1. Mu bungu dia nti Yehova kasarila luzingu?

NTANGU yeri kô Yehova yi kabâ Yandi kaka. Kâ, keri’â mu tiari ko. Mu mpila zazansoni Yehova ka kondoko’â tima ko. Kâ, Nzambi wazolo ti bakaka babaka luzingu mpe bamona nsayi. Ntiangu na luzolo lwalwansoni, wabatika mu sala bima.​—Mik. 36:9; 1 Za 4:19.

2. Bwe Yezu na bambazi bamona mu ntangu Yehova yi kasala bima biakaka?

² Ku mbatukulu, Yehova wasala Mwana’andi, Yezu. Ha manima, mu nzila ya mwana wo wa ntete, ‘biabiansoni [. . .] biayiluku,’ mu kati na milio za bivangu bia mpeve bie na mayela. (Kol. 1:16) Yezu watomo yangalala mu bweso bu kabaka bwa sala tintwari na Tata’andi. (Bin. 8:30) Mbazi za Nzambi zayizi bâ mpe na nsayi. Ho zeri mu ntangu Yehova na Yezu, we tisari tiandi titomono zaba tisalu, basala zulu na mutoto. Ngano bwe bambazi basongela ti, diangana bayangalala? “Babatika mu sika nsaki” mu ntangu mutoto wasalama, mpe ntembe kâni batatamana mu sika nsaki mu bisalu biabiansoni bia Yehova, na mu ntangu yi basala bantu mpe. (Yobe 38:7; Bin. 8:31, note) Muna tivangu mbo tieri songelaka luzolo na ndwenga za Yehova.​—Mik. 104:24; Rom. 1:20.

3. Tintwari na 1 Bisi-Korente 15:21, 22, nkûlulu ya futa Yezu ntia bweso yanata?

³ Yehova wazolo ti bantu bazinga mankululu mu planete ya toma yi kasala. Kâ, Adame na Eva bu bakolamana Tata diawu die na luzolo, masumu na lufwa biakotesa buyongongo ha mutoto. (Rom. 5:12) Ngano Yehova nti kasa? Ho nkatika bendo,  watâ kabwe kaketi vukisila bantu. (Mba. 3:15) Yehova wakanisina nkûlulu yaketi hana bala ba Adame na Eva bweso bwa kûluka mu masumu na mu lufwa. Buna mbo kaketi sa ti muna muntu wusola mu mu sarila kabaka luzingu lwa mankululu.​—Za 3:16; Rom. 6:23; tanga 1 Bisi-Korente 15:21, 22.

4. Ntia biyuvu tuzonzela mu timoko ti?

⁴ Kani dia Nzambi ditariri mvumbukulu ya bantu ba fwa, biyuvu biabingi dinataka. Mu tifwani, mvumbukulu bwe yibêla? Ngano mbo tulenda mu vutu zaba bantu ba tafwilulu bu bavumbuka? Mu ntia mpila mvumbukulu ya ba fwa yitunatina nsayi? Mpe bwe dimbitila mu mvumbukulu ya ba fwa kusa ti tatonda mu luzolo lwa Yehova, ndwenga zandi na luvivululu lwandi? Tazonzeleno biyuvu bio.

5. Mu bungu dia nti wufwanakane mu banza ti bantu ba fwa ka babavumbula ha timosi ko?

⁵ Mu ntangu Yehova yi kavumbula milio za bantu kwe ba fwa mu nzila ya mwana’andi, tulendi banza ti babansoni ka bavumbuka ha timosi ko. Mu bungu dia nti? Mu bungu ti, tala ti bantu babulumukini mbala mosi ha mutoto, mbo ha bâ vwandi diadingi. Mpe kani kabwe Yehova kayirikilaka misamu mu vwandi ko. Zebi ti bima bifweti bâ mu bunkete ngatu bantu babâ mu tidzunu. (1 Kor. 14:33) Yehova ndwenga na luvivululu lweri nandi bu kasala tintwari na Yezu mu kubika mutoto malembe malembe ntete kasala bantu. Buna, mu luyalu lwa mvula 1 000, Yezu mbo kasarila ndwenga na luvivululu bu kasala na bô bavuka mu Armagedo mu kubika mutoto ngatu babwana bantu bavumbuka kwe ba fwa.

