TIMOKO TIA NDONGOKOLO 40
‘Banata nzanda bantu ku buderede’
‘Bô banata nzanda bantu ku buderede, mbo bakenga ntiana mbwetete mankululu.’—DAN. 12:3.
MUKUNGA 151 Mbo katâ mbila
BUKUFI BWA TIMOKO *
1. Ntia misamu mia toma mita tu kêla mu ntangu ya luyalu lwa mvula 1 000?
DIANGANA mbo tibâ tilumbu tia nguria tia nzitukulu bu batika mvumbukulu ya ba fwa ha mutoto mu ntangu ya luyalu lwa mvula 1 000 lwa Kristo! Bô bahombesa bantu ba bazololo timina dibâka nawu mu vutu ba mona. Yehova mpe timina ni dio die nandi. (Yobe 14:15) Banza ka ntia mpila nsayi yibâ na bantu babâ ha mutoto bu bavutu mona bantu ba bazolo bavumbuka kwe ba fwa. Ntiana bu talongokele wo mu timoko tiayôkele, “bantu ba sungama,” bê na nkumbu za tsonama mu buku dia luzingu, mbo babaka “mvumbukulu ya luzingu.” (Bis. 24:15; Za 5:29) Kampe bantu babîngi ba tafwilulu mbo bavumbuka ntangu fioti ha manima ma Armagedo. * Mpe, “bantu balembolo ba sungama,” balembo tomo bwa bweso bwa zaba Yehova, peleko bwa mu sarila na kwikama kwakwansoni ntete lufwa lwawu, mbo babaka ‘mvumbukulu ya mfundusu.’
2-3. a) Ntiana bu têle wo Izaya 11:9, 10, ntia tisalu tia tinene tia ndongosolo tisalama? b) Nti tutaluzula mu timoko ti?
2 Bantu babansoni bavumbuka kwe ba fwa mbo babâ na nsatu babalongesa. (Iza. 26:9; 61:11) Buna, mbo wufwanakana tasala tisalu tia tinene tia ndongosolo tialembo toko salama ha mutoto. (Tanga Izaya 11:9, 10.) Mu bungu dia nti? Mu bungu ti ku lweka lwa ntete bantu balembolo ba sungama bavumbuka, bafweti longoka mu zaba misamu mitariri Yezu Kristo, Timfumu tia Nzambi, nkûlulu, na mfunu ya nkumbu ya Yehova na nswa’andi wa yâla. Ku lweka lwakaka, bantu ba sungama bafweti longoka mu zaba misamu mia yizi zabikisa Yehova malembe-malembe mitariri kani diandi mu bungu dia mutoto. Bantu ba kwikama bakaka batifwila tûka ntama, ntete Bibila diabâ dia mukaka. Bantu balembolo ba sungama na ba sungama, misamu miamingi balongoka.
3 Mu timoko ti, mbo tutaluzula biyuvu ebi: Bwe tisalu tio tia tinene tia ndongosolo tisalamana? Bwe tinatina nsobolo mu nkumbu zitsonama mankululu peleko kâni mu buku dia luzingu? Mvutu za biyuvu bio mfunu zena lumbu ti. Ntiana bu tumona wo, mbikululu zakaka ze mu buku dia Daniele na dia Nzabukusu mbo zitubakisa mu delakasa ngwilu’eto mu misamu miyôka mu ntangu yi bavumbula bantu ba fwa. Ntete-ntete, tataluzuleno misamu mia toma mi babikula mu Daniele 12:1, 2.
‘BÔ BASEKA MU MFUMFUTA ZA MUTOTO MBO BAVUMBUKA’
4-5. Ngano Daniele 12:1 bwe yitâka mu bungu dia ntangu ya mansukina?
4 Tanga Daniele 12:1. Buku dia Daniele mbo dibangulaka mpila yi yôkela misamu mia nzitukulu mu ntangu ya mansukina. Mu tifwani, Daniele 12:1 mbo yibangulaka ti Mikayele, wuzololo tâ Yezu Kristo, telamane ‘mu bungu dia bubote bwa kanda [dia Nzambi].’ Titini ti tia mbikululu tiabatika mu lungana mu 1914, mu ntangu yi batumba Yezu Mutinu wa Timfumu tia Nzambi tia ku mazulu.
