1. Ngano ntia bweso tuzoloko?

BWESO bwa bunene bwe neto bwa bâ mu timvuka tia Yehova. Mu paradi ya timpeve ya fuluka mu bantu bê na tidzunu, mpe bê mu nsayi twena. Ngano tibuka tiaku mu timvuka ni tie?

2. Ntia tifwani ntumwa Paulo kasarila mu mikanda miandi mie mu Bibila?

² Misamu miamingi tulendi longoka mitariri tisalu tieto mu timvuka, mu tifwani tia sarila ntumwa Paulo mu mikanda miandi miamîngi mie mu Bibila. Mu mikanda miango, Paulo wafwanakasa timvuka na nitu ya muntu. Paulo wafwanakasa mpe muna muntu mu timvuka na binama bia mu nitu.​—Rom. 12:4-8; 1 Kor. 12:12-27; Efz. 4:16.

3. Ntia ndongosolo zitatu tutaluzula mu timoko ti?

³ Mu timoko ti, mbo tulongoka ndongosolo zitatu za mfunu zitûka mu tifwani tia sarila Paulo. (1) Mbo tulongoka ti muna muntu we na tibuka * tiandi mu timvuka tia Yehova. (2) Mbo tuzonzela nti tulendi sa tala ti musamu wa mpasi wena kwe beto mu zaba tibuka tieto mu timvuka. Mpe (3) mbo tuzonzela mu bungu dia nti twe na nsatu ya sala kwakwingi mu tisalu tia hana Yehova kwe muna muntu mu beto mu timvuka.

4. Nti Bisi-Rome 12:4, 5 yitulongesaka?

⁴ Ndongosolo ya ntete yi tulendi baka mu tifwani tia sarila Paulo ni yena’eti, muna muntu mu beto tibuka tia mfunu tie nandi mu kanda dia Yehova. Paulo wabatika tifwani tiandi bu katâ: ‘Ntiana bu twe na binama biabingi mu nitu yimosi; biabiansoni ka bisalaka tisalu timosi ko; ni bo mpe beto bu twe babingi, twe nitu yimosi mu Kristo. Kâ muna muntu muntu, binama twena bia beto na beto.’ (Rom. 12:4, 5) Ngano bwe Paulo keri zolo tâka? Muna muntu mu beto tisalu tia swaswana tie nandi mu timvuka, kâ ntalu twena.

5. Nti Yehova kahana mu timvuka?

⁵ Bu banzaka bantu bê na tibuka mu timvuka, mabanza maku malendi kulu kwenda kwe bô batwarisaka. (1 Tes. 5:12; Ebr. 13:17) Wa matieleka wena ti, mu nzila ya Kristo, Yehova wahana “bantu ba nkabila” mu timvuka tiandi. (Efz. 4:8) “Bantu [bango] ba nkabila” ni Timvuka titwarisaka, bibakisi bia Timvuka titwarisaka, mpangi za Komite za filiale, minkengi mia bizunga, milongi mia ku tukolo twa Bibila, bakuluntu ba mu timvuka, na bibakisi mu bisalu. Mpangi zo zazansoni, mu nzila ya mpeve santu babasolelaka mu kipa bimeme bia ntalu bia Yehova na mu sarila ndandu za timvuka.​—1 Pi. 5:2, 3.

6. Tintwari na 1 Bisi-Tesalonike 2:6-8, ngano mpangi zi basolaka mu nzila ya mpeve santu ntia ngolo zi sarilaka?

⁶ Mpangi zi basolaka mu nzila ya mpeve santu, madema mamingi me nawu. Ntiana kwa binama bia mu nitu, mu tifwani moko na malu, masalaka mu bungu dia ndandu ya nitu yayansoni, mpangi zi basolaka mu nzila ya mpeve santu, tisalu tia ngolo basalaka mu bungu dia ndandu za timvuka tiatiansoni. Ka badingaka ko ti bantu bakaka babasîka. Bawu, mbo badingaka mu tunga mpangi zawu na mu ba yika ngolo. (Tanga 1 Bisi-Tesalonike 2:6-8.) Matondo tuvutulaka kwe Yehova mu bungu dia babakala bô basalaka bubote, mpe bayôkesaka nsatu za bantu bakaka ku matu, ntete za bawu beni!

