1-2. Ntia mpila yiyôkele bubote mu tanga na mu dimbitila Bibila? Hana tifwana.

 BANZA’ETI zololo wasumba nzo. Ngano nti zolo mu toko mona ntete wabonga nzengolo yo? Ngano foto kwa yita songela matu ma nzo yo? Ntembe kâni mbo zolo mu kwe ya tala, ngatu wazungana yo, wakota mu kati mu tala chambre zazansoni, na mu tala bima biabiansoni bie mo. Kampe mbo dinga mu zaba ka bwe batungila yo. Wa matieleka, mbo zolo mu tala bima biabiansoni bitariri nzo yo yita zolo mu sumba.

² Tulendi sila bo bu tutangaka na bu tulongokaka Bibila. Muntu wumosi we na mayela ma Bibila watâ ti “Bibila diena ntiana nzo ya zangama, ya sarila mpe ye na fondasio zi batoko tima mu tunga zo.” Buna, bwe tulendi tomo zabila mio miamiansoni mie mu Bibila? Tala ti tengi mu ntinu-ntinu, misamu mia nguri kwa zaba—‘misamu mia mbatukulu mia Nzambi.’ (Ebr. 5:12) Kâ, kani wasila bo, kota mu “kati” mu taluzula misamu mia fioti-fioti mia mfunu. Mpila yiyôkele bubote mu longoka Bibila ni mu tala ka bwe misamu mia swaswana mie mu kati mikwelanaka. Dinga mu bakula matieleka ma kwikilaka, kâ mpe mu bungu dia nti kwikilaka mo.

3. Ntia musamu ntumwa Paulo katindisila mpangi zandi za Bakristo mu yirika, mpe mu bungu dia nti? (Bisi-Efeze 3:14-19)

³ Mu tomo bakula Zu dia Nzambi diadiansoni, tufweti longoka  matieleka ma ndilu. Ntumwa Paulo watindisa mpangi zandi za Bakristo mu longoka Zu dia Nzambi na bunsungu, ngatu batomo ‘bakula bunene, bula, mu tela na ndilu ya matieleka.’ Ha manima mbo baketi ‘sikama’ mpe mbo baketi ‘kwikama’ mu timinu. (Tanga Bisi-Efeze 3:14-19.) Ni bo tufweti sila. Tataleno ka bwe tulendi tomo longokela Zu dia Nzambi mu bakula nsasa’andi yayansoni.

4. Nti tulendi sa mu pusana kwe Yehova? Hana bifwani.

⁴ Bu twena Bakristo, ka tudingaka ko kwa mu bâ na luzabu lwa zulu-zulu lwa Bibila. Na lubakusu lwa mpeve santu ya Nzambi, timina dibâka neto dia longoka ‘misamu mia ndilu mia Nzambi.’ (1 Kor. 2:9, 10) Lendi sa ndongokolo ya ndilu yisa ti wapusana kwe Yehova. Mu tifwani, lendi taluzula ka bwe Nzambi kasongela luzolo lwandi kwe bisari biandi bia ntama, mpe ka bwe musamu wo wusongelaka ti nge kazololo. Lendi longoka mpe ka mu ntia mpila Yehova kazolo ti bala ba Israele bamusila nsambululu, mpe fwanakasa yo na mpila yi kazololo tamusila nsambululu lumbu ti. Peleko lendi longoka mu ndilu mbikululu za lungisa Yezu bu keri ha mutoto.

5. Ngano mutu-diambu we kô zololo mu sila recherche mu ndongokolo ya Bibila ya nge beni?

⁵ Bayula kwe milongoki miakaka mia nsungu mia Bibila ka ntia misamu mia ndilu beri zoloko mu taluzula mu Zu dia Nzambi. Mvutu zawu zakaka za bazonzele mu kaku titêle “ Mitu-diambu mitariri ndongokolo ya nge beni.” Lendi baka nsayi yayingi bu longoka mitu-diambu mio mu nzila ya Index peleko ya Guide de recherche pour les Témoins de Jéhovah. Ndongokolo ya ndilu ya Bibila yilendi yika timinu tiaku ngolo mpe yilendi kubakisa mu bâ na ‘luzabu lwa Nzambi.’ (Bin. 2:4, 5) Bwawu bu mbo tuzonzela matieleka makaka ma Bibila ma ndilu ma tulendi tomo longoka.