6. Tintwari na Bisalu 24:15, ntia mpila bantu Yehova kavumbula kwe ba fwa?

⁶ Musamu wuyôkele mfunu ni wena’eti, bô bavuka mu Armagedo bafweti longesa misamu mitariri Timfumu tia Nzambi na ntumunu za Yehova kwe bantu bô bavumbuka kwe ba fwa. Mu bungu dia nti? Mu bungu ti bantu babîngi  bavumbuka kwe ba fwa “bantu balembolo ba sungama” bena. (Tanga Bisalu 24:15.) Mbo wufwanakana basa nsobolo zazingi ngatu babakila nkûlulu ya Yezu ndandu. Banza’eti ka ntia mpila tisalu tiena mu longesa matielaka matariri Nzambi kwe milio za bantu balembolo na luzabu lwa Yehova. Ngano mbo wufwanakana kwe muna muntu kabâ na ndongokolo ya Bibila ya yandi kaka, ntiana bu wuyôkelaka lumbu ti? Ngano mbo wufwanakana babâ mu bimvuka mpe babakubika mu longesa bantu bô bavumbuka ha manima mawu? Tufweti kêla mu zaba. Kâ, tuzebi ti, ku nsuka ya luyalu lwa mvula 1 000, “mutoto mbo wufuluka mu luzabu lwa Yehova.” (Iza. 11:9) Diangana tisalu tiatingi tia nsayi tibâ neto mu luyalu lwa mvula 1 000!

7. Mu bungu dia nti kanda dia Nzambi dizolo mu longesa bantu bavumbuka kwe ba fwa?

⁷ Mu ntangu ya luyalu lwa mvula 1 000 lwa Kristo, kanda diadiansoni dia Yehova mbo ditatamana mu sa nsobolo ngatu diamutâ nsayi. Buna babansoni mbo bazolo mu bakisa bô bavumbuka kwe ba fwa ngatu balenda mu telamana mabanza na nsatu za mbi mpe balanda mitieno mia Nzambi. (1 Pi. 3:8) Wa matieleka, bô bavumbuka kwe ba fwa bu bamona ti kanda dia Yehova dia kuluka diena, mpe tatamana dita tatamana mu sa nsobolo mu tâ Yehova nsayi, buna mbo bazolo mu sarila Yehova tintwari na bawu.​—Flp. 2:12.

8. Mu bungu dia nti wufwanakane mu banza ti bô babâ na bweso bwa mona mvumbukulu ya ba fwa, mbo bavutu zaba bantu ba bafwilulu?

⁸ Misamu miamingi mita songela ti, bô babâ na bweso bwa mona mvumbukulu ya ba fwa balendi bâ na lukwikulu ti mbo bavutu zaba bantu ba bafwilulu. Mu tifwani, mu mpila yasalamana mvumbukulu mu ntama, tulendi tâ ntiana’eti Yehova bantu bavumbuka kavutu sala na nitu zatoko bâ nawu, na mpila’awu yi beri toko zonzelaka na mabanza meri nawu ntete bafwa. Bambuka ti Yezu wafwanakasa lufwa na tolo, mpe mvumbukulu ya ba fwa na bu tuvumbukaka ku tolo. (Mat. 9:18, 24; Za 11:11-13) Muntu bu wuvumbukaka ku tolo, tidiri tiandi na tipamu tiandi mpila yimosi kwa bibaka na bu katokolo bâ ntete ke kasêka, mpe nsimu’andi ka yisobaka ko. Tabongeno tifwani tia Lazare. Bilumbu biyà kayôkesa ku lufwa, mpe nitu’andi yabatika mu bola. Kâ, buna kwa Yezu kamuvumbula, bibusi biandi biavutu mu zaba, Lazare mpe wababambukila.​—Za 11:38-44; 12:1, 2.

