Bu twe Mbangi za Yehova, ngolo tusarilaka mu yika ngolo makanda meto na ma ngwala zeto. Nzambi tuzitisaka Yandi wasala makanda. (Mbatukulu 2:21-24; Bisi-Efeze 3:14, 15) Mu Bibila, Nzambi mitieno katulongesaka, mibakisaka bantu babansoni mu nza mu bâ na makwela ma ngolo na ma nsayi.

 Ngolo tusarilaka mu landa malongi ma Bibila, mu bungu ti bakisa matubakisaka mu bâ babakala, bakento, na bibuti bia mbote. (Bingana 31:10-31; Bisi-Efeze 5:22–6:4; 1 Timote 5:8) Mitieno mia ndwenga mie mu Bibila makanda me na dibundu diaswaswana mibakisaka mpe mu bâ mu nsayi. (1 Piere 3:1, 2) Taleno misamu mia tâ bantu balembolo Mbangi za Yehova kâ bakwela muntu wayizi bâ Mbangi ya Yehova ha manima:

•   Clauir bâka ku Brésil têle ti: “Ivete na meno bu takwelana, mu mvula nsabwari zeto za ntete, nkatika bakana tweri bakanaka na maniongo mamingi meri neto. Ha manima, Ivete wayizi bâ Mbangi ya Yehova; wayizi tomo vutu kunzolo mpe luvivululu lwalwingi lwayizi bâ nandi. Nsobolo zi kasa zavukisa makwela meto.”

•   Agness bâka ku Zambie têle ti: “Ka nayizi’â zoloko mu ntangu bakala diani Chansa kabatika mu longoka na Mbangi za Yehova, mu bungu ti dieri banzaka ti makanda zihambasaka. Kâ nayizi bakula ti Bibila bantu ba kwelana dibakisaka.”

 Mu tisalu tia samuna, kwe bangwala beto tusongelaka ti bu tusarila malongi ma ndwenga me mu Bibila tulendi

•   Sola muntu wa mbote wu tukwela

•   Bêla mu nsayi mu mvula ya ntete ya makwela

•   Wisana bubote na bakwezi beto

•   Sarila mbongo mu mayela

•   Bika mu bakana

•   Longoka mu lemvokela

•   Sansa bala

 Diangana, ntangu zakaka ni bo wubêlaka. Mu tifwfani, mu 1998 rapore mosi (rapport de l’institut de sondage Sofres) yatâ ti mu makwela 20, makwela mamosi mayizi bwabana na mpasi mu ntangu wumosi mu bawu wayizi bâ Mbangi ya Yehova.

 Yezu wabikula ti ntangu zakaka bô baketi landa ndongosolo’andi mbo baketi mona mpasi mu bungu dia kanda diawu. (Matie 10:32-​36) Will Durant titsoniki timosi tia misamu mia ntama watâ ti mu ntangu luyalu lwa Bisi-Rome bu lweri yâlaka : “batâ ti Bakristo makanda beri hambasaka,” a mpe lumbu ti Mbangi za Yehova misamu ni mio babwabanaka na mio. Ngano wuzololo tâ ti ni wo we Mbangi ya Yehova tulumunaka misamu?

 Bu yabonga nzengolo yitariri musamu weri tâka ti Mbangi za Yehova makanda zihambasaka, Cour européenne des droits de l’homme yatâ ti bantu bamakanda balembolo Mbangi za Yehova misamu batulumunaka bu bakalaka “mu tambula na mu zitisa timpwanza tia bantu bakanda diawu mu sarila dibundu diawu.” Yivutu tâ ti: “Makanda mamansoni malembolo na dibundu dimosi musamu ni wo babwabanaka na wo, na Mbangi za Yehova mpe.” b Kâ, ni bu sa ti yina babayinaka mu bungu dia dibundu diawu, Mbangi za Yehova ngolo zisarilaka mu landa malongi ema ma Bibila: “Ka lukârisakandi mbi kwe muntu. . . . Tala ti bulendakane, buna kwa bu lulendela; bêno mu tidzunu na bantu babansoni.”​—Bisi-Rome 12:17, 18.

 Mbangi za Yehova malongi ma Bibila balandaka ma lomba mu kwela “kwa mu Mfumu,” wuzololo tâ, kwela muntu we Mbangi ya Yehova. (1 Bisi-Korente 7:39) Ntumunu yango mu Bibila yitûkiri mpe nkatika sarisa yisarisaka. Mu tifwani, mu 2010 timoko timosi tia duka mu zurnale yimosi (Journal of Marriage and Family) tiatâ ti: “bantu ba kwelana bê na dibundu dimosi, nkwikulu zimosi mpe basarilaka nkwikulu zo ha timosi” wisana batomo wisanaka. c

 Kâ, Mbangi za Yehova ka zilombaka ko kwe bantu badibundu diawu mu honda makwela na bakala diawu peleko mukento’awu wulembolo Mbangi ya Yehova. Bibila ditêle ti: “Kâ kwe bakaka ntêle ebu, yee ni meno, ka Mfumu’â ko: Tala ti mpangi ye kô ye na mukento wulembo kwikilaka, kâ tamburi mu bâ na yandi, ka mu bikandi; mpe tala ti mukento we na bakala dilembo kwikilaka kâ tamburi mu bâ na yandi, ka bikandi bakala diandi.”(1 Bisi-Korente 7:12, 13) Mbangi za Yehova ntumunu yo balandaka.