1-2. Ngano muntu nti wufweti sa ntete kabatusu?

 MU MVULA 5 ziyôkele, bantu yôka milio mosi bayizi batusu mu bâ Mbangi za Yehova. Babingi mu bawu ntiana mulongoki Timote, mu mbandu ya ntete bayizi longoka matieleka tûka buleke bwawu. (2 Tim. 3:​14, 15) Bakaka bayizi longoka mu zaba Yehova bu bê ba kula, bakaka bu bayizi nuna. Mwa ntangu yiyôkele, mukento wumosi weri longokaka Bibila na Mbangi za Yehova wabatusu bu keri na mvula 97!

² Tala ti Bibila longokaka peleko bibuti biaku mu matieleka bata kukurisila, ngano mbo ta banza mu batusu? Kani dia nguria dia mbote diena! Kâ ntete wabatusu, fweti toko tihani kwe Yehova. Timoko ti mbo tibangula tifu tia tihana kwe Yehova bwe tita zolo tâ. Mbo tikubakisa mpe mu mona ka mu bungu dia nti fweti lembo bêla na bunkuta mu tihana kwe Nzambi, mpe mu batusu tala ti wa kubama wena mu sila bo.

TIFU TIA TIHANA NI NTI?

3. Hana bifwani bia Bibila bia bantu batihana kwe Yehova.

³ Mu Bibila, muntu weri tihanaka kwe Yehova mbo beri mu solaka mu sala tisalu tiandi. Bala ba Israele kanda dieri dia tihana kwe Yehova. Kâ bantu bakaka bayizi tihana kwe Yehova mu mpila ya nzitukulu. Mu tifwani Arone mbo keri lwataka lanta dia ore dieri hezimaka ha matu ma turban’andi. Lanta  dio dia ore mbo dieri songelaka ti watihana mu sarila Yehova mu mpila ya nzitukulu, wuzololo tâ mu bâ Mfumu-Nganga-Nzambi ya ku Israele. (Lev. 8:9) Banazire mpe batihana kwe Yehova mu mpila ya nzitukulu. Ntelo ya Nazire mu Hebre nazirʹ, yizololo tâ “hambula” peloko “tihana.” Banazire bafweti tumamana ntumunu zi babahana mu Musiku wa Mose.—Lut. 6:​2-8.

4. a) Mu bwe bantu batihanaka kwe Yehova bê bahambuka mu sala tisalu tia nzitukulu? b) Tibela bwe kuta zolo tâ? (Tala mpe tifwani.)

⁴ Bu tihana kwe Yehova, mbo sola mu kwizi bâ mulongoki wa Yezu Kristo na mu sarila luzolo lwa Nzambi, mpe tio ni tima tiyôkele mfunu mu luzingu lwaku. Mu tihana kwe Yehova mu bâ Mukristo, ngano nti fweti sa? Yezu watâ: ‘Wô zololo mu kundanda katibela yandi beni.’ (Mat. 16:24) Ntelo ya Greke yi babangula mu “katibela yandi beni,” balendi vutu ya têla ebu, “ka vutuandi zinga mu bungu dia yandi beni.” Bu kwizi bâ tisari tia tihana kwe Yehova, mbo wufwanaka ti wakala bima biabiansoni bilembo kwelanaka na luzolo lwandi. (2 Kor. 5:​14, 15) Wuzololo tâ ti fweti kala nsalulu za tinsuni ntiana bunsuza. (Nga. 5:​19-21; 1 Kor. 6:18) Ngano bima bio bi bayimina, mbo bisa ti luzingu lwaku lwabâ mpasi? Kâni tala ti Yehova zololo, mpe lukwikulu lwe naku ti bu kahanaka misiku ni mu bungu dia bubote bwaku. (Mik. 119:97; Iza. 48:​17, 18) Mpangi ye na na nkumbu Nicolas têle ti: “Lendi bongela mitieno mia Yehova ntiana bisengo bi bakaka mu boloko bita kukabakasa mu yirika miamiansoni mi zololo, peleko ntiana bisengo bia nzo za bango-mbulu bita kukengerela mu musamu wa mbi.”

5. a) Ngano bwe lendi tihanina kwe Yehova? b) Ntia luswaswanu lwe ha kati dia tihana kwe Yehova na bateme? (Tala mpe tifwani.)

