1. Bwe tuzabiri ti Yehova zololo kabâ penepene na beto?

 YEHOVA mbo katulombaka mu bâ penepene na Yandi. (Zaki 4:8) Zololo ti kabâ Nzambi’eto, Tata’eto, mpe ndiku’eto. Mbo kahanaka mvutu mu tusambulu tweto, mpe mbo katubakisaka mu ntangu za mpasi. Organizasio’andi kasarilaka mu tu longesa na mu tu kengerela. Kâ nti tufweti sa mu pusana kwe Yehova?

2. Bwe tulendi pusana kwe Yehova?

² Tulendi bâ penepene na Yehova bu tumusambila, bu tutanga Zu diandi, mpe bu tudimbitila dio. Bu tusila bo, mbo tukwizi bâ na luzolo lwalwingi mu Yandi mpe mbo tumutonda. Mbo tubâka na timina dia mu tumamana na dia mu hana mukembo wumufwanakane. (Nza. 4:11) Bu tutomo kwe longoke mu zaba Yehova, lukwikulu lweto mu Yandi na mu organizasio yi kasarilaka mu tu bakisa mbo lutomo kula.

3. Ngano Diabulu bwe kayêlelaka mu tu hambasa na Yehova, kâ nti bitubakisa mu lembo yambirika Nzambi’eto na organizasio’andi? (Mikunga 31:13, 14)

³ Kâ, Diabulu mbo kayêlaka mu tu hambasa na Yehova, nsungula bu tubwabanaka na misamu mia mpasi. Ngano bwe kasaka? Mbo kayêlaka mu bebesa lukwikulu lweto mu Yehova na mu organizasio’andi malembe-malembe. Kâ, tulendi telamana nsalulu zandi. Timinu tieto bu tikwizi bâ ngolo mpe lukwikulu lweto mu Yehova bu lukwizi bâ lwa sikama, ka tuyambirika Nzambi’eto ko na organizasio’andi.​—Tanga Mikunga 31:13, 14.

4. Nti tuzonzela mu timoko ti?

⁴ Mu timoko ti, mbo tuzonzela misamu mitatu mia mpasi  milendi tûka kwe bantu balembolo mu timvuka; milendi bebesa lukwikulu lweto mu Yehova na mu organizasio’andi. Bwe misamu mio mia mpasi milendi tu hambasala na Yehova? Mpe nti tulendi sa mu telamana ngolo zi sarilaka Satana?

5. Bwe mpasi zilendi bebesela lukwikulu lweto mu Yehova na mu organizasio’andi?

⁵ Ntangu zakaka, mbo tubwabanaka na mpasi​—ntiana nkwamusu za kanda, peleko bu tuhombesaka tisalu. Bwe mpasi za mpila yo zilendi katurila lukwikulu lweto mu organizasio ya Yehova, mpe bwe zilendi tu hambasala na Yandi? Bu tukorelaka mpasi tûka ntangu yayingi, tulendi kondo tivuvu mpe tulendi kwizi nôka. Satana mbo kasarilaka ntangu za mpila yo, mpe mbo kadingaka mu sa ti tabâ na ntembe mu luzolo lwe na Yehova mu beto. Satana mbo kazoloko ti tatiyula tala ti ni Yehova peleko organizasio’andi yita tulumuna mpasi zeto. Musamu wa mpila yo waturila bala ba Israele ku Ezipte. Ku mbatukulu, mbo beri kwikilaka ti Yehova watambika Mose na Arone mu ba kûla ku bungamba. (Ndu. 4:29-31) Kâ, Farao bu kayizi yika mpasi mu luzingu lwawu, bayizi songela ti ni Mose na Arone bayizi tulumuna mpasi zawu, bu babatêla ti: ‘Lutusiri nsunga ya mbi ha meso ma Farao na ma bisari biandi; yo mbele kwa ya muzingu lutûriri ha moko mawu mu tu honda.’ (Ndu. 5:19-21) Bakwikisila bisari bia Nzambi bia kwikama misamu. Ntia mpila tiari! Tala ti mpasi ta korela tûka ntama, bwe lendi tatamana mu bâ na lukwikulu lwa ngolo mu Yehova na mu organizasio’andi?

