1. “Nsatu’eto ya timpeve” ni nti, mpe bwe yitunatininaka nsayi?

 NSAYI ya matieleka ka yena kwa mwa nsayi ko yikwendaka mpe yikâlaka. Yilendi zingila luzingu lwa mukaka. Mu bwe? Yezu wabangula wo mu tinzonzi tiandi tia ha zulu mongo. Watâ ti: “Nsayi kwe bô babakulaka ti nsatu za timpeve ze nawu.” (Mat. 5:3) Yezu wazaba ti bantu babasala na nsatu ya zaba na ya sambila Mvangi’awu Yehova. Zo ni “nsatu zeto za timpeve.” Mu bungu ti Yehova “Nzambi ya nsayi yena,” bantu bamusambilaka bafweti bâ mpe mu nsayi.​—1 Tim. 1:11.

2-3. a) Tintwari na misamu mia tâ Yezu, bantu bakaka balendi bâ mu nsayi ni banani? b) Nti tuzonzela mu timoko ti, mpe mu bungu dia nti we mfunu?

² Ngano mu bâ na nsayi wufwanakane kwa ka tabândi na musamu? Kâni. Mu tinzonzi ti kasa, Yezu watâ musamu wa nzitukulu. “Bô bata dila”​—ni bu sa ti mu bungu ti masumu mawu mata ba mwisa mpasi peleko misamu mia mpasi bata bwabana na mio mu luzingu lwawu—​balendi bâ mu nsayi. Yezu watâ musamu wa mpila yo mu bungu dia ‘bô bata kwe kwamusu mu bungu dia misamu mia delalakana,’ peleko mu bungu dia bô bamonaka mpasi mu bungu ti mbo babayiminaka mu bâ Bakristo. (Mat. 5:4, 10, 11) Kâ, bwe tulendi bêla mu nsayi mu misamu mia mpila yo?

³ Yezu watulongesa ti nsayi ka yitûkaka mu luzingu lwa mbote ko, kâ bu tulungisaka nsatu zeto za timpeve, mpe bu tupusanaka kwe Nzambi. (Zaki 4:8) Ngano bwe tulendi bwa sila? Mu timoko ti, mbo tuzonzela bitini bitatu binataka nsayi ya matieleka.

4. Ntia titini tia ntete tufweti landa mu bâ mu nsayi ya matieleka? (Mikunga 1:1-3)

⁴ TITINI 1: Mu bâ mu nsayi ya matieleka, tufweti diaka bidia bia timpeve. Bantu na bibulu nsatu bidia bia tinsuni yibâka nawu. Kâ, bantu kwa balendi dia bidia bia timpeve. Mpe nsatu bie neto. Ntiangu Yezu katâ: ‘Muntu ka mu dimpa na dimpa ko kwa kayindukilaka; kâ na mu misamu miamiansoni mitûkaka mu munwa wa Nzambi.’ (Mat. 4:4) Buna, ka tufweti’â tayôkesa tilumbu timosi ko, ti tulembo dia bidia bia timpeve bia Zu dia Nzambi. Titsoniki tia Mikunga tiatâ ti: ‘Nsayi kwe muntu bakilaka nsayi’andi mu musiku wa Yehova, mpe musiku’andi katangaka mpimpa na mwini.’​—Tanga Mikunga 1:1-3.

5-6. a) Nti tulendi longoka mu Bibila? b) Mu ntia mpila ntangulu ya Bibila yilendi tu bakisila?

⁵ Mu Bibila, na luzolo lwalwansoni, Yehova wahana mabanza ma mfunu mu mpila yi tulendi bêla na luzingu lwa nsayi. Mbo tulongokaka nsasa ya luzingu ka ni nti. Mbo tulongokaka ka bwe tulendi pusana kwe Yandi, mpe bwe tulendi bakila mulemvo mu masumu meto. Mpe mbo tulongokaka tivuvu tia toma ti katukanisina mu bungu dia bilumbu bia ku matu. (Yer. 29:11) Matieleka mo matubakaka mu ndongokolo ya Bibila, mbo mafulusaka mitima mieto mu nsayi!