⁵ Bwe lendi tihanina kwe Yehova? Ni mu mu kanisina mu lusambulu ti ni Yandi kwa sarila  mpe mbo tûla luzolo lwandi ha tibuka tia ntete mu luzingu lwaku. Mu matieleka, mbo kanisina Yehova ti mbo tatamana mu mu ‘zolo mu mutima’aku wa mukaka, mu tilundi tiaku tia mukaka, mu mabanzulu zaku zazansoni na mu ngolo zaku zazansoni.’ (Mak. 12:30) Kani dia tihana kwe Yehova mu mansweki basilaka dio, mbo sila dio ha nge kaka na Yehova. Ku lweka lwakaka, ha lungiri bantu babatusuku; mbo songela kwe bantu ti kwe Yehova watiheni. Kani diaku dia tihana kwe Yehova dia mulongo diena, mpe Yehova mbo kakêlaka ti wazitisa dio, ntiana buzololo nge beni.—Ekl. 5:​4, 5.

MU BUNGU DIA TI FWETI TIHANINA KWE YEHOVA?

6. Nti bitumaka muntu mu tihana kwe Yehova?

⁶ Musamu wa nguri wufweti tihanina kwe Yehova ni wena’eti Yandi zololo. Lozolo lwaku ka zena kwa mbanzulu za mpamba ko. kâ, mbo lusikamanaka mu ‘luzabu lwa matieleka’ na mu ‘mayela ma bakula ma timpeve.’—Misamu mi wayizi longoka mu Yehova miayizi kurisa luzolo lwaku mu Yandi. (Kol. 1:9) Ndongokolo’aku ya Matsonoko yakuheni lukwikulu ti 1) Yehova kô kena, 2) Bibila Zu diandi diena, mpe 3) mbo kasarilaka organizasio’andi mu lungisa luzolo lwandi.

7. Nti tufweti sa ntete tatihana kwe Nzambi?

⁷ Bantu batihanaka kwe Yehova bafweti zaba ndongosolo za nguri za Zu dia Nzambi mpe bafweti landa mitieno miandi. Mbo basaka miamiansoni mi balenda mu zonzela timinu tiawu kwe bantu bakaka. (Mat. 28:​19, 20) Luzolo lwawu mu Yehova lwayizi kula mpe nsatu’awu ya matieleka ni mu sarila kwa Yandi. Ngano ka wena bo ko mu bungu dia nge? Bubâ na luzolo lwa mpila yo, kumona ko ti  kani diaku dia tihana kwe Yehova na bateme bima biena bi saka mu bungu ti zololo watâ mulongi’aku wa Bibila nsayi peleko bibuti biaku; kumona ko mpe ti bima biena bi sa ngatu ndiku zaku zakutambula.

8. Bwe tifu tia tonda tikubakisila mu bonga nzengolo ya tihana kwe Yehova? (Mikunga 116:​12-14)

⁸ Bu banza mu bima biabiansoni Yehova bi kasa mu nge mbo mu tonda, mpe mbo zolo mu tihana kwe Yandi. (Tanga Mikunga 116:​12-14.) Diangana Bibila mbo ditâka ti Yehova ni Yandi hanaka ‘kabu ni kabu dia mbote na dia lunga’. (Zaki 1:17) Kabu diyôkele bunene ni mukayulu wa Mwana’andi, Yezu. Banza’eti! Nkûlulu yakuhana nzila mu bâ na tindiku tia ngolo na Yehova. Mpe yakuhana bweso bwabâ na luzingu lwa mankululu. (1 Za 4:​9, 10, 19) Tifu tia tihana kwe Yehova mpila yena ya mbote ya songela ti mbo tondaka mu mpila yiyôkele ya songela luzolo, na mu bungu dia tusakumunu twakaka twa kuhana Yehova. (Lub. 16:17; 2 Kor. 5:15) Musamu wo mbo batomo wazonzelaka mu timoko tia 46, titini tia 4, mu buku dia Bâ mu nsayi ntangu zazansoni! mwe na video ya minute mitatu yitêle Haneno makabu kwe Nzambi.

NGANO WA KUBAMA WENA MU TIHANA KWE YEHOVA NA MU BATUSU?

