MIVU miamiansoni, bimeme bia ntalu biabingi bakarisaka mu timvuka tia Bakristo. Banza’eti nsayi yibâka ku mazulu mu ntangu bantu bo yi bakâlaka! (Like 15:7, 10) Tala ti mu timvuka bakukarisi, lendi bâ na lukwikulu ti Yezu, bambazi na Yehova Yandi beni nsayi yayingi ye nawu bu vutulu kâla mu matieleka. Kâ, bu ta kwe vutu tungi tindiku tiaku na Yehova, lendi bâ na misamu miakaka mia mpasi. Misamu miango ni mie, mpe nti bilendi ku bakisa?

Mpangi zazingi zita tatamana mu bâ ba nôka ni bu sa ti bakâla mu timvuka. Kampe mbo bakulaka ka bwe mutinu Davide keri monaka ku mutima. Ni bu sa ti masumu mandi ma balemvokela, ha manima watâ ti: “Mbi’ani yayingi yena, yikundiyôkele mutela.” (Mik. 40:12; 65:3) Muntu bu wumana kâlaka kwe Yehova, ha manima, lendi yôkesa mivu miamingi mu kwe tisembe peleko lendi bâ na nsoni. Isabelle wu bakatula mu timvuka tûka mvula yôka 20, * mpe wakâla mu timvuka, têle ti: “Musamu wa nguria wa mpasi ndieri wa monaka mu tambula ti Yehova lendi kundemvokela.” Wamana bâ wa nôka, timpeve tiaku tilendi vutu peta. (Bin. 24:10) Yêla mu sa ti bunôkena ka bwakukotandi.

Bantu bakaka mbo babanzaka ti ka balenda mu sa mio mifwanakane ko mu vutu karisa tindiku tiawu na Yehova. Bu bamana mu karisa mu timvuka, Antoine watâ ti:“Mbo ndieri monaka ntiana meno nazimbakana misamu mi nalongoka na mi ndieri toko yirikaka ntete bakunkatula mu timvuka.” Mu bungu dia mabanza ma mpila yo, bantu bakaka balendi tîna mu sa miamiansoni mi balendi lenda mu bungu dia Yehova.

Mu tifwani, tala ti titembo tia ngolo titomono mwangasa nzo ya muntu, munkwa-nzo lendi nôka  bu kabanza ntangu na ngolo zifwanakane mu vutu ya tunga. Mpila mosi mpe, tala ti disumu dia dinene diamwangasa tindiku tiaku na Yehova, lendi mona ti ngolo za nguria zazingi zidingana mu vutu karisa tindiku tio. Kâ, nsatu lubakusu ye naku.

Yehova tu têlele ti: “Yizeno, tayirikeno misamu ha kati dieto.” (Iza. 1:18) Ngolo za wabatikiri mu sarila mu ‘yirika misamu.’ Yehova nge kazololo mu bungu ti ni bo ta kwe se. Banza’eti: Mu bungu ti wakêri kwe Yehova, Yehova lendi sarila musamu wo ngatu kahana mvutu kwe Satana mu bungu dia mitsotso miandi!​—Bin. 27:11.

Bu wakêri kwe Yehova, wabatikiri mu pusana kwe Yandi, mpe kanisini ti mbo kapusana kwe nge. (Zaki 4:8) Kâ, ni bu sa ti mpangi zakaka zizebi ti wakêri mu timvuka, misamu miakaka fweti yirika. Fweti tatamana mu yika luzolo lwaku ngolo mu Yehova we Tata’aku mpe Ndiku’aku. Ngano bwe lendi bwa sila?

Yêla mu bâ na makani ma lendi lungisa. Kampe misamu mia nguri mitariri Yehova mi walongoka na makani mandi matariri Paradi ma kwa watiri bambukila. Kâ bwawu bu fweti vutu bâ na programe yakaka. Mu tifwani, fweti samunaka ntangu zazansoni, fweti bâka ku tukutakanu, mpe fweti vulu yôkesaka ntangu na mpangi zaku. Tazonzela makani mata landa.