9. Mu bungu dia nti bô bavumbuka kwe ba fwa balembo vumbukila na nitu za lunga?

⁹ Yehova wakanisina ti na kani muntu wubâ ku Paradi wutâ ti: “Bêla nita bêla.” (Iza. 33:24; Rom. 6:7) Wuzololo tâ ti, bô bavumbuka kwe ba fwa mbo babâ na nitu za wasa. Kâ, ka bakwizi bâ mbala mosi ba lunga ko. Bamana vumbuka ba lunga, bantu babavwiri balendi lembo babambukila. Kampe bantu babansoni mbo bakwizi soba malembe malembe mu bâ ba lunga mu ntangu ya luyalu lwa mvula 1 000 lwa Kristo. Ku nsuka kwa ya luyalu lwa mvula 1 000 Yezu kakarisa Timfumu kwe Tata’andi. Ni buna Timfumu tilungisa tisalu tiandi tiatiansoni, ni buna mpe bantu babansoni bakwizi bâ ba lunga.​—1 Kor. 15:24-28; Nza. 20:1-3.

10. Ngano mvumbukulu ya ba fwa bwe yilusa ku mutima?

¹⁰ Banzeno’eti bweso bwa vutu bwana bantu beno ba lwazolo. Ngano nsayi yi lumona mbo yilusehesa peleko mbo yiludirisa? Ngano nsayi yi lumona mbo yisa ti lwatanga mikunga mu kembela Yehova? Tulendi bâ na lukwikulu ti, mbo tubâ na luzolo lwalwingi mu bungu dia Tata’eto dia luzolo na Mwana’andi wa luzolo, basiri ti kwa bâ mvumbukulu ya ba fwa.

11. Mu mabanza ma Yezu me mu Za 5:28, 29, nti biturila bô batumamana Nzambi?

 ¹¹ Banzeno’eti nsayi yi mona bô bavumbuka kwe ba fwa bu basa nsobolo mu tumamana Nzambi. Bô basa nsobolo zo mbo babâ na bweso bwa zinga mankululu ku Paradi. Kâ, bô bakala mu sa nsobolo, Yehova ka ba bika ko bazinga mpe basa vwandi ku Paradi.​—Iza. 65:20; tanga Za 5:28, 29.

12. Mu ntia mpila Yehova kasakumuna bô babansoni bê ha mutoto?

¹² Kanda diadiansoni dia Nzambi mbo dimona ti misamu mie mu Bingana 10:22 mia matieleka miena. Yitêle: “Ni lusakumunu lwa Yehova luvwamisaka, mpe ka luyikaka mpasi ko.” Na lubakusu lwa mpeve ya Yehova, kanda dia Nzambi mbo dikwizi bâ malembe malembe ntiana Yezu, mpe mbo dikwizi bâ dia lunga. (Za 13:15-17; Efz. 4:23, 24) Lumbu basiri lumbu, nitu zawu mbo zibâ za tima mpe mbo babâ bantu ba mbote. Ntia mpila luzingu lwa nsayi kwa lubâ! (Yobe 33:25) Bwe, dimbitila mu mvumbukulu ya ba fwa kulendi lu bakisa bwawu bu?

13. Tintwari na Mikunga 139:1-4, bwe mvumbukulu ya ba fwa yisongela ti Yehova beto katomono zaba?

¹³ Ntiana bu tumweni wo ku mbatukulu, mu ntangu Yehova yi kavumbula bantu ba fwa, mbo kabakarisila nsimu’awu, mpe timuntu tiabâ nawu ka tisoba ko. Banza’eti fioti bwe wuta zolo tâ. Yehova tomono ku zolo ntiangu kalundaka, mpe kabambukilaka moyo misamu miaku miamiansoni mi banzaka, mi monaka ku mutima, mi tâka na mi yirikaka. Ntiangu, tala ti kwe ba fwa kakuvumbula, ka wubâ musamu wa mpasi ko mu ku vumbula ntiana bu watoko bâ. Mutinu Davide wazaba ti Yehova tomono zaba muna muntu mu beto. (Tanga Mikunga 139:1-4.) Bwe tumonaka ku mutima bu tubakulaka ti Yehova beto katomono zaba?

