1-2. Ntia tusakumunu tubakaka ha manima ma bateme?

 MUSAMU wa nsayi wena mu batusu na mu bâ mu kanda dia Yehova. Bô bayizi bwa bweso bo, mbo basingasa misamu miatâ Davide weri titsoniki tia Mikunga, watâ ti: “Nsayi kwe wô wu [Yehova] solele, mpe wu neti penepene ngatu kabâ ku tupangu twaku!”—Mik. 65:​4, NWT.

² Yehova ka tambulaka muntu ni muntu ko mu kanda diandi. Ntiana bu tatokolo wazonzela mu timoko tiayôkele, mbo kapusanaka kwe bô basongelaka ti bazololo mu bâ penepene na Yandi. (Zaki 4:8) Bu watiheni kwe Yehova, mpe bu wayizi batusu, wayizi pusana kwe Yehova mu mpila ya nzitukulu. Lendi bâ na lukwikulu ti ha manima ma bateme, Yehova mbo ‘kakuhombolela lusakumunu, tii bu lembo vutu kondo tima.’—Mal. 3:10; Yer. 17:​7, 8.

3. Bakristo batihana kwe Yehova mpe babatusu, ntia dema dia mfunu die nawu? (Ekleziaste 5:​4, 5)

³ Wa matieleka, bateme mbatukulu kwa yena. Ha manima ma bateme’aku fweti sarila ngolo mu zitisa kani disiri ni bu wubâ mu ntangu ya mpasi, peleko timinu tiaku bu tibâ mu ntontolo. (Tanga Ekleziaste 5:​4, 5.) Mu bungu ti mulongoki  wa Yezu wena, mbo tomo landa tifwani tiandi na ntumunu zandi buna bufwanakane. (Mat. 28:​19, 20; 1 Pi. 2:21) Timoko ti mbo tikubakisa mu sila bo.

TATAMANA MU LANDA YEZU NTONO MPASI NA NTONTOLO

4. Mu ntia mpila milongoki mia Yezu minatinaka ‘poto dia matimuna’? (Like 9:23)

⁴ Kubanzandi ti ha manima ma bateme’aku kubwabana na mpasi ko. Yezu watomo tâ kwe milongoki miandi ti mbo baketi nata ‘poto dia matimuna.’ Diangana, mbo baketi bwasa ‘bilumbu biabiansoni.’ (Tanga Like 9:23.) Ngano Yezu mbo keri zolo tâka ti milongoki miandi mbo miaketi bâ mu mpasi ntangu zazansoni? Kâni. Mbo keri zolo zabikisaka kwa ti, ni bu sa ti mbo baketi baka tusakumunu, mbo baketi bwabana na misamu mia mpasi. Misamu miango miakaka milendi bâ nguria mpasi.—2 Tim. 3:12.

5. Ntia tusakumunu Yezu kakanisina kwe bô batambulaka mu hombesa bima?

⁵ Kampe nkwamusu ta korela za kanda diaku peleko kampe bima bia tinsuni wayizi tambula mu hombesa mu tûla Timfumu tia Nzambi ha tibuka tia ntete. (Mat. 6:33) Tala ti ni bo, lendi bâ na lukwikulu ti Yehova miamiansoni mi yirikaka mu bungu dia Yandi mia kazebi. (Ebr. 6:10) Kampe wayizi mona butieleka bwa misamu mia tâ Yezu: ‘Matieleka nita lu têla, ka kwena muntu ko, wasisa nzo, nkazi, bibusi, nguri, tata, bala, peleko misitu, mu bungu dia meno, na mu bungu dia nsangu za mbote, lembo baka bwawu bu, mbala yôka nkama mu ntangu yi, nzo, nkazi, bibusi, nguri, bala na misitu, na nkwamusu, mpe mu nza yita kwiza luzingu lwa mankululu.’ (Mak. 10:​29, 30) Tusakumunu tu wabakiri tuyôkele bunene bima biabiansoni bi watamburi mu hombesa.—Mik. 37:4.

