TIMOKO TIA NDONGOKOLO 43
MUKUNGA 90 Tatitindisaka beto na beto
Nti bilendi tu bakisa mu telamana ntembe
‘Tomoeno sungamana miamiansoni.’—1 TES. 5:21.
MABANZA MA NGURI
Mu timoko ti mbo tumona bwe tulendi telamana ntembe zilendi nata nsobolo za mbi mu tisalu ti tusarilaka Yehova.
1-2. a) Ntia biyuvu bisari bia Yehova balendi tiyula? b) Nti tutaluzula mu timoko ti?
NTANGU zakaka beto bansoni ntembe a zibâka neto. Mu tifwani, tisamuni tia ntwenia tilendi tiyula tala ti Yehova yandi kamonaka peleko yandi kabelokelaka lwaka. Kampe lendi kondo lukwikulu ti lendi batusu. Tifwani tiakaka ni tia mpangi ya bakala yasola mu tûla tisalu tia Yehova ha tibuka tia ntete mu luzingu lwandi mu ntangu yi keri ntwenia, kani kasola mu bâ na mbongo zazingi. Lumbu ti bu keka na mvula zazingi mpe bu ke kwa na mbongo za fioti mu lungisa nsatu za kanda diandi, lendi bâ na ntembe tala ti nsololo ya mbote kasa bu keri ntwenia. Banza’eti mpangi ya yikento ya nuna yilembolo vutu sâla na ngolo zazingi. Lendi nôka mu bungu ti ka siri’â na lenda ko dia yirika misamu mi keri yirikaka mu ntama. Biyuvu ebi bia weka tiyula: ‘Ngano Yehova meno kamonaka? Ngano musamu wa mfunu weri bu natambula mu hombesa bima mu bungu dia Yehova? Ngano salu kwa natiri kwe Yehova?’
2 Tala ti ka tudingiri’â mvutu mu biyuvu bia mpila yo ko, tulendi hombesa timinu tieto mu Yehova, mpe tulendi bika mu mu sarila. Mu timoko ti, mbo tumona bwe tifu tia tûla mabanza meto mu mitieno mia Bibila tilendi tu bakisila tala ti ntembe ze neto ti 1) Yehova beto kakipaka, 2) nzengolo zeto za mu ntama za mbote zeri, peleko 3) salu kwa tatiri kwe Yehova.
NTI BILENDI KUBAKISA BU BÂKA NA NTEMBE
3. Nti tulendi sa bu tubâka na ntembe peleko na lwaka?
3 Bu tubâka na ntembe peleko lwaka, musamu wa mfunu wena mu dinga mvutu mu Bibila. Bu tusila bo, mbo tubaka lutindusu, mbo tukula mu timpeve mbo tubâ ‘basikama mu timinu.’—1 Kor. 16:13, NWT.
4. Bwe tulendi tomo ‘sungamana miamiansoni’? (1 Bisi-Tesalonike 5:21)
4 Tanga 1 Bisi-Tesalonike 5:21. Bibila ditutindisi mu tomo ‘sungamana miamiansoni.’ Bwe tulendi bwa sila? Tala ti ka twena na lukwikulu ko mu musamu wumosi, tufweti taluzula mio mitâka Bibila mu musamu wo. Mu tifwani, ntwenia yimosi yita tiyula tala ti ntalu kena ha meso ma Yehova. Ngano fweti bika mu dinga mvutu ya tiyuvu tio? Kâni, fweti tomo ‘sungamana miamiansoni’ bu kadinga mabanza ma Yehova mu tiyuvu tio.
5. Bwe tubakilaka mvutu za Yehova mu biyuvu bieto?
5 Bu tutangaka Bibila, Yehova tubikaka katuzonzela. Kâ mu zaba mabanza mandi mu musamu, tufweti sarila ngolo. Tufweti dinga mpe tufweti sa ndongokolo ya verse zita hanina mvutu mu musamu we neto. Tulendi sa recherches mu bungu dia musamu wo bu tusarila bisalulu bia ndongokolo bia organizasio ya Yehova. (Bin. 2:3-6) Tulendi sambila Yehova katwarisa recherches zeto mpe katubakisa mu baka mabanza mandi mu musamu we neto. Ha manima, tulendi dinga mitieno mia Bibila na nsangu zakaka zita tarila musamu’eto. Wulendi bâ mpe mfunu mu taluzula binsamu bia bantu mu Bibila babwabana na musamu we neto.