7. Bisari bia ntangu zazansoni ntia tusakumunu bibakaka?

⁷ Bakaka mu timvuka balendi ba sola mu bâ misionere, mipasuri-nzila mia minene, peleko mipasuri-nzila mia ntangu zazansoni. Diangana, mpangi za mu nza yayansoni zayizi bonga nzengolo ya sala tisalu tia samuna na tia kubika milongoki mu luzingu lwawu. Mu bungu ti bayizi bonga nzengolo yo, bayizi bakisa bantu babingi mu bâ milongoki mia Yezu. Ni bu sa ti bisamuni bio biabîngi bia ntangu zazansoni ka bivulu’â bâka na bimvwama ko, Yehova wabahana bima biabingi bia mbote. (Mak. 10:29, 30) Mpangi zo za mutima za tutomo zoloko mpe mbo tutondaka mu bungu ti binama biena bia timvuka!

8. Mu bungu dia nti bisamuni biabiansoni bia nsangu za mbote bie ntalu kwe Yehova?

⁸ Ngano mpangi kwa zi basolaka mu nzila ya mpeve santu na bisari bia ntangu zazansoni bê na tibuka mu timvuka? Kâni! Bisamuni biabiansoni bia nsangu za mbote mfunu biena kwe Nzambi na mu timvuka. (Rom. 10:15; 1 Kor. 3:6-9) Diangana, mu makani mayôkele mfunu mu timvuka mwe na kani dia kubika milongoki mia Mfumu’eto Yezu Kristo. (Mat. 28:19, 20; 1 Tim. 2:4) Bantu babansoni mu timvuka, bisamuni bia batusu na bilembolo bia batusu, mbo bisaka ti tisalu tiango tiabâ tima tia ntete mu luzingu lwawu.​—Mat. 24:14.

9. Mu bungu dia nti tutomo zoloko mpangi zeto za zikento?

⁹ Yehova mbo kahanaka tibuka tia buzitu mu timvuka kwe mpangi zeto za zikento. Bakento bo, nguri zo, mifwiri mio, na mpumpa  (célibataires) zo za zikento zimusarilaka na kwikama kwakwansoni, ntalu bena kwe Yehova. Bibila mbo divulu zonzelaka bakento ba nzitukulu bayizi tâ Yehova nsayi. Bifwani biena bia mbote bia ndwenga, bia timinu, bia luhemo, bia tifu tia kaba, na bia bisalu bia mbote. (Like 8:2, 3; Bis. 16:14, 15; Rom. 16:3, 6; Flp. 4:3; Ebr. 11:11, 31, 35) Matondo mamingi tuvutulaka kwe Yehova mu bungu dia bakento ba mu timvuka tieto, bawu mpe bifu bia mbote ni bio bie nawu!

10. Mu bungu dia nti bantu ba nuna bê ntalu kwe beto?

¹⁰ Nsayi yayingi yibâka neto mu bungu dia mpangi za nuna za mu timvuka. Bimvuka biakaka bie na mpangi za nuna zayizi sarila Yehova na kwikama kwakwansoni mu luzingu lwawu. Kampe, mpangi zakaka za nuna, ka ntama ko zayizi zaba matieleka. Bantu bô bê ba nuna balendi bâ na bimbevo mu bungu dia bununu bwawu. Bimbevo biango bilendi ba kabakasa mu sa mio mi balendi sa mu timvuka na mu tisalu tia samuna. Kâ, mpangi zo za nuna mbo zisaka mio mi balendaka mu tisalu tia samuna, mpe mbo basarilaka ngolo zawu zazansoni mu tindisa na mu kubika bantu bakaka! Mbo tubakaka ndandu mu misamu mi balongoka. Diangana, ntalu bena kwe Yehova na kwe beto.​—Bin. 16:31.

11-12. Bwe ntwenia za mu timvuka tiaku zayizi ku tindisila?

¹¹ Tabanza’eti mpe ntwenia zeto. Nkwamusu zazingi batelamanaka bu bata kwe kuri mu nza yi ye mu lutumu lwa Satana na mbanzulu zandi za mbi. (1 Za 5:19) Kâ, bu tumonaka ntwenia zeto bu zihanaka mvutu ku tukutakanu, bu zisarilaka ngolo mu tisalu tia samuna, na bu zinwaninaka nkwikulu zawu na butindi, tindisa zitutindisaka. Diangana, beno batwenia, tibuka tia ntalu tie neno mu timvuka tia Yehova!​—Mik. 8:2.

¹² Kâ, musamu wa mpasi wena kwe mpangi zeto zakaka mu kwikila ti ntalu bena mu timvuka. Ngano nti bilendi tu bakisa mu zaba ti muna muntu mu beto stibuka tie nandi mu timvuka? Tataleno musamu wo.

13-14. Mu bungu dia nti bantu bakaka balendi kwizi banza ti ka bena ntalu ko mu timvuka?

