1. Ntangu fioti ntete lufwa lwa ntumwa Piere, ngano mpeve santu nti yamutuma mu sa?

 NTUMWA Piere wazaba ti luzingu lwandi ntamana mbo lwaketi suka. Wasarila Yehova na kwikama kwakwansoni tûka mivu miamingi. Waturisa Yezu mu tisalu tiandi tia samuna, wabatika tisalu tia samunina bantu balembo bâ Bayuda, ha manima wayizi bâ mu Timvuka titwarisaka. Kâ tisalu tia Piere ka tiasuka ko. Mu 62-64 M.B., watsoneka mikanda miole mia Bibila mu nzila ya mpeve santu: 1 na 2 Piere. Wabâ na tivuvu ti mikanda mio mbo miaketi bakisa Bakristo ha manima ma lufwa lwandi.—2 Pi. 1:12-15.

2. Mu bungu dia nti mikanda mia Piere mieri mfunu mu ntangu yi katsoneka mio?

² Piere watsoneka mikanda miandi mu ntangu mpangi zandi zeri bwabanaka na misamu miamingi mia mpasi. (1 Pi. 1:6) Bantu ba mbi mbo beri yêlaka mu kotesa ndongosolo za bungungu na ndiatulu yilembolo ya verela mu timvuka. (2 Pi. 2:1, 2, 14) Ntangu fioti kwa yasâla ngatu Bakristo beri bêlaka ku Yerusaleme bamona nsuka ya misamu mia Bayuda na mfukulu ya mumvuka’awu kwe binwani bia Bisi-Rome. (1 Pi. 4:7) Ntembe kâni, mikanda mia Piere miabakisa Bakristo mu mona ka nti baketi sa mu korela mpasi zi beri bwabanaka na zo, na zaketi kwiza ku matu. b

3. Mu bungu dia nti tufweti taluzula mikanda mia Piere?

 ³ Ni bu sa ti Piere watsoneka mikanda mio kwe Bakristo ba ntete, Yehova wakotesa mio mu Zu diandi. Buna, beto mpe tulendi mia bakila ndandu. (Rom. 15:4) Mu bungu ti mu nza yisingasaka ndiatulu yilembolo ya verela tubêlaka, beto mpe mbo tubwabanaka na misamu mia mpasi milendi sa ti tisalu tieto mu bungu dia Yehova tiabâ mpasi. Musamu wakaka, ntamana mbo tubwabana na mpasi ziyôkele na zo zatûla nsuka mu tinsamu tia Bayuda. Mbo tubakaka malongi ma mfunu mu mikanda mia miole mia Piere. Mbo matubakisa mu tatamana mu kêla tilumbu tia Yehova, mu telamana bunkuta bwa bantu, na mu kurisa luzolo lwa ngolo mu beto na beto. Misamu mio milendi bakisa mpe bakuluntu mu zaba ka bwe balendi kipila nsatu za bimeme bia Nzambi.

4. Ntiana bu batâ wo mu 2 Piere 3:3, 4, nti bilendi zezesa timinu tieto?

⁴ Bantu balembolo na timinu mu mbikululu za Bibila batuzungirilaka. Bantu batutelamanaka balendi tu sehesela mu bungu ti tûka mvula zazingi tukêlaka nsuka ya nza. Bakaka mbo batâka ti kani kabwe nsuka ka yitula ko. (Tanga 2 Piere 3:3, 4.) Tala ti tuwîri misamu mia mpila yo kwe muntu wu tuta samunina, kwe mpwana’eto yi tusalaka, peleko kwe muntu wa kanda, timinu tieto tilendi zeza. Piere wabangula ka nti bilendi tu bakisa.

5. Nti bitubakisa mu kêla nsuka ya nza na luvivululu lwalwansoni? (2 Piere 3:8, 9)

⁵ Bantu bakaka balendi banza ti Yehova mande me nandi mu tûla nsuka mu nza yi ya mbi. Misamu mia tâ Piere milendi tu bakisa mu bungu ti mbo mitubambulaka ti mpila Yehova yi kamwinaka ntangu ya swaswana yena na ya bantu. (Tanga 2 Piere 3:8, 9.) Kwe Yehova, mvula 1000 zidelakane na tilumbu timosi. Yehova luvivululu lwe nandi, mpe ka zololo’â ko ti na kani muntu wumosi wafuka. Kâ, tilumbu tiandi bu titula, nza mbo yifuka. Diangana bweso bwa bunene bwe neto mu sarila ntangu yisiri mu tâ timbangi kwe bantu ba nsi zazansoni.

