Mbikululu zakaka zi bazonzele mu kaku ti mbo zizonzelaka misamu miayôka ha timosi. Mbikululu zo mbo zisongelaka ti “mu ntangu ya mansukina” twena.​—Dan. 12:4.

• Verse Nza. 11:7; 12:13, 17; 13:1-8, 12

  Mbikululu “Tibulu tia sangi” tiyêri mutoto mvula zazingi. Mu ntangu ya mansukina, mutu wa nsambwari wulwele. Ha manima, mutu wo wuwasiri mpe “mutoto wa mukaka” wulendi tibulu tia sangi. Satana tibulu tio kasarilaka mu “nwanisa bô basâla.”

  Ndungananu Ha manima ma muzingu wo, guvernema zitelamanaka Yehova zayâla mutoto wa mukaka. Ha manima ma mafunda ma mvula, mu ntangu ya Muzingu wa ntete wa wunene wa nza, Grande-Bretagne ka yisiri’â ngolo ko. Yavutu kâla ngolo bu yayizi vukana na États-Unis. Mu ntangu ya mansukina, Satana tinsamu tia politike tiatiansoni kata sarila mu mwisa kanda dia Nzambi mpasi.

• Verse Dan. 11:25-45

  Mbikululu Timbanda tia mutinu wa ku nore na mutimu wa ku side mu ntangu ya mansukina.

  Ndungananu Allemagne yanwanisa Grande-Bretagne na États-Unis. Mu muvu wa 1945 Union soviétique na nsi zi beri tintwari bayizi bâ mutinu wa ku nore. Mu muvu wa 1991, Union soviétique yamwangana, mpe ntangu fioti ha manima, Russie na nsi zi beri tintwari bayizi bâ mutinu wa ku nore.

• Verse Iza. 61:1; Mal. 3:1; Like 4:18

  Mbikululu Yehova tambikiri ‘ntumwa’andi’ ngatu ‘yakubika nzila’ ntete batûla Timfumu tia Masiya. “Ntumwa” yabatika mu “samuna nsangu za mbote kwe bantu ba lembama.”

  Ndungananu Tuka 1870, Russell na ndiku zandi batomo longoka Bibila ngatu bazaba ka nti ditomo longesaka. Mu muvu wa 1880, babatika mu songela na tiya twatwansoni ti bisari bia Nzambi bifweti samuna. Badukisa mikanda ntiana “Bisamuni 1 000 bita dingana” mpe “batumbu mu samuna.”

• Verse Mat. 13:24-30, 36-43

  Mbikululu Mbeni yizi kuna matiti ma mabi ku musitu wa blé ma baheni nzila makula mpe masweka blé tii ntangu yi bakwizi ya tia yitula; mpe matiti ma mabi bahambase mo na blé.

  Ndungananu Ku mbatukulu ya muvu wa 1 800, Bakristo ba matieleka babatika mu swaswakana na Bakristo ba bungungu. Mu ntangu ya mansukina, Bakristo ba matieleka bayizi batika mu bâ mu bimvuka mpe bayizi hambana na Bakristo ba bungungu.

• Verse Dan. 2:31-33, 41-43

  Mbikululu Malu ma bisengo ma vukana na tibuma mu tifwiti tiasalama mu bisengo bia swaswana.

  Ndungananu Tibuma mbo timonekesaka bantu babansoni ba yâlaka guvernema ya Grande-Bretagne na ya États-Unis mpe bakwizi kolamaka kwe guvernema zo. Mu bungu dia bantu bo, guvernema ka zilendi’â zasarila ngolo zawu zazansoni ko.

• Verse Mat. 13:30; 24:14, 45; 28:19, 20

  Mbikululu “Blé” baneti yo mu “nzo yi balundilaka bima” mpe “ngamba ya kwikama na ya ndwenga” yibatikiri mu sarila “bisari bia nzo.” Tisalu tia samuna “nsangu za mbote za Timfumu” tibatikiri mu salama “ha mutoto wa mukaka.”

  Ndungananu Mu 1919 ngamba ya kwikama yabatika mu sarila kanda dia Nzambi. Mu ntangu yo, milongoki mia Bibila mbo mieri samunaka kwakwingi. Lumbu ti, Mbangi za Yehova mu nsi na teritware yôka 200 basamunaka, mpe mbo bakabaka mikanda mizonzelaka Bibila mu mazu yôka 1 000.