6. a) Ntia luswaswanu lwe ha kati dia plan na kani? b) Mu bungu dia nti tulendi têla ti kani dia Yehova mu bungu dia bantu na mutoto ka disoba ko? (Bisi-Efeze 3:11)

⁶ Mu tifwani dimbitila misamu mi tâka  Bibila mu kani dia Nzambi. Luswaswanu lwalwingi lwe ha kati dia plan na kani. Plan yena ntiana nzila ya zabakana yilendi nata ku nsuka ya nzengolo yi bongele. Kâ, plan yilendi sa ti walembana misamu tala ti batûriri tikaku mu nzila’aku. Ku lweka lwakaka, tulendi fwanakasa kani na mbuka yi tuta zolo tula. Tibuka ti tuta zolo tula tia tuzebi, kâ tulendi bonga nzila za swaswana mu tula ha tibuka tiango. Musamu wa nsayi, malembe-malembe Yehova wazabikisa kani diandi mu Bibila. (Efz. 3:11) Mu mpila ni mpila mbo dilungana mu bungu ti Yehova wasa ti bima biabiansoni biasala mu bungu dia kani dio. (Bin. 16:4) Ndandu za mio mi yirikaka Yehova mbo zizingila mankululu. Ngano kani dia Yehova ni die, mpe ntia nsobolo kasa mu lungisa dio?

7. Bantu ba ntete bu bamana kolama, bwe Yehova kasila nsobolo mu mpila yi kaketi lungisila kani diandi? (Matie 25:34)

⁷ Nzambi watâ kwe bantu ba ntete ka ntia kani dieri nandi mu bungu dia bawu. Bafweti ‘butana, funana, bafweti fulusa mutoto, mpe bafweti wa tuma, bafweti tuma bima biabiansoni bie ha mutoto nsi.’ (Mba. 1:28) Adame na Eva bu bakolama, bakotesa bantu mu masumu, mu bungu dia musamu wo kani dia Yehova ka dia kabakana ko. Wasa nsobolo mu mpila yi diaketi lunganana. Ho nkatika bendo, wabonga nzengolo ya tûla Timfumu ku mazulu tilungisa kani diandi dia mbatukulu mu bungu dia bantu na mutoto. (Tanga Matie 25:34.) Mu ntangu yi kasola, na luzolo lwalwansoni Yehova watambika mwana’andi wa ntete ha mutoto mu longesa misamu mitariri Timfumu kwe bantu na mu hana luzingu lwandi mu bakûla mu masumu na mu lufwa. Ha manima Yehova wavumbula Yezu mu kwe bâ mutinu wa Timfumu tiandi ku mazulu. Kâ misamu miamingi miakaka mie kô mi tulendi dimbitila mu kani dia Nzambi.

8. a) Ngano mutu-diambu wa nguri wu zonzelaka Bibila ni we? b) Ntiana bu ta wa songela Bisi-Efeze 1:8-11, kani dia Yehova dia mansukina ni die? (Tala mpe tifwani ha tinima tia ntete.)

⁸ Mutu-diambu wa nguri wu zonzelaka Bibila ni wena’eti: Nkumbu ya Yehova mbo yibâ ya santu bu kalungisa kani diandi mu bungu dia mutoto mu nzila ya Timfumu tiandi ti yâlaka Kristo. Kani dia Yehova ka dilendi’â dia soba ko. Wakanisina ti miamiansoni mbo miyôkela buna bu katêla mio. (Iza. 46:10, 11, note; Ebr. 6:17, 18) Bala ba nsungu ba Adame na Eva bakwizi bâ ba lunga mbo babâ ha mutoto wu basobesa mu paradi, ku babêla mu nsayi ntangu zazansoni. (Mik. 22:26) Kâ, ka ni mio mio’â ko kwa Yehova kalungisa. Kani diandi dia ku mansukina ni dia vukasa bivangu biandi bia mayela bia ku mazulu na bia ha mutoto. Buna, babansoni ba moyo, mbo bamutumamana na kwikama kwakwansoni mu bungu ti ni Yandi we na nswa wa yâla. (Tanga Bisi-Efeze 1:8-11.) Ngano kuyitukuku’â ko mu mpila ya nzitukulu Yehova yi kata lungisila kani diandi?

