1-2. Nti bilendi tu bakisa mu bakula mio mi monaka Yehova bu batâka bungungu mu nkumbu’andi?

 BANZA’ETI musamu ewu: Muntu wu zololo wutêle musamu wa mbi mu nge. Zebi ti bungungu kwa bwena; mpe bantu bakaka mbo bata mu kwikila. Kâ tima tiyôkele bubi, batikiri mu yangasa bungungu bo, mpe bantu babingi babatikiri mu kwikila bo. Ngano bwe mona? Tala ti lwaka lwe naku lwa bantu, mpe lwa bâ na nkumbu ya mbote, diangana bungungu bo mbo bukufwemesa.—Bin. 22:1.

² Musamu wo wulendi tu bakisa mu bakula mio mia mona Yehova bu babebesa nkumbu’andi. Mwana’andi mosi wa timpeve watâ bungungu mu Yandi kwe mukento wa ntete, Eva. Wakwikila bungungu bo. Bungungu bo bwasa ti bibuti bieto bia ntete biakolamana Yehova. Ha manima, masumu na lufwa biakota ha kati dia bantu. (Mba. 3:​1-6; Rom. 5:12) Misamu miamiansoni mi tumonaka mu nza—lufwa, mizingu, mpasi—miayizi moneka mu bungu dia bungungu bwa tâ Satana ku nsaba ya Edene. Ngano Yehova mpasi kamonaka mu bungungu bo na mu bungu dia misamu mi bwatulumuna? Yee. Kâ, Yehova kena mu tiari ko, peleko kena na diki ko. Kâ, mbo katatamanaka mu bâ Nzambi ya nsayi. —1 Tim. 1:11.

3. Ntia bweso bwe neto?

³ Bweso bwe neto bwa hana lubakusu ngatu nkumbu ya Yehova yabâ ya santu bu tutumamana ntumunu eyi yilembolo mpasi: ‘Kembeleno nkumbu ya Yehova.’ (Mik. 113:1) Mbo tukembelaka nkumbu ya Yehova bu tutâka misamu mia mbote mu Yandi. Ngano mbo kembela nkumbu ya Yehova? Tataluzuleno misamu mitatu mitubakisa mu kembela nkumbu ya Nzambi’eto mu mutima wa mukaka.

 YEHOVA TUTÂKA NSAYI BU TUKEMBELAKA NKUMBU’ANDI

4. Mu bungu dia nti mukembo’eto wutêlaka Yehova nsayi? Hana tifwani. (Tala mpe tifwani.)

⁴ Mbo tutâtaka Tata’eto dia ku mazulu nsayi bu tukembelaka nkumbu’andi. (Mik. 119:108) Ngano wuzololo tâ ti Nzambi, Nkwa-Ngolo-Zazansoni, ntiana bantu kena balembolo ba lunga bê na nsatu mukembo, mu bungu ti ka bena na lukwikulu mu bawu beni ko? Kâni. Tabongeno tifwani. Banza’eti mwana wa fioti wa mukento wuta kwe dioke mu bwana tata’andi, mu bumbiri, mpe mu têlele, “Nge ni tata diyôkele mu nza ya mukaka!” Tata sehele, mpe mu nsayi kena. Mu bungu dia nti? Ngano tufweti tâ ti, kampe bakala dio kena na lukwikulu lwalwingi ko mu yandi beni, peleko lukwikulu lwandi mu mukembo wu mu hanaka mwana’andi lutûkaka? Kâni. Kani wa bêla bo, mu bungu ti mwana’andi kazololo, mpe mu nsayi kena mwana bu wuta mu songela luzolo na tifu tia tonda. Zebi ti bifu bia mpila yo mbo bibakisa mwana’andi mu bâ mu nsayi bu kakwe kuri. Mu bungu dia misamu mia mpila yo, Yehova, Tata diyôkele, mu nsayi kabâka bu tumukembelaka.

