MU TILUMBU tia mercredi 18 janvier 2023, nsangu za nzitukulu zayizi moneka mu jw.org, zeri tâka ti bayizi noma mpangi Gage Fleegle na mpangi Jeffrey Winder mu bâ mu Timvuka titwarisaka tia Mbangi za Yehova. Mpangi zo za zole ntangu yayingi beka sala na kwikama kwakwansoni mu tisalu tia Yehova.

Mpangi Fleegle ku weste ya Pennsylvanie, ku États-Unis bamukurisila mu matieleka kwe bibuti biandi. Bu keri ntwenia, kanda diandi diayenda ku mwa hata dimosi dieri na nsatu bisamuni. Ntangu fioti ha manima, wayizi batusu mu tilumbu tia 20 novembre 1988.

Bibuti bia mpangi Fleegle, ntangu zazansoni mbo beri mu tindisaka mu sala tisalu tia ntangu zazansoni. Mbo beri vulu bwanaka minkengi mia bizunga na Babetelite ku nzo’awu, mpe mpangi Fleegle mbo keri monaka nsayi yeri na mpangi zo za zikento na za zibakala. Ntangu fioti ha manima ma bateme’andi, wayizi bâ mupasuri-nzila wa ntangu zazansoni—mu tilumbu tia 1^er septembre 1989. Mvula zole zayôka, wayizi lungisa kani dieri nandi tûka bu keri na mvula 12—kani dia sala ku Betele. Wabatika tisalu tia ku Betele ku Brooklyn mu octobre 1991.

Ku Betele, mpangi Fleegle wasala mvula 8 ku bayirikilaka mabuku, ha manima bayizi mu tûla ku département pour le service. Mu ntangu yo, wayizi sala mwa mivu mu timvuka tia Russe. Mu 2006 wayizi kwela mukento’andi, Nadia, wayizi bâ nandi tintwari mu tisalu tiandi ku Betele. Tintwari bayizi sala ku teritware ya Portugais, mpe bayôkesa mvula 10 zike mu teritware ya Espagnol. Bu kamana sa mvula zazingi ku département pour le service, mpangi Fleegle bamutambika ku biro ya Komite ya ndongosolo, mpe ha manima ku biro ya Komite ya tisalu. Mu mars 2022, bayizi mu noma tibakisi mu Komite ya tisalu ya Timvuka titwarisaka.

 Mpangi Winder ku Murrieta kakurila, ku Californie, ku États-Unis. Bibuti biandi mu matieleka bamukurisila, mpe wabatusu mu tilumbu tia 29 mars 1986. Ngonda yalanda, wabonga nzengolo ya bâ mupasuri-nzila wa ntangu fioti. Tisalu tio tia katomo zolo, mpe wazolo mu tatamana. Ha manima ma ngonda zazingi mu tisalu tio, wayizi bâ mupasuri-nzila wa ntangu zazansoni mu tilumbu tia 1^er octobre 1986.

Bu keri ntwenia, mpangi Winder waye tala bayaya bandi bole ba babakala beri salaka ku Betele mu ntangu yîna. Tala kô kwavumbula nsatu’andi ya fulusa formilere ya tisalu ku Betele bu kayizi bâ na mvula za fwanana. Mpe mu mai 1990, bamutikisa mu sala ku Betele ya Wallkill.

Ku Betele, mpangi Winder wasala mu departema zazingi, ntiana departema ya nettoyage, ku la ferme, na ku Biro ya Betele. Wakwela mukento’andi, Angela, mu 1997, mpe ba bole ku Betele basalaka tûka ntama. Mu 2014 babatambika ku Warwick, mpe kûna mpangi Winder wabakisa mu ntungulu ya siège mondial. Mu 2016 bayenda ku Nzo ya ndongokolo ya Watchtower ku Patterson, mpe kûna mpangi Winder wasala bisalu bia Audio/Video. Ha manima ma mvula ziyà, bavutu kâla ku Warwick, mpe mpangi Winder bamutambika mu sala mu biro ya Komite ya bisari. Mu mars 2022 bayizi mu noma tibakisi tia Komite ya bisari ya Timvuka titwarisaka.

Mbo tuta sambila Yehova katomo sakumuna bantu bo ba nkabila bu bata tatamana mu sala tisalu tia ngolo mu bungu dia Timfumu tia Nzambi.—Efz. 4:8.