¹³ Ndongosolo ya nzole ye mu tifwani tia sarila Paulo mbo yita sa ti tabanza musamu wu bwabanaka na bantu babingi mu ntangu yi. Musamu wa mpasi wena kwe bantu babingi mu kwikila ti ntalu bena mu timvuka. Paulo watsoneka: ‘Tala ti kulu kutêle: “Meno ka koko’â ko; dieka bo, ka ndiena mu nitu ko,” ngano ka siri’â mu nitu ko? Tala ti kutu ditêle: “Meno ka disu’â ko; dieka bo, ka ndiena mu nitu ko,” ngano ka siri’â mu nitu ko?’ (1 Kor. 12:15, 16) Ngano Paulo nti keri tu longesaka?

¹⁴ Wamana tifwanakasa na bantu bakaka mu timvuka, lendi banza ti ka wena ntalu ko mu timvuka. Bantu bakaka mu timvuka balendi bâ na makabu ma bâ milongi, bantu bazebi kubika misamu, peleko bantu bazebi bomba na bazebi tindisa bantu bakaka. Kampe, mbo ta banza ti kulendi’â wasala bubote ntiana bawu ko. Wusongele ti nge wa kuluka wena, mpe ndilu zaku za zebi. (Flp. 2:3) Kâ sa mayela. Tala ti na bantu basalaka bubote vulu tifwanakasaka, mbo kwizi kota mu bunokena. Mpe lendi kwizi banza, ntiana bwa tâ Paulo, ti nge ka wena na tibuka mu timvuka ko. Ngano nti bilendi ku bakisa mu telamana mabanza mo?

15. Tintwari na 1 Bisi-Korente 12:4-11, nti tufweti zaba mu makabu malendi bâ neto?

¹⁵ Tala musamu ewu: Yehova wahana makabu ma bimangu mu nzila ya mpeve santu kwe Bakristo ba ntete; kâ babansoni ka bayizi’â bâka makabu mamosi ko. (Tanga 1 Bisi-Korente 12:4-11.) Yehova wabahana makabu ma swaswana na lenda dia swaswana, kâ muna muntu ntalu keri. Lumbu ti, beto ka twena na makabu ma bimangu ko mu nzila ya mpeve santu, mpe beto bansoni ka twena na makabu mamosi ko, kâ ntalu twena ha meso ma Yehova. Mutieno wo salu kwa watiri mu ntangu yi.

16. Ntia malongi ma hana ntumwa Paulo twe na nsatu mu sarila?

¹⁶ Kani tatifwanakasaka na bantu bakaka, tuzololo tasarilaka malongi ma hana ntumwa  Paulo mu Bibila: ‘Muna muntu kasungamana tisalu tia yandi beni. Kamana tia bakila lenda dia malona, katilona mu bungu dia yandi beni; kâ, ka diena ko ti mu [tifwanakasa na] muntu wakaka.’​—Nga. 6:4.

17. Ntia ndandu tukwizi baka tala ti tulendi malongi ma hana ntumwa Paulo?

¹⁷ Tala ti tulendi malongi ma hana ntumwa Paulo mu Bibila mpe tutaluzuri nsalulu zeto, mbo tubakula ti lenda na makabu me neto ma beto kaka mena. Mu tifwani, mukuluntu wumosi wulendi lembo bâ na kabu dia zaba tâ binzonzi, kâ lendi bâ ngolo mu tisalu tia kubika milongoki. Peleko, lendi lembo bâ na lenda dia zaba mu kubika misamu ntiana bakuluntu bakaka ba mu timvuka, kâ lendi bâ muntu we na nsayi mpe mukuluntu wa luzolo, mpe bampangi bubote bamonaka bu bakwizi mu lombaka malongi ma timpeve. Peleko, lendi bâ na nkumbu ya mbote mu bungu ti ndiambu ye nandi. (Ebr. 13:2, 16) Bu tuzabaka bubote lenda na makabu meto, mbo tubâ na mabanza ma mbote mu misamu mi tulendi yirika mu timvuka. Ka tukwizi’â dienokena bantu bê na makabu ma swaswana na ma beto ko.

18. Ngano bwe tulendi kwizi bêla milongi miyôkele bubote?

¹⁸ Tibuka ni tibuka ti twe na tio mu timvuka, beto bansoni tufweti dinga mu tomesa tisalu tieto na lenda dieto. Mu tu bakisa mu tomesa tisalu tieto, Yehova mbo katukubikaka mu mpila ya mbote mu nzila ya organizasio’andi. Mu tifwani, ku lukutakanu lwa luzingu na tisalu tia Bakristo, ndongosolo tubakaka mu tomo sala bubote mu tisalu tia samuna. Ngano ndongosolo za lukutakanu lo za sarilaka?

