1. Mu bungu dia nti bantu babîngi babêlaka na mabanza yeko-yeko?

LUMBU ti mabundu mamingi matâka ti Bakristo bena, mpe Nzambi basambilaka mu mpila yi kazololo. Ntiangu bantu babîngi babâka na mabanza yeko-yeko! Mbo bayulaka: “Ngano dibundu dimosi kwa die kô dia matieleka peleko mabundu mamansoni Nzambi ma katambulaka?” Ngano lukwikulu lwe neto ti bu twena Mbangi za Yehova, matieleka tulongesaka, mpe mpila yi tusambirilaka Yehova ni yo kwa yimutâka nsayi? Ngano tulendi baka mvutu za matieleka mu biyuvu bio? Tataleno bidimbu bilendi tu bakisa.

2. Tintwari na 1 Bisi-Tesalonike 1:5, mu bungu dia nti ntumwa Paulo kabêla na lukwikulu mu matieleka?

² Ntumwa Paulo lukwikulu lwalwingi lweri nandi mu matieleka. (Tanga 1 Bisi-Tesalonike 1:5.) Ka nsayi ya mpamba ko kwa yeri mu tumaka mu bâ na lukwikulu lwa mpila yo. Kâ Paulo mbo keri longokaka Zu dia Nzambi na bunsungu bwabwansoni. Lukwikulu lweri nandi ti Matsonoko ‘mamansoni kwe Nzambi matûka.’ (2 Tim. 3:16) Ngano ndongokolo’andi nti yamunatina? Mu Matsonoko, Paulo wabaka tidimbu ti balendi lembo sila ntembe ti Yezu ni Masiya. Kâ tidimbu tio, mfumu za mabundu za Bayuda tia beri kalaka. Mbo beri tâka ti matieleka ma Nzambi beri longesaka kwe bantu, kâ misamu mi yinaka Nzambi beri yirikaka. (Tite 1:16) Ka bonga nzengolo ko ya solaka misamu mi kakwikila mu Zu dia Nzambi. Wa kubama weri mu longesa na mu sarila malongi mamansoni ma Nzambi.​—Bis. 20:27.

3. Mu bâ na lukwikulu lwa ngolo, ngano wufwanakane tabaka mvutu mu biyuvu biabiansoni? (Tala mpe kaku tie na mutu-diambu “ Bisalu bia Yehova na mabanza mandi​—‘biabingi biena mu zonzela bio.’”)

³ Bantu bakaka mbo babanzaka ti dibundu dia matieleka difweti  hanina mvutu mu biyuvu biabiansoni, ni bu bibâ biyuvu bilembo zonzelaka Bibila. Ngano mabanza ma delakana mabâka nawu? Tataluzuleno tifwani tia Paulo. Watindisa mpangi zandi mu ‘sungamana miamiakulu,’ kâ watâ mpe ti misamu miamingi mieri kô mi keri lembo bakulaka. (1 Tes. 5:21) Watâ ti: ‘Mi tuzebi mia ndambu kwa [miena],’ mpe wavutu tâ ti: ‘Ntiana mu titâri tia tisengo kwa tuta mia mwina.’ (1 Kor. 13:9, 12) Paulo keri’â bakulaka misamu miamiansoni ko; beto mpe ni bo kwa. Kâ Paulo mbo keri bakulaka matieleka ma nguri matariri Yehova. Misamu miamingi kazaba mu bâ na lukwikulu ti matieleka meri nandi!

4. Bwe tulendi yikila lukwikulu lweto ngolo ti matieleka tabaka, mpe ntia misamu tutaluzula mitariri Bakristo ba matieleka?

⁴ Tulendi yika lukwikulu lweto ngolo ti matieleka me neto bu tufwanakasa mpila Yezu yi keri silaka nsambululu na mpila yi silaka Mbangi za Yehova nsambululu lumbu ti. Mu timoko ti, mbo tumona ti Bakristo ba matieleka 1) ka basambilaka biteki ko, 2) nkumbu ya Yehova bazitisaka, 3) matieleka bazololo, mpe 4) luzolo lwe nawu bawu na bawu.