14. Bwe tufweti mona ku mutima, bu tudimbitilaka mu mpila yitomono tu zabila Yehova?

¹⁴ Bu tudimbitilaka mu mpila yitomono tu zabila Yehova, ka tulendi’â tabâ na lwaka ko. Mu bungu dia nti? Bambukeno ti Yehova beto katomo fwilaka tiari. Mosi na mosi mu beto ntalu ke ha meso mandi. Mbo kabambukila moyo misamu minataka nsobolo mu luzingu lweto. Musamu wo nguria tindisa wuta tu tindisa! Kani kabwe ka tufweti’â tabanzaka ko ti beto kaka twena. Ntangu zazansoni, Yehova na beto kabâka, mu kwe dingi mpila yi katubakisila.​—2 Nta. 16:9.

15. Bwe mvumbukulu ya ba fwa yita songela ndwenga za Yehova?

¹⁵ Tala ti mbeni zawu zibakanikini lufwa mpe zibatumini mu ngolo, bantu batînaka lufwa mbo bayirikaka misamu mi baketi lembo yirika. Bantu bô bê mu lutumu lwa Satana mbo basarilaka bunkuta mu tuma bantu mu ngolo mu yirika misamu miakaka mi bazebi ti ka miena mia sungama ko. Kâ mpila yo ya sarila ka yisimbaka ko kwe beto. Tuzebi ti mbeni zeto zamana tu honda, Yehova mbo katuvumbula kwe ba fwa. (Nza. 2:10) Lukwikulu lwe neto ti, ka kwena musamu ko wu bayirika, wutukabakasa mu bâ ndiku za Yehova. (Rom. 8:35-39) Yehova wizi songela ndwenga zandi bu katuheni vuvu tia mvumbukulu ya ba fwa! Buna, ka twena na bunkuta ko tala ti bô bê mu lutumu lwa Satana batukanikini lufwa tamana lembo sa mio mi batutêlele. Diangana musamu wo nguria butindi wuta tu hana mu tatamana mu bâ ba kwikama kwe Yehova.

16. Ntia biyuvu lufweti tiyula mpe bwe mvutu zo zilubakisila mu zaba ti mu Yehova lutomo kwikilaka?

¹⁶ Tala ti bô bayinaka Yehova batêle ti honda baluhonda, ngano mbo lubâ na lukwikulu ti Yehova mbo kaluvumbula kwe ba fwa? Bwe lulendi zabila ti mbo lubâ na lukwikulu mu Yehova  mu ntangu yina? Mpila ya zabila wo, ni mu tiyula: ‘Ngano nzengolo za fioti zi nibongaka lumbu basiri lumbu mbo zisongelaka ti lukwikulu lwe nani mu Yehova?’ (Like 16:10) Tiyuvu tiakaka tilendi bâ: ‘Ngano mbelo’ani mbo yisongelaka ti lukwikulu lwe nani mu kani dia Yehova dia kipa nsatu zani namana toko dinga Timfumu?’ (Mat. 6:31-33) Tala ti lutêle “yee” mu mvutu za biyuvu bio, dieka bo lusongele ti lukwikulu lwe neno mu Yehova, mpe mbo lubâ ba kubama mu ntontolo ni ntontolo ziluturila.​—Bin. 3:5, 6.

17. (a) Bwe mvumbukulu ya ba fwa yisongelaka ti Yehova luvivululu lwe nandi? (b) Bwe tulendi songela ti luvivululu lwa Yehova lwa tuzololo?

