Bibila misamu na ndiatulu dizonzelaka biaketi moneka mu “nsuka ya tinsamu tia nza ya [bwawu bu],” peleko “nsuka ya nza.” (Matie 24:3; King James Version) Ntangu yo mu Bibila, “bilumbu bia mansukina” na “ntangu ya nsuka” peleko “ntangu za mansukina” batâka yo—2 Timote 3:1; Daniele 8:19; Easy-to-Read Version.

 Bibila diazonzela bima biabingi biaketi bâ “tidimbu” tiaketi zabikisa bilumbu bia mansukina. (Like 21:7) Taluzula bifwani:

 Muzingu mu nza yayansoni. Yezu watâ: “Makanda mbo manwana mpe bimfumu mbo binwana.” (Matie 24:7) Mpila mosi mpe, Nzabukusu 6:4 yabikula tifwani tia tinati tia balu timonekesaka muzingu wukatula tidzunu ha mutoto.”

 Nsatu za ngolo. Yezu watâ: “Mbo ku bâ nsatu [za ngolo].” (Matie 24:7) Mukanda wa Nzabukusu wabikula bifwani biakaka bia binati bia mabalu, biaketi nata nsatu mu mbuka za mpila na mpila.—Nzabukusu 6:5, 6.

 Midikutulu mia mutoto mia minene. Yezu watâ ti mbo kwaketi bâ “midikutulu mia mutoto mu mbuka za mpila na mpila.” (Matie 24:7; Like 21:11) Midikutulu mio mia mutoto mia minene mbo miaketi tulumuna mpasi na lufwa lwa bantu mu mpila yi mialembo toko kwabêla.

 Timbevo. Mu mabanza ma Yezu, mbo kwaketi bâ bimbevo, peleko epidemi za “bimbevo bia ngolo.”—Like 21:11, Contemporary English Version.

 Bumpumbulu. Ni bu sa ti tûka nkama za mvula bantu basarilaka bumpumbulu, Yezu watâ ti mu bilumbu bia mansukina, mbo kwa keti bâ “bumpumbulu bwa yôka.”—Matie 24:12.

 Mbeba ya mutoto. Nzabukusu 11:18 yabikula ti bantu mbo baketi “bebesa mutoto.” Bawu, mbo baketi bwa sila mu mpila zazingi, ka mu miangu’â ko kwa na bumbaki, kâ mpe mu mpila yi baketi bebesela mamba, mwela na mutoto.

 Mbeba ya ndiatulu. Mu 2 Timote 3:1-4, Bibila diatâ ti bantu babîngi mbo baketi kondo ‘tifu tia vutulaka matondo, ka [baketi’â ba] ba kwikama ko, [. . .] Mbo baketi kondo tiwisa, mbo baketi hunisina bantu misamu, mbo baketi kondo tifu tia tiyimina, mbo baketi bâ na mutima ngolo, mbo baketi yina mbote, baketi teka bampwana’awu, mbo baketi bâ na tungu, mbo baketi bâ na lulendo lwalwingi, mbo baketi bâ ndiku za nsaka, kâ ka za Nzambi’â ko.” Bifu bio mbo biaketi bâ bia yôka ntiangu ntangu yo baketi tomo ya tâ “ntangu za mpasi mu vivirila

 Nzingula mu makanda. Mu 2 Timote 3:2, 3, Bibila diatâ ti bantu babingi baketi kondo “luzolo” mu bungu dia kanda diawu mpe bala mbo baketi bâ na “bukolo kwe bibuti biawu.”

 Kondo kwa luzolo mu Nzambi. Yezu wabikula: “Luzolo lwa bantu babîngi mbo lukota tiozi.” (Matie 24:12) Yezu wazolo tâ ti bantu ka baketi’â vutu tomo zolo Nzambi ko. Mpila mosi, 2 Timote 3:4 yitêle ti mu bilumbu bia mansukina, bantu bô mbo baketi bâ “ndiku za nsaka, kâ ka za Nzambi’â ko.”

 Bungungu mu mabundu. Mu 2 Timote 3:5, Bibila diabikula ti bantu mbo baketi songela ti Nzambi basarilaka, kâ ka baketi’â landa mitieno miandi ko.

 Ngwilu ya mbote ya mbikululu za Bibila. Mukanda wa Daniele watâ ti mu “mu ntangu ya mansukina,” babingi baketi kurisa luzabu lwawu lwa matieleka ma Bibila, na ngwilu ya mbote ya mbikululu zo.—Daniele 12:4, note.

 Tisalu tia samuna mu nza yayansoni. Yezu watâ: “Nsangu za mbote za Timfumu, mbo basamuna zo ha mutoto wawansoni.”—Matie 24:14.

 Kondo kwa manzangu na buzoba. Yezu watâ ti bantu babîngi ka baketi’â tambula bidimbu bia nsuka ya nza ko. (Matie 24:37-39) Ntiangu, 2 Piere 3:3, 4 yatâ ti bantu bakaka mbo baketi sehesela bidimbu, mbo baketi tomo bia kala.

 Ndungananu ya mbikululu zazansoni. Yezu wabikula ti mu bilumbu bia mansukina mbo kwaketi bâ ndungananu ya mbikululu zo zazansoni, ka zakaka ko kwa.—Matie 24:33.

 Yee. Misamu mia mu nza na ntangu yi bazonzelaka mu Bibila bisongele ti bilumbu bia mansukina mu 1914 biabtika, muvu wa batika Muzingu wa Nza wa Ntete. Mu mona bwe misamu mia nza mita songela ti mu bilumbu bia mansukina twena, tala video yita landa:

 Mu 1914, Timfumu tia Nzambi tiabatika mu yâla ku zulu, mpe musamu wa ntete wu tiayirika ni mu kuma Satana na demo zandi ku zulu; mpe tiabafilangasa ha mutoto. (Nzabukusu 12:7-12) Lutumu lwa Satana mu bantu balendi lwa mona mu bifu biawu na ndiatulu zawu, bisaka ti bilumbu bia mansukina biabâ “mpasi mu vivirila.”—2 Timote 3:1.

 Babantu babingi bata fwema mu bungu dia ntangu zo za mpasi. Bunkuta bwe nawu bwa mona ti bantu bawu beni batifukisa. Bakaka mpe bunkuta bwe nawu bwa mona bantu bahondasana bawu na bawu mu bilumbu bita kwiza.

 Mu ntangu yo, bakaka bata fwema mu bungu dia misamu mia nza, tivuvu tie nawu. Lukwikulu lwe nawu ti Timfumu tia Nzambi mbo tikubika misamu mu kamanisa misamu mia nza. (Daniele 2:44; Nzabukusu 21:3, 4) Bawu, na luvivululu bakêlaka ngatu Nzambi kalungisa makani mandi, mpe lutindusu babakaka mu misamu mia tâ Yezu: “Wô korela tii ku nsuka, mbo kavuka.”—Matie 24:13; Mika 7:7.