Tataluzuleno mvutu za Bibila mu biyuvu bio.

Bisalu 24:15 mbo yitutêlaka ti ‘mvumbukulu ye kô ya bantu ba sungama, na ya bantu balembolo ba sungama.’ Bantu ba sungama ni bantu beri tumamanaka Nzambi ntete bafwa, buna nkumbu zawu za tsonoko zena mu buku dia luzingu. (Mal. 3:16) Bô balembolo ba sungama, ni bantu bafwa mpe basa lembo bâ na lenda dia longoka mu zaba Yehova; buna, nkumbu zawu ka zena za tsonoko ko mu buku dia luzingu.

Za 5:28, 29 mbo yizonzelaka bikunku bia biole bie mu Bisalu 24:15. Yezu watâ ti “bô bayirika misamu mia mbote” mbo babaka “mvumbukulu ya luzingu, mpe bô bayirika misamu mia mbi, mbo babaka mvumbukulu ya mfundusu.” Bantu ba sungama misamu mia mbote bayirika ntete lufwa lwawu. Mbo babaka mvumbukulu ya luzingu mu bungu ti nkumbu zawu za tsonoko zatiri mu buku dia luzingu. Kâ, bantu balembolo ba sungama misamu mia mbi beri yirikaka ntete lufwa lwawu. Mbo babaka mvumbukulu ya mfundusu. Nkumbu zawu ka zena za tsonoko ko mu buku dia luzingu mpe mbo bakwizi yôkesa ntangu ya mfundusu peleko ntangu yi bataluzula ndiatulu’awu. Mu ntangu yîna, mbo babâ na bweso bwa longoka mu tomo zaba Yehova na bwa tsonekesa nkumbu zawu mu buku dia luzingu.

Nzabukusu 20:12, 13 mbo yibangulaka ti mbo wufwanakana ti bantu babansoni bavumbuka kwe ba fwa batumamana misamu miatsonama mu “mabuku,” wuzololo tâ misiku mia môna mi tu hana Nzambi mu nza ya môna. Yehova mbo kafukisa bantu balembo tumama.​—Iza. 65:20.

Daniele 12:2 yabikula ti bantu babingi ba fwa babaka mvumbukulu ya ‘luzingu lwa mankululu’ mpe bakaka mbo babaka mvumbukulu ya ‘bifingu na busafu bwa mankululu.’ Verse yi mbo yizonzelaka mfundusu ya mansukina ya bantu bavumbuka kwe ba fwa. Mbo babaka “luzingu lwa mankululu” peleko ‘bifingu na busafu bwa mankululu.’ Buna ku nsuka ya luyalu lwa mvula 1 000, bantu bakaka mbo babaka luzingu lwa mankululu mpe bakaka mbo babafukisa mankululu.​—Nza. 20:15; 21:3, 4.

Tabongeno tifwani. Bikunku bia biole bia bantu bavumbuka kwe ba fwa balendi bia fwanakasa na nzenza zilolo mu kwe bâ ku nsi ya nzenza. Bantu ba sungama bena ntiana nzenza zibakaka visa ya tisalu peleko visa yibahanaka nswa wa bêla ku nsi yo (visa de résident) yisaka ti babazaba, mpe babâ na timpwanza. Mpe bô balembolo ba sungama bena ntiana nzenza zibakaka visa ya ntangu fioti peleko ya kwe tala kwa nsi. Nzenza zo zifweti songela ndiatulu ya mbote ntete babahana nswa wa bêla ku nsi yo ya nzenza. Mpila mosi mpe, mbo wufwanakana ti bantu balembolo ba sungama bavumbuka kwe ba fwa batumamana misiku mia Yehova mpe badiatila mu mpila ya sungama, ngatu batatamana mu bâ ku Paradi. Ntono visa yi lendi baka banzenza bu bakotaka ku hata dia môna, bakaka balendi baka nswa wa bâ bantu ba nsi ya môna, mpe bakaka balendi ba kuma ku nsi yo. Ndiatulu’awu yisa ti batatamana mu bâ ku nsi yo peleko babakuma. Mpila mosi mpe, mfundusu ya mansukina ya bantu bavumbuka kwe ba fwa mbo yisikamana mu kwikama kwawu na mu ndiatulu’awu mu nza ya môna.

Yehova kena kwa Nzambi ya tiari ko, kâ Nzambi ya buderede mpe yena. (Lub. 32:4; Mik. 33:5) Mbo kasongela luzolo lwandi bu kavumbula bantu ba sungama na balembolo ba sungama. Kâ, mbo kakêla mpe ti babansoni batumamana mitieno miandi mitariri mbote na mbi. Bô kwa bakwizi mu zolo mpe batumamana mitieno miandi batatamana mu bâ mu nza ya môna.