19. Bwe lendela nu lungisa kani dia kota Lukolo lwa bisamuni bia Timfumu?

¹⁹ Programe yakaka ya nzitukulu yi batuhaninaka ndongosolo ni Lukolo lwa bisamuni bia Timfumu. Bantu balendi kota lukolo lo bafweti bâ bisari bia ntangu zazansoni bie na mvula 23 tii 65. Lendi kwizi banza ti kulendi’â walungisa kani dio ko. Kani wasa lutangu lwa misamu milendi ku kabakasa mu kota lukolo lo, sa lutangu lwa misamu milendi ku nata wa kota lukolo lo. Ha manima, sa programe yilendi ku bakisa mu sa mio mifwanane mu fulusa formilere ya lukolo lo. Lubakusu lwa Yehova na tisalu tiaku tia ngolo, bilendi ku bakisa mu lenda misamu mi banzaka ti kulenda mio ko.

20. Ngano nti tulendi longoka mu Bisi-Rome 12:6-8?

²⁰ Ndongosolo ya ntatu yi tulendi baka mu tifwani tia sarila Paulo, mu Bisi-Rome 12:6-8 yena. (Tanga.) Mu verse yo Paulo vutulu songela ti bantu babansoni mu timvuka makabu ma swaswana me nawu. Kâ, mo verse mo yandi songele ti tufweti sarila kabu ni kabu mu tunga na mu kurisa timvuka.

21-22. Nti tulendi longoka mu Robert na mu Felice?

²¹ Banza misamu miaturila mpangi yimosi yi batele nkumbu Robert. Ha manima ma ntangu yi kaye sala ku nsi ya nzenza, bayizi mu tambika ku Betele ya nsi’andi. Ni bu sa ti bamutêla ti ka wena ko ti musamu wa mbi kayirika, yandi watâ: “Ngonda zazingi zayôka zi nalembo bâ mu nsayi, mu bungu ti mbo ndieri banzaka ti nayizi lembana tisalu tiani. Ntangu zeri kô zi ndieri dingaka mu bika tisalu tiani ku Betele.” Ngano bwe kasa mu karisa nsayi’andi? Mukuluntu wakaka wamubambula ti Yehova kubika keri kwe tu kubiki mu ntangu ya bisalu bieto bia ntama ngatu tasala bubote mu tisalu tieto bwawu bu. Robert wayizi bakula ti nsatu yeri nandi ya bika mu banzaka misamu miayôka na ya batika mu tala misamu mi kalendi sa bwawu bu.

²² Mpangi’eto Felice Episcopo wabwabana mpe na misamu mia mpila yo. Yandi na mukento’andi  bayizi kota lukolo lwa Galade mu 1956 mpe bayizi sala mu tisalu tia tizunga ku Bolivie. Mu 1964 bayizi buta mwana. Felice watâ ti: “Tayizi wa mona musamu wa mpasi mu bika tisalu tieto ti tweri zoloko. Mvula ya mukaka nasa, nayizi kota mu bunokena. Kâ, Yehova wayizi tu bakisa. Nayizi soba mabanza mpe nabatika mu kipa dema diani dia sansa mwana.” Ngano mabanza ma Robert peleko ma Felice me naku? Ngano mu bunokena wena mu bungu ti ka wasâla na madema meri naku mu ntama ko? Tala ti ni bo wena, mbo bâ mu nsayi tala ti sobele mabanza mpe siri mutima mu mio milendi sa bwawu bu mu sarila Yehova na mpangi zaku. Tatamana mu sarila makabu maku na lenda diaku mu bakisa bantu bakaka, mpe mbo kwizi baka nsayi yayingi mu tunga timvuka.

23. Nti tufweti bongelaka ntangu mu sa, mpe nti tutaluzula mu timoko tita kwiza?

²³ Muna muntu mu beto ntalu kena kwe Yehova. Yehova zololo ti beto tabâ mu kanda diandi. Tala ti tubongele ntangu ya dimbitilaka mu mio mi tulendi sa mu tunga mpangi zeto mpe tusariri ngolo mu lungisa tisalu tieto, ka tukwizi’â banza ko ti ka twena na tibuka ko mu timvuka! Kâ, bwe tufweti mwinaka bantu bakaka mu timvuka? Bwe tulendi songela ti bawu tuzoloko mpe bawu tuzitisaka? Mu timoko tita kwiza, diambu ni dio tutaluzula.