⁶ Ntiana bu tuzebi wo, Bibila mbo dituhanaka mpe malongi me nguria salu mu bungu dia luzingu lweto lwa bilumbu biabiansoni. Tamana landa malongi mo, mbo tubaka nsayi  ya matieleka. Ntangu zazansoni zi bâka wa nôka mu bungu dia misamu mia luzingu, yôkesaka ntangu mu tanga Zu dia Yehova na mu dimbitila dio. Yezu watâ ti: ‘Kiese kiawu bô bawâka Zu dia Nzambi, mpe bakêlaka dio.’​—Like 11:28.

7. Bwe lendi bakila ndandu yayingi mu ntangu yi yôkesa mu tanga Zu dia Nzambi?

⁷ Bu tangaka Zu dia Nzambi bongaka ntangu ya tomo mona luwu lwa mio mi ta tanga. Tabongeno tifwani, ngano musamu ewu wa weka bwabana na wo? Muntu wulembi bidia bi tomo zoloko. Kâ, mu bungu ti ntangu ya fioti ye naku peleko mabanza kwakaka me naku, diri bio mu ntinu-ntinu, mpe kuta dinga mu zaba luwu lwa bima bi ta dia ko. Bu meni manisa mu dia, wizi bakula ti mu ntinu-ntinu diriri, mpe mbo keti zoloko mu dia malembe-malembe ngatu wazaba luwu lwa muna nsunsu. Mpila mosi mpe, ngano weka tanga Bibila mu ntinu-ntinu, mpe wizi bakula ti kubongele’â ntangu ko ya zaba luwu lwa nsangu ze mô? Bongaka ntangu ya tangaka Zu dia Nzambi; taluzulaka mpila ya yôkela binsamu, wâka mazu, mpe banzaka mu mio mi tangaka. Bu sila bo, mbo kwizi bâ mu nsayi.

8. Bwe “ngamba ya kwikama na ya ndwenga” yilungisilaka dema diandi? (Tala mpe note.)

⁸ Yezu wanoma “ngamba ya kwikama na ya ndwenga” mu hanaka bidia mu ntangu ya fwanana, mpe mbo tutomo diaka bubote mu timpeve. * (Mat. 24:45) Misamu miamiansoni mi dukisaka ngamba ya kwikama mbo misikamanaka mu Zu dia Nzambi. (1 Tes. 2:13) Bidia bio bia timpeve mbo bitubakisaka mu zaba mbanzulu za Yehova, ntiana bu bazonzela zo mu Bibila. Ntiangu tutangaka Nzo ya Zangama ya Munkengi na Réveillez-vous! mpe na mutu-diambu mie mu jw.org. Mbo tukubamaka mu bungu dia lukutakanu lweto lwa luzingu lwa Bakristo na lwa lumingu. Ngonda zazansoni mbo tutalaka mpe programe ya JW Télédiffusion. Tamana diaka bidia bia timpeve biabingi, mbo tulenda mu tula ku titini tia nzole tinataka ku nsayi ya matieleka.

9. Ngano titini tia nzole tinataka ku nsayi ya matieleka ni tie?

⁹ TITINI 2: Mu bâ mu nsayi ya matieleka tufweti tumamanaka mitieno mia Yehova. Titsoniki tia Mikunga tiatsoneka ti: ‘Kiese kiandi muntu [wu tînaka] Yehova na kwe diatiri mu nzila zandi.’ (Mik. 128:1) Tîna Yehova kuzololo tâ ti tufweti tomo mu zitisa, mpe tufweti lembo zolo mu sa tima timufwemesa. (Bin. 16:6) Buna, mbo tutatamana mu sarila ngolo mu tumamana mitieno mia Nzambi mitariri mbote na mbi, ntiana bu babangulaka mio mu Bibila. (2 Kor. 7:1) Mbo tubâ na nsayi tala ti tuyirikiri misamu mi zololo Yehova, mpe tulosele mio mi kayinaka.​—Mik. 37:27; 97:10; Rom. 12:9.

10. Tintwari na Bisi-Rome 12:2, ngano ntia dema die neto?

¹⁰ Tanga Bisi-Rome 12:2. Muntu wulendi zaba ti ni Yehova we na lutumu lwa hana misiku mitariri mbote na mbi, kâ fweti mpe bonga nzengolo ya landa mitieno miandi. Mu tifwani, muntu wulendi zaba ti guvernema nswa we nandi wa hana ntinu zi bafweti natina kaminio. Kâ, lendi kala mu tumamana ntinu zo zi bahana. Buna, mbo kakwe natini mu ntinu ziyôkele. Mu ndiatulu’eto mbo tusongelaka ti nguria lukwikulu lwe neto ti bu tulandaka mitieno mia Yehova, luzingu lweto mbo lubâka lwa nguria lwa mbote. (Bin. 12:28) Davide mpe ni bo kamona, bu katâ mu bungu  dia Yehova ti: ‘Mbo kunzabikisaka nzila ya luzingu. Ha meso maku, nsayi yayingi ye hô; nsayi ya ntangu zazansoni ha lubakala lwaku yena.’​—Mik. 16:11.