5 Kâ, Daniele watâ mpe ti Yezu ‘mbo katelama’ mu ‘ntangu ya mpasi ntiana bu yalembo toko kwa bâ tûka bwa salama nsi ya ntete tii mu ntangu yo.’ ‘Ntangu yo ya mpasi’ ni “mpasi ziyôkele” zi bazonzelaka mu Matie 24:21. Yezu mbo katelama, peleko mbo kanwanina kanda dia Nzambi, ku nsuka ya ntangu yo ya mpasi, wuzololo tâ ku Armagedo. Buku dia Nzabukusu mbo ditâka ti kanda dio ni yungi dia bantu ‘batûkiri ku mpasi ziyôkele.’—Nza. 7:9, 14.
6. Nti bitula mu ntangu yungi dia bantu divuka mu mpasi ziyôkele? Bangula. (Tala mpe mutu-diambu wa “Biyuvu bia bitangi” wutariri mvumbukulu ha mutoto.)
6 Tanga Daniele 12:2. Ngano nti biyôka bu mana vuka yungi dia bantu mu ntangu ya mpasi? Mbikululu yo ka yita tarila mvumbukulu ya timpeve ko ya bisari bia Nzambi yisalamaka mu bilumbu bia mansukina, ntiana bu tweri toko wa tâka. * Kâ, verse yo mbo yizonzelaka mvumbukulu ya ba fwa yisalama mu nza ya môna. Mu bungu dia nti tuta têla bo? Ntelo ya ‘mfumfuta’ mbo basarilaka yo mpe mu Yobe 17:16 yidelakanaka na ntelo ya “Mpiema.” Musamu wo wusongele ti Daniele 12:2 mbo yizonzelaka mvumbukulu ya ba fwa yisalama ha manima ma nsuka ya bilumbu bia mansukina, mpe ha manima ma muzingu wa Armagedo.
7. a) Mu bwe bantu bakaka bavumbukila kwe ba fwa mu baka luzingu lwa mankululu? b) Mu bwe mvumbukulu yo yiyôkele bubote?
7 Kâ, ngano Daniele 12:2 bwe yizolo tâka bu yitâka ti bantu bakaka mbo bavumbuka kwe ba fwa mu baka “luzingu lwa mankululu”? Yizololo tâ ti mu ntangu ya luyalu lwa funda dia mivu, bô bavumbuka mpe balongoka mu mu zaba peleko batatamana mu longoka, na mu tumamana Yehova na Yezu mbo bakwizi baka luzingu lwa mankululu. (Za 17:3) Diangana mvumbukulu yo mbo yiyôka zo zasalama mu ntama. (Ebr. 11:35) Mu bungu dia nti? Mu bungu ti bantu bo ba masumu ba bavumbula bavutu fwa.
8. Mu ntia mpila bakaka bavumbukila ‘ku bifingu na ku busafu bwa mankululu’?
8 Kâ, bantu babansoni bavumbuka ka batambula ndongosolo ya Yehova ko. Mbikululu ya Daniele mbo yitâka ti bantu bakaka mbo bavumbuka ‘ku bifingu na busafu bwa mankululu.’ Mu bungu ti mbo basongela ti bukolo bwe nawu, nkumbu zawu ka zitsonama mu buku dia luzingu ko, mpe ka babaka luzingu lwa mankululu ko. Kâ, mbo babaka ‘busafu bwa mankululu,’ peleko mfukulu. Buna, Daniele 12:2 mbo yizonzelaka musendo wu baka bantu bavumbuka kwe ba fwa mu misamu mi bayirika ha manima ma mvumbukulu’awu. * (Nza. 20:12) Bakaka mbo babaka luzingu lwa mankululu, bakaka kâni.
‘BANATA NZANDA BANTU KU BUDEREDE’
9-10. Nti biakaka bitula ha manima ma mpasi ziyôkele, mpe banani ‘bakenga buna bu kengaka zulu’?
9 Tanga Daniele 12:3. Nti biakaka bitula ha manima ma ‘ntangu ya mpasi’? Mu Daniele 12:2, verse 3 mbo yizonzelaka tima titula ha manima ma mpasi ziyôkele.
10 Banani ‘bakenga buna bu kengaka zulu’? Mbo tubakaka tidimbu mu misamu mia tâ Yezu mu Matie 13:43: ‘Ba sungama konga, mbo bakenga ntiana ntangu mu Timfumu tia Tata’awu.’ Bu tutomo taluzula verse yo, Yezu mbo keri zonzelaka “bala ba Timfumu,” mpangi zandi za tumbu, basala nandi tintwari mu Timfumu tia mazulu. (Mat. 13:38) Buna Daniele 12:3 mbo yizonzelaka bantu ba tumbu na tisalu ti basala mu ntangu ya luyalu lwa mvula 1 000.
