masumu ti bawu keri tambulaka, tulendi banza Yehova ta tu têla misamu mio.—Za 15:​9, 15.

11. Mu bungu dia nti tufweti lembo banza ti bu tubâka mu mpasi wuzololo tâ ti Yehova ka ta vutu tu tambula ko? (Zaki 1:12)

¹¹ Mu nsalulu zandi. Yehova tomono zolo mu tu bakisa, ntiana bu kalungisaka nsatu zeto za tinsuni. Ntangu zakaka, Yehova lendi bika tamona mpasi, ntiana bu kasa mu Yobe. (Yobe 1:​8-11) Bu tubâka mu mpasi, ka wuzololo’â tâ ko ti Nzambi ka ta vutu tu tambula ko. Kâ, mbo katuhanaka bweso bwa mu songela ti luzolo lwa ngolo lwe neto mu Yandi, mpe Yandi tu sikirilaka. (Tanga Zaki 1:12.) Buna, mu ntangu zo za mpasi mbo tumona ti beto katomono zolo, mpe beto kata tomo bakisa mu korela.

12. Nti tulendi longoka mu tinsamu tia Dmitrii?

¹² Tazonzeleno mpangi mosi ya bakala ya ku Asie ye na nkumbu Dmitrii. Wahombesa tisalu tiandi, mpe wayôkesa ngonda zazingi zi kalembo baka tiakaka. Buna, wabonga nzengolo ya kurisa tisalu tiandi tia samuna, mu songela lukwikulu lweri nandi mu Yehova. Ngonda zazingi zeri yôkaka, mpe keri’â bakaka tisalu ko. Ha manima wayizi baka timbevo tiasa ti kabâka  kwa ku mfulu. Wayizi batika mu banza ti keri’â bakala mpe tata dia mbote ko, mpe wayizi batika mu tiyula tala ti Yehova yandi kwa keri tatamanaka mu tambula. Tilumbu timosi mu nkokela, mwana’andi wa mukento wayizi dukisa mukanda wumosi mu masini weri na misamu mie mu Izaya 30:15: “Ngolo zeno ni mu tatamana mu bâ ba dzuna na mu bâ na lukwikulu.” Wamunatina wo ku mfulu, mpe watâ: “Tata, mu ntangu yi monaka mpasi, lendi bambukilaka verse yi.” Dmitrii wabakula ti, mu nzila ya Yehova, kanda diandi mbo dieri bakaka bidia bia fwanana, binkuti na tibuka tia bêla. Têle ti: “Tima ti nafweti sa, ni mu tatamana mu bâ wa dzuna na mu bâ na lukwikulu mu Nzambi’ani.” Tala ti misamu mia mpasi mia mpila yo tabwabana na mio, lendi kwikila ti Yehova nge kakipaka, mpe mbo kakubakisa mu korela.

13. Banani Yehova kalendi sarila mu tu songela ti beto katambulaka, mpe bwe?

¹³ Mu nzila ya mpangi zeto za Bakristo. Yehova mbo kasarilaka mpangi zeto mu tu songela ti beto katambulaka. Mu tifwani, lendi ba tuma mu tâ misamu mitutindisa mu ntangu yi twe na mio nsatu. Mpangi mosi ya yikento ya ku Asie yamona musamu wo bu keri na lwaka lwalwingi. Wayizi hombesa tisalu tiandi, mpe wayizi bâ na timbevo tia nguria ngolo. Ha manima bakala diandi wayizi sa disumu dia dinene mpe ka yizi’â vutu sâla mukuluntu ko. Têle ti: “Ka ndieri’â bakulaka ko mu bungu dia nti misamu mio mieri kunturilaka. Mbo ndieri banzaka ti kampe musamu wa mbi nayirika, mpe Yehova keri’â vutu kuntambulaka ko.” Mpangi’eto walemberela Yehova mu vutu mu zabikisa ti yandi kwa katiri tambula. Ngano Yehova nti kasa? Mpangi yo têle ti: “Bakuluntu ba timvuka bamoka na meno, mpe bakunsongela ti Yehova meno kazololo.” Ha  manima, wayizi vutu lomba lubakusu lwa Yehova. Têle ti: “Mu tilumbu tio kwa, nabaka mukanda watsoneka tikunku tia bampangi ba mu timvuka tiani. Bu natanga misamu mi batâ mitindisaka, namona ti Yehova meno kawirikila.” Yee, diangana Yehova mbo kasongelaka ti beto katambulaka, mu nzila ya misamu mia nsayi mi tûkaka kwe mpangi zeto.—Mik. 10:17.

14. Ntia mpila yakaka Yehova kasarilaka mu songela ti beto katambulaka?

¹⁴ Yehova mbo kasongelaka ti beto katambulaka, bu kasarilaka mpangi zeto mu tu hana malongi bu tubâka na mo nsatu. Mu tifwani, mu mbandu ya ntete, Yehova wasarila ntumwa Paulo mu tsonekena bampangi mikanda 14 mu nzila ya mpeve santu. Mu mikanda mio mweri na malongi ma ngolo mpe ma luzolo. Mu bungu dia nti Yehova katuma Paulo mu tsoneka malongi ma mpila yo? Yehova Tata dia mbote diena, mpe mbo kasembaka bala bandi ba kazololo. (Bin. 3:​11, 12) Buna, tala ti tubakiri malongi masikamanaka mu Bibila, tulendi ma bongela ntiana tidimbu tisongelaka ti Yehova beto katambulaka, ka wena ko mu bungu ti ka tâ vutu tu yangalala ko. (Ebr. 12:6) Ngano ntia misamu miakaka misongelaka ti Yehova beto katambulaka?

