1. Ngano ntia tindiku bantu ba kwikama balendi bâ na tio na Yehova?

MU KANDA dia Yehova, mwe na Yezu ‘watoko butuka mu biabiansoni biayiluku’ mpe na bambazi babingi. (Kol. 1:15; Mik. 103:20) Yezu bu keri ha mutoto, wabakisa bantu mu bakula ti lenda dieri nawu dia tâ Yehova Tata’awu. Bu keri zonzaka kwe milongoki miandi, Yezu watâ Yehova ‘Tata’ani, mpe Tata’eno.’ (Za 20:17) Mu ntangu yi tutihanaka kwe Yehova, mpe yi tubatusuku, mbo tukwizi kotaka mu kanda dia luzolo dia bampangi.​—Mak. 10:29, 30

2. Ngano nti tuzonzela mu timoko ti?

² Kwe bantu bakaka musamu wa mpasi wena mu bongela Yehova ntiana Tata dia luzolo. Kampe bakaka ka bazebi’â ko ka bwe balendi songela luzolo kwe mpangi zawu. Mu timoko ti, mbo tumona ka bwe Yezu katubakisilaka mu mona Yehova ntiana Tata dia luzolo, mpe ka bwe tulendi pusana kwe Yandi. Mbo tulongoka mpe ka bwe tulendi landila tifwani tia Yehova mu mpila yi tubongelaka mpangi zeto.

3. Ngano bwe lusambulu lwa longesa Yezu lutubakisilaka mu pusana kwe Yehova?

³ Yehova Tata dia luzolo diena. Yezu mbo kazoloko tabongela Yehova mu mpila yi kamubongelaka yandi​—ntiana tata die na nsayi mpe dia luzolo di tulendi zonzela mu ntangu ni ntangu yi tuzololo, kâ ka ntiana muntu’â ko wulembolo na nsayi, mpe wututêlaka kwa misamu mi tufweti yirika. Mbo tumonaka wo mu mpila yi kalongesela milongoki miandi mu sambila. Wabatikila lusambulu mu ntelo ya: “Tata’eto.” (Mat. 6:9) Yezu lenda dieri nandi dia tâ Yehova “Nkwa-Ngolo-Zazansoni,” “Mvangi,” peleko “Mutinu wa ntangu zazansoni”​—ntelo zo zazansoni za delakana  zena, mpe mu Bibila zena. (Mba. 49:25; Iza. 40:28; 1 Tim. 1:17) Kâ, Yezu watutêla tatâka Yehova, “Tata.”

4. Ngano bwe tuzabiri ti Yehova zololo ti tapusana kwe Yandi?

⁴ Ngano musamu wa mpasi wena kwe nge mu mona ti Yehova Tata dia luzolo diena? Bantu bakaka mu beto ni bo bamonaka. Tala ti tata’eto keri’â na nsayi ko, wulendi bâ musamu wa mpasi mu banza ti tata die kô dituzololo. Kâ, nkatika lutindusu lwena mu zaba ti Yehova mbanzulu zeto za katomo bakulaka! Zololo ti kabâ penepene na beto. Ntiangu Zu diandi ditutindisaka ebu: “Pusaneno kwe Nzambi, mpe Yandi mbo kapusana kwe beno.” (Zaki 4:8, NWT) Yehova beto kazololo, mpe mbo katâka ti mbo kabâ Tata diyôkele matata mamansoni.

5. Tintwari na Like 10:22, bwe Yezu kalendi tu bakisila mu pusana kwe Yehova?

⁵ Yezu lendi tu bakisa mu pusana kwe Yehova. Yezu, Yehova Yandi katomono zaba, mpe mbo kalandaka bifu biandi mu mpila ya lunga, ntiangu katâ ti: ‘Wô kumweni, mweni mpe Tata.’ (Za 14:9) Ntiana kwa yaye’eto, Yezu mbo katulongesaka ka bwe tuzitisila mpe tutumamana Tata’eto, bwe tulendi sa mu lembo mu niongesa, mpe ka bwe tusa ngatu katutambula. Kâ mpila Yezu yi keri natinaka luzingu lwandi bu keri ha mutoto, mbo yisongelaka ti Yehova nsayi ye nandi mpe beto kazololo. (Tanga Like 10:22.) Tazonzeleno mwa bifwani.