6. Ntia malongi tuta baka mu mpila mbikuri Habakuke yi katelamana mpasi? (Habakuke 3:17-19)

⁶ Ziburila Yehova mutima’aku mu lusambulu, mpe kêla lubakusu lwandi. Mbikuri Habakuke mpasi zazingi kabwabana na zo. Ntangu yeri kô, kampe wayizi bâ na ntembe ti Yehova yandi keri belokelaka lwaka. Buna wayizi zabikisa mabanza mandi kwe Yehova mu lusambulu. Watâ ti: ‘Na tii ntia ntangu, Yehova, nikuyawurila, kâ nge kungwirikiri? [. . .] Mu nti ta sungamana kwa mpasi zani?’ (Hab. 1:2, 3) Yehova wahana mvutu mu lusambulu lwa bunsungu lwa tisari tiandi tia kwikama. (Hab. 2:2, 3) Bu kamana dimbitila mu nsalulu za mvukusu za Yehova, Habakuke wayizi vutu bâ na nsayi yayingi. Wayizi bâ na lukwikulu ti Yehova yandi keri kipaka, mpe mbo kaketi mu bakisa mu korela misamu mia mpasi. (Tanga Habakuke 3:17-19.) Ngano ntia malongi tuta baka? Bu bwabanaka na mpasi, sambila Yehova mpe mu têla ka bwe tamona. Ha manima dinga lubakusu lwandi. Bu sila bo, lendi bâ na lukwikulu ti Yehova mbo kakuhana ngolo ze naku nsatu mu korela. Mpe bu kwizi mona lubakusu lwandi, timinu tiaku mu Yandi mbo titomo kula.

7. Ngano bantu ba mu kanda dia Shirley ntia musamu badinga kakwikila, mpe nti biamukabakasa mu hombesa timinu mu Yehova?

⁷ Tatamana mu landa programe’aku ya misamu mia timpeve. Tataleno ka bwe musamu wo wabakisila Shirley, mpangi ya yikento yibâka ku Papouasie-Nouvelle-Guinée, mu ntangu yi kabwabana na musamu wa mpasi. b Shirley na kanda diandi mputu zeri, mpe ntangu zakaka musamu wa mpasi weri mu baka bima bia dia biafwanana. Muntu wumosi mu kanda diandi wayela mu bebesa lukwikulu lwandi mu Yehova. Watâ ti: “Mbo lutâka ti mpeve santu ya Nzambi yilubakisaka, kâ lubakusu ni kwe lwe? Kanda mu bumputu kwa diatiri. Ntangu’aku hombesaka mu samuna.” Shirley vutulu tâ: “Ngano Nzambi  beto kabelokelaka lwaka peleko kâni?’ Buna nayizi kulu sambila Yehova mpe namutêla misamu miamiansoni mi ndieri banzaka. Natatamana mu tangaka Bibila na mabuku meto masikamanaka mu Bibila, mpe natatamana mu samuna na mu kwendaka ku tukutakanu.” Wayizi batika mu kulu bakula ti Yehova kanda diandi keri kipaka. Kani kabwe kanda diani ka diafwa nsatu ko, mpe mu nsayi beri. Shirley têle: “Nayizi mona ti Yehova wahana mvutu mu tusambulu lwani.” (1 Tim. 6:6-8) Wamana tatamana mu landa programe’aku ya timpeve, kubika ko ti mpasi peleko ntembe zakuhambasa na Yehova.