5. Nti tuta longoka mu mpila ya sambila Nzambi mu tifwani tia Yezu, mpe bwe tulendi sarila ndongosolo’andi?

⁵ Mu bungu ti Yezu Yehova keri zoloko, ni Yandi kwa keri sarilaka bu keri ku mazulu na bu keri ha mutoto. (Like 4:8) Walongesa milongoki miandi mu sila bo. Ni wubâ Yezu ni mibâ milongoki miandi mia kwikama, na kani muntu ka weri’â sarilaka biteki ko mu nsambululu. Mu bungu ti Nzambi ka monekaka ko, ka kwena muntu ko wulendi yirika tima timufwanakana! (Iza. 46:5) Ngano tufweti sambilaka foto za bantu ba batâka basantu? Mu  ntumunu ya nzole mu ntumunu za 10, Yehova watâ ti: “Kufweti’â watisarisa titeki ko peleko tifwani tia tima ni tima tie ku zulu ku mazulu peleko tie ku nsi ha mutoto [. . .] Kufweti’â wafukamana bio ko.” (Ndu. 20:4, 5) Misamu mio misongele ti, bô bazololo mu yangirika Nzambi ka bafweti’â basambilaka biteki ko.

6. Ngano Mbangi za Yehova ntia tifwani balandaka lumbu ti?

⁶ Bantu balongokaka misamu mia ntama mbo batâka ti mu ntangu ya bantumwa, Bakristo Nzambi kwa beri sambilaka. Mu tifwani, buku dimosi dizonzelaka misamu mia ntama ditâka ti Bakristo bo mbo beri yinaka mabanza ma sarila biteki mu mbuka zi beri silaka nsambululu. Lumbu ti, Mbangi za Yehova tifwani tia Bakristo ba ntete balandaka. Ka tusambilaka bambazi ko peleko foto za “basantu”; ni bu wubâ Yezu, ka tumusambilaka ko. Ka tutelamaka ha matu ma drapo ko mu tanga hymne national peleko mu sa tima tihana nsambululu kwe guvernema. Mu misamu ni misamu mi batutuma mu sa, nzengolo tubongele ya tatamana mu tumamana misamu mia tâ Yezu: ‘Ni Yehova Nzambi’aku kwa fweti kunda [sambila].’​—Mat. 4:10.

7. Ntia luswaswanu lwe ha kati dia Mbangi za Yehova na mabundu makaka?

⁷ Lumbu ti, bantu babingi bazololo mu wirikilaka mfumu za mabundu ze za zabakana. Mu bungu ti mfumu zo za bazololo, mbo batulaka ha titini tia bahana nsambululu. Bantu babingi bakwendaka ku eglize zawu, basumbaka mabuku mawu mpe bahanaka mbongo zazingi mu ba yika moko na mu yika bimvuka biawu moko. Bantu bakaka mbo bakwikilaka misamu miamiansoni mi tâka mfumu zo za mabundu. Tulendi tâ ti, bu bamonaka mfumu zo za mabundu mbo babâka mu nsayi ntiana bawu kwa bamweni Yezu! Kâ bô basambilaka Yehova ka balandaka bantu ko. Ni bu sa ti mbo tuzitisaka ntwarisi zeto, mbo tulandaka ndongosolo ya Yezu yitâka ti: ‘Beno bansoni bampangi lwena.’ (Mat. 23:8-10) Ka tuhanaka nsambululu kwe muntu ko, ni bu babâ mfumu za mabundu peleko mfumu za politike. Mpe ka tusingasaka makani mawu ko. Kâ, mbo tutatamanaka mu lembo kota misamu mia politike na mu bâ ba hambana na nza. Mu misamu mio, mbo tusongelaka ti ba swaswana twena na mabundu matâka ti Bakristo bena.​—Za 18:36.

8. Bwe tuzabiri ti Yehova zololo ti takembesa nkumbu’andi mpe yatomo zabakana kwe bantu babansoni?

⁸ Lumbu timosi, Yezu wasambila ebu: ‘Tata, kembesa nkumbu’aku!’ Yehova, Yandi beni, wahana mvutu mu lusambulu lo mu zu dia tumbu diatûka ku zulu, mpe wakanisina ti mbo kakembesa nkumbu’andi. (Za 12:28, NWT) Yezu wakembesa nkumbu ya Tata’andi mu tisalu tiandi tia samuna. (Za 17:26) Buna, Bakristo ba matieleka mu nsayi babâka bu basarilaka nkumbu ya Nzambi na bu bazabikisaka yo kwe bantu bakaka.