¹⁷ Yehova watikubikila ntangu yi kahonda bantu ba mbi. (Mat. 24:36) Ka kondo’â luvivululu ko, mpe ka yirika mio mi kakubikiri ntete ntangu yo yafwana ko. Yehova nsatu ya yayingi ye nandi ya vumbula bantu ba fwa, kâ luvivululu lwe nandi. (Yobe 14:14, 15) Kêla kata kêla na tii ntangu yi kakubika yafwana mu ba vumbula. (Za 5:28) Misamu miamingi mie neto mita sa ti tavutula matondo kwe Yehova mu bungu dia luvivululu lwandi. Banzeno’eti: Mu bungu ti Yehova luvivululu lwe nandi, bantu babingi, na beto mpe mu kati, babakiri ntangu ‘ya soba mabanza.’ (2 Pi. 3:9) Yehova zololo ti bantu babîngi babaka bweso bwa zinga mankululu. Buna tasongeleno ti luvivululu lwa Yehova lwa tuta zolo. Bwe? Mu kwe dingi bô babansoni bê na “ndiatulu yifwanakane mu bungu dia luzingu lwa mankululu” na mu kwe ba bakisi mu zolo Yehova na mu mu sarila. (Bis. 13:48, NWT) Buna mbo babakila luvivululu lwa Yehova ndandu ntiana kwa beto.

18. Mu bungu dia nti tufweti bâ na luvivululu na bantu bakaka?

¹⁸ Yehova mbo kakêla na luvivululu lwalwansoni nsuka ya mvula 1 000 ntete kamona ti bantu beka ba lunga. Kâ, na tii bwawu bu, Yehova zololo mu lemvokela masumu meto. Ntiangu tufweti landa tifwani tiandi mpe tufweti tala kwa bifu bia mbote bia bantu bakaka mpe tufweti bâ na luvivululu. Tabongeno tifwani tia mpangi yimosi ya yikento yeri na bakala diayizi batika mu bâ na lwaka lwa ngolo mpe diabika mu lembo vutu kwendaka ku tukutakanu. Mpangi yo yitêle ti: “Nguria musamu wa mpasi weri kwe meno. Mu pa-pulukusu kwa luzingu lweto lwayizi soba, mpe ka tavutu’â bâ na lenda ko dia yirika misamu mi tawaya mu yirika.” Kâ mukento wo weri na luzolo watatamana mu bâ na luvivululu kwe bakala diandi. Ntiana kwa Yehova, watatamana mu tûla mabanza mandi  mu bifu bia mbote bia bakala diandi. Têle ti: “Bakala diani bifu bia mbote bie nandi, mpe malembe malembe ngolo kasaka mu telamana lwaka lwandi.” Nguria mfunu wena mu bâ na luvivululu na bantu ba kanda dieto peleko na bantu ba timvuka ba sarilaka ngolo mu telamana ntontolo!

19. Ntia nzengolo tufweti bonga?

¹⁹ Yezu na bambazi nsayi yeri nawu mu ntangu yasalama mutoto. Kâ, banzeno mpila nsayi yibâ nawu bu bamona ti mutoto wufulukiri mu bantu ba lunga, bazololo Yehova mpe bamusarilaka. Banzeno mpila nsayi yibâ na bô bakwenda ku mazulu mu kwe yâla na Yezu bu bamona ti bantu ndandu ya tisalu tiawu bata baka. (Nza. 4:4, 9-11; 5:9, 10) Mpe banzeno mansangaza ma nsayi bu mayingasa mansangaza ma mpasi, mu ntangu timbevo, tiari na lufwa bizimbakana mankululu. (Nza. 21:4) Kâ bwawu bu, bonga nzengolo ya landa tifwani tia Tata’aku die na luzolo na ndwenga mpe na luvivululu. Wamana sarila bo, mbo tatamana mu bâ na nsayi’aku ni bu sa ti misamu mia mpasi ta bwabana na mio. (Zaki 1:2-4) Mbala kwa kwa tuvutula matondo mu bungu dia kani ditâka ti “mvumbukulu ye kô”!​—Bisalu 24:15.