1. Ngano Yezu bwe katâ mu musamu wutariri bimvwama bia ku mazulu?

BIMVWAMA biabiansoni ka bimonekaka ko. Wa matieleka, bimvwama biyôkele ntalu ni bio bilembo monekaka. Mu tinzonzi ti kasa ha zulu mongo, Yezu wazonzela bimvwama bia ku mazulu bitomono yôka bimvwama ntiana mbongo. Mpe wavutu tâ ti: ‘He timvwama tiaku, mutima’aku mpe ni hana [wena].’ (Mat. 6:19-21) Mutima’eto mbo wututumaka mu landa bima bi tumonaka ti nkatika ntalu biena kwe beto. Mbo tulundaka “bimvwama bia ku mazulu” bu tukwizi zabakanaka mu mpila ya yibote ha meso ma Nzambi. Yezu wabangula ti bimvwama bio kani kabwe ka bilendi’â biabeba ko, mpe ka balendi’â balaba bio ko.

2. (a) Tintwari na 2 Bisi-Korente 4:17, 18, ntia musamu Paulo katutindisila mu tomo kipaka? (b) Nti tutaluzula mu timoko ti?

² Ntumwa Paulo watutindisa mu kêla bima bilembo monekaka. (Tanga 2 Bisi-Korente 4:17, 18.) Bima bio bilembo monekaka bimvwama biena, mu bimvwama bio mpe mwe na tusakumunu tu tubaka mu nza ya môna ya Nzambi. Mu timoko ti, mbo tuzonzela bimvwama biyà bilembo monekaka, bi tulendi baka tuka lumbu ti: tindiku na Nzambi, kabu dia lusambulu, lubakusu lu tu hanaka Nzambi mu nzila ya mpeve santu, na lubakusu lutûkaka ku mazulu mu bungu dia tisalu tia samuna. Mbo tumona mpe ka bwe tulendi songela ti bimvwama bio bilembo monekaka bia tuzoloko.

3. Ngano kabu diyôkele bunene mu makabu malembo monekaka ni die, mpe nti bituhanaka bweso bwa baka dio?

³ Kabu diyôkele bunene mu makabu malembo monekaka ni tindiku na Yehova Nzambi’eto. (Mik. 25:14) Nzambi bwe kalendi tatamana mu bâ Yandi wansoni wa santu tala ti siri tindiku na bantu bê na masumu? Lendi tatamana mu bâ wa santu mu bungu ti mukayulu wa nkûlulu wa Yezu mbo ‘wukatulaka disumu dia mutoto nsi.’ (Za 1:29) Yehova watizabila ti, Yezu mbo kaketi bâ wa kwikama tii ku lufwa mu vukisa bantu. Ntiangu Yehova kasa tindiku na bantu batoko bâ ha mutoto ntete Yezu kafwa.​—Rom. 3:25.

4. Hana bifwani bia bantu beri ha mutoto ntete Yezu, mpe bayizi bâ ndiku za Nzambi.

⁴ Tazonzeleno’eti ndambu bantu beri ha mutoto ntete mbandu ya beto mpe bayizi bâ ndiku za Nzambi. Abrahame weri muntu wabâ na timinu tia nzitukulu. Mvula yôka 1 000 ha manima ma lufwa lwa Abrahame, Yehova wayizi mu tâ “ndiku’ani.” (Iza. 41:8) Wuzololo tâ ti, lufwa ka lulendi’â lwahambasa Yehova na ndiku zandi za kwikama ko. Abrahame wa moyo kwa watiri mu nsimu ya Yehova. (Like 20:37, 38) Tifwani tiakaka ni Yobe. Mu ntangu bambazi bakutakana ku mazulu, Yehova wazonzela Yobe na lukwikulu lwalwansoni. Yehova wamutâ “muntu wa nsungu mpe wa kwikama, wutînaka Nzambi mpe wudiokaka mbi.” (Yobe 1:6-8) Mpe bwe Yehova keri bongelaka Daniele, weri wa kwikama kwe Nzambi mvula kampe 80 ku nsi ya bapaye? Mbala tatu, bambazi bayizi zabikisa mbuta muntu yo ti yandi weri muntu “wa nkatika ntalu” kwe Nzambi. (Dan. 9:23; 10:11, 19) Tulendi bâ na lukwikulu ti Yehova nkatika kêla kakêlaka tilumbu ti kavumbula ndiku zandi za luzolo kwe ba fwa.​—Yobe 14:15.

