1. Ntia tiyuvu tulendi tiyula?

NGANO ntangu zakaka mbo bâka na lwaka bu banzaka misamu mita tu kêla ku matu ntiana mfukulu ya mabundu ma bungungu, nkotolo ya Goge ya ku nsi ya Magoge na muzingu wa Armagedo? Ngano mbo tiyulaka: ‘Ntangu yo bu yitula, ngano mbo nitatamana mu bâ wa kwikama tii bu yiyôka?’ Tala ti mabanza ni mo me naku, timoko ti tita zonzela misamu mia tâ Yezu mie mu verse ya mutu-diambu, tilendi ku bakisa. Yezu watâ kwe milongoki miandi ti: “Mitima mieno ka mibândi na lwaka. Sarileno timinu.” (Za 14:1, NWT) Timinu tia ngolo mbo titubakisa mu bâ na butindi mu misamu ni misamu mitula ku matu.

2. Bwe tulendi yikila timinu tieto ngolo, mpe nti tutaluzula mu timoko ti?

² Tulendi yika timinu tieto ngolo mu telamana misamu mia mpasi mia ku matu tala ti tutaluzuri ka bwe tutelamanaka misamu mia mpasi mia lumbu ti. Bu tudimbitilaka mu mpila yi tutelamanaka ntontolo zi tubwabanaka na zo lumbu ti, mbo tubakula ka mu ntia misamu tufweti yikila timinu tieto ngolo. Ntangu zazansoni zi tulendaka mu telamana ntontolo, timinu tieto mbo tiyikamaka ngolo. Musamu wo mbo wutubakisa mu korela misamu mia mpasi mikwiza. Mu timoko ti, mbo tutaluzula misamu miyà mia bwabana na milongoki mia Yezu, miasongela ti wafwanakana babâ na timinu tia ngolo. Ha manima, mbo tutaluzula ka bwe tulendi telamana misamu mia mpila yo lumbu ti, mpe bwe milendi tu kubikila mu bungu dia bilumbu bita kwiza.

3. Tintwari na Matie 6:30, 33 ntia musamu wutariri timinu Yezu katomo zonzela?

³ Musamu wa delakana wena kwe mfumu-kanda mu hana bidia, binkuti na tibuka tia bêla kwe mukento’andi na kwe bala bandi.  Mu ntangu yi ya mpasi ka wuvulu’â bâka musamu wa fioti ko. Mpangi zeto zakaka ka zasiri’â na tisalu ko, mpe ntono ngolo zi bata sarila, ka bata baka tisalu tiakaka ko. Bakaka bayizi kala bisalu bi lendi lembo sala Bakristo. Mu misamu mio miamiansoni, tufweti bâ na timinu tia ngolo ti, Yehova mbo katuhana bima biabiansoni bie neto nsatu mu bungu dia kanda dieto. Yezu wa katomo zonzela kwe milongoki miandi mu tinzonzi tiandi tia ha zulu mongo. (Tanga Matie 6:30, 33.) Tala ti tubêle na lukwikulu lwa ngolo ti Yehova ka tu yambirika ko, mbo tubâ na lenda dia tûla mabanza meto mamansoni mu tisalu tiandi. Bu tumona ka bwe Yehova kata tu bakisila mu lungisa nsatu zeto za tinsuni, mbo tutomo bâ penepene na Yandi mpe timinu tieto mbo tikwizi tomo bâ ngolo.

4-5. Nti biabakisa kanda dimosi mu telamana lwaka lwawu lwa lungisa nsatu zawu za tinsuni?

⁴ Tataleno ka bwe kanda dimosi dia ku Venezuela diamwina lubakusu lwa Yehova mu ntangu yi beri na lwaka mu bima bia tinsuni. Mu ntama kanda dia Castro nsi yeri nawu yi beri salaka mu baka mbongo za tikipa. Ha manima, bantu beri na mata babawuka bima biawu mpe babatuma mu ngolo mu bika nsi’awu. Tata, Miguel, têle ti: “Bwawu bu bima bi tusikirilaka ni bima bi tukunaka mu mwa musitu wa fioti wu tadefo. Bilumbu biabiansoni mbo nilombaka kwe Yehova mu tu hana bio bie neto nsatu mu tilumbu tio.” Luzingu lwa kanda dio lwa mpasi lwena, kâ na timinu tiatingi mu lenda dia Tata’eto dia luzolo dia lungisa nsatu zawu, kanda dia Castro mbo dikwendaka ku tukutakanu twa timvuka ntangu zazansoni mpe mbo basamunaka. Mbo batûlaka Timfumu tia Nzambi ha tibuka tia ntete, mpe Yehova mbo kabahanaka bio bie nawu nsatu.

