1. Ntia tusakumunu tubakaka mu bungu ti mu organizasio ya Yehova twena?

 DIANGANA nguria lusakumunu lwena bu twena mu organizasio ya Yehova mu ntangu yi ya mansukina ya mpasi. Luzingu mu nza yi lweka lwa nguria lwa mpasi, kâ Yehova tu heni bampangi mu tu bakisa. (Mik. 133:1) Mbo katubakisaka mu bâ na luzingu lwa nsayi mu kanda. (Efz. 5:33–6:1) Mpe mbo katuhanaka ndwenga ze neto nsatu mu telamana lwaka lweto na mu bâ mu nsayi.

2. Nti tufweti sa, mpe mu bungu dia nti?

² Kâ, tufweti sarila ngolo mu tatamana mu sarila Yehova na kwikama kwakwansoni. Mu bungu dia nti? Mu bungu ti tulendi fwema mu bungu dia misamu mi tâka peleko mi yirikaka bantu bakaka. Tulendi nôka mpe bu tusaka fote, nsungula bu tuvulu kârilaka fote yo mbala zazingi. Tufweti tatamana mu sarila Yehova 1) mpangi bu yitufwemesaka, 2) muntu wu takwelana bu wutuniongesaka, mpe 3) bu tunôkaka mu bungu dia fote zeto. Mu timoko ti, mbo tutaluzula muna musamu. Mbo tutaluzula mpe malongi ma tulendi baka mu bifwani bia bantu batatu ba bazonzelaka mu Bibila, batatamana mu bâ ba kwikama.

TATAMANA MPANGI BU YIKUFWEMESAKA

3. Ntia misamu mia mpasi kanda dia Yehova dibwabanaka na mio?

³ Musamu wa mpasi. Bifu bia mpangi zakaka mbo bitutâka nkesi. Bakaka balendi yirika musamu wutuniongesa peleko balendi tu bongela mu mpila ya mbi. Mpangi zitwarisaka zilendi sa fote. Misamu mio milendi nata bantu bakaka mu bâ na ntembe ti organizasio ya Nzambi yena. Kani batatamana mu sarila Nzambi ‘ha timosi’ na mpangi zawu, balendi bika mu bâ tintwari na mpangi zo zibafwemese, peleko balendi bika mu  kwendaka ku tukutakanu. (Sof. 3:9) Ngano mpila ya ndwenga yena? Dimbitila mu malongi ma tulendi baka mu tifwani tia muntu wu bazonzelaka mu Bibila wabwabana na misamu mia mpila yo.

4. Paulo ntia misamu mia mpasi kabwabana na mio?

⁴ Tifwani tia Bibila. Ntumwa Paulo wazaba ti mpangi zandi za Bakristo bantu ba masuma beri. Mu tifwani, bampangi mbanzulu za mbi zeri nawu mu yandi bu kabatika mu bâ tintwari na timvuka. (Bis. 9:26) Ha manima, bantu bakaka bayizi tâ misamu mia mbi mu yandi ngatu balembo vutu mu kwikila. (2 Kor. 10:10) Paulo wamona mukuluntu wabonga nzengolo ya mbi kampe yatêsa bantu bakaka makuba. (Nga. 2:​11, 12) Mpe mpangi yimosi yeri penepene na Paulo, Marke, wayizi tomo mu niongesa. (Bis. 15:​37, 38) Paulo mbo kaketi bika ti musamu ni musamu wamunata mu lembo vutu yôkesaka ntangu na mpangi zandi zeri mu fwemesaka. Kâ, mabanza ma mbote meri nandi mu mpangi zandi, mpe watatamana mu sala tisalu tia Yehova. Nti biabakisa Paulo mu tatamana?