6. Hana bifwani bita songela ti Yehova, Yezu keri wirikilaka.

⁶ Yehova bala bandi ba kawirikilaka. Tataleno mpila Yehova yi kawirikila Mwana’andi wa ntete. Kampe, Yehova wawirikila tusambulu twatwingi twa Mwana’andi mu ntangu yi keri ha mutoto. (Like 5:16) Wawirikila Yezu bu keri mu sambilaka mu bungu dia nzengolo za zinene, ntiana mu ntangu yi kasola ntumwa za 12. (Like 6:12, 13) Yehova wawirikila mpe tusambulu twa Yezu mu ntangu yi keri na lwaka lwalwingi. Ntete bamuteka, Yezu watomo sambila Tata’andi mu bungu dia misamu mia mpasi miaketi mu turila. Yehova keri’â  wirikilaka kwa tusambulu twa Yezu ko, kâ watambika mpe mbazi yayika ngolo Mwana’andi wu katomono zolo.​—Like 22:41-44.

7. Bwe tufweti mona ku mutima bu tuzebi ti Yehova tusambulu tweto kawirikilaka?

⁷ Lumbu ti, Yehova mbo katatamanaka mu wirikila tusambulu twa bisari biandi, mpe mbo kabahanaka mvutu mu ntangu yifwanakane na mu mpila yiyôkele bubote. (Mik. 116:1, 2) Tataleno bwe mpangi yimosi ya yikento ya ku Inde yamwina mpila Yehova yi kahaninaka mvutu mu tusambulu. Lwaka lwalwingi lweri nandi, mpe wasambila Yehova na bunsungu bwabwansoni mu bungu dia musamu’andi. Têle ti: “JW Télédiffusion ya mai 2019 yazonzela ka bwe tulendi sa bu tubâka na maniongo mpe na lwaka, tima tieri tiakumfwanaka. Mvutu ya tusambulu twani yeri.”

8. Mu ntia mpila Yehova kasongela luzolo kwe Yezu?

⁸ Yehova beto kazololo mpe beto kakipaka, ntiana kwa bu kazolo Yezu mpe bu kamukipa mu misamu mia mpasi miamuturila bu keri ha mutoto. (Za 5:20) Wabakisa Yezu mu tatamana mu bâ na timinu tia ngolo, wamutindisa bu keri mu mpasi, mpe wakipa nsatu zandi za tinsuni. Yehova watêla mpe Mwana’andi ti yandi kazololo, mpe yandi keri tambulaka. (Mat. 3:16, 17) Yezu wazaba ti Tata’andi dia ku mazulu mbo kaketi tatamana mu bâ nandi, mpe mbo kaketi mu bakisa. Buna, kani kabwe Yezu keri’â monaka ko ti yandi kaka weri.​—Za 8:16.

9. Bwe tuzabiri ti Yehova beto kazololo?

⁹ Ntiana Yezu, beto bansoni tweka mona ti Yehova beto kazololo mu mpila zazingi. Banzeno’eti: Yehova watubenda kwe Yandi, watuhana kanda dia luzolo dia timpeve die na bumosi ditutâka nsayi, mpe ditutindisaka bu tubâka mu mpasi. (Za 6:44) Yehova mbo katuhanaka bima biabiansoni bie neto nsatu ngatu timinu tieto tiatatamana mu bâ ngolo. Mbo katubakisaka mpe mu baka bima bia tinsuni bilumbu biabiansoni. (Mat. 6:31, 32) Bu tudimbitila mu luzolo lwe na Yehova mu beto, luzolo lweto mu Yandi mbo lukula.

10. Ngano nti tulendi longoka mu mpila Yehova yi kabongelaka mpangi zeto?

¹⁰ Yehova mpangi zeto za kazololo. Kâ, ntangu zazansoni ka wubâka musamu wa fioti ko kwe beto mu ba songela ti bawu tuzoloko. Ntangu zakaka mbo wubâka musamu wa mpasi mu bungu ti bikulu bia swaswana bie neto, peleko mbuka za swaswana tatûka. Mpe beto bansoni tulendi yirika misamu milendi niongesa mpe milendi nôkesa bampwana’eto. Kâ, tulendi yika luzolo lwa kanda dieto dia timpeve ngolo. Ngano bwe? Bu tulanda tifwani tia Tata’eto mu mpila yi kasongelaka luzolo. (Efz. 5:1, 2; 1 Za. 4:19) Tataleno misamu mi tulendi longoka mu tifwani tia Yehova.

11. Ngano bwe Yezu kalandila tiari tia mutima tia Yehova?

¹¹ Yehova mbo kasongelaka tiari tia mutima. (Like 1:78) Muntu we na tiari tia mutima, mbo wubâka na lwaka bu kamonaka bantu bê mu mpasi; mbo wudingaka mpila zi kalendi ba bakisila, mpe zi kalendi ba tindisila. Yezu walanda tifwani tia Yehova bu keri bongelaka bantu na tiari tia mutima. (Za 5:19) Lumbu timosi, bu kamona nzanda bantu, Yezu ‘tiari tiamubaka, mu bungu ti [babaniekona mpe babayambirika] ntiana bimeme bikondolo [muvungi].’ (Mat. 9:36) Yezu kabâ kwa na tiari ko mu bawu, kâ wasa mpe tima mu ba bakisa. Wawasisa bambevo, mpe wabakisa bô beri ba fwatika mpe beri na madema.​—Mat. 11:28-30; 14:14.