Bantu ba 144 000 mbo basala tintwari na Yezu Kristo mu twarisa tisalu tia ndongosolo tisalama mu ntangu ya mvula 1 000 (Tala paragrafe 11)
11-12. Bantu ba 144 000 ntia tisalu basala mu ntangu ya luyalu lwa fuda dia mivu?
11 Mu ntia mpila Bakristo ba tumbu banatina ‘nzanda bantu ku buderede’? Bakristo ba tumbu mbo basala tintwari na Yezu Kristo mu twarisa tisalu tia ndongosolo tisalama ha mutoto mu ntangu ya luyalu lwa mvula 1 000. Bantu ba 144 000 mbo babâ mitinu, kâ mpe mbo babâ Banganga-Nzambi. (Nza. 1:6; 5:10; 20:6) Mu mpila yo mbo babakisa makanda mu wasa—mpe malembe-malembe mbo basa ti bantu bizi babâ ba lunga. (Nza. 22:1, 2; Ezk. 47:12) Ntia mpila nsayi yibâ na bantu ba tumbu!
12 ‘Nzanda bantu’ yi banata ku buderede ni banani? Ni bantu ba bavumbula kwe ba fwa na bô bavuka ku muzingu wa Armagedo, na bala babansoni balendi butuka mu nza ya môna. Ku nsuka ya luyalu lwa mvula 1 000, bantu babansoni ha mutoto mbo babâ ba lunga. Buna, ntia ntangu nkumbu zawu zitsonama mankululu mu encre kani zabâ za tsonoko mu crayon mu buku dia luzingu?
NTONTOLO YA MANSUKINA
13-14. Bantu ba lunga babâ ha mutoto nti bafweti songela ntete babaka luzingu lwa mankululu?
13 Tufweti bambukaka ti tala ti muntu wa lunga wena, ka wuzololo’â tâ ko ti fweti baka luzingu lwa mankululu. Banza’eti mu Adame na Eva. Ba lunga beri, kâ bafweti tumamana Yehova ntete bazinga mankululu. Kâ, musamu wa tiari, ka bamutumamana ko.—Rom. 5:12.
14 Ku nsuka ya luyalu lwa mvula 1 000, bô babâ ha mutoto bwe babâ? Babansoni mbo bakwizi bâ ba lunga. Ngano bantu bo ba lunga ntangu zazansoni mbo batomo singasa lutumu lwa Yehova? Peleko mbo babâ ntiana Adame na Eva—bayizi kolama ni bu sa ti ba lunga beri? Biyuvu bio bafweti bia hanina mvutu, kâ bwe?
15-16. a) Mu ntia ntangu bantu babâ na bweso bwa songela ti ba kwikama bena kwe Yehova? b) Ntontolo ya mansukina ntia ndandu yinata?
15 Satana mbo bamukotesa boloko dia mvula 1 000. Mu ntangu yo ka bâ na lenda ko dia wubakasa bantu. Kâ, ku nsuka ya mvula 1 000, Satana mbo bamudukisa ku boloko. Ha manima mbo kadinga mu wubakasa bantu ba lunga. Mu ntangu yo ya ntontolo, bantu babansoni ba lunga ha mutoto mbo babwa bweso bwa songela tala ti nkumbu ya Nzambi bazitisa, mpe lutumu lwandi basingasa. (Nza. 20:7-10) Misamu mi bayirika mu ntangu yo, mbo misongela tala ti nkumbu zawu zifweti tsonama mankululu mu buku dia luzingu.
16 Bibila mbo ditutêlaka ti bantu bakaka mbo babâ ntiana Adame na Eva, bu bakala lutumu lwa Yehova. Ngano nti bibaturila? Nzabukusu 20:15 mbo yitutêlaka ti: ‘Bô babansoni balembo bâ na nkumbu za tsonama mu buku dia luzingu babalosa mu zanga dia tiya.’ Diangana, bantu babansoni bakolama, mbo bafuka mankululu. Kâ, bantu babîngi ba lunga mbo banunga ntontolo yo. Buna, nkumbu zawu mbo zitsonama mankululu mu buku dia luzingu.
MU ‘NTANGU YA MANSUKINA’
17. Ntia misamu batâ kwe Daniele miyôka mu ntangu ya beto? (Daniele 12:4, 8-10)
17 Diangana musamu wa mbote wena mu dimbitila mu misamu mikwiza ku matu! Kâ, Daniele wabaka mpe nsangu za mfunu zatûka kwe mbazi, zitariri ntangu’eto, ‘ntangu ya mansukina.’ (Tanga Daniele 12:4, 8-10; 2 Tim. 3:1-5) Mbazi yatâ kwe Daniele ti: ‘Luzabu [lwa matieleka] mpe mbo luyikama.’ Mbikululu za buku diandi, mbo baketi tomo za bakula kwe kanda dia Nzambi. Mbazi yavutu tâ ti mu ntangu yo ‘Bankwa-mbi mbo basarila bubi bwawu. Na kani munkwa-mbi wumosi ka wubakula ko.’
