Kâni, mutoto’eto ka bamwangasa wo ko, ka wuya ko mpe mu tiya, mpe ka bayingasa wo ko. Bibila ditâka ti Nzambi wasala mutoto ngatu bantu babêla wo ntangu zazansoni.

•   “Bantu ba sungama mbo babiarila mutoto, mpe mbo bazinga mankululu ha zulu mutoto.”​—Mikunga 37:29.

•   “[Nzambi] wasikamasa mutoto ha mabandu mandi; kani kabwe ka wukatuka ko ha tibuka tiandi.”​—Mikunga 104:5.

•   “Mutoto mankululu wuzingaka.”​—Ekleziaste 1:4.

•   “Yandi wakubika mutoto, Yandi wasala wo mpe watomo wasikamasa, [. . .] mpamba ko kasala wo, kâ wakubika wo ngatu babêla wo.”​—Izaya 45:18.

 Nzambi ka bika ko ti bantu babebesa mutoto mu titembo tia mbi, mu mizingu, na mu mpila zakaka. Kâ, mbo “kafukisa bô bata bebesa mutoto-nsi.” (Nzabukusu 11:18, Bîbila kia kintuâri) Bwe kalungisila wo?

 Nzambi mbo kayingasa guvernema za bantu, zalembane mu kengerela mutoto, mu Timfumu tia mazulu. (Daniele 2:​44; Matie 6:​9, 10) Ni Yezu Kristo, Mwana wa Nzambi twarisa Timfumu tiango. (Izaya 9:​6, 7) Bu kabâ ha mutoto, Yezu wasarila ngolo zandi mu sa bimangu, bu kalembeka bitembo bia ngolo. (Marke 4:​35-​41) Bu ke Mfumu ya Timfumu tia Nzambi, mbo kazabirila mutoto na bitembo bia ngolo. Mbo kasa ti misamu ha mutoto miabâ ntiana bu mia toko bâ ku nsaba ya Edene.​—Matie 19:28; Like 23:43.

 Kâni, Bibila ka ditâka bo ko. Mabanza mo ma bungungu mabutukaka mu bungu ti 2 Piere 3:7, balembo tomo bakulaka, yitâka ti: “Zulu na mutoto wa bwawu bu, balundiri bio mu bungu dia tiya .” Tataluzuleno misamu miole mia mfunu mitubakisa mu bakula nzonzolo yo:

1.   Ntangu zakaka Bibila ntêlo ya “zulu,” “mutoto,” na “tiya” disarilaka mu zonzela bima biabingi. Mu tifwani, Mbatukulu 11:1 yitêle: “Mutoto wawansoni zu dimosi kwa dieri zonzaka.” Mu verse yi , “mutoto” bantu wuta zonzela.

2.   Verse zita zungirila 2 Piere 3:7 zitubakisi mu bakula ti zulu, mutoto na tiya bata zonzela mu verse yi. Verse 5 na 6 zisiri tintwari na tilumbu tia Noa. Nza ya ntama mu delize yafukila, kâ mutoto ka wazimbakana ko. Kâ, delize bantu ba mbi ba mu ntangu yina yafukisa, peleko “mutoto.” (Mbatukulu 6:​11) Yafukisa mpe “zulu”​—mpila mosi bô beri tumaka mu ntangu yina. Buna bankwa mbi bahonda, ka mutoto’â ko. Noa na kanda diandi bavuka mu mfukulu yo, mpe batatamana mu bâ ha mutoto ha manima ma delize.​—Mbatukulu 8:​15-​18.

 Delize yafukisa bantu. Mpila mosi mpe “tiya,” peleko mfukulu ya mu 2 Piere 3:7 mbo tuzimbakasa nza ya mbi, ka mutoto’â ko. Nzambi kanisini “zulu dia môna na mutoto wa môna” kubâ “buderede.” (2 Piere 3:​13) “Zulu dia môna,” peleko timfumu tia môna​—wuzololo tâ Timfumu tia Nzambi mbo tiyâla “mutoto wa môna,” peleko bantu ba môna. Mu lutumu lwa Timfumu tio, mutoto mbo wukwizi bâ paradi kubâ tidzunu.​—Nzabukusu 21:​1-4.