8. Ntia misamu miturilaka mpangi ze na madema mu organizasio ya Yehova?

⁸ Mu nzila ya média na ya réseaux sociaux, mbeni zeto mbo ziyangasaka bungungu peleko mbo zibutisaka ntembe mu mpangi ze na madema mu organizasio. (Mik. 31:13) Mpangi zakaka bayizi ba kanga mpe batâ ti misamu mia nkatika mia mbi bayirika. Bakristo ba mu mbandu ya ntete misamu ni mia mpila yo babwabana na mio bu bakwikisila Paulo misamu na bu bamukanga na kondo kwa buderede. Ngano bwe basa?

9. Ngano Bakristo bakaka bwe basa mu ntangu yi bakanga ntumwa Paulo?

⁹ Bakristo bakaka ba mu mbandu ya ntete babika mu yika ntumwa Paulo moko bu keri ku boloko ku Rome. (2 Tim. 1:8, 15) Mu bungu dia nti? Ngano nsoni za Paulo zeri nawu mu bungu ti bantu mbo beri mu bongelaka ntiana timpumbulu? (2 Tim. 2:8, 9) Peleko bunkuta bweri nawu ngatu babakwamisi bawu mpe? Ni bu sa ti ka ntia misamu mieri ba tumaka, banzeno’eti ka bwe Paulo keri monaka ku mutima. Wakorela misamu miamingi mia mpasi, mpe waketi hombesa luzingu lwandi. (Bis. 20:18-21; 2 Kor. 1:8) Kani kabwe ka tubândi ntiana bantu bayambirika Paulo bu keri na nsatu lubakusu! Ngano ntia musamu tufweti bambukilaka bu bakwamisaka mpangi zeto ze na madema?

10. Nti tufweti bambukilaka bu bakwamisaka mpangi zeto ze na madema, mpe mu bungu dia nti?

 ¹⁰ Bambukaka ka nani tu kwamisaka mpe mu bungu dia nti. 2 Timote 3:12 mbo yitâka ti: “Bô babansoni bazololo mu bâ ba kangama kwe Nzambi, tintwari na Kristo Yezu, mbo babwabana na nkwamusu.” Buna, ka tufweti’â tayitukuku ko Satana bu kakwamisaka mpangi zeto ze na madema. Kani diandi ni diena’eti, kabebesa kwikama kwawu, mpe katutâ bunkuta.​—1 Pi. 5:8.

11. Nti tuta longoka mu tifwani tia Onezifore? (2 Timote 1:16-18)

¹¹ Tatamana mu yika mpangi zaku moko, mpe bâ wa kwikama kwe bawu. (Tanga 2 Timote 1:16-18.) Mukristo wumosi mu mbandu ya ntete, weri na nkumbu Onezifore, wasarila mu mpila ya swaswana mu ntangu Paulo yi keri ku boloko. Chaînes za boloko za Paulo ka zeri’â mu tâka nsoni ko. Kâ, Onezifore wadinga Paulo, mpe bu kamumona, wadinga mpila zi kaketi mu bakisila. Bu kasila bo, Onezifore wayizi tûla luzingu lwandi mu mpasi. Ntia malongi tuta baka? Ka tufweti’â tabika bantu ko batutâ bunkuta, mpe batukabakasa mu bakisa mpangi zeto ze mu nkwamusu. Tabanwanina, mpe tababakisa. (Bin. 17:17) Nsatu ya luzolo lweto ye nawu na ya lubakusu lweto.

12. Nti tuta longoka mu tifwani tia mpangi zeto za ku Russie?

¹² Taleno ka bwe mpangi ze ku Russie zayizi bakisila mpangi zawu ze ku boloko. Mu ntangu yi bafundisaka bakaka, mpangi zazingi zikwizaka ku nzo ya mfundusu mu ba yika moko. Ntia malongi tuta baka? Bu bahunisinaka mpangi ze na madema misamu, bu babakangaka, peleko bu babakwamisaka, ka tubâkandi na bunkuta. Sambilaka mu bungu dia bawu, kipaka kanda diawu, mpe dinga mpila zakaka zi lendi ba hanina lubakusu.​—Bis. 12:5; 2 Kor. 1:10, 11.