5. Nti tufweti sa mu bâ na tindiku tia ngolo na Yehova?

⁵ Bantu ba masumu bakwa bê na tindiku na Yehova lumbu ti? Milio za bantu. Lutangu lo lwa tuzebi mu bungu ti, ha mutoto wawansoni babakala, bakento, na bala basongelaka mu ndiatulu’awu ti bazololo babâ ndiku za Nzambi. Yehova “mbo kakwizi bâka ndiku ya mutima ya bantu ba sungama.” (Bin. 3:32) Ni mu nzila ya nkûlulu ya Yezu tindiku tio tilendi bêla. Mu nzila ya nkûlulu yo, na nsayi yayansoni Yehova watuhana bweso ngatu tatihanaka kwe Yandi mpe tabatusuku. Bu tubongaka nzengolo zo za mfunu, mbo tukwizi bâka tintwari na milio za Bakristo batihana kwe Nzambi, babatusu mpe bê na “tindiku tia ngolo” na Yehova, Yandi Wa Tomo Zangama mu nza yayansoni!

6. Bwe tulendi songela ti tindiku tieto na Yehova tia tuzoloko?

⁶ Bwe tulendi songela ti tindiku tieto na Yehova tia tuzoloko? Ntiana Abrahame na Yobe, batatamana mu bâ ba kwikama mvula yôka 100, tufweti tatamana mu bâ ba kwikama ni bu sa ti ntama peleko ka ntama ko tabatikiri mu sarila Yehova mu nza yi ya mbi. Ntiana Daniele, tufweti bongelaka tindiku tieto na Yehova ntiana tima tiyôkele luzingu lweto mu ntalu. (Dan. 6:7, 10, 16, 22) Na lubakusu lwa Yehova, tulendi korela mpasi ni mpasi zituturila mu tatamana mu bâ ndiku zandi.​—Flp. 4:13.

7. (a) Tintwari na Bingana 15:8, Yehova bwe kabongelaka tusambulu tweto? (b) Bwe Yehova kahaninaka mvutu mu tusambulu tweto?

⁷ Timvwama tiakaka tilembo monekaka ni lusambulu. Ndiku za matieleka mbo zizoloko mu zonzela mabanza mawu na mbanzulu zawu za mutima. Ngano ni bo kwa mpe mu tindiku tieto na Yehova? Yee! Yehova mbo katuzonzesaka mu nzila ya Zu diandi, mpe ni mo katuzabikisilaka mabanza mandi na mbanzulu zandi za mutima. Mbo tuzonzaka nandi mu nzila  ya lusambulu, mpe tulendi mu têla mabanza meto ma kati na mbanzulu zeto za mutima. Yehova nsayi yayingi yi bâka nandi bu kawâka tusambulu tweto. (Tanga Bingana 15:8.) Bu kena ndiku’eto ya luzolo, Yehova ka sukinaka ko kwa mu wâ tusambulu tweto, kâ mbo kahaninaka to mpe mvutu. Ntangu zakaka mbo kakulu hanaka mvutu. Kâ, ntangu zakaka tufweti tatamana mu sambirilaka musamu we neto. Buna, tulendi bâ na lukwikulu ti, mvutu mbo zikwizaka mu ntangu na mu mpila ya yibote. Wa matieleka, mvutu za Nzambi zilendi bâ mpe za swaswana na mpila yi tuta za kêlela. Mu tifwani, kani kakatula mpasi, Yehova lendi tu hana ndwenga na ngolo za “korela zo.”​—1 Kor. 10:13.