11-12. a) Bu tubâka na lwaka peleko bu tubâka ba nôka, mu ntia musamu tufweti silaka keba? b) Bwe misamu mie mu Bisi-Filipe 4:8 milendi tu bakisila mu sola nsaka?

¹¹ Bu tubâka na lwaka peleko bu tubâka ba nôka, tulendi bâ na nsatu ya sa mwa nsaka mu lembo tomo banza mu misamu mieto. Musamu wo wa fwanana wena, kâ tufweti saka keba mu lembo bâ na mabanza ma yirika tima ti yinaka Yehova.​—Efz. 5:10-12, 15-17.

¹² Mu mukanda’andi kwe Bisi-Filipe, ntumwa Paulo watindisa Bakristo mu tatamana mu taluzulaka misamu ‘mia sungama, [. . .] mia verela, mi bafweti zolo, [. . .] [na] mie na bifu bia bibote.’ (Tanga Bisi-Filipe 4:8.) Ni bu sa ti Paulo katangumuna nsaka ko, misamu mi katsoneka mifweti nata nsobolo mu mpila’eto yi tusolelaka nsaka. Yêla mu sa ebu: Mbuka zazansoni ze na ntelo ya “biabiansoni” mu verse, yingasa yo mu ntelo za “mikunga,” “filme,” “mabuku,” peleko “jeux vidéo.” Wamana sila bo, mbo zaba ka ntia bima Nzambi kalendi tambula na bi kalendi lembo tambula. Mu luzingu lweto lwalwansoni tuzololo tadiatila mu mitieno mia zangama mia Yehova. (Mik. 119:1-3) Buna na ngindu ya mbote, tulendi sarila titini tia ntatu tinataka nsayi ya matieleka.​—Bis 23:1.

13. Titini tia ntatu tinataka ku nsayi ya matieleka ni tie? (Za 4:23, 24)

¹³ TITINI 3: Sa ti nsambululu ya Yehova yabâ ha tibuka tia ntete mu luzingu lwaku. Bu kena Mvangi’eto, ni Yehova fwanakane mu baka nsambululu’eto. (Nza. 4:11; 14:6, 7) Buna, nsambululu yi tumusilaka yifweti bâ ha tibuka tia ntete, mpe tufweti ya mu sila mu mpila yi kazololo, ‘mu mpeve na mu butieleka.’ (Tanga Za 4:23, 24.) Tuzololo ti mpeve santu ya Nzambi yatwarisa nsambululu’eto ngatu yabâ tintwari na matieleka ma tubakaka mu Zu diandi. Nsambululu’eto yifweti bâ ha tibuka tia ntete ni bu sa ti ku hata di balembo tomo haninaka tisalu tieto nzila peleko di bayiminaka tio tubêlaka. Bwawu bu, mpangi yôka 100 ze ku boloko mu bungu ti Mbangi za Yehova zena. * Ntono musamu wo, na nsayi yayansoni mbo basarilaka ngolo zawu zazansoni mu sambila, mu longoka na mu zonzela Nzambi na Timfumu tiandi kwe bantu. Bu batuyiminaka peleko bu batukwamisaka, tulendi bâ mu nsayi mu bungu ti tuzebi ti Yehova na beto kena, mpe mbo katusenda.​—Zaki 1:12; 1 Pi. 4:14.