13. Bwe lukwikulu lweto mu Yehova na mu organizasio’andi lulendi kwizi bebela bu batumonekesaka buzoba?

¹³ Bantu ba kanda balembolo Mbangi, bantu batusalaka na bo, peleko batukotaka na bo balendi tu monekesa buzoba mu bungu ti samuna tusamunaka, peleko mitieno mia Yehova tulandaka. (1 Pi. 4:4) Balendi tâ: “Nge nzololo, kâ misamu ngolo miena mu dibundu diaku, mpe nsalulu zeno ka zena za delakana ko.” Bantu bakaka balendi tu tsâla mu bungu dia mpila yi tubongelaka bantu ba bakatula mu timvuka, bu batâ ti: “Bwe lendi têla ti luzolo lwe naku?” Misamu mio milendi butisa ntembe mu mutima’eto, mpe tulendi tiyula: ‘Ngano Yehova misamu mingi kakundombaka? Ngano organizasio’andi misamu mingi yiyiminaka?’ Tala ti musamu ni wo ta bwabana na wo, bwe lendi tatamana mu bâ penepene na Yehova, mpe na organizasio’andi?

14. Bwe tufweti saka mu ntangu yi batumonekesaka buzoba mu bungu ti mitieno mia Yehova tulandaka? (Mikunga 119:50-52)

¹⁴ Bonga nzengolo ya zitisa mitieno mia Yehova. Ni bu sa ti bamusehesela, Yobe mbo keri zitisaka mitieno mia Yehova. Mosi mu ndiku za bungungu za Yobe wayêla mu sa ti Yobe kakwikila ti ka weri’â musamu wa mfunu ko kwe Nzambi mu tumamana mitieno miandi peleko kâni. (Yobe 4:17, 18; 22:3) Kâ, Yobe wakala mu kwikila bungungu bo. Wazaba ti mitieno mia Yehova mitariri mbote na mbi mia delakana miena, mpe nzengolo kabonga mu zitisa mio. Ka bika ko ti bantu bakaka bakatula kwikama kwandi. (Yobe 27:5, 6) Ngano ntia malongi tuta baka? Kubikandi bantu badingaka mu ku monekesa buzoba babutisa ntembe mu nge mu bungu dia mitieno mia Yehova. Banza misamu miakuturila mu luzingu lwaku. Ngano ka wamona ko ti ntangu zazansoni mitieno mia Yehova mia delakana kwa mibâka,  mpe ndandu mikunatinaka? Bonga nzengolo ya yika moko kwe organizasio yizitisaka mitieno mio. Ni bu sa ti muntu ni muntu dingiri mu ku monekesa buzoba bwabwingi, kani kabwe kuhambana na Yehova ko.​—Tanga Mikunga 119:50-52.

15. Mu bungu dia nti bamonekesa Brizit buzoba?

¹⁵ Tazonzeleno tinsamu tia Brizit, ye mpangi ya yikento ya ku Inde. Kanda diandi diamutsâla mu bungu dia timinu tiandi. Ntangu fioti ha manima ma bateme’andi mu 1997, bakala diandi dialembo bâ Mbangi ya Yehova diayizi hombesa tisalu tiandi. Buna, wabonga nzengolo ti yandi, Brizit, na bala bawu ba bakento ya kwe bâ kwe bibuti biandi bieri bêlaka ku hata diakaka. Kâ, Brizit wayizi bwabana na misamu miakaka miyôkele mpasi. Mu bungu ti bakala diandi keri’â na tisalu ko, Brizit wafweti sala tilumbu tia mukaka mu lungisa nsatu za kanda diandi. Musamu wakaka, timvuka tieri penepene kampe ha titini tia kilometre 350 tieri. Musamu wa tiari ni wena’eti, kanda dia bakala diandi diayizi mu telamana mu bungu dia timinu tiandi. Mu bungu ti misamu miayizi tomo beba, kanda dia Brizit diavutu soba mbuka ya bêla. Mpe mu ta-pulukusu, bakala diandi diayizi fwa. Ha manima, mwana mosi wa mukento wayizi fwa mu kansere, kâ mvula 12 kwa yeri nandi. Mu vutu tomo yika misamu mpasi, kanda dia Brizit diayizi mu hana fote mu bungu dia misamu miatula. Bayizi tâ ti tala ti ka yizi’â bâ Mbangi ya Yehova ko, misamu mio miamiansoni ka miaketi’â tula ko. Kâ, Brizit watatamana mu tûla lukwikulu lwandi mu Yehova na mu bâ penepene na organizasio’andi.