6. Bwe tukutakanu tulendi tubakisila mu telamana ntembe zeto?
6 Yehova beto kazonzelaka mu nzila ya lukutakanu. Tala ti ku tukutakanu tuvulu kwendaka, tulendi wâ musamu mu tinzonzi peleko mu mvutu ya mpangi yimosi wusa ti tatelamana ntembe zeto. (Bin. 27:17) Bwawu bu tataluzula nti tulendi sa mu telamana ntembe zeto.
BU BÂKA NA NTEMBE TI NZAMBI NGE KAKIPAKA
7. Bantu bakaka ntia tiyuvu balendi tiyula?
7 Ngano weka tiyula: ‘Wa matieleka, Yehova meno kamonka?’ Tala ti mweni ti ka wena salu ko, lendi banza ti kulendi’â wabâ ndiku ya Nzambi ko yasala bima biabiansoni. Kampe mutinu Davide mabanza ni mo meri nandi. Wayituku bu kamona ti Yehova bantu ba kakipaka mpe ba kabelokelaka lwaka. Davide watâ: ‘Yehova muntu nti kena ngatu wamuzaba, mwana wa muntu ngatu wamubanzila?’ (Mik. 144:3) Ntia kûma lendi bakila mvutu ya tiyuvu tio?
8. Tintwari na 1 Samwele 16:6, 7, 10-12, nti Yehova kamonaka kwe bantu?
8 Bibila mbo ditulongesaka ti, Yehova bantu bamonaka ti kampe ka bena salu ko kakipaka. Mu tifwani, Yehova watambika Samwele ku nzo ya Yese mu kwe tumba mwana’andi wa bakala mu bâ mutinu ku Israele. Yese watikisa bala bandi ba 7 ba babakala mu kwiza kwe Samwele, kâ ka tikisa Davide ko weri muleke mu babansoni. b Kâ, Yehova wasola Davide. (Tanga 1 Samwele 16:6, 7, 10-12.) Yehova watomo zaba Davide—ntwenia yeri tomo zoloko misamu mia timpeve.
9. Mu bungu dia nti lendi kwikila ti Yehova nge kamonaka? (Tala mpe tifwani.)
9 Banza mu mpila Yehova yi keka kusongela ti nge kamonka. Malongi ma mbote kakuhanaka ma delakane na musamu we naku. (Mik. 32:8) Bwe Yehova kalendi sila bo, tala ti ka tomono’â ku zaba ko? (Mik. 139:1) Tala ti sariri malongi ma Yehova mpe bakuri bwe makubakisilaka, mbo bâ na lukwikulu ti Yehova nge kakipaka. (1 Nta. 28:9; Bis. 17:26, 27) Ngolo zisarilaka mu tumama Yehova za kamonaka. Bifu biaku bia mbote bia kamonaka, mpe zololo ti kabâ ndiku’aku. (Yer. 17:10) Dingana mbo kabâ mu nsayi tala ti tamburi mu bâ ndiku’andi.—1 Za 4:19.
‘Wamana dinga [Yehova], mbo katisongesa kwe nge.’—1 Nta. 28:9 (Tala paragrafe 9) c
BU BÂKA NA NTEMBE TI MU NTAMA NZENGOLO ZA NDWENGA WABONGA
10. Bu tubanzaka nzengolo zi tabonga mu ntama, ntia biyuvu tulendi tiyula?
10 Ntangu zakaka, bantu bakaka balendi banza nzengolo zi babonga mu ntama, mpe balendi tiyula tala ti za mbote zeri. Kampe bayizi bika tisalu tieri bafutaka bubote, peleko bakala mu zibula compagnie ngatu batomo sarila Yehova. Kampe mvula zazingi zeka yôka. Balendi bambukila bantu babazebi basa nsololo za swaswana na bawu, mpe bamonekaka ntiana’eti mbongo zazingi ze nawu na luzingu lwa mbote. Kampe, mbo batiyulaka: ‘Ngano nsololo yi nasa ya sarila Yehova ni yo yayôka bubote? Peleko wafwanakana nasala bwabwingi ngatu nabâ na mbongo zazingi lumbu ti?’