9. Mu bungu dia nti muntu wufweti bonga nzengolo yandi beni mu tihana kwe Yehova?

⁹ Lendi kwizi mona ti ka wena wa kubama ko mu tihana kwe Yehova na mu batusu. Kampe wufwanakane ti wasa nsombolo mu luzingu lwaku ngatu wadiatila mu mitieno mia Yehova, peleko ntangu ye naku nsatu mu yika timinu tiaku ngolo. (Kol. 2:​6, 7) Milongoki miamiansoni mia Bilbila ka mikurilaka mpila mosi ko mu timpeve, mpe ntwenia zazansoni ka zibâka za kubama ko mu tihana kwe Yehova na mu batusu mu mvula zimosi. Yêla mu tala mpila yita kurila timpeve tiaku mu misamu mi we na mio lenda, kâ kutifwanakasandi na muntu wakaka.—Nga. 6:​4, 5.

10. Nti lendi sa tala ti bakuri ka wena wa kubama ko mu tihana kwe Yehova na mu batusu? (Tala mpe kaku “ Bô bakurila mu matieleka.”)

¹⁰ Ni bu sa ti wizi bakula ti ka wena wa kubama ko mu tihana kwe Yehova, tatamana mu bâ na kani dio. Sambila Yehova ngatu kakuhana ngolo zikubakisa mu sa nsobolo za mfunu. (Flp. 2:13; 3:16) Lendi bâ na lukwikulu ti, mbo kawâ lusambulu lwaku mpe mbo kahanina lo mvutu.—1 Za 5:14.

MU BUNGU DIA NTI BAKAKA BAKEKAMAKA

11. Bwe Yehova katubakisila mu tatamana mu bâ ba kwikama?

¹¹ Bantu bakaka bê ba kubama mu tihana kwe Yehova na mu batusu mbo bakekamaka. Kampe mbo batiyulaka, tala ti ha manima ndiyizi yirika disumu dia dinene mpe bakunkaturi mu timvuka? Tala ti bunkuta bwa mpila yo bwe naku bâ na lukwikulu ti Yehova mbo kakuhana biabiansoni bikufwanane, ngatu wadiatila buna bufwanane na Yandi mu mu yangirika mu miamiansoni. (Kol. 1:10) Mbo kakuhana mpe ngolo mu yirika misamu mia sungama. Wasongela ti lendi bwasa mu mpila yi kabongela bantu babingi bakaka. (1 Kor. 10:13) Wo ni musamu wumosi mu misamu miamiansoni wusaka ti bantu ka babingi’â ko bakatulaka mu timvuka tia Bakristo. Yehova mbo kabakisaka kanda diandi mu tatamana mu bâ dia kwikama.

12. Bwe tulendi sa mu lembo bwa mu disimu dia dinene?

¹² Bantu babansoni ba masumu mbo batontoko mu yirika misamu mia mbi. (Zaki 1:14) Kâ, nge beni fweti sola ka bwe sa mu ntontolo. Mu matieleka ni nge beni zebi ka ntia luzingu nata. Ni bu sa ti bantu bakaka balendi  tâ mabanza ma swaswana, lendi longoka mu zabirila nsatu zaku. Mpe ni bu sa ti nsatu zakaka za mbi zivutulu ku baka, lendi kala mu lungisa zo. Mu bungu dia musamu wo, sambilaka bilumbu biabiansoni. Tatamana mu bâ na programe ya mbote ya ndongokolo ya Zu dia Nzambi ya nge beni. Yendaka ku tukutakanu twa Bakristo. Zonzela timinu tiaku kwe bantu bakaka. Bu vulu yirikaka misamu mio miamiansoni mbo bâ na ngolo za tatamana mu bâ wa kwikama kwe Yehova. Kani kabwe kuzimbakanandi ti Yehova mbo kakubakisa mu sila bo.—Nga. 5:16.

