Mu dibundu dia catholique bakunkurisila, ku hata dia Rochester, mu tizunga tia New York. Bibuti biani biahambana bu ndieri na mvula 8. Tûka lundi tii vendredi kwe nguri’ani ndieri bâka mu nzo ya fioti ya bantu ba mputu, mboko samedi na dimanche kwe tata’ani ndieri kwe bâka ku tizunga tia bamvwama. Bu ndieri monaka mpasi zeri monaka nguri’ani mu sansa bala 6, nayizi bâ na nsatu ya bâ mvwama ngatu nabakisa kanda diani.

 Tata’ani watomo zolo ti meno na lenda, mpe wasa ti ndienda na tala lukolo lumosi lwa lunene lu balongokaka mpila ya twarisila Hôtel. Nazolo lukolo lwango mpe naye titsonekesa kûna. Nayizi banza ti Nzambi weri hanaka mvutu mu tusambulu twani twa bâ mvwama. Nayizi longoka Administration hôtelière, Droit des affaires na Finances d’entreprises; mu mvula 5 zi ndieri salaka ku Casino-hôtel ya ku Las Vegas, mu tizunga tia Nevada.

 Bu nayizi bâ na mvula 22, nayizi bâ tilandi tia vice président ya Casino-hôtel. Mbo beri kumbongelaka ntiana mvwama mpe ntiana muntu wa lenda weri zoloko bidia biyôkele bubote na malavu ma mayôkele ntalu. Ndiku zani za tisalu mbo zeri vulu tâka: “Bambukaka ti mbongo ni tima tiyôkele mfunu mu nza.” Mu mabanza mawu, nguria nsayi mu mbongo yitûkaka.

 Tisalu tiani tieri ni mu lungisaka nsatu za bantu beri mvwama, bayizi sakana ku Las Vegas. Ni bu sa ti mbongo zazingi zeri nawu, ka ndeiri’â bamonaka na nsayi ko. Meno mpe nayizi batika mu lembo vutu bâ na nsayi. Ni bu sa ti bimvwama biani yikama bieri yikamaka, tiari tieri vula bâka nani mpe ka ndieri’â bwaka tolo twa tubote ko. Nayizi batika mu bâ na mabanza ma tihonda. Mu bungu ti mbelo’ani nôkesa yeri kunôkesaka, nayizi dinga Nzambi mpe namuyula: “Ngano kwe ndendi bakila nsayi ya matieleka?”

 Mu ntangu yo kwa mpe, bibusi biani biayizi bâ Mbangi za Yehova mpe biayizi bâ ku Las Vegas. Ni bu sa ti ka ndieri’â zoloko mu tanga mabuku mawu ko, nayizi tambula mu tangaka Bibila diani na bawu. Mu bungu ti mbo ndieri tambulaka misamu miamiansoni miatâ Yezu, bibusi biani mbo bieri vulu kunzonzelaka ndongosolo za Yezu. Bu ndieri bâka meno kaka mpe, Bibila ndieri tangaka.

 Misamu miamingi natanga mu Bibila miakunsusumuna. Mu tifwani, Yezu watâ: “Bu lusambilaka, ka luzonzakandi kwakwingi ntiana bu saka bapaye, bawu babanzaka ti mbo babawâ mu bungu ti misamu miamingi batâka.” (Matie 6:7, The New American Bible) Mu ntama, mupelo wumosi wakungana foto ya Yezu mpe wakuntêla ti namana tâka lusambulu lwa “Tata’ eto” mbala 10 na lusambulu lwa “ Mbote’ aku Marie” mbala 10, ha foto yo, Nzambi mbo kakungana mbongo zazansoni zi nzololo. Kâ nayizi bakula ti, bu naketi karilaka tusambulu to mbala zazingi, mbo naketi tatamana mu karila misamu milembolo nsasa kwe meno. Nayizi tanga mpe nzonzolo ya Yezu yi tâka ti: “Ha mutoto, kutândi muntu, tata’aku; kâ Tata dimosi kwa die naku ku zulu.” (Matie 23:9, NAB) Mpe navutu tiyula ‘Mu bungu dia nti ndiku zani za mu dibundu dia Catholique zitâka mupelo’eto “Tata”?’

