Yanmei, Mbangi yimosi ya Yehova ya ku Asie, wabakisa mukento wumosi wafwa meso wubatâka nkumbu Mingjie mu sabuka nzila. * Mingjie watâ: “Matondo maku. Bika Nzambi kakusakumuna!” Ha manima, Yanmei wayula Mingjie tala ti zololo bavutu bwabana ngatu bazonzela Bibila. Mingjie watâ ti bilumbu biabiansoni sambila keri sambilaka ngatu bamutwarisa mu timvuka tia matieleka tia Nzambi. Mu bungu dia nti kasila lusambulu lwa mpila yo?

Mingjie têle ti mu 2008 watambula mbila ya ndiku’andi yeri mpe na meso ma fwa mu kwenda ku lukutakanu lwa dibundu dimosi mu bungu dia bantu bê na bifuma. Bu bamana wâ tinzonzi, Mingjie wayula kwe mupelo ntia buku kasarila. Mupelo wamuvuturila ti Bibila, Zu dia matieleka dia Nzambi kasarila. Mingjie wayizi bâ na nsatu yayingi ya tanga Bibila. Ntiangu kaye sumba Bibila dia mu chinois ditangaka bantu bafwa meso (braille), mpe watanga volume 32 za Bibila dio mu ngonda 6. Bu keri kwe tangi Bibila, Mingjie wayizi mona ti ndongosolo ya butatu (trinité) yi bamulongesa mu dibundu ka yitûkaka mu Bibila ko, mpe wayizi longoka ti Nzambi nkumbu ye nandi, mpe nkumbu yango ni Yehova.

Bantu ba mu dibundu bayizi niongesa Mingjie. Wayizi bakula ti ka basarilaka mio mi keri tangaka mu Bibila ko. Mu tifwani, mbo beri hanaka bidia bia mbote kwe bantu beri na meso, mboko bantu bafwa meso mbo beri bahanaka bio bieri sarilaka. Mingjie wafwema mu titantu tia mpila yo; buna wabatika mu dinga dibundu diakaka dieri mu tizunga tiandi. Ntiangu Mingjie keri lombaka mu lusambulu kabaka timvuka tia Bakristo ba matieleka.

Mu bungu ti nsayi yamusongela Yanmei yamusimba mutima, Mingjie watambula ndongokolo ya Bibila ya mu zonzela Yanmei. Ha manima, Mingjie wayenda mbala ya ntete ku lukutakanu lwa Mbangi za Yehova. Mingjie têle ti: “Kani kabwe, ka nizimbakana lukutakanu lwani lwa ntete ko. Mpangi zazansoni mbo zeri kunganaka mbote na nsayi yayansoni. Watomo kunsimba mutima. Ni bu sa ti meso ma fwa me nani, kâ namona luzolo lulembolo na tihambula.”

Mingjie watatamana mu longoka mu zaba Yehova, mpe wabatika mu kwendaka ku tukutakanu ntangu zazansoni. Mbo keri vulu zoloko mu tangaka mikunga mia nsambululu, kâ, musamu wa mpasi weri kwe yandi mu bungu ti kweri’â buku dia mikunga mu braille ya zu diandi ko. Na lubakusu lwa timvuka, Mingjie watsoneka buku dia mikunga dia yandi beni. 22 heures yamufwanakana mu tsoneka mikunga 151! Mu avril 2018, Mingjie wayizi batika mu samuna, mpe mbo keri yôkesaka 30 heures mu ngonda mu tisalu tia samuna.

Mu bakisa Mingjie ngatu kakubama mu bungu dia bateme, Yanmei wasa enregistrement ya buku dia Organisés pour faire la volonté de Jéhovah ha titini tizonzelaka biyuvu na verse zitariri bateme. Mu juillet 2018, Mingjie wabatusu. Yandi têle ti: “Luzolo lwasongela bampangi ku lukutakanu lwa lunene lwatomo kunsimba mutima. Nsayi yingi yeri nani ni nabatika mu dila mu bungu ti, bwawu bu mu timvuka tia matieleka tia Nzambi ndiena.” (Za 13:34, 35) Bwawu bu Mingjie, nzengolo kabongele ya sala tisalu tia samuna tia ntangu yayansoni mu bungu ti zololo kasongela luzolo lu bamusongela kwe bantu bakaka.