11. Nti bia nôkesa titsoniki tia Mikunga 73?
11 Tala ti biyuvu bio bia weka tiyula, taluzula mio mitâka Bibila mu bungu dia titsoniki tia Mikunga 73. Wamona bantu beri lembo sarilaka Yehova beri na tikolela tia mbote, beri na mbongo, mpe beri monekaka ntiana’eti ka beri’â na misamu ko mieri banatinaka lwaka. (Mik. 73:3-5, 12) Bu kamona ti bantu bo luzingu lwawu ntiana’eti lwa beri lendaka, wabanza ti ngolo zi keri saka mu sarila Yehova za mpamba kwa zeri. Tilumbu tia mukaka lwaka lweri nandi mu bungu dia mbanzulu zo zinôkesaka. (Mik. 73:13, 14) Bwe kabongela mbanzulu zandi za mbi?
12. Tintwari na Mikunga 73:16-18, nti biabakisa titsoniki tia mikunga bu keri na mbanzulu zinôkesaka?
12 Tanga Mikunga 73:16-18. Titsoniki tia mikunga wakota mu mbuka ya yinene ya santu ya Yehova. Mu mbuka yo, lenda dieri nandi diatomo banza. Wabakula ti ni bu sa ti luzingu lwa bantu bakaka mbo lweri monekaka ntiana’eti lwa mbote lweri, kâ ka beri’â na tivuvu ko mu bungu dia bilumbu bia ku matu. Buna, ka vutu’â nôka ko mu bungu ti lukwikulu lweri nandi ti tûla Yehova ha tibuka tia ntete mu luzingu, yo ni nzengolo yiyôkele bubote. Ndandu ni yena’eti, wavutu bonga nzengolo ya tatamana mu sarila Yehova.—Mik. 73:23-28.
13. Bwe lendi bêla na tidzunu mu mabanza tala ti ka wena na lukwikulu ko mu nzengolo zi wabonga mu ntama? (Tala mpe tifwani.)
13 Na lubakusu lwa Zu dia Nzambi lendi baka tidzunu tia mpila yo. Ngano bwe? Bambukila bima bia mbote bie naku, lusakumunu lwa Yehova na mu zaba ti nge katambulaka, mpe bambuka ti bô balembo mu sarilaka ka babakaka lubakusu lwandi ko. Bantu babingi balembo sarilaka Yehova mbo babanzaka ti bâ na tisalu tia mbote peleko luzingu lwa mbote tio ni tima tiyôkele mfunu, mu bungu ti ka bena na tivuvu ko mu bilumbu bia ku matu. Kâ nge, Yehova bima biabingi bia mbote kakukanisini yôka bio bilendi banza. (Mik. 145:16) Banza’eti mpe musamu ewu: Ngano lendi zaba bwe luzingu lwaku lwaketi bâ tala ti nsololo za swaswana wasa? Kâ lendi bâ na lukwikulu mu musamu ewu: Bu bongaka nzengolo zisikamanaka mu luzolo lwaku mu Nzambi na mu bantu, ntangu zazansoni mbo baka bima bikuhana nsayi yayingi.
Vulu dimbitilaka mu makabu ma mbote ma kuhana Yehova ku matu (Tala paragrafe 13) d
BU BÂKA NA NTEMBE TI SALU WENA KWE YEHOVA
14. Bakaka ntia misamu mie nawu, mpe ntia tiyuvu balendi tiyula?
14 Bisari biakaka bia Yehova ka balendi’â bavutu sala buna bu bazalolo ko mu bungu ti ba nuna beka, timbevo tie nawu, peleko tifuma tie nawu. Balendi banza ti ka basiri’â salu ko kwe Yehova. Balendi tiyula, ‘ngano salu kwa natiri kwe Yehova?’