9. Bu tutangaka Bibila ntia misamu tulendi kwizi bakula mu bungu dia bilumbu bia ku matu?

⁹ Tataleno mbikululu ya hana Yehova ku nsaba ya Edene, ye mu Mbatukulu 3:15. b Mbo yizonzelaka misamu miaketi yôka ngatu kani diandi dialungana, kâ misamu mio, ha manima ma mivu miamingi kwa miaketi yilama. Mu tifwani, Nzambi watâ kwe Abrahame ti, ha manima ma mvula zazingi, mosi mu bala bandi kwizi bâ Kristo. (Mba. 22:15-18)  Mpe mu 33 M.B., Yezu bamutatika ku tinkoso ntiana bu babikula wo. (Bis. 3:13-15) Mbikululu yitariri kosakasa kwa mutu wa Satana mbo yilungana ha manima ma mvula yôka 1 000. (Nza. 20:7-10) Bibila mbo ditomo bangulaka ka nti biyôka mu ntangu bumbeni bwa nza ya Satana na organizasio ya Yehova butula ku nsuka.

10. a) Ntia misamu mitula ntamana? b) Bwe tulendi kubikila mbanzulu zeto na mitima mieto? (Tala note.)

¹⁰ Dimbitila mu misamu mia nzitukulu mi bikulaka Bibila. Makanda mbo matâ, “tidzunu na kondo kwa bunkuta!” (1 Tes. 5:2, 3) “Ho nkatika bendo,” mpasi ziyôkele mbo zibatika, makanda bu makotela mabundu ma bungungu. (Nza. 17:16) Ha manima ma misamu mio, wulendi bâ musamu wa nzitukulu ‘Mwana-muntu bu kakwiza ha zulu matuti mu ngolo zandi na mu nguria mukembo wa wunene.’ (Mat. 24:30) Yezu mbo kafundisa bantu, bu kakaba bimeme na bankombo. (Mat. 25:31-33, 46) Kâ, Satana mbo katatamana mu sala. Mu diki diandi, mbo katuma makanda mavukana, Bibila ma katâka Goge ya ku nsi ya Magoge, makotela bisari bia Yehova bia verela. (Ezk. 38:2, 10, 11) Ha manima, Bakristo ba tumbu basâla, mbo babakutakasa ku mazulu mu bâ tintwari na Kristo na mukangu wa binwani wa ku mazulu mu nwana muzingu wa Armagedo wutûla nsuka mu mpasi ziyôkele. c (Mat. 24:31; Nza. 16:14, 16) Buna, luyalu lwa mvula 1 000 lwa Kristo mbo lubatika ha mutoto.—Nza. 20:6.

11. Ngano luzingu lwa mankululu bwe luta zolo tâ kwe nge? (Tala mpe tifwani.)

¹¹ Bwawu bu tomo dimbitila mu misamu mitula ku nguria matu ha manima ma mvula 1 000. Bibila mbo ditâka ti Mvangi ‘watûla mu mitima mieto luzingu lwa mankululu.’ (Ekl. 3:11) Banza’eti ka bwe wuta zolo tâ mu bungu dia nge na mu tindiku tiaku na Yehova. Mu buku dia Approchez-vous de Jéhovah, tinima 319, mbo batutêlaka musamu ewu wa nzitukulu: “Bu tumana zinga mafunda, milio, mpe miliare za mivu, mbo tukwizi tomo zaba Yehova yôka lumbu ti.  Kâ, ntangu zazansoni mbo tumona ti misamu miamingi miatiri kô mi tulendi longoka. [. . .] Luzingu lwa mankunlulu mbo lubâ lwa nguria lwa toma, mpe lwa fuluka mu bima bia mbote—mpe musamu wuyôkele butoma, ntangu zazansoni mbo tudinga mu bâ penepene na Yehova. Kâ, bwawu bu, mu ntangu yi tuta kwe tatamane mu longoka Zu dia Nzambi, nti biakaka tulendi dinga mu bakula?

