Makabu meto tusarilaka mu baka mbongo za bisalu bia nsambululu na bia lubakusu bia organizasio’eto. Bisalu biango mbo bitubakisaka mu lungisa tisalu tia mfunu: Bakisa bantu bakaka mu bâ milongoki mia Yezu Kristo.​—Matie 28:19, 20.

 Ka tusarilaka mbongo za makabu meto ko mu vwamisa muntu. Bakuluntu beto na bisari biakaka ka ba bafutaka ko, mpe Mbangi za Yehova ka bafutaka zo ko bu zikwe samunaka mu nzo na nzo. Bô basala ku filiale zeto peleko ku biro ya yinene (siège mondial), ntiana mpangi za Timvuka titwarisaka, mu tikunku tia bisari bia Nzambi bia ntangu zazansoni bena mpe ka babafutaka ko.

•   Dukisa mabuku: Milio zazingi za Mabibila tubangulaka, tuniemaka, tutambikaka, mpe tukabaka, na mikanda miakaka mitariri Bakristo mia ofele mivu miamiansoni. Mpila mosi mpe, site jw.org na application JW Library bantu zibakisaka mu baka mikanda mia ofele mpe ka tusilaka mio publicité ko.

•   Ntungulu na ntomosono: Mbuka zazingi za nsambululu za delakana tutungisaka mu nza yayansoni mu bakisa bimvuka bia mpangi zeto mu kutakanaka mu mpila ya mbote ngatu bakundaka Nzambi. Ni bo kwa mpe tusaka mu bungu dia filiale zeto, na biro za mbangululu (antennes de traduction). Tisalu tiatîngi mu mbuka zango, bantu mu luzolo lwa mutima basarilaka tio, ntiangu tulembo tia futilaka mbongo zazingi.

•   Bisalu bia biro: Bisalu bia ku biro ya yinene, bia ku filiale na bia ku biro za mbangululu na bisalu bia minkengi mia bizunga, mu mbongo za makabu ma basaka mu bungu dia bisalu bieto bisalamanaka.

•   Tisalu tia samuna: Mbangi za Yehova ka bafutaka zo ko buzisamunaka nsangu za mbote na bu zilongesaka “Zu dia Nzambi.” (2 Bisi-Korente 2:17) Buna, ntiana Bakristo ba mu mbandu ya ntete, bisari biê kô basola, bi bakubika badikilka mpe bahanaka nzo ya bêla mu yôkesaka ntangu yayingi mu tisalu tia samuna.​—Bisi-Filipe 4:16, 17; 1 Timote 5:17, 18.

•   Ndongosolo: Tukutakanu tweto twa tunene na twa bizunga mu mbongo za makabu bakubikilaka to. Programe za ndongokolo ya Bibila mpe tu kubikaka. Tukolo twa bakuluntu na twa bisari bia ntangu zazansoni tukubikaka ngatu basala tisalu tiawu mu mpila ya mbote.

•   Bisalu bia lubakusu: Bima bia dia, mamba na nzo tuhanaka kwe bô babwilaka makuba ma nza (catastrophes naturelles) peleko makuba ma tulumunaka bantu. Tisalu tio tia lubakusu, Mbangi za Yehova babakilaka tio ndandu na bantu bakaka balembolo Mbangi za Yehova.​—Bisi-Ngalate 6:10.