1. Mu bungu dia nti twe na nsatu lutwalusu lwa Yehova? Hana tifwani

 BANZA’ETI zimbakane ku sangi. Luzingu lwaku lulendi bâ mu mpasi mu bungu dia: bibulu bia miangu, insectes zitâka bimbevo, na miti mie na poison, lendi bwa mpe mu bulu. Diangana mbo tomo tonda tala ti bêle na muntu wutomono zaba mbuka mu ku twarisa, mpe zebi kabwe lulendi diokela misamu mitûla luzingu lwaku mu mpasi! Nza yi yena ntiana sangi dio. Ya fuluka yena mu misamu milendi bebesa timpeve tieto. Kâ ntwarisi ya lunga ye neto —Yehova. Mbo katukengerelaka mu misamu mia mbi, mpe mbo katutwarisaka mu nzila yinataka ku luzingu lwa mankululu mu nza ya môna.

2. Bwe Yehova katutwarisilaka?

² Ngano bwe Yehova katutwarisilaka? Ntete-ntete, mu nzila ya Zu diandi, Biblia. Kâ, mbo kasarilaka mpe bantu. Mu tifwani, mbo kasarilaka “ngamba ya kwikama na ya ndwenga” mu hana bidia bia timpeve bitubakisaka mu bonga nzengolo za mbote. (Mat. 24:​45, NWT) Yehova mbo kasarilaka mpe bantu bakaka mu tu twarisa. Mu tifwani, minkengi mia bizunga na bakuluntu mu bimvuka bahanaka lutindusu na ntumunu zilendi tu bakisa mu yôkesa ntangu za mpasi. Diangana mbo tutomo tondaka mu malongi mo mu bilumbu bi bia mansukina bia mpasi! Mbo matubakisaka mu tatamana mu bâ ndiku za Yehova ngatu tabaka ndandu mu luzingu lwa lumbu ti na lwa ntangu zazansoni.

3. Nti tuzonzela mu timoko?

³ Ni bu sa ti ni bo, ntangu zakaka wulendi bâ musamu wa mpasi mu landa malongi ma Yehova, nsungula mu ntangu bantu ba masumu yi bahanaka mo. Mu bungu dia nti? Mu bungu  ti tulendi lembo zolo misamu mi batutêlaka. Peleko tulendi banza ti lutwalusu lu tubakaka ka lwena lwa ndwenga ko, mpe tulendi tâ ti malongi ka matûkiri’â kwe Yehova ko. Mu ntangu yo, tufweti bâ na lukwikulu ti Yehova ni Yandi twarisaka kanda diandi, mpe bu tulandaka malongi mandi tusakumunu kwa tubakaka. Mu tu bakisa mu yika lukwikulu lweto ngolo, timoko ti mbo tizonzela 1) bwe Yehova katwarisila kanda diandi mu ntangu ya Bibila, 2) bwe katutwarisilaka lumbu ti, mpe 3) ntia ndandu tubakaka bu tutatamanaka mu landa malongi mandi.

BWE YEHOVA KATWARISILA KANDA DIA ISRAELE

4-5. Bwe Yehova kasongela ti Mose keri sarilaka mu twarisa Israele? (Tala tifwani.)

⁴ Yehova wanoma Mose mu dukisa kanda dia Israele ku Ezipte. Mpe wahana bidimbu bieri songelaka ti mu nzila ya Mose keri batwarisilaka. Mu tifwani, wasarila tuti mu mwini na mulaku wa tiya mu mpimpa. (Ndu. 13:21) Mose walanda bima bio bieri ba twarisaka, yandi na bala ba Israele tii ku Mubu wa Mbwaki. Kâ bantu bayizi bâ mu bunkuta bu babanza ti mu mutambu beri bu babâ ha kati dia mukangu wa binwani wa Ezipte na Mubu wa Mbwaki. Babanza ti Mose wahunakana bu kabanata ku Mubu wa Mbwaki. Kâ ka hunakana ko. Yehova wawaya bo mu twarisa kanda dandi mu nzila ya Mose. (Ndu. 14:2) Ha manima Nzambi wabavûkisa mu mpila ya nzitukulu.—Ndu. 14:​26-28.

⁵ Mu mvula 40 zalanda, Mose watatamana mu kwikila ti Yehova weri sarilaka tuti mu twarisa kanda diandi ku sese. a Mpe tûka mwa ntangu, Yehova wayizi tûla tuti dio ha zulu tivula tia Mose, yeri mbuka bala ba Israele yi beri dia mwinaka. (Ndu. 33:​7, 9, 10) Tûka tuti Yehova wazonza kwe Mose, mpe yandi ha manima wahana ntumunu kwe kanda dia Nzambi. (Mik. 99:7) Bala ba Israele bidimbu biabingi bieri nawu bieri songelaka ti Yehova Mose keri sarilaka mu ba twarisa.