8. Bwe tulendi songela ti kabu dia lusambulu dia tuzoloko?

⁸ Bwe tulendi songela ti kabu dia lusambulu ntalu diena kwe beto? Tulendi wa songela bu tulanda malongi ma Nzambi matâka ti ‘tasambilakeno ntangu zazansoni.’ (1 Tes. 5:17) Yehova ka tu tumaka mu ngolo ko tasambilaka. Mbo kazitisaka timpwanza tieto tia sola mpe mbo katutindisaka mu “tatamana mu lusambulu.” (Rom. 12:12, NWT) Buna tulendi songela ti lusambulu lwa tuzoloko tala ti sambila tuvulu sambilaka mu tilumbu. Wufwanakane mpe, tatondaka mpe takembelaka Yehova mu tusambulu tweto.​—Mik. 145:2, 3.

9. Mpangi yimosi bwe yibongelaka lusambulu, mbo nge bwe bongelaka lusambulu?

⁹ Bu tukwe sariri Yehova na bu tukwe mone mpila yi kahanina mvutu mu tusambulu tweto luzolo lweto mu bungu dia lusambulu mbo lutomo kula. Tabongeno tifwani tia Chris, mpangi yeri mu tisalu tia ntangu zazansoni tuka mvula 47. Têle ti: “Ntia nsayi yi bâka nani mu pari na pari bu nivumbukaka mu sambila Yehova!” Vutulu tâ ti: “Musamu wa nguria wa mbote wena mu zonza kwe Yehova bu batikaka mu têka mwini mpe bima biabiansoni bu biena bia toma! Mbo bikuntumaka mu mu vuturila matondo mu bungu dia makabu mandi mamansoni, mo kati dia makabu mo mwe na kabu dia lusambulu. Mpe ha manima ma lusambulu lwa mpimpa, ntia nsayi ya bwa tolo na ngindu ya mbote peleko ya dzuna.”

10. Mu bungu dia nti tufweti bongelaka mpeve santu ntiana kabu dia ntalu?

¹⁰ Ngolo za Nzambi zisalaka, kabu diakaka diena di tufweti tomo zolo. Yezu watutindisa mu tatamana mu lombaka mpeve santu mu lusambulu. (Like 11:9, 13) Mu nzila ya mpeve santu, Yehova mbo katuhanaka “ngolo ziyôkele.” (2 Kor. 4:7; Bis. 1:8) Na lubakusu lwa mpeve santu, tulendi telamana mpasi ni mpasi zituturila.

11. Mu ntia mpila mpeve santu yilendi tu bakisila?

¹¹ Mpeve santu yilendi tu bakisa mu tomo nata madema me neto mu tisalu tia tu hana Nzambi. Mpeve santu yilendi vutu yika ngolo lenda dieto dia sarila. Buna, tuzebi ti tala ti ndandu za mbote tubakaka mu tisalu tia Yehova, ka mu ngolo za beto beni’â ko, kâ mu ngolo za mpeve santu ya Nzambi.

12. Tintwari na Mikunga 139:23, 24, mu ntia misamu tulendi sambila ngatu mpeve santu yatubakisa?

¹² Mpila yakaka yi tusongela ti mpeve santu ntalu yena kwe beto, ni mu sambilaka ngatu yatubakisa mu zaba mabanza na nsatu za mbi za mutima’eto. (Tanga Mikunga 139:23, 24.) Tamana saka ndombolo za mpila yo, Yehova lendi sa ti tazaba mabanza meto na nsatu zeto za mbi mu nzila ya mpeve’andi. Mpe tala ti twizi zaba mabanza meto na nsatu zeto za mbi, tufweti sambila ngatu mpeve santu ya Nzambi yatuhana ngolo za telamana mabanza na nsatu zo za mbi. Tamana sarila bo, mbo tusongela ti tuzololo tasa keba mu yirika musamu wusa ti Yehova ka vutuandi tu bakisa mu nzila ya mpeve santu’andi.​—Efz. 4:30.