• Verse Dan. 12:11; Nza. 13:11, 14, 15

  Mbikululu Tibulu tia sangi tie na mampoka mole mbo titumaka bantu bê ha mutoto bayirika “tifwiti tia tibulu tia sangi,” mpe mbo tihanaka “tihumunu kwe tifwiti.”

  Ndungananu Anglo-Américain lwe lutumu luyôkele mu nza yabatika tinsamu tia SDN (Société des nations). Nsi zakaka zayizi kota mu organizasio yo. Ha manima, mutinu wa ku nore wayizi ya kota mpe​—kâ tuka muvu wa 1926 tii wa 1933 kwa. Bantu bayizi kwikila ti SDN mbo yaketi nata tidzunu mu nza, kâ musamu wo Nzambi kwa lendi wa yirika. Bantu mbo bakwikilaka mpe ti ONU tidzunu yinataka.

• Verse Dan. 8:23, 24

  Mbikululu Mutinu we na miangu miamingi wuneti “mfukulu ya nzitukulu.”

  Ndungananu Anglo-Américain lwe lutumu luyôkele mu nza yahonda bantu babingi mpe yamwangasa bima biabingi. Mu tifwani, mu Muzingu wa nzole wa wunene wa nza ya mukaka, États-Unis yatambika bombes atomiques zole ku nsi yeri mbeni zawu na za Grande-Bretagne. Bingundu bio biahonda bantu babingi mpe biamwangasa bima mu mpila yimosi yalembo toko kwa bâ.

• Verse Dan. 11:31; Nza. 17:3, 7-11

  Mbikululu Tibulu tia “mbwaki ya ngolo” tie na mampoka ma kumi tidukiri mu abime mpe tieka mutinu wa nana (8). Buku dia Daniele mbo dizonzelaka mutinu wo ntiana “tima tia ntoto tibebesaka.”

  Ndungananu Mu Muzingu wa nzole wa wunene wa nza, SDN yasuka. Ha manima ma muzingu, ONU “yabatika mu sala.” Ntiana SDN yatekela, mukembo wu bahanaka kwe Timfumu tia Nzambi, ONU ni wo kabakaka. Mpasi ziyôkele mbo zibatika mu ntangu yi mwangasa ONU mabundu ma bungungu.

• Verse 1 Tes. 5:3; Nza. 17:16

  Mbikululu Makanda matêle “tidzunu na kondo kwa bunkuta,” mpe “mampoka ma kumi” na “tibulu tia sangi” babalukiri “tiyala” mpe bamufukisi. Ha manima, bizi fukisa makanda.

  Ndungananu Kampe Makanda mbo matâ ti tidzunu na kondo kwa bunkuta baneti mu nza. Mpe nsi ze na tintwari na ONU, mbo zifukisa mabundu ma bungungu. Ni mu ntangu yo mpasi ziyôkele zibatika. Mpasi zo mbo zikwizi wa mu ntangu Yezu yi kafukisa nza ya Satana mu Armagedo.

• Verse Ezk. 38:11, 14-17; Mat. 24:31

  Mbikululu Goge yiteni nsi ya kanda dia Nzambi. Ha manima, bambazi bakutakase “bô bê ba solo.”

  Ndungananu Mutinu wa ku nore, na guvernema zakaka mbo zikwizi nwanisa kanda dia Nzambi. Ntangu fioti ha manima ma mbatukulu ya mfietokoso zo, bantu ba tumbu mbo babakutakasa ku mazulu.

• Verse Ezk. 38:18-23; Dan. 2:34, 35, 44, 45; Nza. 6:2; 16:14, 16; 17:14; 19:20

  Mbikululu “Wô zakale” ha zulu “balu (cheval) dia mpembe” ‘nungini tii ku nsuka’ bu kafukisi Goge na mukangu’andi wa binwani. ‘Tibulu tia sangi balosele tio mu zanga dia tiya,’ mpe tifwiti tia zangama timwangane.

  Ndungananu Yezu, mutinu wa Timfumu tia Nzambi, wiziri mu vukisa kanda dia Nzambi. Tintwari na bantu 144 000 bakatuma na bo mpe na mikangu mia binwani mia bambazi, Yezu mbo kafukisa makanda mamansoni manwanisa kanda dia Nzambi. Ni hana ha bêla nsuka ya nza ya Satana.