5. Bu tukembelaka Yehova, ntia musamu tusongelaka ti bungungu kwa bwena?

⁵ Bu tukembelaka Tata’eto die ku mazulu, mbo tuhanaka lubakusu ti musamu wakaka wa tâ Satana mu muna muntu mu beto bungungu kwa bwena. Satana mbo katâka ti ka kwena muntu ko wulendi nwanina nkumbu ya Nzambi na kwikama kwakwansoni. Mbo katâka ti ka kwena muntu ko wutatamana mu bâ wa kwikama kwe Nzambi bu kakota mu ntontolo. Satana mbo katâka ti mbo tubika mu sarila Nzambi tala ti tubenzi ti wo ni musamu wuyôkele bubote kwe beto. (Yobe 1:​9-11; 2:4) Kâ Yobe na kwikama kwakwansoni wasongela ti Satana ngungu kwa yena. Ngano mbo nge? Muna muntu mu beto lendi sola mu nwanina Tata’eto na mu mu tâ nsayi bu kamusarila na kwikama kwakwansoni. (Bin. 27:11) Diangana nguria bweso bwena mu sila bo.

6. Bwe tulendi landila mutinu Davide na Balevite? (Nehemi 9:5)

⁶ Bô bazoloko Yehova mbo bazoloko mu kembela nkumbu’andi mu mutima’awu wa mukaka. Mutinu Davide watsoneka ti: ‘Kembela Yehova nge tilundi tiani; mboko biabiansoni bie mu meno biakembela nkumbu’andi ya santu.’ (Mik. 103:1) Davide wabakula ti kembela nkumbu ya Yehova, ni Yehova kwa keri kembelaka. Bu tuwâka nkumbu ya Yehova, mbo tubanzaka ka ntia mpila muntu wena, mbo tubanzaka bifu biandi biabiansoni bia toma na nsalulu zandi za mbote. Davide wazolo mu  bongela nkumbu ya Yehova ntiana tima tia santu na mu kembela yo. Wazolo mu sila bo na ‘biabiansoni’ bieri mu yandi—wuzololo tâ, mu mutima’andi wa mukaka. Mpila mosi mpe, Balevite babonga nzengolo ya kembela Yehova. Na kuluka kwakwansoni bayizi tambula ti misamu miawu ka miaketi’â kembesa nkumbu ya santu ya Yehova ko buna bufwanane. (Tanga Nehemi 9:5.) Ntembe kâni, mukembo wa kuluka mpe wa matieleka wayizi tâ mutima wa Yehova nsayi.

7. Bwe tulendi kembela Yehova mu tisalu tieto tia samuna na mu luzingu lweto?

⁷ Lumbu ti, tulendi tâ Yehova nsayi bu tumuzonzela na luhemo lwalwansoni, bu tusongela ti Yandi tuzololo mpe Yandi tutondaka. Bu tusamunaka kani dieto dia ntete ni mu bakisa bantu bakaka mu pusana kwe Yehova na mu mona ntiana beto ti Tata’eto diena dia luzolo. (Zaki 4:8) Nsayi yibâka neto mu songela kwe bantu ka bwe Bibila dizonzelaka Yehova, luzolo lwandi, buderede bwandi, ndwenga zandi, ngolo zandi, na bifu biandi biakaka bia mbote. Mbo tukembelaka Yehova mpe mbo tumutâka nsayi bu tulandaka tifwani tiandi. (Efz. 5:1) Bu tusila bo, kampe bantu mbo bamona ti ba swaswana twena na nza yi ya mbi, mpe balendi tiyula mu bungu dia nti. (Mat. 5:​14-16) Bu tuzonzaka nawu, tulendi ba têla mu bungu dia nti tuyirikilaka misamu mu mpila eyi peleko eyi. Ndandu zimoneka, bantu bê na bunsungu balendi tambula Nzambi. Bu tukembelaka Yehova mu mplia yo, mbo tutâka mutima’andi nsayi.—1 Tim. 2:​3, 4.