15. Titsoniki tia Mikunga 71 mu ntia musamu keri na lukwikulu?
15 Titsoniki tia Mikunga 71 mbanzulu ni zo zeri nandi. Wasambila ebu: ‘Bu wa ngolo zani kundiyambirikandi.’ (Mik. 71:9, 18) Buna, titsoniki tia mikunga lukwikulu lweri nandi ti bu kaketi sarila Nzambi’andi na kwikama kwakwansoni, mbo kaketi mu twarisa mpe mbo kaketi mu yika moko. Ntiana bwa longoka wo titsoniki tia mikunga, Yehova mbo kayangalalaka mu bantu basaka miamiansoni mi balenda mu mu sarila ntono misamu mi bakabakasaka.—Mik. 37:23-25.
16. Bantu ba nuna mu ntia mpila bê salu kwe Yehova? (Mikunga 92:12-15)
16 Tala ti nge wa nuna wena, dimbitila mu mpila Yehova yi kakumwinaka. Lendi kubakisa mu mu sarila na kwikama kwakwansoni ni bu sa ti kusiri’â na ngolo zazingi ko. (Tanga Mikunga 92:12-15.) Kani watûla mabanza maku mu mio mi lembo lenda mu yirika, tûla mo mu misamu mi lenda mu yirika. Mu tifwani, Lendi tindisa bantu bakaka mu tifwani tiaku tia kwikama na mu mpila yi bakipilaka. Lendi zonzela mpila Yehova yi kakubakisila tûka mivu, mpe lendi zonzela tivuvu tiaku tia ngolo mu ndungananu ya makani ma Nzambi. Mpe bambuka ti tusambulu tu saka mu bungu dia bantu bakaka mfunu twena. (1 Pi. 3:12) Musamu ni musamu we neto, beto bansoni lenda die neto dia hana tima kwe Yehova na kwe bantu bakaka.
17. Mu bungu dia nti tufweti lembo tifwanakasa na bantu bakaka?
17 Tala ti wanionga wena mu lembo vutu sala bwabwingi mu tisalu tia Yehova, bâ na lukwikulu ti ntalu wena ha meso mandi mu mio mi lungisaka. Lendi dinga mu fwanakasa misamu mi we na mio lenda mu yirika na mia bantu bakaka. Kâ kusandi bo! Mu bungu dia nti? Mu bungu ti Yehova ka tu fwanakasaka ko na bantu bakaka. (Nga. 6:4) Mu tifwani, Mariya wahana kabu dia fwa ntalu dia mafutu meri na nsunga ya mbote. (Za 12:3-5) Ku lweka lwakaka, mufwiri weri mputu wahana mipata miole mia lembo bâ na ntalu yayingi. (Like 21:1-4) Yezu ka fwanakasa bakento bo ko, kâ wamona timinu tiawu. Yehova, Tata’andi, miamiansoni mi yirikaka mu luzolo lwaku mu Yandi, ni bu sa ti mia fioti miena mia kazololo.
18. Nti bitubakisa mu telamana ntembe zeto? (Tala mpe kaku “ Zu dia Yehova dilendi tu bakisa mu telemana ntembe zeto.”)
18 Ntangu zakaka beto bansoni ntembe zibâka neto. Ntiana bu tumweni wo, Zu dia Nzambi dilendi tu bakisa mu telamana zo. Buna, sa miamiansoni mi lenda mu baka mvutu mu biyuvu bie naku. Yehova nge kazebi. Nsololo zisaka mu mu tûla ha tibuka tia ntete mu luzingu lwaku za kazololo, mpe mbo kalungisa kani diandi dia kusenda. Bâ na lukwikulu ti Yehova muna tisari tiandi tia kwikama kazololo mpe kabelokelaka lwaka.
MUKUNGA 111 Yehova ni nsayi’eto
a NTELO YI BABANGURI: Mu timoko ti, ntembe zi tuta zonzela ni zo zita tarila ntalu ye neto ha meso ma Yehova, peleko nzengolo za ndwenga zi tabonga. Kâ ka zena ntembe ko zi bazonzelaka mu Bibila zisongelaka kondo kwa timinu mu Yehova na mu makani mandi.
b Ni bu sa ti Bibila ka ditutêlaka ko Davide mvula kwa zeri nandi Yehova bu kamusola, kampe ntwenia kwa yeri (adolescent).—Tala Nzo ya Zangama ya Munkengi ya 1er septembre 2011, tin. 29, par. 2.