6. Mu bungu dia nti fweti tatamana mu nwanisa ‘nsatu za tinsuni’ ha manima ma bateme?

⁶ Mbo wufwanakana ti watatamana mu nwana na ‘nsatu za tinsuni’ ha manima ma bateme’aku. (1 Za 2:16) Mu bungu ti tii lumbu ti muntu wa masumu kwa watiri. Ntangu zakaka, lendi bâ na mbanzulu zimosi na ntumwa Paulo. Watsoneka ti: ‘Diangana mutieno wa Nzambi wa nita yangalala mu kati dia mutima’ani, kâ, mu binama biani mbakiri mutieno wakaka wuta nwanisa mutieno wa mbanzulu zani, na wuta kunsimbirila mu boloko dia mutieno wa disumu we mu binama biani.’ (Rom. 7:​22, 23) Lendi kwizi nôka mu bungu dia nsatu zaku za mbi. Kâ, tifu tia banza mu kani di wasa bu watihana kwe Yehova mbo tikubakisa mu bâ wa kwikama mu nzengolo’aku ya telamana ntontolo. Musamu wa matieleka ni wena’eti kani dio mbo dikubakisa bu bâ mu ntontolo. Mu bwe?

7. Mu bungu ti watihana kwe Yehova bwe musamu wo wulendi kubakisila mu tatamana mu bâ wa kwikama kwe Yandi?

⁷ Bu watihana kwe Yehova wayizi tibela. Wuzololo tâ ti wayizi sola mu kala nsatu na makani ma nge beni ma lembo tâka Yehova nsayi. (Mat. 16:24) Buna, bu bâ mu ntontolo peleko bu bwabana na musamu wa mpasi ku fweti’â wabâ na lwaka ko mu mpila yi yirikila musamu. Buna nzegolo mosi kwa yikwizi bâ naku ni mu tatamana mu bâ wa kwikama kwe Yehova. Bu tatamana mu sarila Yehova na kwikama kwakwansoni mbo kwizi bâ ntiana Yobe. Ni bu sa ti mpasi za ngolo zeri nandi, na lukwikulu lwalwansoni wayizi tâ ti: ‘Ka nilosa kwikama kwani ko!’—Yobe 27:5.

8. Bwe tifu tia dimbitila mu lusambulu lu wasa mu tihana kwe Yehova tilendi kubakisila mu telamana ntontolo?

⁸ Bu banza lusambulu lwaku lu wasa mu tihana kwe Yehova, mbo baka ngolo za telamana ntontolo zazansoni. Mu tifwani, ngano  mbo batika mu sa flirter na mukento peleko na bakala dia muntu wakaka? Kampe kâni! Mu bungu ti wakanisina kwe Yehova ti kulendi’â wayirika musamu wa mpila yo ko. Buna, tala ti kubikiri’â ko ti mbanzulu za mbi zakula mu nge, ha manima kubâ na nsatu ko ya nwana mu katula zo. ‘Ku landa nzila ya minsa-mbi’ ko—Bin. 4:14, 15.

9. Bwe tifu tia dimbitila mu lusambulu lu wasa mu tihana kwe Yehova tilendi mpe kubakisila mu tûla misamu mia timpeve ha tibuka ntia ntete?

⁹ Ngano bwe sa tala ti bakuheni tisalu tilendi kukabakasa mu kwendaka ku tukutakanu ntangu zazansoni? Kampe zebi ka nti sa. Ntete watambula tisalu tio wabongele nzengolo mu kala bisalu bilendi kukabakasa mu kwenda ku tukutakanu. Buna kubâ na santu ko mu zaba tala ti nzengolo ya mbi bongele mu lenda. Tifu tia dimbitilaka mu tifwani tia Yezu mbo titubakisa. Yandi wabonga nzengolo ya tâ Tata’andi nsayi, ntiana yandi beto mpe tufweti bonga nzengolo ya tâka Nzambi yi tahana luzingu lweto nsayi.—Mat. 4:10; Za 8:29.

10. Bwe Yehova kakubakisila ha manima ma bateme mu tatamana mu landa Yezu?

¹⁰ Mpasi na ntontolo mbo zikuhana bweso bwa songela ti nge nzengolo wabongele ya tatamana mu landa Yezu. Bu sila bo mbo bâ na lukwikulu ti Yehova mbo kakubakisa. Bibila ditêle ti: ‘Nzambi wa kwikama wena, ka hana nzila ko ti ntontolo zayôka zô zi lulendi korela, mboko mu ntontolo mbo kaluhana lenda dia dukila na ngolo za korela.’—1 Kor. 10:13.