12. Bwe tulendi songela tiari tia mutima kwe mpangi zeto?

¹² Mu songela tiari tia mutima kwe mpangi  zeto, tufweti toko zaba ka ntia misamu mia mpasi mie nawu. Mu tifwani, mpangi ya yikento yilendi bâ na timbevo tia ngolo. Mpe kani kabwe ka zonzelaka timbevo tiandi ko, kâ lendi bâ na nsayi yayingi tala ti bamuheni lubakusu lwe nandi nsatu. Bwe kakipilaka nsatu za tinsuni za kanda diandi? Ngano tulendi mu lambila peleko tulendi mu bakisa mu kipa nzo? Mpangi ya yibakala yilendi lembo sâla na tisalu. Ngano tulendi mu sila mwa kabu dia mbongo, mu mansweki, zilendi mu bakisa mu tikipa tii ntangu yi kabaka tisalu tiakaka?

13-14. Bwe tulendi landila tifu tia kaba tia Yehova?

¹³ Yehova kaba kakabaka. (Mat. 5:45) Ka tufweti’â takêlaka ko ti mpangi zeto zalomba lubakusu ngatu tabasongela tiari tia mutima. Ntiana Yehova, tulendi yirika misamu mu bungu dia mpangi zeto ntete batulomba lubakusu. Ni bu sa ti katulombaka wo ko, Yehova mbo katudukisilaka ntangu bilumbu biabiansoni! Mpe mwini wu hanaka ntangu, mbo wunataka ndandu kwe bantu babansoni, bô batondaka na bô balembo tondaka. Yehova mbo kasongelaka ti beto kazololo bu katuhanaka bima bie neto nsatu. Yehova Yandi tutomono zolo mu bungu ti nsayi ye nandi mpe kaba kakabaka!

¹⁴ Mpangi zeto zazingi zilandaka tifwani tia Yehova mpe zikabaka kwe bampwana’awu. Mu tifwani, mu 2013, titembo tia ngolo (typhon) tieri na nkumbu Haiyan tiabebesa bima biabingi ku Philippines. Mpangi zakaka zahombesa nzo na bima biawu biakaka. Kâ kanda diawu dia timpeve dia mu nza ya mukaka diakulu ba bakisa. Babingi bahana lubakusu lwa mbongo, bakaka batunga nzo, mpe musamu wo wasa ti batunga peleko bayirika nzo yôka 750 mu muvu wumosi! Mu ntangu ya COVID-19, Mbangi za Yehova zasariri tisalu tia ngolo mu bakisa mpangi zawu. Bu tusarilaka manzangu mu bakisa mpangi zeto za timpeve, mbo tubasongelaka ti bawu tuzoloko.

15-16. Tintwari na Like 6:36, nti tufweti sa mu landa tifwani tia Tata’eto dia ku mazulu?

¹⁵ Yehova tiari tia lemvokela tie nandi mpe lemvokela kalemvokelaka. (Tanga Like 6:36.) Bilumbu biabiansoni mbo tumonaka tiari tia lemvokela tia Tata’eto dia ku mazulu.  (Mik. 103:10-14) Milongoki mia Yezu bantu ba masumu beri; kâ Yezu wabasongela tiari tia lemvokela mpe mbo keri ba lemvokelaka. Wa kubama weri mu hana luzingu lwandi mu mukayulu ngatu balemvokela masumu meto. (1 Za 2:1, 2) Mu bungu dia tiari tia lemvokela na tifu tia lemvokela bisongelaka Yehova na Yezu, mbo tubâka na nsatu ya pusana kwe bawu?

¹⁶ Mbo tuyikaka luzolo lwa kanda dieto dia timpeve ngolo bu tukwe lemvokele bampwana’eto. (Efz. 4:32) Ntangu zakaka musamu wa mpasi wubâka mu lemvokela bampwana’eto, buna tufweti sarila ngolo. Mpangi mosi ya yikento timoko tia Nzo ya Zangama ya Munkengi tie na mutu-diambu “Pardonnons-​nous volontiers les uns aux autres” tiamubakisa mu sila bo. * Watsoneka ti: “Timoko tio tiakumbakisa mu bâ na mabanza ma delakana mu tifu tia lemvokela. Tiabangula ti bu lemvokelaka bantu bakaka, ka wuta zolo tâ ko ti ndiatulu’awu ya mbi ta tambula peleko musamu wu bakuyirikiri ka wukusiri’â mpasi ko. Kâ bu ba lemvokela, kuvutu’â bâ na diki mu bawu ko mpe mbo bâ mu tidzunu.” Bu tukwe lemvokele mpangi zeto mu luzolo lwa mutima, mbo tusongela ti bawu tuzololo mpe mbo tusongelaka ti tifwani tia Tata’eto Yehova tulandaka.