5. Nti biabakisa Paulo mu tatamana mu bâ penepene na mpangi zandi? (Bisi-Kolose 3:​13, 14) (Tala mpe tifwani.)

⁵ Paulo mpangi zandi za keri zoloko. Luzolo lwa Paulo mu bantu bakaka lwamubakisa mu tûla mabanza mandi mu bifu biawu bia mbote, kani katûla mo mu masumu mawu. Luzolo lwabakisa mpe Paulo mu sarila misamu mi katsoneka yandi beni, ntiana mio mie mu Bisi-Kolose 3:​13, 14. (Tanga.) Tala ka bwe Paulo kabongela Marke. Ni bu sa ti Marke wayambirika Paulo mu ntangu ya nzietolo’andi ya ntete ya timisionere, Paulo ka tatamana ko mu bâ mu nkesi. Ha manima, Paulo bu katsoneka mukanda wa luzolo kwe timvuka tia ku Kolose, wakembela Marke bu kata ti ndiku yeri yi bazolo, ‘titeko tia lutindusu.’ (Kol. 4:​10, 11) Mu bungu ti mu boloko keri ku Rome, Paulo walomba kwe Marke kizi kamubakisa. (2 Tim. 4:11) Paulo walemvokela mpangi zandi mpe watatamana mu bâ nawu penepene. Ntia malongi tuta baka mu Paulo?

6-7. Bwe tulendi tatamana mu bâ na luzolo mu mpangi zeto ntono masumu mawu? (1 Za 4:7)

⁶ Malongi. Yehova zololo ti tatatamana bu tukwe songele luzolo kwe mpangi zeto. (Tanga 1 Za 4:7.) Mpangi zeto bu zilembo tu bongelaka mu mpila yi fweti tu bongela Mukristo, tulendi bâ na lukwikulu ti ka baweyi’â ko mu tu fwemesa, mpe mbo bayêlaka mu yirika misamu Yehova mi kamonaka ti mia sungama miena. (Bin. 12:18) Nzambi bisari biandi bia kwikama bia kazololo ntono masumu mawu.  Ni bu sa ti mbo tutatamanaka mu sa fote, mbo katatamanaka mu bâ ndiku’eto, mpe ka tu fwilaka nkesi ko. (Mik. 103:9) Diangana, musamu wa mfunu wena kwe beto mu landa tifwani tia Tata’eto!—Efz. 4:32–5:1.

⁷ Bambukaka ti, bu twena penepene na nsuka ya nza yi, tufweti tatamana mu bâ penepene na mpangi zeto. Tulendi bwabana na nkwamusu za ngolo. Tulendi kota mpe boloko mu bungu dia timinu tieto. Tala ti misamu mio mituriri, mbo tutomo bâ na nsatu ya mpangi zeto yôka mu ntama. (Bin. 17:17) Banza’eti mu mio miaturila Josep, a we mukuluntu ku Espagne. Yandi na mpangi zakaka babatûla mu boloko mu bungu ti ka beri’â kotaka misamu mia politike ko. Têle ti: “Mu boloko, musamu wa fioti weri mu bakila mpangi nkesi mu bungu ti ka tweri’â na mansweki ko. Wafwanana twe tikorele beto na beto na mu tilemvokela mu luzolo lwa mutima. Musamu wo watubakisa mu bâ mu bumosi na mu tikengerela. Bantu ba tweri na bo mu boloko ka beri’â sarilaka Yehova ko. Lumbu timosi, nayizi lwala mpe bakuntûla mpemba mu koko, buna ka ndieri’â na lenda ko dia sala bisalu me beni. Kâ mpangi yimosi mu mpangi zani wasukula binkuti biani, mpe wakunkipa mu mpila zakaka. Nayizi mona luzolo lwa matieleka bu ndieri na lo nsatu.” Diangana, misamu mia mbote misaka ti takulu yirika misamu mibâka neto!