13. Ntia tifwani tia mbote Yozefe katusisila?

¹³ Mbo wubâ musamu wa fioti kwe nge mu zitisa kani diaku dia tihana tala ti tokolo tibongela nzengolo ya zaba ka bwe sa bu bâ mu ntontolo. Bilbila mbo dituzonzeleka bantu balenda mu sila bo, ni bu sa ti bawu mpe bantu ba masumu beri. Mu tifwani, mukento wa Putifare mbala zazingi keri yêlaka mu lenga Yozefe. Kâ Yozefe watizabila ka bwe kafweti sa. Bibila mbo ditutêleka ti wakala, mpe watâ ti: ‘Bwe ndendi sila mbi ya yinene ya mpila yo, mpe nisumukina kwe Nzambi?’ (Mba. 39:​8-10) Yozefe wazaba ka bwe kafweti sa ntete mukento wo kamutonta. Mpila yo yamubakisa bu keri mu ntontolo.

14. Bwe lendi sa mu kala ntontolo?

¹⁴ Bwe lendi landila tifwani tia Yozefe mpe lendi sila keba mu lembo bwa mu ntontolo? Lendi bonga zengolo bwawu bu mu zaba ka nti sa tala ti ntontolo yituriri. Longoka mu kalaka misamu Yehova mi kalembo zoloko na manzangu mamansoni, mpe saka keba mu banza misamu mio. (Mik. 97:10; 119:165) Mu mpila yo, kubâ na mabanza yeko-yeko ko bu bâ mu ntontolo. Mbo tizabila nzengolo yibonga.

15. Bwe mutu wulendi songela ti Yehova kadingaka mu bunsungu? (Bahebre 11:6)

¹⁵ Kampe zebi ti matieleka wabaka, mpe zololo wasarila Yehova mu mutima’aku wawansoni, kâ tima tie kô tita kukabakasa mu tihana kwe Yehova na mu batusu. Lendi sa ntiana bwa sa mutinu Davide. Bu yawula kwe Yehova ti: ‘A Nzambi, kumfipa zaba mpe mutima’ani. Kuntaluzula, zaba mpe bi nikwe lungulu. Tala ngatu nzila ya yayana nikwe landi, kunata mu nzila ya mankululu.’ (Mik. 139:​23, 24) Yehova mbo kasakumunaka bô bamudingaka na bunsungu. Ngolo zisarilaka mu lungisa kani dia tihana kwe Nzambi na dia batusu mbo zimusongelaka ti na bunsungu ta mu dingila.—Tanga Bahebre 11:6.

 TATAMANA MU PUSANA KWE YEHOVA

16-17. Bwe Yehova kabendelaka bô bê na bibuti bie Mbangi za Yehova? (Za 6:44)

¹⁶ Yezu watâ ti Yehova bendaka milongoki miandi. (Tanga Za 6:44.) Tatala mu ntia mpila we musamu wa nzitukulu, mpe bwe wuta zolo tâ mu bungu dia nge. Yehova tima tia mbote kamonaka kwe muna muntu wu kambendaka kwe Yandi. Yehova mbo kabongelaka muna muntu ntiana ‘tima tia Yandi beni’ peleko ‘tima tiandi tia ntalu.’ (Lub. 7:6; note.) Musamu wo wa matieleka wena mpe mu nge.

¹⁷ Kâ, kampe nge ntwenia yena ya kurila mu matieleka. Lendi banza ti pusa kwa bakwe ku pusi. Bibila ditêle: ‘Pusaneno kwe Nzambi, mpe Yandi mbo kapusana kwe beno’. (Zaki 4:8; 1 Nta. 28:9) Bu bonga kani dia pusana kwe Yehova, Yandi mpe mbo kapusana kwe nge. Yehova ka kukipaka ko kwa bu wena mu tinkunku tia bantu. Kâ mbo kakipaka muna muntu, na bô mpe bakurila mu matieleka. Muntu bu wubongaka nzengolo ya pusana kwe Yehova, Yehova mpe mbo kapusanaka kwe yandi, ntiana bu tumweni wo mu Zaki 4:8.—fwanakasa na 2 Bisi-Tesalonike 2:13.

18. Nti tuzonzela mu timoko tilanda? (Mikunga 40:8)

¹⁸ Bu tihana kwe Yehova mpe bu batusu, mbo kwizi sa ntiana bwasa Yezu. Mu luzolo lwa mutima wayizi tihana kwe Tata’ndi mu sa mio mi keri mu lombaka. (Tanga Mikunga 40:8; Ebr. 10:7) Mu timoko tilanda, mbo tuzonzela nti bilendi kubakisa mu tatamana mu sarila Yehova na kwikama kwakwansoni ha manima ma bateme’aku.