16. Ngano Brizit ntia lusakumunu kabaka bu katatamana mu bâ penepene na Yehova mpe na organizasio’andi?

¹⁶ Mu bungu ti Brizit mala keri bêlaka na timvuka, munkengi wumosi wa tizunga wamutindisa mu samunaka ku tizunga tiandi na mu twarisaka tukutakanu ku nzo’awu. Ku mbatukulu musamu wa mpasi weri kwe yandi. Kâ, walanda lutwalusu lo. Wasamuna nsangu za mbote kwe bantu bakaka, wasa tukutakanu ku nzo’awu, mpe wabonga ntangu ya saka nsambululu ya kanda na bala bandi ba bakento. Ngano ntia ndandu zamoneka? Brizit wayizi  bâ na lenda dia batika na dia twarisa ndongokolo za Bibila zazingi, mpe milongoki miandi mia Bibila miakaka miayizi batusu. Mu 2005 wayizi batika mu sala tisalu tia mupasuri-nzila wa ntangu zazansoni. Wayizi baka ndandu za mbote mu bungu dia lukwikulu lwandi mu Yehova na kwikama kwandi kwe organizasio’andi. Bala bandi mbo basarilaka Yehova na kwikama kwakwansoni, mpe bwawu bu bimvuka biole bie ku tizunga tiandi! Brizit lukwikulu lwe nandi ti ni Yehova wamuhana ngolo za telamana misamu mio miamiansoni mia mpasi na mu korela buzoba bu beri mu monekesaka kwe kanda diandi.

17. Ntia nzengolo tufweti bonga?

¹⁷ Satana zololo takwila ti Yehova mbo katuyambirikaka bu tubâka mu mpasi, mpe bu tuyikaka organizasio’andi moko, mpasi kwa tuyikaka mu luzingu lweto. Satana zololo ti tabâ na bunkuta bu bahunisinaka mpangi ze na madema misamu, bu babakwamisaka peleko bu babatûlaka ku boloko. Mpe bu batumonesaka buzoba, mbo kadingaka ti lukwikulu lweto mu mitieno mia Yehova na mu organizasio’andi lwabeba. Kâ, nsalulu zandi za mbi za tutomono zaba, mpe ka lendi’â katuleba ko. (2 Kor. 2:11) Bonga nzengolo ya losa bungungu bwa Satana na ya tatamana mu bâ wa kwikama kwe Yehova na kwe organizasio’andi. Bambuka ti, kani kabwe Yehova ka ku yambirika ko. (Mik. 28:7) Diangana, kubikandi na kani tima tiakuhambasa na Yehova!​—Rom. 8:35-39.

18. Nti tuzonzela mu timoko tita landa?

¹⁸ Mu timoko ti, twizi zonzela misamu mia mpasi mi tulendi bwabana na mio mitûkaka kwe bantu balembolo mu timvuka. Kâ lukwikulu lweto mu Yehova na mu organizasio’andi, lulendi kota mu ntontolo mu misamu mia mpasi mitûkaka mu timvuka. Bwe tulendi lendela mu telamana misamu mia mpila yo? Mbo tuzonzela mio mu timoko tita landa.