⁵ Mu ntangu yîna ya mpasi Miguel na mukento’andi, Yurai, batûla mabanza mawu mamansoni mu mpila Yehova yi keri ba kipilaka. Ntangu zakaka, Yehova wasarila bampangi mu ba hana bima bieri nawu nsatu peleko mu bakisa Miguel mu baka tisalu. Yehova wabahana mpe bima bieri nawu nsatu mu nzila ya filiale. Kani kabwe, Yehova ka ba yambirika ko. Ha manima bamona ti, timinu tia kanda diawu tiayizi kula. Yoselin we mwana’awu wa ntete wa mukento, bu kazonzela musamu wumosi wa ba bakisila Yehova watâ ti: “Musamu wa lutindusu wena mu mona ka bwe Yehova katubakisila. Ndiku’ani yena mpe lukwikulu lwe nani ti mbo katatamana mu kumbakisa.” Wavutu tâ ti: “Misamu mia mpasi mi tabwabana na mio mu kanda dieto miatukubika mu bungu dia misamu mikwiza.”

6. Bwe lendi yikila timinu tiaku ngolo tala ti ku mbaya wena?

⁶ Ngano ku mbaya wena? Tala ti ni bo, musamu wa mpasi wena kwe nge. Kâ ni bu sa ti musamu’aku wa nkatika wa mpasi wena, lendi sarila ntangu yo mu tunga timinu tiaku. Sambila Yehova, tanga misamu mia tâ Yezu mie mu Matie 6:25-34 mpe dimbitila mio. Dimbitila mu bifwani bia bantu ba lumbu ti bisongelaka ti  Yehova mbo kakipaka bantu batûlaka mabanza mawu mu tisalu tiandi. (1 Kor. 15:58) Bu sila bo, timinu tiaku mbo tiyikama ngolo ti Yehova mbo kakubakisa ntiana bu kabakisa bantu bo babwabana na misamu mia mpasi ntiana nge. Zebi ka nti bie naku nsatu mpe ka bwe kalendi tia ku hanina. Bu kwe mone ka bwe Yehova kakubakisilaka mu luzingu lwaku, timinu tiaku mbo tiyikama ngolo mpe mbo bâ na lenda dia telamana misamu mia minene mikwiza.​—Hab. 3:17, 18.

7. Tintwari na Matie 8:23-26, bwe titembo tia ngolo tiakotesela timinu tia milongoki mu ntontolo?

⁷ Mu ntangu Yezu na milongoki miandi babwabana na titembo tia ngolo mu mubu, Yezu wasarila musamu wo mu ba bakisa mu mona ti bafweti yika timinu tiawu ngolo. (Tanga Matie 8:23-26.) Titembo, ngolo zingi kwa tieri mpe tiasa ti bato yafuluka mu mamba, kâ Yezu tolo twandi keri bwaka. Mu bunkuta bo, milongoki miamuvumbula mpe miamulomba kabavukisa. Na bulembami bwabwansoni, Mfumu wabayula: ‘Beno bunkuta bwa nti? Bankwa timinu tia fioti!’ Milongoki mieri na bunkuta miafweti bakula ti, Yehova lenda dieri nandi dia kengerela Yezu na bô babansoni beri nandi tintwari. Ntia malongi tuta baka? Timinu tia ngolo tilendi tu bakisa mu korela bitembo bia ngolo peleko misamu mia mpasi mifwanakane na bitembo bia ngolo.

8-9. Bwe timinu tia Anel tiakotela mu ntontolo, mpe nti biamubakisa?