6. Bala ba Israele bwe beri bongelaka lutwalusu lwa Yehova? (Lutangu 14:​2, 10, 11)

⁶ Musamu wa tiari, bala ba Israele babingi bayizi losa bidimbu bieri songelaka ti Mose mu nkumbu ya Yehova keri zonzelaka. (Tanga Lutangu 14:​2, 10, 11.) Mbala zazingi, bayizi kala ti Yehova Mose keri sarilaka mu ba twarisa. Mu bungu dia musamu wo, Yehova ka bahana nzila ko ya kota ku Mutoto wa kani.—Lut. 14:30.

7. Tangumuna bifwani bia bantu balanda lutwalusu lwa Yehova. (Lutangu 14:24) (Tala mpe tifwani.)

⁷ Kâ, bala ba Israele bakaka balanda malongi ma Yehova. Mu tifwani, Yehova watâ: ‘Kalebe [. . .] Wakundendi yandi ka kakane.’ (Tanga Lutangu 14:24.) Nzambi wasenda Kalebe, bu kamuhana bweso bwa sola mbuka yi kazolo yandi beni ku Mutoto wa kani. (Yos. 14:​12-14) Mbandu yalanda ya bala ba Israele yahana mpe tifwani tia mbote bu balanda lutwalusu lwa Yehova. Yoswa bu kayingasa Mose mu bâ mfumu ya bala ba Israele, batomo mu zitisa bilumbu biabiansoni bia luzingu lwandi. (Yos. 4:14) Ndandu yamoneka, Yehova wabasakumuna bu kabakotesa ku nsi yi kabakanisina.—Yos. 21:​43, 44.

8. Bangula ka bwe Yehova katwarisila kanda diandi mu ntangu ya mitinu. (Tala mpe tifwani.)

⁸ Ha manima ma mivu, Yehova wasarila bamfundisi mu twarisa kanda diandi. Mu ntangu ya mitinu, Yehova wanoma bambikuri mu twarisa kanda diandi. Mitinu mia kwikama mialanda malongi ma bambikuri. Mu tifwani,  mutinu Davide na kuluka kwakwansoni watambula nsembolo ya mbikuri Natane. (2 Sam. 12:​7, 13; 1 Nta. 17:​3, 4) Mutinu Yehozafate walanda lutwalusu lwa mbikuri Yahaziele, mpe watindisa kanda dia Yuda mu tûla timinu tiawu mu mbikuri za Nzambi. (2 Nta. 20:​14, 15, 20) Mu ntangu ya mpasi, mutinu Ezekiase walomba lubakusu kwe mbikuri Izaya. (Iza. 37:​1-6) Ntangu zazansoni mitinu yi mieri landaka malongi ma Yehova, lusakumunu beri bakaka mpe kanda dia keri kengerelaka. (2 Nta. 20:​29, 30; 32:22) Diangana babansoni mbo baketi bakula ti Yehova mbikuri zo keri sarilaka mu twarisa kanda diandi. Kâ, mitinu miamingi na kanda dia Israele ka bayizi’â wirikila mbikuri za Yehova ko.—Yer. 35:​12-15.

BWE YEHOVA KATWARISILA BAKRISTO BA NTETE

9. Nani Yehova kasarila mutwarisa Bakristo ba ntete? (Tala mpe tifwani.)

⁹ Mu mbandu ya ntete ya M.B., Yehova watûla timvuka tia Bakristo. Ngano bwe katwarisila Bakristo ba ntete? Wanoma Yezu mfumu ya timvuka. (Efz. 5:23) Kâ Yezu ka yandi beni’â ko weri twarisaka muna mulongoki. Wasarila bantumwa na bakuluntu beri ku Yerusaleme mu twarisa. (Bis. 15:​1, 2) Buna, Bayizi noma bakuluntu mu twarisa bimvuka.—1 Tes. 5:12; Tite 1:5.

10. a) Bakristo babingi ba mu mbandu ya ntete bwe babongela malongi ma babaka? (Bisalu 15:​30, 31) b) Mu bungu dia nti mu ntangu ya Bibila bantu bakaka balembo tambula ntwarisi Yehova zi keri sarilaka mu ba twarisa? (Tala kaku “Mu bungu dia nti bantu bakaka bakarila bidimbu bieri monekaka.”)

