Bibila mbo ditomo zabikisaka ti Yehova lendi tizabila misamu mia ku matu. (Iza. 45:21) Ka bangulaka misamu miamiansoni ko mu mpila na mu ntangu yi kasarilaka lenda dio peleko mbala kwa kasolaka mu tizabila misamu. Buna, ka tuzebi’â miamiansoni ko mu lenda dio die na Yehova. Kâ, tataleno mwa misamu.

Yehova kena na ndilu ko ntono zi katûla Yandi beni. Na ndwenga zandi zilembolo na ndilu, lendi titêla musamu wuyilama wu kazololo. (Rom. 11:33) Mu bungu ti tifu tia tiyimina tia lunga tie nandi, lendi mpe sola mu lembo zaba ka nti bitula.—Fwanakasa Izaya 42:14.

Yehova mbo kasaka ti luzolo lwandi lwasalama. Bwe musamu wo wuta tu bakisila mu bakula lenda dia Yehova dia tizabila misamu mia ku matu? Izaya 46:10 yibanguri: ‘Tûka mbatukulu, milanda nita wâkasa, mboko tûka miayôka, mio miatiri ka miyilamane ko. Ntêle: “Mawaya mani mbo masalama, mbo niyirika mpe miamiansoni mi nkekolo.”’

Musamu wumosi wulendi sa ti Yehova katitêla misamu mia ku matu ni mu bungu ti ngolo ze nandi dia sa ti misamu miayilama. Buna, kena na nsatu ko ya kwenda mu ntinu-ntinu ngatu kazaba misamu mita mu kêla ku matu—ntiana’eti misamu miamiansoni mia ku matu miatiyilamana, mpe Yehova ti kasaka ni mu toko mia taluzula ntete miatula. Kâ, Yehova lendi bonga nzengolo ti musamu ewu peleko wakaka mu ntangu eyi wuyilama, mpe ha manima musamu wo mbo wuyilama mu ntangu yi katêle.—Ndu. 9:​5, 6; Mat. 24:36; Bis. 17:31.

Mu bungu dia musamu wo, Bibila mbo disarilaka ntelo ya “kubika,” “yirika,” mu zonzela mio Yehova mi kasaka mu misamu mia ku matu. (2 Mit. 19:25; note; Iza. 46:11) Ntelo zo babangula zo mu ntelo ya Hebre yikwelanaka na ntelo yizololo tâ “tisari tia binzu (potier).” (Yer. 18:4) Ntiana kwa tisari tia binzu titomono zaba tisalu bu kabongaka lubumba mu yirika tinzu tia toma, Yehova lendi kubika misamu mu lungisa luzolo lwandi.—Efz. 1:11.

Yehova mbo kazitisaka timpwanza tia sola. Ka tikubikila misamu ko miyôka mu luzingu lwa muntu;ka tumaka mpe bantu ba nsungu ko mu yirika musamu wubanata ku mfukulu. Mbo kabikaka bantu babansoni mu sa nsololo zawu, mpe mbo kabatindisaka mu sola misamu mia mbote.

Tabongeno bifwani biole. Tifwani tia ntete ni tia Bisi-Ninive. Yehova watâ ti mumvuka wa Ninive mbo waketi fuka mu bungu dia mbi’awu. Kâ, bu basoba mabanza, Yehova ‘wavutukisa mutima manina mu bungu dia mbi yi kazolo mu ba sa. Ka vutu’â ya sa ko.’ (Yon. 3:​1-10) Yehova wasoba mabanza mu misamu mi katoko tâ mu bungu ti Bisi-Ninive basarila timpwanza tiawu tia sola mu soba mabanza mu bungu dia nsangu za nsembolo zi kabatambikila.

Tifwani tia nzole ni mbikululu yitariri nkumbu ya Sirise, waketi kûla Bayuda, mpe waketi hana ntumunu ti bavutu tunga Tempelo ya Yehova. (Iza. 44:26–45:4) Mutinu Sirise wa Perse walungisa mbikululu yo. (Ezd. 1:​1-4) Kâ, keri’â tisari tia Nzambi ya matieleka ko. Yehova wasarila Sirise mu lungisa mbikululu, kâ ka mu kabakasa ko mu sola nzambi yi kaketi sarila.—Bin. 21:1.

Wa matieleka, ka tuzonzele’â misamu miamiansoni ko mitariri lenda dia Yehova dia zaba misamu mia ku matu. Na mabanza ma delakana, ka kwena muntu ko lendi tomo bakula nzila za Yehova. (Iza. 55:​8, 9) Kâ, misamu mia tu zabikisa Yehova mbo miyikaka timinu tieto ngolo ti ntangu zazansoni mbo kayirika misamu mia mbote—mu kati na bu kazonzelaka misamu mia ku matu.