Vulu zonzaka kwe Yehova. Tata’aku zebi ti tala ti semba vulu tisembaka, wulendi bâ musamu wa mpasi kwe nge mu mu sambila. (Rom. 8:26) Kâ, tatamana mu lusambulu, bu kwe têle Yehova ka mu ntia mpila zololo wabâ ndiku’andi. (Rom. 12:12) Andrej têle ti: “Nguria semba ndieri tisembaka, mpe nsoni zazingi zeri nani. Kâ ha manima ma tusambulu twatwansoni tu ndieri saka, mbo ndieri monaka bubote. Nayizi bâ na tidzunu tia mutima.” Tala ti kuzebi’â ka ntia musamu sambirila ko, tala tusambulu twa nsobolo ya mutima twa mutinu Davide twe mu Mikunga tikapu 51 na 65.

Longokaka Bibila ntangu zazansoni. Tifu tio mbo tikubakisa mu bâ na timpeve tia ngolo na mu kurisa luzolo lwaku mu Yehova. (Mik. 19:7-11) Felipe têle ti: “Tima tia ntete tiasa ti ndiyizi nabâ na timpeve tia peta mpe nabika Yehova, ni mu bungu ti ka nabâ na programe ya misamu mia timpeve ko. Ka ndieri’â zoloko ko navutu fwemesa Yehova, buna nasa ti ndongokolo ya me beni tiabâ tima tikunkengerela.” Nge mpe lendi sila bo. Tala ti we naku bakubakisa mu sola mutu-diambu wu longoka, lendi lomba kwe ndiku ye na tindiku tia ngolo na Yehova.

Vutu tunga tindiku tiaku na mpangi zaku. Bantu bakaka bakâlaka mu timvuka mbo babâka na lwaka mu bungu ti mbo bamonaka ti bampangi mbo bababongela mu mpila ya mbi. Larissa watâ ti: “Nsoni zazingi zeri nani. Mbo ndieri monaka ti mpangi zani nateka. Mbanzulu zo zatatamana mu bâ nani tûka ntangu yayingi.” Bâ na lukwikulu ti bakuluntu na mpangi zakaka za yela bazololo bakubakisa bu ta kwe tungi timpeve tiaku. (Tala kaku tie na mutu-diambu “ Ngano bakuluntu nti balendi sa?”) Mu nsayi bena mu bungu ti wakêri mu timvuka, mpe bazololo ti wabâ mu nsayi!​—Bin. 17:17.

Ngano nti bilendi sa ti wabâ penepene na timvuka? Yendaka ku tukutakanu twatwansoni na mpangi zaku, mpe ntangu zazansoni samunaka nawu tintwari. Ngano bwe wukubakisila? Felix watâ ti: “Timvuka mbo tieri kêlaka na timina diadiansoni ti nakâla. Mbo ndieri monaka ti ntalu ndiena. Bakumbakisa mu vutu mona ti tibuka tie nani mu timvuka, mu mona ti Yehova wakundemvokela, na mu mona ti ndendi tatamana mu mu sarila.”​—Tala kaku tie na mutu-diambu “ Ngano nti lendi sa?”

Satana mbo katatamana mu tambika bitembo bia ngolo mu nzila’aku, mu yêla mu ku nôkesa mu ntangu yi ta kwe vutu tungi tindiku tiaku na Yehova. (Like 4:13) Bâ wa kubama mu yika tindiku tiaku ngolo na Yehova.

Mu bungu dia bimeme biandi, Yehova wakanisina ti: “Timeme tizimbakane, mbo nidinga tio, tio tiwumukini mbo nikarisa tio, tio tilwele mbo nikanga tio titenda, tio tie tia nôka mbo nitindisa tio.” (Ezk. 34:16) Yehova bantu babingi keka bakisa mu karisa tindiku tiawu na Yandi. Bâ na lukwikulu ti zololo kakubakisa mu tatamana mu tunga tindiku tia nkatika ngolo na Yandi.