6. Bwe tulendi tomo lundila tilumbu tia Yehova mu mabanza meto? (2 Piere 3:11, 12)

⁶ Piere watutindisa mu tomo lundaka tilumbu tia Yehova mu mabanza meto. (Tanga 2 Piere 3:11, 12.) Mu bwe? Tala ti bulendi bâ, musamu wa mbote wena mu dimbitilaka mu tusakumunu tu tubaka mu nza ya môna. Banza’eti titembo tia mbote ta wumuna, bidia bia mbote ta dia, bantu ba wazolo bavumbukiri kwe ba fwa ta bwana, bantu bazinga tûka ntama ta longesa misamu mitariri ndungananu ya mbikululu za Bibila. Dimbitila kwa mpila yo mbo kukubakisa mu kêla ntangu yo na luvivululu lwalwansoni, na mu bâ na lukwikulu ti nsuka ka yisiri’â mala ko. Bu tubâ na luzabu lo lutariri luzingu lweto lwa ku matu, ka tubika ndongosolo za bungungu ko zatuwubakasa.—2 Pi. 3:17.

7. Ngano bunkuta bwa bantu ntia nsobolo bulendi tu natina?

⁷ Bu tulunda tilumbu tia Yehova mu mabanza meto, mbo wututuma mu samuna nsangu za mbote kwe bantu bakaka. Kâ, ntangu zakaka tulendi tîna mu zonza. Mu bungu dia nti? Mu bungu ti tulendi bâ na bunkuta mu mio mi banza bantu peleko mu mio mi balendi tu yirika. Musamu wo waturila Piere. Mu mpimpa yi bafundisa Yezu, Piere walembana mu tâ ti mulongoki wa Yezu weri, mpe wamukala mbala zazingi. (Mat. 26:69-75) Kâ ha manima,  Piere walenda mu tâ ebu na lukwikulu lwalwansoni: ‘Ka lubândi na kani bunkuta mu bawu, ka baluhemonandi mitima.” (1 Pi. 3:14) Misamu mia tâ Piere mbo mita tu hana lukwikulu ti tulendi telamana bunkuta bwa bantu.

8. Nti bilendi tu bakisa mu telamana bunkuta bwa bantu? (1 Piere 3:15)

⁸ Nti bilendi tu bakisa mu telamana bunkuta bwa bantu? Piere watâ ti: ‘Zitiseno Kristo, Mfumu, mu mitima mieno.’ (Tanga 1 Piere 3:15.) Wuzololo tâ mpe ti tufweti dimbitila mu tibuka na ngolo ze na Yezu Kristo, yandi we Mfumu’eto mpe Mutinu’eto. Tala ti lwaka lubâka naku peleko bunkuta bu bâka na bweso bwa samuna nsangu za mbote kwe bantu bakaka, bambukilaka Mutinu’eto. Banza ka bwe kata yârila ku mazulu bu bamuzungiriri kwe mbazi zilembolo na lutangu. Bambuka ti bamuhana timfumu tiatiansoni ku mazulu na ha mutoto, mpe mbo kabâ naku bilumbu biabiansoni tii ku nsuka ya nza. (Mat. 28:18-20) Piere tu tindisi mu bâka ba kubama ntangu zazansoni mu nwanina timinu tieto. Ngano zololo mu samuna ku tisalu, ku lukolo peleko mu mpila zakaka? Toko banza mu misamu mi lendi yirika, mpe kubika misamu mi tâ. Sambila mu baka butindi, na lukwikulu ti Yehova mbo kakubakisa mu telamana bunkuta bwa bantu.—Bis. 4:29.

9. Tilumbu timosi bwe Piere kalembo songela luzolo? (Tala mpe tifwani.)

⁹ Piere walongoka ka bwe tulendi songela luzolo. Hô keri Yezu bu katâ: ‘Ntumunu ya môna nita lu hana: lwazolosono beno na beno ntiana bu naluzololo; beno mpe zolosonoeno beno na beno.’ (Za 13:34) Ni bu sa ti ntumunu yo ya kazaba, ntumwa Piere bunkuta bwamubaka, mpe wakala mu dia na mpangi zandi zalembo bâ Bayuda. Ntumwa Paulo watâ tifu tia sarila Piere ‘bungungu.’ (Nga. 2:11-14) Piere watambula nsembolo yo mpe wabaka malongi. Mu mikanda miandi mia miole, ntumwa Piere watsoneka ti luzolo lweto mu bampangi ka lufweti’â kwa lwasukisinaka ku mutima ko, kâ mpe tufweti lwa songelaka.