BWE LENDI TATAMANA MU LANDA YEZU

11. Ntia mpila mosi mu mpila zazansoni ziyôkele bubote yilendi kubakisa mu tatamana mu landa Yezu? (Tala mpe tifwani.)

¹¹ Yezu luhemo lweri nandi, mpe wabâ penepene na Yehova mu lusambulu. (Like 6:12)  Mpila mosi mu mpila zazansoni ziyôkele kwe nge yi lendi kubakisa mu tatamana mu landa Yezu ha manima ma bateme’aku, ni mu bâ na tifu tikubakisa mu bâ penepene na Yehova. Bibila ditêle: “Diangana, ni bu sa ti ka ntia nsobolo tasiri, tatatamana mu diatila mu nzila yo ya yimosi mu mpila ya fwanana.” (Flp. 3:​16, NWT.) Ntangu zakaka, mbo kwizi wâ binsamu bia bampangi babonga nzengolo ya kurisa tisalu tiawu mu Yehova. Kampe Lukolo lwa bisamuni bia Timfumu basa peleko bayenda ku mbuka yeri dinganaka bisamuni. Tala ti kani dia mpila yo die naku sa miamiansoni mi lenda mu lungisa dio. Dinga mpila zi sarila bwabwingi mu bungu dia Yandi. (Bis. 16:9) Ngano nti bilendi yilama tala ti wena na lenda dia sila bo ko bwawu bu? Kubanzandi ti bantu balenda mu sila bo bakuyôkele. Musamu wuyôkele mfunu ni wena’eti tufweti tatamana mu korela. (Mat. 10:22) Kunioniandi mfunu ya sarila Yehova mpila mosi na lenda mpe na misamu mie naku. Mpila ya mfunu yena mu tatamana mu landa Yezu ha manima ma bateme.—Mik. 26:1.

12-13. Nti lendi sa tala nti luhemo lwaku lubatikiri mu dimina? (1 Bisi-Korente 9:​16, 17) (Tala mpe kaku “ Tatamana mu dioka ntinu.”)

¹² Nti sa, tala ti mweni ti tusambulu twaku ka tusiri’â na nkatika bunsungu ko peleko kusiri’â na nsayi yayingi ko mu sala tisalu tia samuna? Nti lendi sa tala ti benzi ti ntangulu’aku ya Bibila ka yita vutu kunatina ndandu ko ntiana mu ntama? Tala ti misamu mia mpila yo mitûriri ha manima ma bateme’aku, kubanzandi ti kusiri’â na mpeve ya Yehova ko. Mu bungu ti bantu ba masumu twena, mbanzulu zeto mbo zisobaka ntangu zakaka. Tala ti luhemo lwaku lubatikiri mu dimina dimbitila mu tifwani tia ntumwa Paulo. Ni bu sa ti mbo keri sarila ngolo mu landa tifwani tia Yezu,  wazaba ti ntangu zakaka keri’â na ngolo zazingi ko mu sila bo. (Tanga 1 Bisi-Korente 9:​16, 17.) Watâ ti : ‘Kâ bu tilembolo bô, tisalu kwa tiena tibakuntuma.’ Mu mpila yakaka Paulo zengolo kabonga ya sala tisalu tiandi ntono mbanzulu zandi zeri sobaka ntangu zakaka.

¹³ Mpila mosi mpe, kubikandi mbanzulu zaku zasobesa nzengolo zaku. Bonga nzengola ya yirika misamu mia sungama ni bu sa ti kuta tomo zolo ko mu yirika mio. Ntangu bu yikwe yôke nsalulu zaku zifweti sobesa mbanzulu zaku mu mpila ya mbote. Mu mpila ni mpila tatamana mu bâ na programe ya mbote ya timpeve, mbo yikubakisa mu landa Yezu ha manima ba bateme’aku. Luvivululu lwaku mbo luntindisa mpe mpangi zaku zakaka.—1 Tes. 5:11.

‘TATAMANENO MU TISUNGAMANA [. . .] TATAMANENO MU TALA’

14. Nti fweti vulu sungamanaka, mpe mu bungu dia nti? (2 Bisi-Korente 13:5)

¹⁴ Mbo wubâ mpe mfunu kwe nge tala ti ha manima ma bateme tatamane mu tisungamana (Tanga 2 Bisi-Korente 13:5.) Vulu bongaka ntangu ya sungamana luzingu lwaku, na bifu biaku mu zaba tala ti bilumbu biabiansoni sambila sambilaka, Bibila tangaka mpe longokaka, ku tukutakanu kwendaka, mpe mvutu hanaka. Dinga mu sa ti misamu mio mitariri nsambululu’aku mia bâ nguria mfunu kwe nge. Mu tifwani lendi tiyula: “Ngano ndendi bangula ndongosolo za nguri kwe bantu bakaka? Ngano mpila ze kô zi ndendi sarila ngatu tisalu tiani tia samuna tiatomo vutu toma? Ngano tusambulu twani bwe twena, ngano mbo tu songelaka ti mbo nitomo sikirilaka Yehova mu miamiansoni? Ngano ntangu zazansoni mbo nikwendaka ku tukutakanu twa Bakristo? Bwe ndendi tomo landila tukutakano mpe ndendi tomesena mvutu zani?”