13. Bwe tulendi songela ti mpeve santu ya tutomo zoloko?

¹³ Lendi songela ti mpeve santu ya tomo zoloko wamana dimbitilaka misamu mi yita lungisa mu ntangu yi. Ntete kakâla ku mazulu, Yezu watêla milongoki miandi ti: ‘Mpeve santu bu yikôka mu beno, mbo lubâ na ngolo. Mbo lubâ mpe mbangi zani [. . .] na tii kwa sukina mutoto nsi.’ (Bis. 1:8) Misamu mio mialungana miamiansoni. Na lubakusu lwa mpeve santu, bantu milio 8 na ndambu bayika bisari bia Yehova mu bizunga biabiansoni bia nza. Paradi ya timpeve mpe ye neto, mu bungu ti mpeve ya Nzambi mbo yitubakisaka mu bâ na  bifu ntiana, luzolo, nsayi, tidzunu, luvivululu, nsayi ya sarila mbote, mbote ya ku mutima, timinu, bulembami, na tifu tia tiyimina. Bifu ni bio batâka nkumbu “mbutu ya mpeve.” (Nga. 5:22, 23, NWT) Diangana, mpeve santu kabu dia ntalu diena!

14. Ntia lubakusu lulembo monekaka lu bâka neto bu tubâka mu tisalu tia samuna?

¹⁴ “Sala tintwari” na Yehova, na Yezu mpe na bambazi timvwama tiena tilembo monekaka. (2 Kor. 6:1) Mbo tusalaka nawu tintwari, bu tubâka mu tisalu tia samuna. Paulo watâ mu bungu dia yandi na mu bungu dia bantu bô ba beri salaka tisalu timosi: ‘Beto, bibakisi bia Nzambi twena.’ (1 Kor. 3:9) Bu tusalaka tisalu tia samuna tia Bakristo, mbo tubâka mpe bibakisi bia Yezu. Bambukaka ti bu kamana tuma milongoki miandi ‘miakubika milongoki mu nsi yayansoni,’ Yezu watâ ti: ‘Mbo nibâ neno.’ (Mat. 28:19, 20) Bwe tutâ mu bambazi? Tusakumunu twa tunene twena mu baka lutwalusu lwa bambazi bu tusamunaka “nsangu za mbote za ntangu zazansoni [. . .] kwe bô babâka ha mutoto”!​—Nza. 14:6, NWT.

15. Zonzela tifwani timosi tia Bibila tita songela tisalu tia mfunu Yehova ti kasalaka mu tisalu tieto tia samuna.

¹⁵ Ngano ntia misamu miyilamaka mu nzila ya lubakusu lutûkaka ku mazulu? Bu tukwe kunaka nsangu za Timfumu, mbutu zakaka mbo zibwaka mu mitima mitambulaka zo mpe mbo zikulaka. (Mat. 13:18, 23) Nani saka ti mbutu zo za matieleka zakula mpe zabuta mbutu zakaka? Yezu wabangula ti ka kwena muntu ko wulendi kwizi bâ mulongoki’andi tala ti ‘Tata, [. . .] ka mu bendele’â ko.’ (Za 6:44) Bibila tifwani tia mpila yo dihanaka. Bambuka misamu miayôka mu ntangu Paulo yi kasamunina tikunku tia bakento beri ku hata dia Filipe. Mu bungu dia mukento wumosi wu beri tâka nkumbu Lidi weri mo tikunku tio Bibila, ditêle ti: ‘Mfumu Nzambi [Yehova] wamuzibula mutima, mu tomo teka kutu mu misamu mieri tâka Paulo.’ (Bis. 16:13-15) Ntiana Lidi, milio za bantu bakaka Yehova kayizi benda.

16. Ngano nani tufweti kembelaka mu bungu dia ndandu za mbote zi tubakaka mu tisalu tia samuna?

¹⁶ Nani fwanakane mu baka mukembo mu bungu dia ndandu za mbote za tisalu tia samuna? Paulo wahana mvutu mu tiyuvu tio mu mukanda wu katsonekena timvuka tia ku Korente: ‘Meno, ni nakuna; Apolose, ni wamwengi mamba; kâ, ni Nzambi wamenese. Kâ, wô kunaka, kena tima ko, keti wô mwangaka mamba mpe kena tima ko; kâ, Nzambi menesaka.’ (1 Kor. 3:6, 7) Ntiana Paulo, ntangu zazansoni, tufweti hanaka mukembo wawansoni kwe Yehova mu bungu dia ndandu za mbote zi tubakaka mu tisalu tia samuna.