¹⁰ Bakristo ba mu mbandu ya ntete bwe babongela lutwalusu lo? Babîngi ha kati diawu nsayi yeri nawu mu landa ntumunu zi beri bakaka. Buna, ‘nsayi yababaka bu babatindisa’ mu lutwalusu lu babaka. (Tanga Bisalu 15:​30, 31.) Kâ, bwe Yehova katwarisilaka kanda diandi mu ntangu yi ya beto?

BWE YEHOVA KATUTWARISILAKA LUMBU TI

11. Hana tifwani tita songela bwe Yehova keri twarisilaka bantu beri ku matu mu timvuka mu ntangu ya beto.

¹¹ Yehova mbo katatamanaka mu twarisa kanda diandi lumbu ti. Wasila bo mu nzila ya Zu diandi na ya Mwana’andi, mfumu ya timvuka. Ngano tulendi mona bidimbu bisongelaka ti Nzambi watatamana mpe mu sarila bantu mu ntangu ya beto? Yee. Mu tifwani, tabanzeno’eti  mu misamu miayôka ha manima ma muvu wa 1870. Charles Taze Russell na ndiku zandi bayizi bakula ti muvu wa 1914 mbo waketi bâ muvu wa mfunu mu bungu ti mbo waketi nata misamu mia nzitukulu mu ntangu yi baketi tûla Timfumu tia Nzambi. (Dan. 4:​25, 26) Mu bâ na mabanza mo bayizi sikamana mu mbikululu za Bibila. Ngano Yehova weri twarisaka recherches zi beri saka mu Bibila? Yee. Mu 1914, misamu miayôka mu nza miasongela ti Timfumu tia Nzambi tiabatika mu yâla. Muzingu wa ntete wa wunene mu nza wabatika, ha manima kwayizi bâ bimbevo, midikutulu mia mutoto, na nsatu. (Like 21:​10, 11) Yehova mbo keri sarilaka Bakristo bo ba nsungu mu bakisa kanda diandi.

12-13. Ntia misamu bakubika mu ntangu ya muzingu wa nzole wa wunene mu nza mu kurisa tisalu tia samuna na tia longesa?

¹² Tataluzuleno misamu miayôka mu ntangu ya muzingu wa nzole wa wunene wa nza. Ha manima ma ndongokolo ya Nzabukusu 17:​8, mpangi zeri twarisaka ku siège mondial bayizi bakula ti muzingu wo ka waketi’â nata ku Armagedo ko, kâ ntangu yeri ya tidzunu yaketi zibula nzila ya tisalu tia tinene tia samuna. Ni bu sa ti musamu wo wamoneka ntiana’eti ka weri’â wa delakana ko, mpangi zeri twarisaka zabonga nzengelo ya batika Lukolo lwa Galade mu kubika bamisionere mu samuna na mu longesa mu nsi zazansoni za nza. Batambika bamisionere ni bu sa ti ntangu ya muzingu yeri. Musamu wakaka, ngamba ya kwikama yabatika Cours pour le ministère théocratique b mu bimvuka biabiansoni mu bakisa bantu mu bâ bisamuni na milongi mia mbote. Mu mpila yo, kanda dia Nzambi dia kubama dieri mu sala tisalu tia samuna.

¹³ Lumbu ti, tulendi tomo mona ti Yehova kanda diandi kata twarisa mu ntangu yi ya mpasi. Tûka muzingu wa nzole wa wunene mu nza, kanda dia Yehova mu nsi zazingi mu mwa tidzunu diena na timpwanza tia sala tisalu tia samuna. Diangana, tisalu tiayizi buta mbutu.

14. Mu bungu dia nti tulendi bêla na lukwikulu mu lutwalusu lutûkaka kwe organizasio ya Yehova na kwe bakuluntu? (Nzabukusu 2:1) (Tala mpe tifwani.)

 ¹⁴ Lumbu ti mpangi ze mu Timvuka titwarisaka mbo zitatamanaka mu dinga lutwalusu lwa Kristo. Bazololo ti lutwalusu lu bahanaka lwatûkaka kwe Nzambi. Mpe mbo basarilaka minkengi mia bizunga, bakuluntu mu hana lutwalusu mu bimvuka. c Bakuluntu ba tumbu ha koko kwa lubakala lwa Kristo bena. (Tanga Nzabukusu 2:1.) Wa matieleka, bakuluntu bo bantu ba masumu bena batâka makuba. Ntangu zakaka Mose na Yoswa bahunakana, bantumwa mpe. (Lut. 20:12; Yos. 9:​14, 15; Rom. 3:23) Kâ, Kristo mbo katomo twarisaka ngamba ya kwikama na bakuluntu buna bufwanane, mpe mbo katatamana mu sila bo ‘bilumbu biabiansoni tii ku nsuka ya nza.’ (Mat. 28:20) Buna, misamu miamingi misaka ti tabâ na lukwikulu mu malongi ma tu hanaka Yehova mu nzila ya bantu ba kanoma mu tu twarisa.