10. Nti bilendi tu bakisa mu zolo mpangi zeto mu matieleka? (1 Piere 1:22)

¹⁰ Piere watâ ti tufweti zolo mpangi zeto na kondo kwa bungungu. (Tanga 1 Piere 1:22.) Luzolo lo mbo lutûkaka mu tifu tia tumamana matieleka. Mu kati dia matieleka mo, mwe na ndongosolo yitâka ti ‘Nzambi kena na munsola wa bantu ko.’ (Bis. 10:34, 35) Ka tulendi’â tatumamana ntumunu ya Yezu ko yitariri luzolo, tala ti mu timvuka bantu bê kô tusongelaka luzolo kâ bakaka kâni. Wa matieleka, tulendi bâ nguria penepene na mpangi zakaka, ntiana bwa sa Yezu. (Za 13:23; 20:2) Kâ, Piere tu bamburi ti tufweti sarila ngolo mu zolo mpangi zeto zazansoni mu bungu ti mu kanda dieto bena.—1 Pi. 2:17.

11. Bâ na luzolo lwa ngolo mu bampwana’eto bwe wuta zolo tâ?

¹¹ Piere watutindisa mu bâ na luzolo lwa ngolo beto na beto mu mutima. Mu verse yo, bâ na luzolo lwa “ngolo” mbo wuzolo tâka zolo muntu ni bu sa ti musamu wa mpasi wena mu mu songela luzolo. Mu tifwani, nti tulendi sa tala ti mpangi yitulwekese peleko yitufwemese? Mabanza ma ntete malendi kwiza ni mu sa ntiana bu kasiri kani tasongela luzolo. Kâ, Piere walongoka kwe Yezu ti tifu tia karisa mbi mu mbi ka titâka Nzambi nsayi ko. (Za 18:10, 11) Piere watsoneka: ‘Ka luvutulandi mbi mu mbi, peleko tituku mu bituku. Kâ yendeno ba sakumuni.’ (1 Pi. 3:9) Bika luzolo lwa ngolo lwakutuma mu bâ na nsayi na mu kipaka bampwana’aku, ni bu sa ti kwe bantu bakufwemese.

12. a) Nti biakaka luzolo lwa ngolo lututumaka mu sa? b) Ntia ngolo zolo mu sarila ntiana bu basongele wo mu video ya Préservons l’unité, un cadeau précieux?

¹² Mu mukanda’andi wa ntete, Piere wasarila ntelo ya ‘luzolo lwa ngolo.’ Luzolo lwa mpila yo mbo luzibikaka masumu ma fioti, kâ mpe na ‘pôka dia masumu.’ (1 Pi. 4:8) Kampe Piere wabambukila malongi ma mu hana Yezu mu musamu wutariri mulemvo mu mivu miayôka. Mu ntama, kampe Piere mbo keri banzaka ti bubote keri saka bu katâ ti mbo kaketi lemvokela mpwana’andi mbala 7. Kâ Yezu wamulongesa mpe watulongesa mu lemvokela mbala 77, wuzololo tâ ntangu zazansoni. (Mat. 18:21, 22) Tala ti musamu wa mpasi wena kwe nge mu sarila malongi mo, kunôkandi! Ntangu zakaka musamu wa mpasi wubâka kwe bisari bia Yehova bie na masumu mu lemvokela. Tima tia mfunu tilendi sa bwawu bu ni mu sa mio mi lenda mu lemvokela mpangi zaku na mu sa tidzunu na bawu. c

13. Nti bilendi sa ti wabâ mpasi kwe bakuluntu mu kipa mpangi zawu?

¹³ Ntembe kâni, Piere ka zimbakana misamu mia mu têla Yezu ko ha manima ma mvumbukulu’andi kwe ba fwa: ‘Dikila bimeme biani.’ (Za 21:16) Tala ti nge mukuluntu wena,  zebi ti ntumunu yo nge mpe yita tarila. Kâ, wulendi bâ musamu wa mpasi kwe mukuluntu mu nata dema dio dia mfunu. Bakuluntu bafweti toko kipa nsatu za tinsuni, za luzolo na za timpeve za makanda mawu. Mbo batwarisaka tisalu tia samuna, mbo bakubikaka binzonzi peleko bimoko bia tukutakanu twa timvuka na twa tunene. Bakaka mpe mbo basalaka mu komite yiwisanaka na badoktere peleko mbo batambulaka bisalu bi ba hanaka LDC. Diangana bakuluntu bisalu biabingi bibâka nawu!

