Ha manima ma bateme’andi mpe bu kayizi bâ Mbangi ya Yehova, Zarina wakatuka ku Russie mu kâla ku hata di katûka ku Asie Centrale. Wabâ na kani dia longesa misamu mi keri kwikilaka kwe bala bandi ba bole ba bakento. Mu bungu ti ka bâ na mbongo zazingi ko, waye bâ mu nzo yimosi na bibuti biandi, nkazi’andi na mukento wa nkazi’andi. Bibuti biandi biamuyimina mu longesa Bibila kwe bala bandi. Bibuti biandi mpe biayimina bala mu zonzela misamu mia Bibila na nguri’awu.

Zarina watomo dimbitila mu mpila yi kaketi bakisila bala bandi mu zaba Yehova. (Bingana 1:8) Ntiangu kasambila mu mutima wawansoni, walomba kwe Yehova kamutwarisa mpe kamuhana ndwenga. Zarina wayirika misamu buna bu kalombela mio mu lusambulu; waye zeba mbala zazingi na bala bandi mu ba zonzela bima bia toma bia sala Yehova. Mu zeba ko kukeri kwe zebaka, wabakisa bala bandi mu kwizi zolo Nzambi wabasala.

Ha manima, Zarina wayizi vutu banza bwe kaketi sa ngatu bala bandi balongoka misamu miamingi. Buku dia Qu’enseigne réellement la Bible? * keri kopaka mu papier za fioti. Mbangululu ya misamu mio keri tsonekaka mpe mu bakisa bala bandi mu bakula mio. Mpe papier yango keri kwe swekaka na crayon ku nsi’â masini ma basukurilaka binkuti. Bala bu beri kwenda muna mweri masini mango, mukanda wo beri tangaka mpe mbo beri tsonekaka mvutu’awu.

Mu mpila yo, Zarina walenda mu longesa chapitre zole za buku dia Qu’enseigne la Bible ? kwe bala bandi. Ha manima, Zarina waye bâ mbuka yakaka na bala bandi. Buna Zarina ka vutu’â bâ na nkaka ko mu longesa bala bandi buna bu keri zoloko. Mu octobre 2016, bala bandi ba bole ba bakento bayizi batusu. Nsayi yeri nawu mu bungu ti nguri’awu wayizi sarila ndwenga mpe wasa keba, ngatu kalenda mu ba longesa matieleka ma Yehova.