NDANDU ZI TUBAKAKA BU TUTATAMANAKA MU LANDA LUTWALUSU LWA YEHOVA

15-16. Nti ta longoka mu bifwani bia bantu balanda lutwalusu lwa Yehova?

¹⁵ Bu tutatamanaka mu landa lutwalusu lwa Yehova, ndandu tubakaka tûka lumbu ti. Mu tifwani, Andy na Robyn balanda malongi ma ngamba ya kwikama bu bayizi nata luzingu lulembolo nkaka. (Tala note ya ndongokolo ya Matie 6:22.) Ha manima, bayizi hana lubakusu mu tisala tia ntungulu ya Nzo za Nsambululu na nzo zakaka za Mbangi za Yehova. Robyn têle: “Ntangu zakaka mu nzo za fioti tweri bêlaka zalembo bâ na mbuka ya lambila (cuisine.) Mpe nayizi teka bima biabingi bi ndieri sarilaka mu baka foto, tisalu tia ndieri zoloko. Musamu wo wakundirisa. Kâ ntiana Sara, mukento wa Abrahame, nabonga nzengolo ya tatamana mu tala ku matu, kani na tala ku manima.” (Ebr. 11:15) Ngano Andy na Robyn ntia ndandu babaka? Robyn têle: “Nsayi yayingi ye neto mu zaba ti mbo tuhanaka biabiansoni bie neto kwe Yehova. Bu tusalaka tisalu tia Yehova, mbo tumonaka mpila yi bêla luzingu mu nza ya môna.” Andy singase musamu wo, têle ti: “Nsayi yayingi ye neto mu tomo tihana mu yika moko mu tisalu tia Yehova.”

¹⁶ Ntia ndandu zakaka tubakaka tala ti tutatamane mu landa lutwalusu lwa Yehova? Bu kamana baka Bac, Marcia wazolo mu landa malongi ma kabaka mu bâ mupasuri-nzila. (Mat. 6:33; Rom. 12:11) Têle ti: “Bayizi kungana bourse ya mvula 4 ku universite. Kâ nazolo mu lungisa makani mani. Buna, kani natambula  nayizi sola mu longoka tisalu tiaketi kumbakisa mu baka mbongo za fwanana mu bâ mupasuri-nzila. Yo yena nzengolo mosi yiyôkele bubote mu nzengolo zi nabonga. Lumbu ti nsayi ye nani mu bâ mupasuri-nzila, mpe ntangu yi niyôkesaka ku tisalu mbo yikunganaka nzila mu kwe hana lubakusu ku Betele, na mu sala bisalu biakaka bia mbote mu bungu dia Yehova.”

17. Ntia tusakumunu twakaka tubakaka bu tulandaka lutwalusu lwa Yehova? (Izaya 48:​17, 18)

¹⁷ Ntangu zakaka, mbo tubakaka malongi matukengerelaka mu bima ntiana bimvwama na mu misamu miakaka milendi sa ti talembo zitisa misiku mia Nzambi. Diangana, musamu wa mbote wena mu landa lutwalusu lwa Nzambi. Mbo tutatamana mu bâ na ngindu ya mbote, mpe ka tukota mu mpasi za mpamba ko. (1 Tim. 6:​9, 10) Buna, tulendi sarila Yehova mu mutima’eto wa mukaka. Mpe ka kwena tima ko tilendi tu hana nsayi yiyôkele.—Tanga Izaya 48:​17, 18.

18. Mu bungu dia nti bongele nzengolo ya tatamana mu landa lutwalusu lwa Yehova?

¹⁸ Ntembe kâni Yehova mbo katatamana mu sarila bantu mu tu twarisa mu ntangu ya mpasi ziyôkele tii mu ntangu ya luyâlu lwa mvula 1000. (Mik. 45:16) Ngano mbo tutatamana mu landa lutwalusu lo, ni bu sa ti wufwanane mu tûla bio bi tuzololo ha ndeko? Mbo wubâ musamu wa fioti mu sila bo, tala ti lutwalusu lwa Yehova tulandaka lumbu ti. Buna, ntangu zazansoni talanda lutwalusu lwa Yehova, ni bu sa ti lo lu hanaka bantu bakasarilaka mu tu kengerela. (Iza. 32:​1, 2; Ebr. 13:17) Tulendi landa ntwarisi’eto Yehova na lukwikulu lwalwansoni, mu bungu ti mbo katukengerelaka mu mio milendi bebesa tindiku tieto na Yandi, mpe mbo katutwarisaka ku luzingu lwa mankululu.