YEZU TUTÂKA NSAYI BU TUKEMBELAKA NKUMBU YA YEHOVA

8. Mu bungu dia nti Yezu kena tifwani tia mbote tia kembela nkumbu ya Yehova?

⁸ Ka kwena muntu ko ku zulu peleko ha mutoto tomono zaba Yehova yôka Mwana’andi. (Mat. 11:27) Yezu Tata’andi dia kazololo, mpe wabonga nzengolo ya kembelaka nkumbu ya Yehova. (Za 14:31) Mu lusambulu lu kasa kwe Tata‘andi ntete lufwa lwandi, wazonzela mu bukufi tima tia mfunu ti kasa mu ntangu yi keri ha mutoto, bu katâ ti: ‘Nkumbu’aku ya nabazabikisi.’ (Za 17:26) Bwe keri zolo tâka?

9. Bwe Yezu kasarila tinsamu timosi mu bangurila bantu misamu mitariri Tata’andi?

⁹ Yezu ka sukisina ko kwa mu têla bantu ti Nzambi nkumbu’andi Yehova. Bayuda ba keri longesaka, nkumbu ya Nzambi ya bazaba. Kâ Yezu wabonga nzengolo ya ba zabikisa Tata’andi. (Za 1:​17, 18) Mu tifwani Matsonoko ma Hebre, mbo masongelaka ti Yehova, Nzambi yilemvokelaka mpe ye na tiari tia mutima yena. (Ndu. 34:​5-7) Yezu watomo songela matieleka mo, bu kazonzela tinsamu tia mwana wawumuka na tata’andi. Bu tutangaka ti tata dio bu kamona mwana’andi wasoba mabanza bu keri mala, ni kadioka ntinu mu kwe mu bwana, wamubumba mpe wamulemvokela mu mutima’andi wawansoni. Mu nzila ya tinsamu tio mbo tutomo monaka tifu tia lemvokela na tiari tia mutima tia Yehova. (Like 15:​11-32) Yezu wabakisa bantu bakaka mu bakula ka ntia mpila timuntu Yehova tie nandi.

10. a) Bwe tuzabiri ti Yezu wasarila nkumbu ya Tata’andi mpe wazolo ti bantu bakaka basila bo? (Marke 5:19) (Tala mpe tifwani.) b) Nti Yezu kazololo tasa lumbu ti?

¹⁰ Ngano Yezu wazolo ti basarila nkumbu ya Tata’andi? Yee. Kampe mfumu za mabundu zakaka zabanza ti kondo kwa buzitu bweri mu sarila nkumbu ya Nzambi, kâ Yezu ka bika ko ti bikulu bio bieri lembo sikamanaka mu Bibila biamukabakasa mu kembela nkumbu ya Tata’andi. Tataluzeleno ntangu yi kawasisa muntu wumosi weri mu lutumu lwa bademo ku tizunga tia Bisi-Gereza. Bantu bayizi bâ mu bunkuta mpe balomba Yezu ti kenda kwandi,  buna ka vutu’â tatamana ko mu bâ ku tizunga tio. (Mak. 5:​16, 17) Kâ, Yezu wazolo ti nkumbu ya Yehova yazabakana ku tizunga tio. Buna, walomba kwe muntu wu kawasisa mu tâ kwe bantu mio mia yirika Yehova, kani kazonzela mio mia yirika Yezu. (Tanga Marke 5:19.) a Lumbu ti mpe musamu ni wo kazololo—tazabikisa nkumbu ya Tata’andi mu nza ya mukaka! (Mat. 24:14; 28:​19, 20) Bu tusilaka bo, mutinu’eto, Yezu tutâka nsayi.