17. Bwe tulendi songela ti bweso bwa sala tintwari na Nzambi, na Kristo mpe na Bambazi bwa tutomo zoloko?

¹⁷ Bwe tulendi songela ti bweso bweto bwa “sala tintwari” na Nzambi, na Kristo mpe na bambazi bwa tutomo zoloko? Tulendi songela luzolo lweto mu bweso bo, tala ti tusariri ngolo mu samunaka mu mpila zazansoni na luhemo lwalwansoni. Mpila zazingi tulendi samunina, tulendi samunaka ‘ha lungiri bantu, na mu zinzo [nzo na nzo].’ (Bis. 20:20) Bantu babingi bazoloko mpe mu samuna mu ntangu yi balembolo mu tisalu tia samuna. Bu babwanaka nzenza, mbo babahanaka mbote na nsayi yayansoni mpe mbo bayêlaka mu batika timoko. Tala ti bantu bango bazololo timoko, na buzitu bwabwansoni mbo bazonzelaka nsangu za Timfumu.

18-19. (a) Bwe tulendi mwangila mbutu za matieleka mamba? (b) Zonzela tinsamu timosi tita songela ti Yehova wabakisa mulongoki-Bibila wumosi.

¹⁸ Mu bungu ti “bibakisi bia Nzambi twena,” ka tufweti’â takunaka kwa mbutu ko, kâ tufweti  mpe za mwangaka mamba. Muntu bu wusongelaka luzolo mu mio mi tuzonzele nandi, mbo tudingaka mu sa miamiansoni mi tulenda mu vutu kwe mu tala ngatu talanda timoko, peleko mbo tuwisanaka na muntu wakaka wulendi kwe mu tala ngatu babatika ndongokolo ya Bibila. Ndongokolo bu yikwe kuri, nsayi yi bâka neto bu tumonaka mpila Yehova yi kakwizi bakisilaka mulongoki-Bibila mu soba mabanza na mbanzulu zandi za ku mutima.

¹⁹ Tazonzela tifwani tia Raphalalani weri nganga ku Afrique du Sud. Misamu mi keri longokaka mu ndongokolo ya Bibila mia keri zoloko. Kâ, musamu wa mpasi weri kwe yandi bu katanga misamu mi tâka Zu dia Nzambi mu bungu dia tifu tia zonza na bantu ba fwa. (Lub. 18:10-12) Malembe melembe, wayizi bika Yehova kasobesa mabanza mandi. Ha manima, wayizi bika bunganga, ni bu sa ti ni mo keri dilaka. Bwawu bu Raphalalani weka na mvula 60, têle ti: “Matondo mamingi nivuturilaka Mbangi za Yehova mu mpila zazingi zi bakumbakisilaka, ntiana mu lubakusu lu bakungana mu baka tisalu. Kâ tiyôkele, matondo mamingi nivuturilaka Yehova mu lubakusu lu kakungana mu sa bunkete mu luzingu lwani, ngatu lumbu ti nabatika mu samuna ntiana wumosi wa Mbangi zandi za batusu.”

20. Ntia nzengolo bongele?

²⁰ Mu timoko ti, twizi taluzula bimvwama biyà bilembo monekaka. Timvwama titomono yôka biabiansoni, ni bweso bwe neto bwa bâ na tindiku tia ngolo na Yehova. Ni tio tisaka ti tabaka bimvwama bio biakaka bilembo monekaka: pusana kwe Yehova mu nzila ya lusambulu, baka lubakusu lwa mpeve santu’andi, mpe baka lubakusu lutûkaka ku mazulu. Wufwanakane tatomo zolo bimvwama bio bilembo monekaka. Mpe wufwanakane tatamana mu tondaka Yehova mu bungu ti Yandi nkatika ndiku ya mbote yena.