9. Bwe Bakristo ba mu mbandu ya ntete basongela ti nkumbu ya Nzambi ya beri zitisaka?

⁹ Mu mbandu ya ntete mu ntangu ya beto, bu bamana kubika timvuka tia Bakristo, Yehova watala makanda mu benda kanda dilwata nkumbu’andi. (Bis. 15:14) Bakristo bo, nsayi yeri nawu mu sarila nkumbu ya Nzambi na mu zabikisa yo kwe bantu bakaka. Basarila nkumbu ya Nzambi mu tisalu tia samuna na bu batsoneka mabuku ma Bibila. * Mu mpila yo batomo songela ti bawu ni kanda dialwata nkumbu ya Nzambi.​—Bis. 2:14, 21.

10. Nti bisongelaka ti Mbangi za Yehova ni kanda dilwataka nkumbu ya Yehova?

 ¹⁰ Ngano Mbangi za Yehova ni kanda dilwataka nkumbu ya Yehova? Tataleno musamu wuta wa singasa. Lumbu ti, mfumu za mabundu zazingi zisaka miamiansoni mi balenda mu sweka nkumbu ya Nzambi kwe bantu. Bakatula yo mu mbangululu zawu za Bibila mpe bayimina yo mu eglize zawu. * Ngano muntu we kô wulendi kala ti Mbangi za Yehova, ni bawu kwa bazitisaka nkumbu ya Nzambi mpe bahanaka yo mukembo wufwanakane? Mbo tutomo zabikisaka nkumbu ya Nzambi yôka mabundu mamansoni! Mbo tusarilaka ngolo zeto zazansoni mu diatila mu nsasa ya nkumbu’eto ya Mbangi za Yehova! (Iza. 43:10-12) Tayizi dukisa lutangu lwa Bibila yôka milio 240 dia La Bible. Traduction du monde nouveau, diakarisa nkumbu ya Yehova mu mbuka zi bakatula yo mu mbangululu za mabundu makaka. Mpe mbo tudukisaka mikanda misikamanaka mu Bibila mpe mizabikisaka nkumbu ya Yehova mu mazu yôka 1 000!

11. Bwe Bakristo ba ntete basongela luzolo lwawu mu matieleka?

¹¹ Yezu matieleka ma kazolo, wuzololo tâ matieleka matariri Nzambi na makani mandi. Yezu wadiatila tintwari na matieleka mpe wasa ti bantu bakaka bazaba matieleka mo. (Za 18:37) Milongoki mia Yezu mia matieleka, matieleka mpe ma batomo zolo.  (Za 4:23, 24) Ntumwa Piere watâ dibundu dia Bakristo, ‘nzila ya butieleka.’ (2 Pi. 2:2) Mu luzolo lwawu lwa ngolo mu bungu dia matieleka, Bakristo ba ntete balosa mabanza ma mabundu, bikulu na mbanzulu za bantu zeri lembo kwelanaka na matieleka. (Kol. 2:8) Mpila mosi mpe lumbu ti, Bakristo ba matieleka mbo basarilaka ngolo mu kwe diatiri mu matieleka, bu batomo sikamasaka nkwikulu zawu na mpila yi banatinaka luzingu lwawu mu Zu dia Yehova.​—3 Za 3, 4.

12. Nti bitulaka mu ntangu mpangi zitwarisaka zibakulaka ti musamu we kô bafweti delakasa, mpe mu bungu dia nti basilaka bo?

¹² Lumbu ti Mbangi za Yehova ka batâka ko ti ba lunga bena peleko misamu miamiansoni mitariri matieleka mia bazebi. Ntangu zakaka, mbo bayayanaka mu mpila ya bangurila ndongosolo ya Bibila peleko ya twarisila timvuka. Ka tufweti’â tayituku ko mu musamu wo. Bibila diatomo tâ ti luzabu lwa kanda dia Nzambi mbo lwaketi kula malembe-malembe. (Kol. 1:9, 10) Yehova mbo kazabikisaka matieleka malembe-malembe, mpe tufweti zolo mu kêla na luvivululu lwalwansoni tii ntangu mutsamina wa matieleka wutomo kenga. (Bin. 4:18) Mu ntangu mpangi za Timvuka titwarisaka bakwizi bakulaka ti musamu we kô mu matieleka bafweti delakasa, ka batînaka ko mu nata nsobolo zifwanakane. Mabundu mamingi lumbu ti manataka nsobolo mu ndongosolo’awu mu tâ kwa bantu bê mu mabundu mawu nsayi peleko mu sa ti batomo bâ penepene na nza, nsobolo zi saka organizasio ya Yehova mbo zinataka bantu mu tomo pusana kwe Nzambi na mu landa tifwani tia nsambululu ya sisa Yezu. (Zaki 4:4) Bu tusaka nsobolo, ka wena ko ti mu bungu ti mabanza ma bantu mu nza masobele, kâ mu bungu ti Matsonoko tutomono bakula. Matieleka tuzololo!​—1 Tes. 2:3, 4.