11. Ntia musamu Yezu kalongesa kwe milongoki miandi mu sambirilaka, mpe mu bungu dia nti we mfunu? (Ezekiele 36:23)

¹¹ Yezu wazaba ti kani dia Yehova ni mu sa ti nkumbu’andi yabâ ya santu, na mu tsemesa yo mu bungungu bwabwansoni. Ntiangu Mfumu’eto kalongesa kwe milongoki miandi mu sambilaka ebu: ‘Tata’eto die ku zulu nkumbu’aku yabâ ya santu.’ (Mat. 6:9) Yezu wabakula ti, wo ni musamu wa mfunu wutariri bivangu biabiansoni. (Tanga Ezekiele 36:23.) Ka kwena tivangu ko tie na mayela mu nza tieka sa ti nkumbu ya Yehova yabâ ya santu yôka mpila ya sila Yezu. Kâ mu ntangu Yezu yi bamukanga, mbeni zandi zayizi mu fundisa ti, yandi wasongela kondo kwa buzitu buyôkele kwe Tata’andi. Ntembe kâni, Yezu wabanza ti kondo kwa buzitu, peleko zonzela bubi bwa nkumbu ya santu ya Tata’andi dieri disumu diyôkele ngolo. Watomo kondo tidzunu mu mabanza, mu bungu dia mpila yi bamufundisila, mpe yi bamuzengela mambu mu musamu wo. Kampe musamu wa nguri ni wo wasa ti Yezu kabâ mu mpasi za yôka ntete bamukanga.—Like 22:​41-44.

12. Bwe Yezu kasa mu santukisa nkumbu ya Tata’andi mu mpila yiyôkele?

¹² Ngatu nkumbu ya Tata’andi yabâ ya santu, Yezu wavivirila mpasi zazingi, bifingu mpe na bungungu bu bamukwikisila. Wazaba ti watumamana kwe Tata’andi mu miamiansoni; ka kwabâ musamu ko waketi mu tâ nsoni. (Ebr. 12:2) Wazaba mpe ti Satana weri mu nwanisaka mu ntangu yo ya mpasi. (Like 22:​2-4; 23:​33, 34) Satana wazolo mu bebesa kwikama kwa Yezu; kâ ka yizi’â lenda ko! Yezu wasongela mu mpila yiyôkele ti Satana ngungu yena ya yinene, mpe Yehova bisari bia kwikama bie nandi, bitatamanaka mu bâ ba  kangama ni bu sa ti mu ntangu ya nguria mpasi!

13. Bwe lendi telâ nsayi mutinu’aku wuta yâla?

¹³ Ngano zololo watâ Mutinu’aku nsayi wuta yâla? Tatamana mu kembela nkumbu ya Yehova, bu kwe bakisi bampwana’aku mu zaba Nzambi buna bu kena. Bu sila bo, mbo landa ntambi za Yezu. (1 Pi. 2:21) Diangana ntiana kwa Yezu, mbo saka ti Yehova kabâ mu nsayi, mpe mbo songelaka kwe mbeni’andi, Satana, ngungu yena yilembolo na nsoni!

LUBAKUSU TUHANAKA MU VÛKISA LUZINGU LWA BANTU BU TUKEMBELAKA NKUMBU YA YEHOVA

14-15. Ntia misamu mia mbote milendi tula bu tulongesaka Yehova kwe bantu?

¹⁴ Bu tukembelaka nkumbu ya Yehova, lubakusu tuhanaka mu vûkisa luzingu lwa bantu. Ngano mu tia mpila? Diangana Satana ‘wayabikiri mayela ma bô balembolo na lukwikulu.’ (2 Kor. 4:4) Buna bayizi kwikila bungungu bwa Satana, ntiana: Nzambi kena kô ko, Nzambi mala kena na beto, mpe kena na tiari tia bantu ko, Nzambi mutima ngolo we nandi, mpe bantu bayirikaka mbi kamwisaka mpasi ntangu zazansoni. Satana bungungu bo katâka mu bebesa nkumbu ya Yehova, timuntu tiandi na mu kabakasa bantu mu pusana kwe Yandi. Kâ bu tusamunaka, Satana tukabakasaka mu lembo lungisa kani diandi. Bu tulongesaka bantu matieleka matariri Tata’eto, mbo tukembelaka nkumbu ya santu ya Nzambi’eto. Ntia ndandu zimonekaka?