 Mu ntangu yi ndieri tangaka mukanda wa Zaki, nayizi batika mu tomo dimbitila mu mpila yi ndieri natinaka luzingu lwani. Mu tikapu 4, Zaki watsoneka ti: “Ngano wa luzebi ti lwamana bâ muntu wuzololo nza, wuzololo tâ ti lweka mbeni za Nzambi? Dieka bo, muntu wuzololo mu bâ ndiku ya Nzambi mbo kabâ mbeni ya Nzambi.” (Zaki 4:4, NAB) Mpe verse 17 yatomo kunsusumuna: “Kwe muntu wuzebi musamu wu kafweti sa mpe kata wa sa ko, disumu.” Buna nayizi tâ bibusi biani mbila mpe nabatêla ti ka nivutu’â sala ku Casino-hôtel ko, mu bungu ti mbo yeri kuntumaka mu yirika misamu mi ndieri lembo vutu zoloko, ntiana nsaka na luwu lwa mbongo.

 Nayizi bâ na nsatu ya tomesa tindiku tiani na Nzambi, na bibuti biani mpe na bibusi biani. Mu lenda nayizi bonga nzengolo ya bâ na luzingu lulembolo na nkaka. Kâ, katula nkaka yo mu luzingu lwani musamu wa mpasi weri. Mu tifwani, bantu babingi bayizi kuntâ mbila ngatu bakungana tisalu ti naketi bakila mbongo zazingi (yôka mbala zole peleko zitatu na mbongo zi ndieri bakaka). Kâ ha manima ma lusambulu, nayizi bonga nzengolo ya lembo vutu zolo mbelo yo. Nabika tisalu tiani, naye bâ mu garrage ya nguri’ani,mpe nayizi batika tisalu tia salaka mikanda mia plastique mi batarilaka bima bi balambaka mu restaurant (menus).

 Ni bu sa ti Bibila diakumbakisa mu bonga nzengolo ziyôkele bubote mu luzingu, ka ndieri’â zoloko ko mu kwenda ku tukutakanu twa Mbangi za Yehova. Bibusi biani biakundiyula ntia musamu weri saka ti nalembo zolo Mbangi za Yehova. Nabaviturila ti: “Mu bungu ti Nzambi’eno Yehova, makanda yihambasaka. Bilumbu bi ndendi bâ na kanda diani ni bilumbu dia malaki ma Noël na bia malaki ma mbutukulu, mpe beno malaki mo ka ludiaka mo ko.“ Mpangi’ani yabatika mu dila mpe yakundiyula : “Mbo bilumbu biakaka bia muvu kwe bâka? Beto we neto tabâka naku ntangu zazansoni. Kâ nge mu bilumbu bia malaki mo kwa kwizaka, mpe mwizu’aki ni mu bungu ti mbo banzaka ti fweti kwiza kwa mu bilumbu bio.” Misamu mi katâ miatomo kunsimba mutima mpe nabatika mu dila na yandi.

 Ni mu ntangu yo nayizi bakula ti mabanza ma mbi meri nani mpe Mbangi za Yehova makanda mawu bazoloko. Nayizi bonga nzengolo ya kwenda ku lukutakanu lwawu, ku Nzo ya Nsambulula’awu ya ku tizunga tiani. Ni kûna na bwawana na Kevin, mulongi wuzebi Bibila mpe wabatika mu kundongesa Bibila.

 Kevin na mukento’andi luzingu lwa delakana lweri nawu ngatu bayôkesa ntangu yayingi mu bakisa bantu mu longoka Bibila. Mbongo zi beri bakaka mbo zeri babakisaka mu kwenda ku Afrique na ku Amérique mu kwe tunga filiale za Mbangi za Yehova. Nguria nsayi yeri nawu mpe batomo zolosono. Nayizi banza: ‘Yi ni mbelo yi nikekoloko.’

 Kevin wakunsongela video yizonzelaka nsayi za tisalu tia misionere, mpe nayizi bonga nzengolo ya sala tisalu tiango. Mu 1995, ha manima ma ndongokolo’ani ya Bibila ya ngonda 6, nayizi batusu mu bâ Mbangi ya Yehova. Kani nasambila Nzambi mu bâ mvwama, bwawu sambila nisambilaka mu mpila eyi: “Kunganandi bumputu, timvwama mpe kâni.”—⁠Bingana 30:8.

 Bwawu bu timvwama tia matieleka tie nani, ka tia mbongo’â ko, kâ tia timpeve mu bungu ti tindiku tia mbote tie nani na Nzambi mpe luzingu lwa nsayi lwe nani. Nayizi bwabana na Nuria ku Honduras, mukento’ani wu nzololo mpe beto bole tayizi sala tisalu tia misionere ku Panama na ku Mexique. Ntia mpila matieleka me mu nzonzolo ya Bibila yitâka: “Ni lusakumunu lwa Yehova luvwamisaka, mpe ka luyikaka mpasi ko”!—⁠Bingana 10:22.