18. Ngano bankwa-mbi nti bibaturila ntamana?
18 Lumbu ti mbo wumonekaka ntiana’eti bankwa-mbi kampe ka babasembaka ko mu bungu dia ndiatulu’awu ya mbi. (Mal. 3:14, 15) Kâ, ntamana Yezu mbo kafundisa bankwa-mbi bê ntiana bankombo, mpe mbo kabahambasa na bimeme. (Mat. 25:31-33) Bankwa-mbi bo ka bavuka ko ku mpasi ziyôkele, mpe ka babavumbula kwe ba fwa ko mu bâ mu nza ya môna. Nkumbu zawu ka zibâ mu ‘buku dia mbambukulu moyo ko’ di zonzelaka Malaki 3:16.
19. Ntia musamu tufweti yirika bwawu bu, mpe mu bungu dia nti? (Malaki 3:16-18)
19 Yi ni ntangu yi tufweti songela ti ka twena ku lweka lwa bankwa-mbi ko. (Tanga Malaki 3:16-18.) Yehova mbo kakutakasa bantu ba kabongelaka ntiana timvwama tiandi tia ntalu, peleko fwa dia Yandi beni. Ntembe kâni, tuzololo tabâ ku lweka lo.
Diangana musamu wa nsayi wubâ mu mona Daniele na bantu ba tuzololo, mpe na bantu bakaka batelama mu baka tikunku tiawu mu nza ya môna! (Tala paragrafe 20)
20. Ntia kani Yehova kasa kwe Daniele, mpe mu bungu dia nti kêlelaka dio na timina diadiansoni?
20 Wa matieleka, mu ntangu ya nzitukulu tuta zinga. Kâ, misamu miamingi mia nzitukulu miyilama ntamana. Ntamana, mbo tumona nsuka ya mbi yayansoni. Ha manima, mbo tumona ndungananu ya kani dia sa Yehova kwe Daniele, ditâka ti: ‘Mbo telama mu tambula tikunku tiaku ku nsuka ya bilumbu.’ (Dan. 12:13) Ngano mbo kêlaka na timina diadiansoni tilumbu ti vutu ‘telama’ Daniele na bantu ba zololo? Tala ti ni bo, sa miamiansoni mi lenda mu bâ wa kwikama, mpe lendi bâ na lukwikulu ti nkumbu’aku mbo yitatamana mu bâ ya tsonama mu buku dia luzingu dia Yehova.
MUKUNGA 80 “Bimbeno mpe moneno ti Yehova wa mbote wena”
^ Timoko ti mbo tidelakasa ngwilu’eto yitariri tisalu tia tinene tia ndongosolo ti zonzelaka Daniele 12:2, 3. Mbo tutaluzula ka mu ntia ntangu tisalama, mpe banani basala tio. Mbo tumona mpe ka bwe tisalu tio tia ndongosolo tikubikila bantu ha mutoto mu ntangu ya ntontolo za mansukina ku nsuka ya luyalu lwa mvula 1 000 lwa Kristo.
^ Kampe bantu ba ntete bavumbuka kwe ba fwa, ni bantu ba kwikama bafwaka mu ntangu yi ya mansukina, mpe ha manima bô bafwa mu ntama. Tala ti ni bo wuyôkela, muna muntu mbo kabwa bweso bwa bwana bantu ba kazaba. Mu mpila ni mpila, Bibila mbo dizonzelaka bunkete mu musamu wutariri mvumbukulu ya mazulu, mpe tulendi tâ ti mvumbukulu ya ba fwa ha mutoto mu bunkete mpe yiyôkela.—1 Kor. 14:33; 15:23.
^ Mbangululu yi yidelakase ngwilu’eto ye mu timoko tia 17 tia buku dia Prêtons attention à la prophétie de Daniel! Timoko 17, na ye mu Nzo ya Zangama ya Munkengi ya 1erjuillet 1987, bin. 21-25.
^ Mu swasikisa, ntelo ya “bantu ba sungama” na ya “bantu balembolo ba sungama” ze mu Bisalu 24:15 na ntelo ya “bô bayirika misamu mia mbote” mpe na ya “bô bayirika misamu mia mbi” ze mu Za 5:29 mbo zizonzelaka misamu mia yirika bantu bavumbuka kwe ba fwa ntete lufwa lwawu.