TATAMANA MUNTU WU WAKWELA BU WUKUNIONGESAKA

8. Bantu ba kwelana ntia musamu wa mpasi balendi bwabana na wo?

⁸ Musamu wa mpasi. Mu makwela mamansoni mpasi ze mo. Bibila mbo ditomo tâka ti bantu ba kwelana mbo ‘babwabana na ntontolo mu nitu zawu.’ (1 Kor. 7:28) Mu bungu dia nti? Mu bungu ti mukento na bakala bantu ba masumu bena, bê na bifu bia swaswana, bazololo bima bia swaswana. Balendi bâ na tikulu tia swaswana peleko balendi tûka ku mbuka ya swaswana. Ntangu bu yikwe yôke, balendi kwizi songela bifu bieri lembo monekaka ntete bakwelana. Misamu mio milendi nata nzingula. Kani muna muntu katambula fote’andi mu bungu dia musamu wutulumukini, mpe badinga mu yirika wo, mosi mu bawu lendi dinga mu semba mpwana’andi. Balendi kwizi banza ti bubote bu bahambane peleko longo lwafwa kwa. Ngano hambana na fwa kwa longo zo ni mpila ziyôkele bubote? b Tabakeno malongi mu tifwani tia muntu we mu Bibila watatamana mu makwela meri nguria mpasi.

9. Ntia musamu Abigayile kabwabana na wo?

⁹ Tifwani tia Bibila. Abigayile wakwelana na Nabale, Bibila mbo ditâka ti Nabale mutima wa ngolo weri nandi, mpe ndiatulu’andi ya mbi yeri. (1 Sam. 25:3) Musamu wa mpasi weri kwe Abigayile mu bâ na bakala dia mpila yo. Ngano Abigayile wabwa bweso bwa honda makwela mandi? Yee. Bweso bo bwa moneka mu ntangu Davide, waketi kwizi bâ mutinu ku Israele, yi kayiza mu honda bakala diandi mu bungu ti wafinga Davide na bantu bandi. (1 Sam. 25:​9-13) Abigayile lenda dieri nandi dia dioka, mu hana bweso kwe Davide bwa honda Nabale. Kâ, kani kasila bo, wawisa Davide mu bika Nabale wa moyo. (1 Sam. 25:​23-27) Ngano nti biamutuma mu sila bo?

10. Kampe nti biatuma Abigayile mu tatamana mu makwela mandi ma mpasi?

 ¹⁰ Abigayile wazolo Yehova mpe mbo keri zitisaka mitieno miandi mitariri makwela. Ntembe kâni misamu miatâ Nzambi kwe Adame na Eva bu kabakwelesa mia kazaba. (Mba. 2:24) Abigayile wazaba ti makwela kwe Yehova ma mulongo mena. Wazolo mu tâ Nzambi nsayi, mpe musamu wo mbo waketi mu tuma mu sa miamiansoni mi kaketi lenda mu vûkisa kanda diandi na bakala diandi mpe. Wasarila manzangu mu kabakasa Davide mu lembo honda Nabale. Mpe wakubama weri mu lomba mulemvo mu bungu dia musamu wu kalembo yirika. Wa matieleka, Yehova wazolo mukento wo weri na butindi. Bakento na babakala ba kwelana, ntia malongi balendi baka mu tifwani tia Abigayile?

11. a) Yehova nti kakekoloko kwe bô bakwelana? (Bisi-Efeze 5:33) b) Ntia malongi bakiri mu mpila Carmen yi kasarila ngolo mu vûkisa longo lwandi? (Tala mpe tifwani.)