14. Nti biaturila mpangi yimosi ya bakala ya ntwenia yibâka ku Tadjikistan, mpe mu bungu dia nti?

¹⁴ Binsamu bia luzingu bisongele ti bitini bia bitatu bi tutaluzuri mbo binataka ku nsayi ya matieleka ntono misamu mie neto. Tazonzeleno misamu miaturila Jovidon Bobojonov we na mvula 19, bâka ku Tadjikistan, bu kamana kala mu sala tisalu tia timilitere. Mu tilumbu tia 4 octobre 2019, bamubonga ku nzo’andi, bamutûla ku boloko ku kayôkesela ngonda zazingi, mpe mbo beri mu bongelaka ntiana timpumbulu. Nsi zazingi zayizi zaba kondo kwa buderede ku beri mu bongelaka na ko. Bamuhana nkuba mu mu sa tiya ngatu kadia ndefi ya sala tisalu tia timilitere, mpe ya lwata binkuti bia bamilitere. Ha manima, bayizi mu zengela boloko mpe bamutambika ku camp yi basarilaka, tii ntangu  prezida ya ku nsi’awu kayizi mu hana bweso bwa duka. Mu ntangu yo yayansoni ya mpasi, Jovidon watatamana mu bâ wa kwikama, mpe walunda nsayi’andi. Mu bwe? Ntangu zazansoni, mbo keri bambukilaka nsatu’andi ya timpeve.

15. Bwe Jovidon keri dilaka bidia bia timpeve ku boloko?

¹⁵ Bu keri ku boloko, Jovidon mbo keri diaka bidia bia timpeve, ni bu sa ti keri’â na Bibila ko peleko keri’â na mikanda mieto ko. Ngano bwe keri saka? Bampangi mbo beri mu turisilaka bima bia dia, mpe mu sake ya bidia mbo beri tsonekaka verse ya tilumbu. Buna, lenda dieri nandi dia tangaka Bibila na mu dimbitilaka dio bilumbu biabiansoni. Bu bamana mu dukisa ku boloko, wahana malongi ema kwe bô beka lembo bwabana na misamu mia nguria mia mpasi: “Wufwanakane lwatomo sarilaka timpwanza tieno mu kurisa luzabu lweno mu Yehova mu tangaka Zu diandi na mikanda mieto.”

16. Mu ntia bima Jovidon katûla mabanza mandi?

¹⁶ Mpangi’eto mbo keri tumamanaka mitieno mia Yehova. Kani kadinga mu lungisa nsatu za mbi na mu bâ na ndiatulu ya mbi, Jovidon mbo keri tûlaka mabanza mandi mu Yehova na mu misamu mi kazololo. Mbo keri yitukuku mu butoma bwa bima bia sala Nzambi.  Bilumbu biabiansoni mu pari, mikunga mia banuni mieri mu vumbulaka. Mu mpimpa mbo keri talaka ngonda na mbwetete. Têle ti: “Makabu mo matûka kwe Yehova masa ti nabâ mu nsayi mpe nabâ na butindi.” Bu tutondaka mu bima bia timpeve na bia tinsuni bi tu hanaka Yehova, mutima’eto mbo wubâka mu nsayi, mpe nsayi yo yilendi yika ngolo lenda dieto dia korela.

17. Bwe 1 Piere 1:6, 7 yilendi bakisila muntu wuta bwabana na misamu mia bwabana na Jovidon?

¹⁷ Jovidon watûla mpe nsambululu ya Yehova ha tibuka tia ntete. Wazaba mfunu ya tatamana mu bâ wa kwikama kwe Nzambi ya matieleka. Yezu watâ ti: ‘Ni Yehova Mfumu’aku kwa fweti kunda, ni yandi kwa fweti sarila.’ (Like 4:8) Mfumu za bamilitere na bambulumbulu mbo beri zoloko ti Jovidon kabika dibundu diandi. Kâ, mpimpa na mwini mbo keri tomo sambilaka, mpe mbo keri lombaka lubakusu kwe Yehova mu lembo bika na mu tatamana mu bâ wa kwikama. Ntono misamu miakondo buderede mi beri mu yirikaka, Jovidon watatamana mu bâ wa kwikama. Kâ, bwawu bu, nsayi yayingi ye nandi mu bungu ti wabaka tima tialembo toko bâ nandi ntete bamukanga, bamutwa, mpe bamutûla ku boloko​—timinu tia tonto.​—Tanga 1 Piere 1:6, 7.

18. Bwe tulendi tatamana mu bâ na nsayi’eto?

¹⁸ Yehova zebi ka nti bie neto nsatu mu bâ na nsayi ya matieleka. Wamana landa bitini bitatu bi tutaluzuri binataka ku nsayi ya matieleka, lendi tatamana mu bâ mu nsayi ntono misamu mia mpasi. Buna nge mpe, mbo bâ na lenda dia tâ ti: ‘Nsayi kwe kanda dio die na Nzambi Yehova!’​—Mik. 144:15.