17. Tintwari na Matie 5:16, bwe tulendi kembela Tata’eto dia ku mazulu?

¹⁷ Mbo tutomo tondaka mu bungu ti kanda dia bampangi bê na luzolo die neto mu nza ya mukaka. Tuzololo ti bantu babingi bizi basambila Nzambi’eto tintwari na beto. Buna, tufweti sa keba mu yirika misamu misa ti bantu babâ na mbanzulu za mbi mu Yehova peleko mu kanda diandi. Mbo tusarilaka ngolo mu bâ na ndiatulu yisa ti bantu batambula nsangu za mbote.​—Tanga Matie 5:16.

18. Nti bilendi tu bakisa mu samuna na butindi bwabwansoni?

¹⁸ Ntangu zakaka, bantu balendi tu sehesela peleko balendi tu kwamisa mu bungu ti Tata’eto die ku mazulu tutumamanaka. Ngano nti tulendi sa tala ti bunkuta bwe neto mu zonzela nkwikulu zeto kwe bantu bakaka? Tulendi bâ  na lukwikulu ti Yehova na Yezu mbo batubakisa. Yezu watâ kwe milongoki miandi ti ka babândi na lwaka mu bungu dia misamu mi batâ na mpila yi batêla mio. Mu bungu dia nti? Yezu wabangula ti: ‘Mi lutâ hâna, ni mîna miluturila muna ntangu mûna, bungu diangana, ka beno’â ko luzonza, kâ ni [mpeve] ya Tata’eno yizonza mu beno.’​—Mat. 10:19, 20.

19. Hana tifwani tia muntu wasamuna na butindi bwabwansoni.

¹⁹ Tabongeno tifwani tia Robert. Ha mbatukulu, bu keri mulongoki wa Bibila, keri’â na luzabu lwalwingi ko lwa Bibila, bamutikisa ku Nzo ya Mfundusu ya bambulumbulu ku Afrique du Sud. Na butindi bwabwansoni watâ ti wazolo mu tatamana mu lembo kota misamu mia politike mu bungu dia luzolo lwandi mu mpangi zandi za Bakristo. Tibuka tiandi tia kazolo mu kanda dieto dia timpeve! Mfundisi wamuyula: “Ngano mpangi zeno ni banani?” Robert keri’â kêlaka tiyuvu tia mpila yo ko, kâ na manzangu mamansoni wabambukila verse ya tilumbu. Verse yango ni Matie 12:50 yitâka ti: ‘Diangana wûna sa bu zololo Tata’ani we ku zulu, yandi wûna ni mpangi’ani ni busi tiani na nguri’ani.’ Ni busa ti Robert ka ntama ko kayizi bâ mulongoki wa Bibila, mpeve ya Yehova yamubukisa mu hana mvutu mu tiyuvu ti bamuyula na mu biyuvu biakaka. Yehova watomo yangalala mu bungu dia Robert! Yehova mbo kayangalalaka mu beto bu tumusikirilaka mu samuna na butindi bwabwansoni mu ntangu ya mpasi.

20. Ntia nzengolo tufweti bonga? (Za 17:11, 15)

²⁰ Tatatamaneno mu zolo lusakumunu lwe neto lwa bâ mu kati dia kanda dia timpeve dia luzolo. Tata die neto diyôkele matata mamansoni, mpe mpangi zituzololo ze neto. Ntangu zazansoni tufweti tondaka mu bungu dia musamu wo. Satana na bilandi biandi bazololo ti tabâ na ntembe mu luzolo lwe na Tata’eto die ku mazulu, mbo kayêlaka mu kotesa vwandi mu bumosi bwe neto. Kâ Yezu mu nzila ya lusambulu, walomba kwe Tata’andi katukengerela, ngatu bumosi bweto bwatatamana. (Tanga Za 17:11, 15.) Lusambulu lo, Yehova lwa kahaninaka mvutu. Ntiana Yezu, ka tubâkandi na ntembe mu luzolo na mu lubakusu lwa Tata’eto die ku mazulu. Tabongeno nzengolo ya tatamana mu tomo bâ penepene na kanda dieto dia timpeve.