¹¹ Malongi. Yehova zololo ti bantu ba kwelana batatamana mu bâ tintwari ni bu sa ti musamu wa mpasi wena mu bâ na muntu wu bakwelana. Diangana musamu wa nsayi wena kwe Nzambi bu kamonaka bantu ba kwelana basarilaka ngolo mu yirika misamu miawu, basongasanaka luzolo lwa kondo bwimi na buzitu. (Tanga Bisi-Efeze 5:33.) Tabongeno tifwani tia Carmen. Mvula kampe 6 ha manima ma makwela mandi, Carmen wabatika mu longoka na Mbangi za Yehova, mpe wayizi batusu. Têle ti: “Bakala diani ka zolo’â nzengolo’ani ko. Wayizi sila Yehova tibanda. Mbo keri kumfingaka, mpe mbo keri tâka ti mbo kaketi kumbika.” Ntono musamu wo, Carmen watatamana mu makwela mandi. Tûka mvula 50, wasarila ngolo mu bâ na makwela masikamanaka mu luzolo na buzitu. Têle ti: “Mvula bu zeri kwe yôke, nayizi longoka mu vulu songelaka lenda dia swasikisa na mu zonzaka na buzitu bwabwansoni kwe bakala diani. Bu nzebi ti makwela ma mulongo mena kwe Yehova, nayizi sa miamiansoni mi nalenda mu lunda makwela mani. Kani kabwe ka nahonda longo lwani ko, mu bungu ti Yehova nzololo.” c Tala ti mpasi zibwiri mu makwela maku, bâ na lukwikulu ti Yehova mbo kakuyika moko, mpe mbo kakubakisa mu tatamana.

TATAMANA BU NÔKAKA MU BUNGU DIA FOTE ZAKU

12. Ntia musamu wa mpasi tulendi bwabana na wo tala ti disumu dia dinene tuyirikiri?

¹² Musamu wa mpasi. Tulendi tomo nôka tala ti tuyirikiri disumu dia dinene. Bibila mbo ditâka ti masumu meto malendi tu nata mu bâ  na mutima wa pasuka na wa tutuka. (Mik. 51:17) Mpangi yimosi ya bakala ye na nkumbu Robert wasarila ngolo zazingi tûka mivu miamingi mu bâ tibakisi mu tisalu. Kâ, wayizi sa disumu dia dinene diamunata mu bakula ti wateka Yehova. Têle ti: “Bu nayizi bakula misamu mi nayirika, nguindu’ani yatomo kunsemba. Ha manima ka ndieri’â monaka bubote ko. Natomo dila mpe nasambila Yehova. Mbo nibambukaka ti nabanza ti kani kabwe Nzambi ka keti’â vutu wirikila tusambulu twani ko. Mu bungu dia nti kaketi sila bo? Mu bungu ti namuyambirika.” Tala ti tusumukini, mutima’eto wulendi tomo pasuka, mpe tulendi banza ti Yehova tu yambirikiri, mpe ka ku siri’â tivuvu ko tia vutu mu sarila. (Mik. 38:4) Tala ti ni bo monaka, dimbitila mu tifwani tia muntu wa kwikama mu Bibila watatamana mu sarila Yehova ntono masumu ma manene.

13. Ntia disumu Piere kasa, mpe ntia fote katoko sa ntete disumu dio?

¹³ Tifwani tia Bibila. Mu mpimpa ntete lufwa lwa Yezu, ntumwa Piere wasa fote zazingi, mpe mu bungu dia fote zo wayizi sa disumu dia dinene. Ntete-ntete, Piere wasongela lukwikulu lwayôka mu yandi beni, bu katisîka ti mbo kaketi bâ wa kwikama ni bu sa ti bantumwa bakaka bayambikiri Yezu. (Mak. 14:​27-29) Ha manima, bu beri ku nsaba ya Ngetesemane, Piere walembana mu bâ na meso ma tia mbala zazingi. (Mak. 14:​32, 37-41) Mpe yungi dia bantu bu diayiza na mbele na mibota mu kanga Yezu, Piere wamuyambirika. (Mak. 14:50) Ha manima, Piere wakala Yezu nkumbu tatu, wadia mpe ndefi mu bungu dia musamu wo wa bungungu. (Mak. 14:​66-71) Bwe Piere kasa bu kabakula ti disumu dia dinene kasa? Watomo dila, kampe watisemba. (Mak. 14:72) Banza’eti lwaka lweri na Piere ntangu fioti ha manima, bu bahonda ndiku’andi Yezu. Diangana, Piere wamona ti kena salu ko!