⁸ Tataleno ka bwe timinu tia mpangi ya yikento Anel we mpumpa bâka ku Porto Rico, tiayikamana ngolo bu kakorela mpasi. Musamu wa mpasi wu kabwabana na wo ni “titembo tia ngolo” tia nkatika tiawu. Mpasi zabatika mu 2017 mu ntangu ouragan Maria yamwangasa nzo’andi. Ha manima ma titembo tio, wahombesa tisalu tiandi. Anel têle ti: “Mu ntangu yo ya mpasi, nayizi bâ mu lwaka, kâ nalongoka mu kwikila Yehova mu lusambulu, na mu lembo bika lwaka lwakunkabakasa mu yirika misamu mi nafweti yirika.”

⁹ Anel têle ti, tifu tia tumama tiamubakisa mpe mu korela mpasi zandi. Têle ti: “Landa lutwalusu lwa organizasio ya Yehova kwakumbakisa mu bâ mu tidzunu. Yehova wakumbakisa mu nzila ya bampangi bu bakuntindisa mpe bu bakungana bima bieri nani nsatu.” Vutulu tâ ti: “Yehova wakungana bima biabingi na bi ndieri lembo lombaka, mpe timinu tiani tiatomo yikama ngolo.”

10. Nti lendi sa tala ti “titembo tia ngolo” ta bwabana na tio?

¹⁰ Ngano “titembo tia ngolo” ta bwabana na tio? Kampe musamu wa mpasi ta bwabana na wo mu bungu dia catastophe naturelle. Peleko timbevo tia ngolo tie naku tita tomo ku nôkesa. Ntangu zakaka lendi bâ na lwaka, kâ kubikandi ti lwaka lwakukabakasa mu bâ na lukwikulu mu Yehova. Pusana kwe Yandi bu mu sambila na bunsungu bwabwansoni. Yika timinu  tiaku ngolo bu dimbitila mu lubakusu lwa ku hana Yehova mu ntama. (Mik. 77:11, 12) Bâ na lukwikulu ti kani kabwe ka ku yambirika ko​—ni bu wubâ lumbu ti peleko mu bilumbu bita kwiza.

11. Mu bungu dia nti tufweti bongela nzengolo ya tumamana bantu batutwarisaka?

¹¹ Nti biakaka bilendi ku bakisa mu korela misamu mia mpasi? Anel wazonzela tifu tia tumama. Longoka mu kwikila bantu bô Yehova na Yezu babakwikilaka. Ntangu zakaka bô bê na dema dia tu twarisa balendi tu hana lutwalusu lu tulembo bakula. Kâ, Yehova tifu tia tumama kasakumunaka. Zu diandi na bifwani bia bisari bia kwikama mbo bisongelaka ti tifu tia tumama vukisa tivukisaka. (Ndu. 14:1-4; 2 Nta. 20:17) Dimbitilaka mu bifwani biawu. Bu sila bo, mbo kurisa nsatu’aku ya landa lutwalusu lwa organizasio ya Yehova, bwawu bu na mu bilumbu bita kwiza. (Ebr. 13:17) Buna, kubâ na nsatu ko ya tîna titembo tia ngolo tita kwiza.​—Bin. 3:25.

12. Ngano Like 18:1-8 ntia tintwari yisaka ha kati dia timinu na tifu tia korela kondo kwa buderede?

¹² Yezu wazaba ti kondo kwa buderede mbo kwaketi kotesa timinu tia milongoki miandi mu ntontolo. Mu ba bakisa mu telamana tifu tio, wazonzela tifwani timosi tie mu buku dia Like. Yezu wazonzela tinsamu tia mufwiri wumosi wa mukento watatamana mu lomba kwe mfundisi yimosi ya lembo bâ ya sungama, mu baka mfundusu ya buderede. Mufwiri wo, lukwikulu lweri nandi ti fuki tiandi mbo tiaketi futa. Ha manima, mfundisi yamusila mfundusu ya buderede. Ntia malongi tuta baka? Yehova kena na kondo kwa buderede ko. Yezu watâ ti: ‘Ngano Nzambi Yandi beni ka zenga mambu ko ma bantu ba kasola, bamuyawurilaka mpimpa na mwini?’ (Tanga Like 18:1-8.) Yezu wavutu tâ ti: ‘Kâ, Mwana muntu bu kakwiza, ngano mbo kakwizi bwana [timinu tia mpila yo] ha mutoto nsi?’ Mu ntangu yi batubongelaka na kondo kwa buderede, mbo tusongela timinu tia ngolo ntiana tia mufwiri wo, bu tubâ na luvivululu mpe na fuki. Na timinu tia mpila yo, tulendi bâ na lukwikulu ti, Yehova mbo katubakisa mu ntangu ni ntangu. Tufweti bâ mpe na lukwikulu mu ngolo za lusambulu. Ntangu zakaka, tusambulu tweto tulendi nata ndandu zi tulembo kekolo.