15-16. Nti ta longoka mu tifwani tia mpangi mosi ya bakala mu musamu wutariri telamana kwa ntontolo?

¹⁵ Mbo wubâ mpe musamu wa mbote kwe nge mu tisungamana na bunsungu bwabwansoni mu misamu milembolo na mio lenda. Mpangi ye na nkumbu Robert zonzele tifwani timosi tita bangula musamu wo: “Bu ndieri na mvula 20, tisalu tia ntangu fioti tieri nani. Tilumbu timosi bu tamanisa tisalu, mpwana’ani ya yikento yi tweri salaka wakuntikisa ku nzo’andi. Watâ ti beto bole kwa tubâ mpe ‘ntangu ya mbote tuyôkesa.’ Ha mbatukulu nazonza mu mpila ya peta, kâ ha manima nayizi kala mpe na bangula ka mu bungu dia nti.” Robert watelamana ntontolo, mpe tufweti  mu sîka. Kâ ha manima, bu kayizi vutu banza musamu wo wayôka mpe wamona ti mpila ye kô yiyôkele bubote kaketi yirikila musamu wo. Têle ti: “Ka nabâ na manzangu ko mu kala mpe ka nasila buna ko na ngolo zazansoni ntiana bwasa Yozefe bu bamutonta kwe mukento wa Putifare. (Mba. 39:​7-9) Diangana, nayituku bu namona ti nguria musamu wa mpasi weri kwe meno mu kala. Musamu wo wakumbakisa mu mona ti nafweti yika tindiku tiani na Yehova ngolo.”

¹⁶ Lendi baka ndandu bu tisungamana nge beni ntiana bwasa Robert. Ni bu sa ti lendele mu telamana ntontolo tiyula: ‘Ngono ntangu zikwa zi kufwanakane mu tâ kâni?’ Wamana mona ti fweti sa nsobolo kutisembandi. Bâ na nsayi mu bungu ti wizi bakula nti fweti tomesa. Sambirilaka musamu wo, mpe tala ka bwe lendi yikila ngolo nzengolo’aku ya diatila mu mitieno mia ndiatulu mia Yehova.—Mik. 139:​23, 24.

17. Bwe nkumbu ya Yehova yakemboso mu tifwani tia Robert?

¹⁷ Malongi makaka tuta baka mu tinsamu tia Robert. Vutulu tâ ti: “Bu namana kala invitasio ya mpwana’ani yo ya tisalu, wakuntêla ti, ‘test ya lendele!’ Namuyula bwe keri zolo tâka. Wabamgula ti ndiku’andi mosi ya bakala yeri Mbangi ya Yehova mu ntama, wamutêla ti ntwenia zazansoni za Mbangi za Yehova misamu mia mbi bakwe yiriki mu mansweki, mpe mbo baketi tambula bweso bwabwanoni bwa keti moneka mu diata misiku mia Nzambi. Buna, watâ kwe ndiku’andi ti mbo kaketi kuntonta mu zaba tala ti wa matieleka wena. Diangana nayizi bâ mu nsayi mu bungu ti namona ti nkumbu ya Yehova natomo kembesa.”

18. Nti tatamana mu sa ha manima bateme’aku? (Tala mpe kaku “ Bimoko biole bi zolo.”)

¹⁸ Bu watiheni kwe Yehova mpe bu wabatusu wasongele ti zololo wasantukisa nkumbu’andi ntono musamu ni musamu wulendi tûla. Mpe lendi bâ na lukwikulu ti Yehova misamu mia mpasi mita bwabana na mio mia kazebi na ntontolo zita telamana. Mbo kasakumuna ngolo zi sarilaka mu tatamana mu bâ wa kwikama. Bâ na lukwikulu ti mu nzila ya mpeve santu’andi mbo kakuhana ngolo za sila bo. (Like 11:​11-13) Na lubakusu lwa Yehova, lendi tatamana mu landa Yezu ha manima ma bateme’aku.