14. Nti biabakisa Piere mu tatamana mu sarila Yehova? (Tala ntete.)

¹⁴ Piere watatamana mu sarila Yehova mu bungu dia misamu miamingi. Ka bâ ha yandi kaka ko; waye tala mpangi zandi za timpeve, ntembe kâni bamutindisa. (Like 24:33) Musamu wakaka, Yezu bu kavumbuka kwe bafwa wamonekana Piere, kampe mu mu tindisa. (Like 24:34; 1 Kor. 15:5) Ha manima, kani kasemba Piere mu bungu dia fote, Yezu watâ kwe ndiku’andi ti mbo kaketi baka madema ma manene. (Za 21:​15-17) Piere wazaba ti disumu dia dinene kayirika, kâ watatamana mu yêla mu yirika misamu mia sungama. Mu bungu dia nti? Mu bungu ti lukwikulu lweri nandi ti Mfumu’andi, Yezu, ka mu yambirika ko. Mpe mpangi za timpeve za Piere zatatamana  mu mu yika moko. Ntia malongi tulendi baka mu tifwani tia Piere?

15. Ntia musamu Yehova kazololo ti takwikila? (Mikunga 86:5; Bisi-Rome 8:​38, 39) (Tala mpe tifwani.)

¹⁵ Malongi. Yehova zololo ti tabâ na lukwikulu mu luzolo lwandi na mu mulemvo’andi. (Tanga Mikunga 86:5; Bisi-Rome 8:​38, 39.) Bu tusumukaka, mbo tutisembaka. Ka wena musamu wa mbi ko. Kâ, ka tufweti’â tabanzaka ko ti Yehova ka lendi’â kavutu tuzolo ko peleko ka lendi’â katulemvokela ko. Kani tabanzila bo, na manzangu mamansoni tufweti dinga lubakusu. Robert, wututokolo zonzela têle: “Nayizi sumuka mu bungu ti nasikirila ngolo za me beni mu telamana ntontolo.” Wabakula ti wafwanakana mu zonza kwe bakuluntu. Têle ti: “Bu nazonza kwe bakuluntu, bakumbakisa mu mona luzolo lwa Yehova mu meno. Bakuluntu ka bakundiyambirika ko. Bakumbakisa mu kwikila ti Yehova ka kundiyambirika ko.” Beto mpe tulendi kwikila ti Yehova beto katomono zolo, mbo katulemvokela tala ti tusobele mabanza mu masumu meto, tala ti tudingiri lubakusu lufwanakane, mpe tusariri ngolo mu lembo vutu karila fote zeto. (1 Za 1:​8, 9) Tala ti lukwikulu lwe neto ti Yehova beto kazololo mpe zololo mu tulemvokela, ka tubika ko mu tatamana mu mu sarila ha manima ma fote yitusiri.

16. Mu bungu dia nti bongele nzengolo ya tatamana mu tisalu tia Yehova?

¹⁶ Yehova mbo katomo zoloko ngolo zi tusarilaka mu mu sarila mu bilumbu bi bia mansukina bia mpasi. Na lubakusu lwa Yehova, tulendi tatamana ntono misamu miniongesaka. Tulendi tatamana mu zolo mpangi zeto na mu balemvokela ni bu sa ti batufwemese. Tulendi songela bunene bwa luzolo lweto mu Nzambi na buzitu bweto mu bungu dia makwela, bu tusa miamiansoni mi tulenda mu yirika misamu milendi tulumuka mu makwela meto. Tala ti tusiri disumu, tulendi lomba lubakusu lwa Yehova, tulendi kwikila ti beto kazololo, mpe zololo mu tu lemvokela. Tulendi bâ na lukwikulu ti Yehova mbo katomo tu sakumuna tala ti ‘ka tubikiri’â ko mu sarila mbote.’—Nga. 6:​9, NWT.