Danielle, Mbangi ya Yehova ya ku Afrique du Sud, wayizi bukila nkutu ya zimbakana mu nzo yi batekelaka kafi. Mu kati, Mbongo zeri mô na cartes de credit. Mu bungu ti yandi wabonga nzengolo ya karisa nkutu yango, wadinga mu zaba bwe kalendi sa mu vutula yo kwe muntu vwiri yo, kâ tima ti kabaka mu nkutu ni nkumbu ya bakala dimosi. Yandi wayizi dinga mu monekena muntu wango mu nzila ya banque’andi, kâ kayizi’â lenda ko. Danielle ka yizi’â nôka ko. Mu kati dia nkutu wayizi mona reçu yi bavuturila bakala diango ku lupitalu, yandi wayizi tâ mbila nimero ya ku lupitalu lwango mpe sekretere yamubwana ku telefone yatambula mu bonga numero ya Danielle mu hana yo kwe bakala diavwa nkutu yango.

Bakala diango diayizi susumuka mu mona ti lupitalu lwamutâ mbila ku telefone mu mu têla ti Danielle wayizi bukila nkutu’andi mpe nsatu yabâ nandi mu mu vuturila yo. Bu kayiza mu kwizi bonga nkutu’andi, Danielle na tata’andi bayizi mu bwana. Bawu bayizi mu bangurila mu bungu dia nti bayizi sarila ngolo mu mu vuturila nkutu’andi. Bawu bayizi mu têla ti Mbangi za Yehova zeri, mpe ngolo basarilaka mu landa mitieno mia Bibila mu luzingu lwawu. Ntiangu basarilaka ngolo mu bâka na busungu ntangu zazansoni.​—Bahebre 13:18.

Ntangu fioti kwa ha manima, bakala diayizi tambikila Danielle na tata’andi mukanda wa matondo mu bungu dia nkutu yi bamukarisila. Yandi watsoneka ti: “Matondo mamingi nita lu vuturila bu lwasariri ngolo mu kundzukula. Nsayi yayingi yabêle nani mu bwabana na beno mpe ka nizimbakana nsayi na mbote’eno ko. Nzololo naluhana kabu mu luvuturila matondo. Nzebi ti ngolo zazingi lusarilaka mu sala tisalu tia lu hana Nzambi. Nsalulu za Danielle zisongele mpila ya bantu yi lwena: Ba nsungu mpe ba kwikama. Buna, matondo mamingi, mpe Nzambi kasakumuna tisalu tieno.”

Ngonda zalanda ha manima, tata dia Danielle wayizi vutu zonza na bakala diango, mpe yandi wamutêla ti timpokoti kayizi bukila ha mutoto tilumbu timosi bu kaduka. Bu kayizi mona munkwa timpokoti, yandi wamuzonzela musamu wamutuma kakarisa timpokoti tiango: muntu wayizi yirika musamu wa mpila yo mu bungu dia yandi. Yandi watâ ti: “Musamu wa fioti wa bunsungu na wa mbote wutulumuni musamu wakaka wa mpila yo, mpe luzingu lweto toma lutomaka.”