Milongoki mia Bibila miafweti bâ na butindi ngatu basala tisalu tiawu tia samuna. Bafweti samuna “nsangu za mbote” kwe bantu ba kuluka, kâ mpe bafweti samuna “muvu wa mbote” kwe bankwa-mbi.

Mpangi John Henry Hoskin, weri bêlaka ku Canada, ntono nkwamusu, wasamuna na butindi bwabwansoni. Mu printemps ya muvu wa 1921, wabwabana na pastere yimosi. Mpangi Hoskin wabatika timoko tiandi ebu: “Tufweti zonzelaka Matsonoko na nsayi yayansoni, mpe ni bu sa ti ka tuwisanaka ko mu misamu miakaka, tulendi sa nsuka mu timoko tieto mu tidzunu tiatiansoni, mpe tulendi tatamana mu bâ bandiku.” Kâ, misamu ka miayôkela bo ko. Mpangi Hoskin watâ ti: “Minite fioti kwa tayôkesa mu zonza mu ntangu [pastere] yo yabotasa porte mu ngolo, mpe yi nabanza ti titâri tia porte tiabwa ha mutoto.”

Pastere yo wakawula ti: “Mu bungu dia nti talembo kwenda kwe bapaye mu kwe banzonzela?” Mpangi Hoskin ka hana na kani mvutu ko, kâ bu kayenda, ku nsi’a mutima watâ ti: ‘Nita banza ti na paye mbele zonzaka!’

Pastere yo bu kaye longa mu eglize’andi mu tilumbu tialanda, watatamana mu zonzela bubi bwa mpangi Hoskin. Mpangi Hoskin watâ ti: “Walwengesa bimeme biandi mu sa keba na meno, watêla bantu ti meno ngungu ya yinene yeri yalembo toko bâ ku hata di, mpe wafwanakana ti bakungonda.” Kâ, misamu mio ka miasa ko ti kabika, mpe watatamana mu samuna na mu zonza na bantu babingi. Watâ ti: “Nsayi’ani mu tisalu tia samuna yayizi tomo kula. Bantu bakaka bayizi tâ ti: ‘Nzebi ti nge muntu wusarilaka Nzambi wena!’ mpe mbo beri kundiyulaka tala ti balendi kungana bima bieri nani nsatu.”

Mu bakisa bantu beri tambulaka matieleka mu sa nsobolo, Milongoki mia Bibila miadukisa programe ya ndongokolo ya Bibila mu L’Âge d’Or. * Mu programe ya ndongokolo ya Bibila ya bantwenia mweri na biyuvu bia fweti taluzula bibuti na bala bawu. Bibuti biafweti “yula biyuvu bio kwe bala bawu, mpe bafweti ba bakisa mu baka mvutu mu Bibila.” Biyuvu ntiana, “Mabuku makwa me mu Bibila?,” mbo bieri zonzelaka misamu mia fioti-fioti mia Bibila. Biyuvu biakaka ntiana, “Ngano muna Mukristo wa matieleka wufweti kêla ti  bamukwamisa?,” mbo bieri kubikaka bantwenia mu samuna na butindi.

Programe ya buku dia Divin plan des âges yeri na biyuvu bieri tarilaka milongoki mieri na luzabu lwalwingi lwa Bibila, biyuvu biango mbo bieri sikamanaka mu volume ya ntete ya buku dia Études des Écritures. Bitangi bialongoka misamu miamingi mu biyuvu bio, kâ mukanda wa L’Âge d’Or wa 21 décembre 1921, watâ ti mabuku mo ma mole ka bavutu’â madukisa ko. Mu bungu dia nti basila nsobolo yo mu ta-pulukusu?

Mpangi zeri twarisaka zayizi bakula ti milongoki mia Bibila mifweti longokaka mutu-diambu wumosi-wumosi mu misamu mitariri matieleka. Ntiangu buku die na mutu-diambu La Harpe de Dieu diaduka mu novembre 1921. Bantu beri tambulaka buku dio, mbo beri ba hanaka titini ti baketi longoka mu bawu beni. Ndongokolo yi beri saka bawu beni mbo yeri ba bakisaka mu bakula kani dia Nzambi dia hana luzingu lwa mankululu kwe bantu. Ngano bwe beri sarilaka buku dio?

Muntu bu weri tambulaka buku dio, mbo keri bakaka mwa karte yeri mu songelaka ka ntia titini tia buku dio katanga. Lumingu lweri landaka, mbo keri bakaka karte yeri na biyuvu bitariri titini ti katengi. Mpe ku nsuka ya karte mweri na titini tia fweti tanga muntu wo lumingu lulanda.

Mulongoki mbo weri bakaka karte ya môna yeri tûkaka ku timvuka tieri penepene tumingu twatwansoni, tii bu fwana tumingu 12. Vula-vula, mpangi za nuna peleko mpangi za lembo bâ na lenda dia samuna mu nzo na nzo zeri tambikaka mikanda mio. Mu tifwani, Anna K. Gardner, weri bâka ku hata dia Millvale, ku Pennsylvanie, États-Unis, têle ti: “Bu badukisa La Harpe de Dieu, mpangi’ani ya yikento Thayle, weri na tifuma wayizi sala tisalu tiatingi ti keri na tio lenda, tumingu twatwansoni mbo keri tambikaka karte zeri na biyuvu.” Ndongokolo bu yeri waka, mbo kweri bâka muntu mu timvuka weri kwe talaka mulongoki mu mu bakisa mu longoka misamu miakaka mitariri Bibila.

Ku nsuka ya muvu, mpangi J.F. Rutherford watambika mukanda kwe bimvuka biabiansoni. Watsoneka ti: “Tisalu tia samuna tisalamane mu muvu wu tiatingi tibele yôka tio ti basala mu mivu miamiansoni miayôkele mu ntangu ya tisalu tia tia mbutu.” Ha manima, wavutu tâ ti: “Tisalu tiatingi tisîri mu sala. Tindiseno bantu bakaka mu kwizi sala tisalu ti tia toma.” Diangana Milongoki mia Bibila miasarila malongi mo. Mu 1922 bayizi samuna Timfumu tia Nzambi na butindi bwabwansoni, yôka mu ntama.