¹⁵ Matieleka ma Zu dia Nzambi ngolo mena. Bu tulongesaka bantu Yehova ka bwe kena mu matieleka, tulendi mona tima tia nzitukulu. Titenda tia bungungu bwa Satana bu tikwe katuki malembe-malembe, bantu bo mbo bakwizi mwina Tata’eto dia luzolo ntiana bu tumumwinaka. Mbo bakwizi mu tînaka bu bamonaka ngolo zandi zilembolo na ndilu. (Iza. 40:26) Mbo bakwizi bâka na lukwikulu mu Yandi mu bungu dia buderede bwandi bwa lunga. (Lub. 32:4) Misamu miamingi balongokaka mu ndwenga zandi. (Iza. 55:9; Rom. 11:33) Mbo babakaka lutindusu bu balongokaka ti Yandi ni Nkwa luzolo. (1 Za 4:8) Bu bakwe pusane kwe Yehova, tivuvu tiawu tia zinga mankululu ntiana bala bandi mbo titomo  bâka tia matieleka. Diangana nkatika bweso bwa toma bwena bwa bakisa bantu mu pusana kwe Tata’eto! Bu tusilaka bo, Yehova mbo katubongelaka ntiana ‘ndiku zandi za tisalu.’—1 Kor. 3:​5, 9.

16. Bantu bakaka bu balongoka nkumbu ya Nzambi ntia nsobolo zamoneka? Hana bifwani.

¹⁶ Ha mbatukulu, tulendi toko longesa kwa kwe bantu ti Nzambi nkumbu’andi Yehova. Musamu wo wulendi nata nsobolo mu luzingu lwa muntu. Mu tifwani, mukento wumosi wa ntwenia we na nkumbu Aaliyah b bamukurisila mu dibundu dieri lembo sarilaka Bibila. Kâ keri’â yangalalaka dibundu diandi ko, mpe mbo keri monaka ti ka bâ penepene na Nzambi ko. Musamu wo wasoba bu kabatika mu longoka na Mbangi za Yehova. Mpe wabatika mu bongela Nzambi ntiana ndiku’andi. Wayizi yituku bu kalongaka ti nkumbu ya Nzambi bayizi ya katula mu Mabibila mamingi mpe bayingasa yo mu nkumbu za buzitu ntiana Mfumu. Ndongokolo ya nkumbu ya Yehova yanata nsobolo mu luzingu lwandi. Watâ ti: “Nkatika ndiku’ani nkumbu ye nandi!” Ntia ndandu zamoneka? Têle ti: “Tidzunu tiatingi tie nani mu mutima lumbu ti. Diangana mu nsayi ndiena.” Bakala dimosi die na nkumbu Steve musicien yeri yatûka ku mbuka bantu yi batomo landaka tikulu tia Bayuda. Wayizi bâ mala na dibundu mu bungu dia bumbaki bu keri monaka. Kâ, mu ntangu nguri’andi yi kafwa, watambula mu landa ndongokolo ya Bibila yeri twarisaka Mbangi mosi ya Yehova. Wayizi tomo yituku ku mutima bu kalongoka nkumbu ya Nzambi. Têle ti: “Kani kabwe ka nalongoka nkumbu ya Nzambi ko.” Vutulu yika: “Mu mbala’ani ya ntete, nayizi bakula ti Nzambi wa matieleka wena. Namona ti ndiku nabaka.”

17. Mu bungu dia nti bongele nzengolo ya tatamana mu kembela nkumbu ya Yehova? (Tala mpe tifwani.)

¹⁷ Mu tisalu tiaku tia samuna na tia longesa, ngano mbo zonzelaka nkumbu ya santu ya Yehova na bantu? Ngano mbo ba bakisaka mu mona Nzambi ka ntia mpila muntu wena? Bu sila bo, mbo kembela nkumbu ya Nzambi. Bika watatamana mu kembela nkumbu ya Yehova bu kwe bakisi bantu mu zaba muntu wuvwiri yo. Mu mpila yo, mbo vûkisa luzingu lwa bantu. Mbo landa tifwani tia Mutinu’aku, Yezu Kristo. Wuyôkele mfunu, mbo tâ Yehova nsayi we Tata’aku dia luzolo. Bika ‘wakembela nkumbu’andi ntangu zazansoni mpe!’—Mik. 145:2.