14. Nti bilendi tuma bakuluntu mu kipa bimeme? (1 Piere 5:1-4)

¹⁴ Piere watindisa bampwana’andi bakuluntu: ‘Kipeno twila dia Nzambi.’ (Tanga 1 Piere 5:1-4.) Tala ti mukuluntu wena, tuzebi ti mpangi zaku za zololo, mpe zololo ti wabakipa. Kâ, ntangu zakaka lendi mona ti bisalu biabingi bie naku, peleko wa fwatika wena mu lungisa dema dio. Nti lendi sa? Têla Yehova maniongo maku. Piere watsoneka: ‘Wô sarila bakaka, kabasarila mu ngolo zi mu hana Nzambi.’ (1 Pi. 4:11) Kampe mpangi zaku mbo zita bwabana na misamu milendi lembo wa mu nza yi. Kâ bambukeno ti muvungi wa wunene, Yezu Kristo lendi ba bakisa mu mpila yiyôka yo yi lulendi ba bakisila. Lendi bwa sa lumbu ti na mu nza ya môna. Nzambi mbo kalombaka kwe bakuluntu mu zolo kwa mpangi zawu, mu ba kipa na mu bâ bifwani mu bungu dia bawu.

15. Bwe mukuluntu wumosi wukipilaka bimeme bia Nzambi? (Tala mpe tifwani.)

¹⁵ William we mukuluntu tûka ntama, mbo kabakulaka mfunu ya bâ muvungi. COVID-19 bu yabatika, yandi na bakuluntu bakaka basa ti wabâ musamu wa mfunu mu mokaka na muna mpangi za bikunku biawu tumingu twatwansoni. Banguri mu bungu dia nti: “Mpangi zeto zazingi beri bawu kaka ku nzo, mpe mbanzulu zawu mbo zaketi kulu soba mu mpila ya mbi.” Mpangi’eto bu yibâka na misamu, William mbo kawirikilaka na bunsungu bwabwansoni mu zaba nsatu na maniongo mandi. Ha manima, mbo kadingaka mitu-diambu peleko video mu site’eto mu bakisa mpangi’eto. Têle ti: “Tisalu tia kipa bampangi nguria salu tiena lumbu ti yôka mu ntama. Ngolo zazingi tasarila mu bakisa bantu mu zaba Yehova; tufweti sarila ngolo za mpila yo mu kipa twila dia Nzambi, bu tubakisa  bimeme biandi mu tatamana mu bâ mu matieleka.”

16. Mu ntia mpila tulendi sarila malongi ma tubakaka mu mikanda mia Piere?

¹⁶ Ndambu malongi kwa tuzonzele me mu mikanda mia miole mia Piere. Kampe wizi mona mbuka yi fweti tomesa. Mu tifwani, ngano zololo wavulu dimbitilaka mu tusakumunu tu tubaka mu nza ya môna? Ngano kani siri dia samunaka ku tisalu, ku lukolo peleko mu mpila zakaka? Ngano mpila mweni zi lendi tomo songela luzolo lwa ngolo kwe mpangi zaku? Bakuluntu, ngano nzengolo lubongele ya kipaka bimeme bia Yehova na nsayi mpe na manzangu mamansoni? Bu tomo titaluzula mu bunsungu, lendi kwizi bakula ti fweti sa nsobolo mu misamu miakaka, kâ kunôkandi. ‘Mfumu wa mbote wena,’ mpe mbo kakubakisa mu sa nsobolo. (1 Pi. 2:3) Piere tu heni lukwikulu ti: “Nzambi [. . .] mbo kasukisa ndongokolo’eno. Mbo kalusiamisa, mbo kaluyika ngolo, mbo kalusikamasa.”—1 Pi. 5:10, NWT.

17. Tala ti tutatamane mpe tubikiri Yehova katulongesa, ngano ntia ndandu tubaka?

¹⁷ Lumbu timosi Piere wamona ti ka fwanana ko mu bâ ha mbuka yimsoi na Mwana wa Nzambi. (Like 5:8) Kâ na lubakusu lwa Yehova na Yezu, Piere watatamana mu bâ mulongoki wa Kristo. Buna Piere bamutambula mu kota mu Timfumu tia Mfumu’eto na Muvukisi’eto Yezu Kristo. (2 Pi. 1:11) Diangana musamu wa mbote weri! Wamana tatamana ntiana Piere, mpe wamana bika Yehova kakulongesa, nge mpe mbo baka luzingu lwa mankululu. Mbo lungisa kani dia timinu tiaku, mvukulu’aku.—1 Pi. 1:9.