13. Ngano lusambulu bwe lwabakisila kanda dimosi di babongela na kondo kwa buderede?

¹³ Tataleno tifwani tia mpangi yimosi ya yikento ye na nkumbu Vero, bâka ku R.D.C. Vero, bakala diandi dilembolo Mbangi na mwana’awu wa mukento weri na mvula 15, badioka hata diawu mu ntangu yi bakotela dio kwe bantu beri na mata. Bu beri mu nzila, bayizi tula huma ha bakanga nzila kwe bantu beri na mata. Babakanga mpe babatêla ti mbo babahonda. Mu ntangu Vero kabatika mu dila, mwana’andi wayêla mu mu dzunisa bu keri sambilaka mu zu dia tumbu mpe bu keri vulu sarilaka nkumbu ya Yehova mu lusambulu  lwandi. Bu kamanisa mu sambila, mfumu ya bantu beri na mata wamuyula: “Mwana, nani wakulongesa mu sambila?” Wavutula ti: “Nguri’ani, bu keri sarilaka tifwani tie mu Matie 6:9-13.” Mfumu yo wavutu mu têla ti: “Mwana, nge na bibuti biaku yendeno mu tidzunu, mpe bika Yehova Nzambi’eno kalukengerela!”

14. Nti bilendi kotesa timinu tieto mu ntontolo, mpe nti bitubakisa mu korela?

¹⁴ Bifwani bia mpila yo mbo bitulongesaka ti kani kabwe, ka tufweti’â tazimbakana ko ti lusambulu nguria mfunu lwena. Ngano nti lendi sa tala ti kuta kulu baka mvutu mu tusambulu twaku ko peleko kuta baka mvutu za nzitukulu ko? Ntiana mufwiri wa tifwani tia Yezu, tatamana mu sambila na lukwikulu ti Nzambi’eto ka ku bika ko, mpe mbo kahanina tusambulu twaku mvutu mu mpila ni mpila na mu ntangu yifwanakane. Tatamana mu lomba mpeve santu kwe Yehova. (Flp. 4:13) Bambuka ti Yehova ntamana mbo katomo ku sakumuna mpe mbo zimbakana mpasi zaku zazansoni za ntama. Na lubakusu lwa Yehova, bu kwe korele mpasi na kwikama kwakwansoni, mbo kwizi bâ ngolo mu bilumbu bita kwiza.​—1 Pi. 1:6, 7.

15. Tintwari na Matie 17:19, 20, ntia musamu wa mpasi milongoki mia Yezu miabwabana na wo?

¹⁵ Yezu walongesa milongoki miandi ti, timinu mbo tiaketi ba bakisa mu telamana misamu mia mpasi. (Tanga Matie 17:19, 20.) Lumbu timosi, ka beri’â lendaka ko mu kuma demo yimosi ni bu sa ti bwa beri toko saka. Mu bungu dia nti beri lembo lendelaka? Yezu wabatêla ti, timinu tiatingi tieri nawu nsatu. Wabatêla ti tala ti timinu tiatingi tieri nawu, mbo baketi bâ na lenda dia katula mongo ha tibuka tiandi mpe mu tûla wo ha tibuka tiakaka! Lumbu ti, mbo tubwabanaka na misamu mi tumonaka ti ka tulendi’â tatelamana mio ko.

16. Ngano timinu bwe tiabakisila Geydi mu korela bu bahonda bakala diandi?

¹⁶ Tabongeno tifwani tia mpangi yimosi ya yikento ye na nkumbu Geydi bâka ku Guatemala. Bahonda bakala diandi Edi mu ntangu yi batûka ku lukutakanu lwa timvuka mpe yi beri kâlaka ku nzo’awu. Ngano timinu bwe tiabakisila Geydi mu telamana tiari tiandi tiatingi? Têle ti: “Lusambulu, mbo lukumbakisaka mu losa dema diani kwe Yehova, mpe mbo lusaka ti nabâ mu tidzunu. Mbo nimonaka ti Yehova mbo kakunkipaka mu nzila ya kanda diani na ya ndiku zani mu timvuka. Bu nisalaka tisalu tiatingi mu tisalu tia Yehova, mpasi zani mbo zidiminaka, mpe mbo wukumbakisaka mu kipa kwa tilumbu ti twena kani nabâ na lwaka lwalwingi mu bungu dia tilumbu tita kwiza. Musamu wo bu wakumbwila, nayizi longoka ti, mu ntontolo ni ntontolo zikwiza ku matu, mbo nibâ na lenda dia telamana zo na lubakusu lwa Yehova, lwa Yezu na lwa organizasio.”