13. Ntia tifu tiyôkele mfunu Bakristo ba matieleka basongela, mpe bwe timonekenaka kwe Mbangi za Yehova lumbu ti?

¹³ Bakristo ba ntete bifu biabingi babazabila bia mbote, kâ tifu tia nguria mfunu ti batomo ba zabila ni luzolo. Yezu watâ ti: “Ni bo, bantu babansoni bazabila ti beno milongoki miani miena​—tala ti lubêle na luzolo beno na beno.” (Za 13:34, 35, NWT) Lumbu ti, Mbangi za Yehova za mu nza ya mukaka, luzolo lwa matieleka na bumosi bwe nawu. Ba swaswana twena na mabundu makaka mu bungu ti kanda dieto dia tutomono zolo, ni bu sa ti nsi na bikulu bia swaswana bie neto. Mbo tutomo monaka luzolo lo lwa matieleka bu tubâka ku tukutakanu twa timvuka na twa tunene. Musamu wo mbo wuyikaka lukwikulu lweto ngolo ti nsambululu’eto, Yehova ya katambulaka.

14. Tintwari na Bisi-Kolose 3:12-14, mu ntia mpila ya mfunu tulendi songasana luzolo lwa ngolo?

¹⁴ Bibila mbo ditulombaka mu bâ na luzolo lwa ngolo beto na beto. (1 Pi. 4:8) Tulendi songela luzolo lwa mpila yo bu tukwe tilemvokele beto na beto na bu tukwe korele masumu ma bampwana’eto. Mbo tudingaka mpe mpila yi tulendi songela tifu tia kaba na ndiambu kwe bantu babansoni ba mu timvuka, ni bu sa ti kwe bô batufwemesa. (Tanga Bisi-Kolose 3:12-14.) Bu tusongasanaka luzolo lwa mpila yo, mbo tusongelaka ti Bakristo ba matieleka twena.

15. Mu ntia mpila zakaka tulandilaka tifwani tia nsambululu tia Bakristo ba ntete?

¹⁵ Mbo tulandaka tifwani tia nsambululu ya timvuka tia Bakristo ba ntete mu mpila zakaka. Mu tifwani mbo tukubikaka misamu, mpila mosi na Bakristo bo. Minkengi mia bizunga mie neto, bakuluntu na bibakisi mu tisalu  ntiana kwa bweri saka bantumwa mu mbandu ya ntete. (Flp. 1:1; Tite 1:5) Mpe ntiana kwa bawu, mbo tuzitisaka misiku mia Yehova mitariri vukasa kwa nitu na makwela, mio mi katâka mu bungu dia nsalulu ya menga, mpe mbo tukengerelaka timvuka mu bantu balembo zoloko mu landa misiku mia Nzambi.​—Bis. 15:28, 29; 1 Kor. 5:11-13; 6:9, 10; Ebr. 13:4.

16. Ngano nti tuta longoka mu misamu mie mu Bisi-Efeze 4:4-6?

¹⁶ Yezu watâ ti bantu babingi batâ ti milongoki miandi miena, kâ ka babansoni’â ko babâ milongoki mia matieleka. (Mat. 7:21-23) Zu dia Nzambi mbo ditomo tâka mpe ti, mu bilumbu bia mansukina, bantu babingi basongela kwa bidimbu bia Nzambi ku mbazi. (2 Tim. 3:1, 5) Kâ Bibila mbo ditomo tu têlaka ti, Nzambi timinu timosi kwa katambulaka.​—Tanga Bisi-Efeze 4:4-6.

17. Lumbu ti, banani balandaka Yezu mpe basarilaka timinu tia matieleka?

¹⁷ Ngano banani basarilaka timinu tia matieleka lumbu ti? Bidimbu bia tulongokele. Tulongokele mpila Yezu na Bakristo ba ntete beri silaka nsambululu. Mvutu yimosi kwa yena​—ni Mbangi za Yehova. Ntia mpila bweso mu bâ mu kanda dia Yehova na mu zaba matieleka matariri Yehova na makani mandi! Buna, tatatamaneno mu simbirila matieleka na lukwikulu lwa ngolo.