12. Bwe tulendi tarila ku zulu? Hana tifwani.

¹² Zu dia Nzambi mbo dimonekesaka Yehova we ku mazulu. (Iza. 33:5) Bibila mbo dituzabikisaka misamu mia nzitukulu mitariri Yehova na lweka lwa ku mazulu lwa organizasio’andi. (Iza. 6:1-4; Dan. 7:9, 10; Nza. 4:1-6) Mu tifwani, tulendi tanga misamu mia nzitukulu mia mona Ezekiele, mu ntangu mazulu bu mazibuka, mpe yi kabatika mu mona bimona-meso bia Nzambi.—Ezk. 1:1.

13. Ntiana bu tâka Bahebre 4:14-16, nti zoloko mu tisalu ti salaka Yezu ku mazulu?

¹³ Dimbitila mpe mu tisalu ti salaka Yezu ku mazulu bu kena Mutinu mu Timfumu tia Nzambi, me Mfumu-Nganga-Nzambi ye na tiari. Mu nzila ya Yezu, tulendi pusana ha ‘muyâlu wa bweso bwalembo tu delakana’ bwa Nzambi mu lusambulu, mpe tulendi lomba ti katufwila tiari mpe katubakisa mu ntangu yifwanane. (Tanga Bahebre 4:14-16.) Kani kabwe, ka tuyôkesakandi na kani tilumbu mu lembo dimbitila mu mio mia yirika Yehova na Yezu na mu mio mi bata yirika mu beto tûka ku mazulu. Luzolo lwawu mu beto lufweti tomo tu simba mitima, mpe lufweti tu tuma mu bâ na luhemo mu tisalu tieto tia samuna na mu nsambululu’eto.—2 Kor. 5:14, 15.

14. Ntia tima tulendi sa tiyôkele bubote mu songela ti Yehova na Yezu bawu tutondaka? (Tala mpe tifwani.)

¹⁴ Mpila yimosi yiyôkele bubote mu songela  ti Nzambi tuzoloko na Mwana’andi, ni ya sarila ngolo mu bakisa bantu bakaka mu bâ Mbangi za Yehova mpe milongoki mia Yezu. (Mat. 28:19, 20) Mu tonda Nzambi na Krsito, ntumwa Paulo musamu ni wo kayirika. Wazaba ti Yehova zololo ti ‘bantu babansoni bavuka, batula mpe ha luzabu lwa butieleka.’ (1 Tim. 2:3, 4) Wasala tisalu tia ngolo mu tisalu tiandi mu bakisa bantu babingi ba keri na bo lenda, ngatu kavukisa na kani ndambu.—1 Kor. 9:22, 23.

15. Tintwari na Mikunga 1:2, nti bituhana nsayi?

¹⁵ Mu musamu wo, titsoniki tia mikunga tiatsoneka ti muntu we mu nsayi mpe wulendaka, ni muntu wô monaka nsayi mu musiku wa Yehova, mpe dimbitilaka wo mpimpa na mwini. (Mik. 1:1-3; note) Joseph Rotherham bangulaka Bibila, watâ ebu mu bungu dia verse yo: “Muntu wufweti tomo zolo lutwalusu lwa Nzambi, ngatu kadinga lo, kalongoka lo, mpe kayôkesa ntangu yayingi mu dimbitila lo.” Wavutu yika ti: “Tala ti muntu wuyôkese tilumbu tia mukaka, mpe ka wuta tanga Bibila ko, tilumbu kahombese.” Lendi baka nsayi mu ndongokolo ya Bibila bu taluzula misamu mia fioti-fioti mia mfunu, mpe bu mona ka bwe mikwelanaka. Diangana nguria nsayi yena mu tomo taluzula nsasa yayansoni ya Zu dia Nzambi!

16. Nti tuzonzela mu timoko tita landa?

¹⁶ Matieleka ma toma Yehova ma katulongesaka mu Zu diandi, ka mena mpasi ko mu bakula. Mu timoko tilanda, mbo tutaluzula matieleka mamosi ma ndilu matariri Tempelo ya yinene ya timpeve ya Yehova, ya zonzela Paulo mu mukanda wu katsoneka kwe Bakristo ba Bahebre. Bika ndongokolo ya mutu-diambu wo yakunatina nsayi yayingi.