MPILA ZAKAKA YEHOVA ZI KASARILAKA MU TU SONGELA TI BETO KATAMBULAKA

15. Kwe nani Yehova kahanaka mpeve santu’andi, mpe mu bungu dia nti musamu wo wulendi tu yikila lukwikulu?

¹⁵ Yehova mbo kahanaka mpeve santu kwe bô ba katambulaka. (Mat. 12:18) Tulendi tiyula: ‘Ngano lenda die nani dia sarila bifu biakaka bia mbutu ya mpeve mu luzingu lwani?’ Ngano mbo monaka ti mbo sarilaka luvivululu lwalwingi mu bampangi baku yôka lweri naku ntete wazaba Yehova? Lumbu ti, bu kwe vulu longoke mu sarila bifu bia mbutu ya mpeve, mbo tomo kwizi mona ti Yehova nge katambulaka!—Tala kaku “ Mbutu ya mpeve ni . . . ”

16. Nani Yehova kasarilaka mu samuna nsangu za mbote, mpe bwe musamu wo wukusaka? (1 Bisi-Tesalonike 2:4)

¹⁶ Yehova nsayi yibâka nandi mu hana nsangu za mbote kwe bô ba katambulaka. (Tanga 1 Bisi-Tesalonike 2:4.) Tala ka bwe mpangi ya yikento ye na nkumbu Jocelyn kabakila ndandu mu tisalu tia samuna nsangu za mbote. Tilumbu timosi, Jocelyn tiari tiabâ nandi bu kavumbuka. Têle ti: “Mbo ndieri monaka ntiana’eti ka ndieri’â na tima ko ti naketi hana. Kâ, mupasuri-nzila ndieri, mpe tilumbu ti ndieri samunaka tieri. Buna nasambila mpe naye samuna.” Mu pari tîna, Jocelyn wabwabana  na Mary, mukento wumosi weri na nsayi mpe watambula mu longoka Bibila. Mwa ngonda zayôka, Mary wayizi tâ ti Nzambi keri sambilaka ngatu kamubakisa mu ntangu Jocelyn yi keri konkotaka ha mwelo. Bu kadimbitila mu tinsamu tio, Jocelyn wayizi tâ: “Nayizi mona ntiana’eti Yehova ebu keri kuntêlaka, ‘Nge nitambulaka.’” Wa matieleka, bantu babansoni ka batambulaka ko bu tubasamuninaka. Kâ, tulendi bâ na lukwikulu ti Yehova nsayi yibâka nandi bu tusarilaka ngolo zeto zazansoni mu samunina bantu bakaka nsangu za mbote.

17. Nti longokele mu misamu mia tâ Vicky mu nkûlulu? (Mikunga 5:12)

¹⁷ Yehova mbo kasarilaka ntalu ya nkûlulu kwe bô ba katambulaka. (1 Tim. 2:​5, 6) Kâ nti bifwanakane tala ti mutima’eto mbo wuta bâ na ntembe ti Yehova beto katambulaka, ni bu sa ti timinu tie neto mu nkûlulu mpe tayizi batusu? Bambuka ti ntangu zakaka ka tufweti’â takwikilaka mbanzulu zeto ko, kâ tulendi kwikila Yehova. Kwe Yandi, bantu bê na timinu mu nkûlulu ba sungama bena, mpe wakanisina ti mbo kabasakumuna. (Tanga Mikunga 5:12; Rom. 3:26) Tifu tia dimbitila mu nkûlulu tiabakisa Vicky. Tilumbu timosi, bu katomo banza mu nkûlulu, wayizi tâ ti: “Yehova watomo sarila luvivululu mu meno tûka ntangu yayingi. [. . .] Kâ, ntiana meno ndieri tâka ebu: ‘Kulendi’â wazolo muntu ko ntiana meno, mukayulu wa Mwana’aku ka wulendi’â wazibika masumu mani ko.’” Bu keri kwe dimbitiri mu kabu dio dia nkûlulu, wabatika mu mona luzolo lwe na Yehova mu yandi. Beto mpe mbo tumona ti Yehova beto kazololo mpe beto katambulaka bu tukwe dimbitiri mu nkûlulu.

18. Tala ti tutatamane mu zolo Tata’eto dia ku mazulu, mu nti tulendi bêla na lukwikulu?

¹⁸ Ni bu sa ti tusariri ngolo mu landa mabanza me mu timoko ti, ntangu zakaka tulendi bâ ba nôka, mpe tulendi tiyula tala ti Yehova beto katiri tambula. Tala ti mbanzulu zo zituriri, bambuka ti mbo katambulaka ‘bô bamuzololo.’ (Zaki 1:12) Dieka bo, tatamana mu pusana kwe Yehova na mu tala mpila zi kasongelaka ti nge katambulaka. Ntangu zazansoni bambukaka ti Yehova kena ‘na kani mala na muna muntu mu beto ko.—Bis. 17:27.