17. Nti tulendi sa mu ntangu yi tubwabanaka na musamu wa wunene wubâka ntiana mongo?

¹⁷ Ngano muntu wuzololo wafwilulu? Bonga  ntangu ya yika timinu tiaku ngolo mu vuvu tia mvumbukulu ya bafwa bu kwe tangi binsamu bia Bibila bia bantu bavumbuka kwe ba fwa. Ngano tiari tie naku mu bungu ti muntu wa kanda diaku bakaturi mu timvuka? Longoka ngatu wabâ na lukwikulu ti nsembolo yi hanaka Nzambi ya mbote kwa yibâka. Musamu ni musamu wa mpasi wuta bwabana na wo, sarila wo mu kurisa timinu tiaku. Ziburila Yehova mutima’aku. Kwendandi bê ha nge kaka, kâ tatamana mu bâ penepene na mpangi zaku. (Bin. 18:1) Yenda yiriki misamu mikubakisa mu korela, ni bu sa ti na bidilu kwe mia yirikiri. (Mik. 126:5, 6) Tatamana mu kwendaka ku tukutakanu twa timvuka, mu samunaka na mu tangaka Bibila. Mpe tatamana mu bâ na mabanza mu tusakumunu twa toma tu ku hana Yehova. Bu kwe mone ka bwe Yehova kata ku bakisila, timinu tiaku mu Yandi mbo tikwizi bâ nguria ngolo.

18. Tala ti bakuri ti timinu tiaku ka tiena ngolo ko, ngano nti lendi sa?

¹⁸ Tala ti misamu mia mpasi mi wabwabana na mio peleko mi ta bwabana na mio mbo misongelaka ti timinu tiaku ka tiena ngolo ko, kunôkandi. Mona ti musamu wu ta bwabana na wo mpila yena ya kurisa timinu tiaku. Sa ndombolo ya sa milongoki mia Yezu bu batâ ti: ‘Tu yikila timinu.’ (Like 17:5) Mpe dimbitila mu bifwani bi tuzonzele mu timoko ti. Ntiana Miguel na Yurai, bambukaka ntangu zazansoni Yehova zi kakubakisa. Ntiana mwana wa mukento wa Vero na Anel, sambilaka Yehova na bunsungu bwabwansoni, nsungula bu bwabanaka na misamu mia minene. Mpe ntiana Geydi, zabaka ti Yehova lendi ku hana lubakusu lwe naku nsatu mu nzila ya kanda diaku peleko ya ndiku zaku. Wamana bika Yehova kakubakisa mu misamu mie naku lumbu ti, mbo kwizi bâ na lukwikulu lwalwingi ti mbo kakubakisa mu korela musamu ni musamu wa mpasi wulendi ku turila mu bilumbu bita kwiza.

19. Ngano Yezu ntia lukwikulu lweri nandi, mpe mu ntia misamu lendi bêla na lukwikulu?

¹⁹ Yezu wabakisa milongoki miandi mu mona ka mu ntia misamu beri na nsatu timinu tiatingi. Kâ kani kabwe ka bâ na ntembe ko ti na lubakusu lwa Yehova mbo baketi lenda mu telamana misamu mia mpasi miaketi ba turila ku matu. (Za 14:1; 16:33) Lukwikulu lweri nandi ti timinu tia ngolo mbo tibakisa yungi dia bantu mu yôka ntangu ya mpasi ziyôkele. (Nza. 7:9, 14) Ngano mbo bâ mu kati dia yungi dio? Na lubakusu lwa Yehova mbo bâ mu kati tala ti yirikiri misamu mi lendi lenda bwawu bu mu yika timinu tiaku ngolo!​—Ebr. 10:39.