Bibila ka ditomo’â zonzelaka musamu wutariri euthanasie ko. a Kâ misamu mi ditâka mu bungu dia luzingu na mu bungu dia lufwa mbo mitubakisaka mu bâ na mabanza ma delakana. Dinga lufwa lwa muntu, musamu wa mbi wena, kâ ka wuta zolo tâ ko ti tufweti kwe pusi bilumbu bia muntu wulembolo sala na bweso bwa vuka.

 Bibila mbo ditâka ti Nzambi ni “titeko tia luzingu.” (Mikunga 36:9; Bisalu 17:28) Luzingu nguria mfunu lwena ha meso ma Nzambi. Ntiangu Nzambi kayiminaka mu honda muntu peleko mu tihonda. (Ndukulu 20:13; 1 Za 3:15) Bibila mbo disongelaka ti tufweti baka ba kubama mu kengerela luzingu lweto na lwa bantu bakaka. (Lubambu 22:8) Wa matieleka, Nzambi zololo ti luzingu lwabâ ntalu kwe beto.

Mbo tala ti muntu ka wusiri’â na bweso bwa vuka ko?

 Bibila mbo disongelaka ti honda muntu, ni bu sa ti ntamana mbo kafwa, ka bwena bubote ko. Tifwani tia mutinu Sawule mbo tisingasaka musamu wo. Bu kaye nwana muzingu, walwala mputa ya yinene yaketi mu nata ku lufwa, mpe walomba kwe tisari tiandi kamubakisa mu fwa. (1 Samwele 31:3, 4) Tisari tia Sawule tiakala. Ha manima, muntu wakaka wayizi tâ ti ni yandi walungisa nsatu ya Sawule ya tihonda. Kâ bungungu kwa bweri. Davide, weri na mabanza ma Yehova mu musamu wutariri tsamuna menga ma muntu peleko honda, wazengela muntu wo lufwa mu musamu wu katâ.​—2 Samwele 1:​6-​16.

Ngano bafweti sa miamiansoni mu kwe yiki bilumbu bia muntu wulembolo na bweso bwa vuka?

 Bibila ka ditâka ko ti bafweti lalumuna luzingu lwa muntu ni bu sa ti lufwa lweka penepene. Mabanza ma Bibila ma delakana ma bâka. Lufwa nguria mbeni’eto yena. Mbo tufwaka mu bungu ti bantu ba masumu twena. (Bisi-Rome 5:12; 1 Bisi-Korente 15:26) Ni bu sa ti lufwa ka lutâka nsayi ko, ka tufweti’â tatinaka lo ko mu bungu ti Nzambi watukanisina ti mbo kavumbula bantu kwe ba fwa. (Za 6:39, 40) Muntu wubongelaka luzingu ntiana tima tia ntalu mbo kadingaka lubakusu lwa badoktere ba babote. Kâ, ka wuta zolo tâ ko ti muntu wufweti tambula mpila za bukila zidingaka mu yika lalumuna luzingu lwa muntu wu bazebi ti mbo wufwa kwa.

Ngano muntu wamana tihonda, disumu di balembo lemvokelaka kayirikiri?

 Kâni, Bibila ka ditâka ko ti muntu wamana tihonda ka balendi’â bamulemvokela ko. Wa matieleka tihonda disumu dia dinene diena b, kâ Nzambi mbo kazabaka misamu milendi sa ti muntu wabâ na mabanza ma tihonda; ntiana malari ma mutu, lwaka lwa yôka peleko timbevo tia kanda tilendi nata ku mabanza ma tihonda. (Mikunga 103:13, 14) Mu nzila ya Zu diandi, Nzambi mbo katindisaka bô bê mu tiari. Bibila mbo ditâka ti “mvumbukulu ye kô ya bantu ba sungama, na ya bantu balembolo ba sungama.” (Bisalu 24:15) Wuzololo tâ tivuvu tie kô mu bungu dia bantu bayirika masumu ma manene ntiana bô batihonda.